Star Chat

You Are Here: Home / Archives / Category / Star Chat

Experience taught me acting
അന്ന ബെൻ / മരിയ റാൻസം

Categories:

കുമ്പളങ്ങി നൈറ്റ്‌സ് എന്ന ചിത്രത്തിലൂടെ മലയാളിയുടെ മനം കവർന്ന യുവതാരമാണ് അന്ന ബെൻ. ഹെലനിൽ അന്നയുടെ കഥാപാത്രം ഏറെ സ്വീകരിക്കപ്പെട്ടു. കപ്പേള എന്ന ചിത്രത്തിലെത്തുമ്പോൾ പക്വതയുള്ള നായികയായി മാറുന്നു അന്ന. കുമ്പളങ്ങി നൈറ്റ്‌സിലെ ബേബി മോൾ, ഹെലനിലെ ഹെലൻ പോൾ, കപ്പേളയിലെ ജെസി എന്നീ മൂന്നു കഥാപാത്രങ്ങളും വ്യത്യസ്തമാണ്. അന്നയുടെ അഭിനയമികവും ഈ കഥാപാത്രങ്ങളിലൂടെ തിരിച്ചറിയാനാകും.
അന്ന ബെൻ ഞാൻ മലയാളിക്ക് അനുവദിച്ച പ്രത്യേക അഭിമുഖം.

  • തിരക്കഥാകൃത്ത് ബെന്നി പി. നായരമ്പലത്തിന്റെ മകൾ വളർന്നത് കഥകൾ കേട്ടും കഥാപാത്രങ്ങൾ വെള്ളിത്തിരയിൽ ജീവൻ വയ്ക്കുന്നതു കണ്ടുമാണ്. കുടുംബ പശ്ചാത്തലം കരിയറിനു സഹായകമായോ

ശരിയാണ്, പപ്പ പറഞ്ഞ കഥകൾ കേട്ടു വളർന്ന കുട്ടിയാണ് ഞാൻ. കുഞ്ഞുനാൾ മുതൽ സിനിമയുടെ/കഥയുടെ ലോകത്താണ്. കഥ കേൾക്കുന്നത് ഇഷ്ടമുള്ള കാര്യമാണ്. കഥകളുടെ കേൾവി, സിനിമകളുടെ തെരഞ്ഞെടുപ്പുകൾക്കും അഭിനയത്തിനും എനിക്ക് ഏറെ സഹായകമായിട്ടുമുണ്ട്. കാരണം, പപ്പയുടെ കഥകൾ കേൾക്കുമ്പോഴാണെങ്കിലും, മറ്റു തിരക്കഥാകൃത്തുക്കൾ കഥ പറയുന്ന അവസരങ്ങളിലും, ഡയറക്ടർ അഭിനയത്തിന്റെ സന്ദർഭങ്ങൾ വിവരിച്ചു തരുമ്പോഴുമെല്ലാം ഞാൻ അതു കേൾക്കുന്നതു പ്രേക്ഷകയായി മാത്രമാണ്. അപ്പോൾ മാത്രമേ കൃത്യമായ വിധി നിർണയത്തിനുള്ള സാധ്യത നമുക്കു ലഭിക്കൂ. സിനിമ എന്ന കലാരൂപത്തിന്റെ പ്രത്യേകതയും ഇതാണ്. പ്രേക്ഷകനിലേക്ക് ഒരു കഥാപാത്രമെത്തുമ്പോൾ അവർ എപ്രകാരം ആയിരിക്കും അതിനെ സ്വീകരിക്കുക എന്ന് അറിഞ്ഞാൽ മാത്രമേ ഈ സിനിമ ചെയ്യണമോ വേണ്ടയോ എന്ന തെരഞ്ഞെടുപ്പു സാധ്യമാകൂ. കൂടാതെ, കഥയുടെ പുതുമയും ഗുണദോഷങ്ങളും മനസിലാക്കാനും സാധിക്കൂ. കഥാപാത്രത്തെ ഉൾക്കൊള്ളാൻ എനിക്ക് ആകുമോ എന്നറിയണമെങ്കിലും പ്രേക്ഷക മനസ് ഉൾക്കൊണ്ടുള്ള കഥ കേൾക്കൽ ആവശ്യമാണ്. തിരക്കഥാകൃത്തും സംവിധായകനും ഓരോ കഥാപാത്രത്തിനും ഒരു ജീവൻ നൽകുന്നുണ്ട്. എന്നാൽ, ആ കഥാപാത്രം നമ്മുടേതാവുമ്പോൾ കുറച്ചു മാറ്റങ്ങൾ സ്വാഭാവികമായും സംഭവിക്കും. ചിലപ്പോഴത് എഴുതിയിരിക്കുന്ന കാര്യങ്ങളിൽ നിന്ന് ഒരുപടി മുന്നിലാവും മറ്റു ചിലപ്പോൾ തിരക്കഥാകൃത്ത് രൂപപ്പെടുത്തിയിരിക്കുന്നതിൽ നിന്നു ചെറിയ വ്യത്യാസങ്ങൾ കഥാപാത്രങ്ങൾക്കു വരാം. നമ്മുടെതായ ഒരു കാഴ്ചപ്പാടും സംഭാവനയും കൂടി ചേരുമ്പോഴാണ് ഇതു സംഭവിക്കുന്നത്. കഥാപാത്രത്തിന്റെ പൂർണതയ്ക്ക് ആവശ്യമാണത്. അപ്പോൾ മാത്രമാണ് ഒരു കഥാപാത്രം പൂർണമായി ജീവൻ വയ്ക്കുന്നതെന്നു പറയാം.

  • ആത്മവിശ്വാസമുള്ള നായികാ കഥാപാത്രങ്ങൾ

ഇന്നത്തെ തലമുറയുടെ പ്രത്യേകതയായിരിക്കാം അത്. ആത്മവിശ്വാസത്തിന്റെ കാര്യത്തിൽ, ഞാൻ ഇഷ്ടപ്പെടുന്ന കുറേ താരങ്ങൾ ഇതുപോലെ എന്നെയും പ്രചോദിപ്പിച്ചിട്ടുണ്ട്. എന്നെക്കൊണ്ട് എന്തൊക്കെ ചെയ്യാനാകും, എന്താണ് എന്റെ കഴിവ് എന്നൊക്കെ തിരിച്ചറിയാൻ എനിക്കു കഴിയാറുണ്ട്. എന്നാൽ, അതിലുപരിയായി സമ്മർദ്ദം അനുഭപ്പെടുന്ന ഒരു സാഹചര്യം വന്നാൽ എന്റെ ചുറ്റുമുള്ളവരാണ് പപ്പ, അമ്മ, അനിയത്തി, എന്റെ അടുത്ത ഫ്രണ്ട്‌സും കസിൻസും എനിക്കു സഹായമാകുന്നത്. എന്നാൽ, പുറമേ നിന്നല്ല, നമുക്കുള്ളിൽ നിന്നാണ് ആത്മധൈര്യം കൈവരിക്കേണ്ടത് എന്നാണ് എന്റെ വിശ്വാസം. ആത്മാർത്ഥമായി എന്റെ നന്മ ആഗ്രഹിക്കുന്നവർ എന്റെ ചുറ്റും ഉണ്ട് എന്ന ബോധ്യമാണു സത്യത്തിൽ എന്റെ ആത്മവിശ്വാസം.

  • കോവിഡ്, സിനിമ, ഒ.ടി.ടി റിലീസ്

കൊറോണ എന്ന പ്രശ്‌നം എല്ലാ മേഖലയെയും എന്നതുപോലെ സിനിമയെയും ബാധിച്ചു കഴിഞ്ഞു. എല്ലാ പ്രതിസന്ധി ഘട്ടത്തിലും മനുഷ്യർ ആദ്യം ഒഴിവാക്കുന്നത് വിനോദ കലാ മേഖലകൾ ആയിരിക്കുമല്ലോ. അതിന്റേതായ ബുദ്ധിമുട്ടുകൾ നന്നായിട്ടുണ്ട്. മറ്റെല്ലാ പ്രശ്‌നങ്ങളെയും അതിജീവിക്കുന്നതു പോലെ ഈ രംഗത്തും അതിജീവനത്തിനുള്ള പരിശ്രമങ്ങൾ നടക്കുന്നുണ്ട്. ഗവൺമെന്റ് നടപ്പാക്കിയ എല്ലാ നിയമങ്ങളും പാലിച്ച് ചെറിയ ഷൂട്ടുകളൊക്കെ പുനരാരംഭിച്ചു തുടങ്ങി. ഈയൊരു കാലയളവ് നല്ലൊരു നാളെക്കായുള്ള ഒരുക്കത്തിന്റേതാവണം.

കപ്പേള റിലീസ് ചെയ്ത് ഒന്നര ആഴ്ചയ്ക്കുള്ളിൽ തിയേറ്ററുകളെല്ലാം അടച്ചു. ആദ്യം വിഷമമായി. പക്ഷേ, നമ്മുടെ മുന്നിൽ മറ്റു വഴികളൊന്നും ഇല്ലല്ലോ. രണ്ടാമത് ഒ.ടി.ടി പ്ലാറ്റ്‌ഫോമിൽ റിലീസ് എന്നത് തിയേറ്ററിൽ First day@ First Show അനുഭവമായിരുന്നു എനിക്ക്. ഒരുപാട് ഫോൺ കോളുകളും മെസേജുകളും വന്നു. നല്ല പ്രതികരണങ്ങളും കുറേ കുറേലേഖനങ്ങളുമൊക്കെ ഉണ്ടായിരുന്നു. ഇത്രയും നല്ല പ്രതികരണങ്ങൾ കിട്ടിയതിനാൽ ഞങ്ങളുടെ ടീമും വലിയ സന്തോഷത്തിലായിരുന്നു

  • തട്ടിപ്പു സംഘങ്ങളും സിനിമയും

പ്രലോഭനങ്ങളിൽപ്പെടുത്തി സാമ്പത്തിക തട്ടിപ്പു നടത്തുന്ന സംഘങ്ങൾ മറയായി സിനിമയെ ഉപയോഗിക്കുന്ന വാർത്തകൾ വീണ്ടും കേൾക്കുന്നു. എല്ലാ തൊഴിൽ മേഖലയിലുമുള്ള ചതിക്കുഴികൾ എന്നതിനപ്പുറം സിനിമയിൽ ഇത്തരം സാധ്യതകൾ കൂടുതലുണ്ടോ എന്നറിയില്ല. അടുത്തിടെ നടന്ന തട്ടിപ്പിനെക്കുറിച്ചുള്ള വാർത്തകൾ വരുന്നത് സിനിമാ മേഖലയെ മുഴുവനും ബാധിക്കുന്ന തരത്തിലാണ്.

subscribe

മായമില്ലാതെ മണികണ്ഠൻ
മണികണ്ഠൻ / പി.ടി. ബിനു

Categories:

മീശമാധവൻ സിനിമയിലെ ” കൃഷ്ണവിലാസം ഭഗീരഥൻ പിള്ള വലിയ വെടി നാല് ചെറിയ വെടി നാല് ” എന്ന ഡയലോഗ് ഇന്നും പ്രേക്ഷകർ മറന്നിട്ടില്ല. സിനിമ റിലീസ് ചെയ്ത് വർഷങ്ങൾ കഴിഞ്ഞിട്ടും മീശമാധവനിൽ മണികണ്ഠൻ പറഞ്ഞ ഡയലോഗ് ഇന്നും പ്രേക്ഷകരെ ചിരിപ്പിക്കുന്നു. സോഷ്യൽ മീഡിയ പ്ലാറ്റ്‌ഫോമുകളിൽ മീശമാധവനിലെ കോമഡി രംഗങ്ങൾ പ്രേക്ഷകരെ ചിരിപ്പിച്ചുകൊണ്ടിരിക്കുന്നു. നാടകത്തിന്റെ പിൻബലവുമായി സിനിമയിലും ടെലിവിഷനിലും സജീവമായ മണികണ്ഠന്റെ അഭിനയജീവിതം ആരംഭിക്കുന്നത് പട്ടാമ്പിയിലെ സ്‌കൂൾ കാലഘട്ടം മുതലാണ്. സ്‌കൂൾ ഓഫ് ഡ്രാമയിൽ നാടക പഠനത്തിനു ചേർന്ന മണികണ്ഠന്റെ അഭിനയജീവിതം അവിടെ ആരംഭിക്കുകയായിരുന്നു. ശ്രദ്ധേയമായ നിരവധി നാടകങ്ങൾ ചെയ്തു. സുഹൃത്തുക്കൾപ്പൊപ്പം ചെയ്ത ആദ്യ സിനിമ മൺകോലങ്ങൾ നിരവധി അവാർഡുകൾ കരസ്ഥമാക്കി. തുടർന്ന്, ചലച്ചിത്ര രംഗത്തും ടെലിവിഷൻ രംഗത്തും സജീവമായി. എൺപതോളം സിനിമകളിൽ അഭിനയിച്ചു. സാമൂഹ്യവിമർശനം അടിസ്ഥാനമാക്കി മഴവിൽ മനോരമയിൽ അവതരിപ്പിക്കുന്ന മറിമായം പരമ്പരയിലെ കേന്ദ്രകഥാപാത്രം മണികണ്ഠൻ അവതരിപ്പിക്കുന്ന സത്യശീലൻ ആണ്. പച്ചയായ ജീവിതത്തിന്റെ കലർപ്പില്ലാത്ത ഹാസ്യത്തിലൂടെ പ്രേക്ഷകരെ ചിരിപ്പിക്കുകയും ചിന്തിപ്പിക്കുകയും ചെയ്യുന്നു മണികണ്ഠൻ.

  • മീശമാധവനും ” വലിയ വെടി നാല് ചെറിയ വെടി നാല് ” എന്ന ഡയലോഗും

മീശമാധവൻ റിലീസ് ആയിട്ട് 18 വർഷം കഴിയുന്നു. കാലം പോകുന്നത് അറിയുന്നേയില്ല. സിനിമ തിയേറ്ററിൽ ഓടിക്കൊണ്ടിരുന്നപ്പോഴും ടി.വിയിൽ സംപ്രേക്ഷണം ചെയ്യുമ്പോഴും സോഷ്യൽ മീഡിയയിലൂടെ കാര്യങ്ങൾ പൊടിപൊടിക്കുന്ന വർത്തമാനകാലത്തും മീശമാധവൻ സിനിമയിലെ രസകരമായ സീനുകൾ ആളുകൾ ആസ്വദിക്കുന്നു എന്നതു വലിയ സന്തോഷമുള്ള കാര്യമാണ്. എന്റെ രണ്ടാമത്തെ സിനിമയാണത്. ഞാനെഴുതുകയും പ്രധാന വേഷത്തിൽ അഭിനയിക്കുകയും ചെയ്ത ‘മൺകോലങ്ങൾ’ ആണ് ആദ്യ സിനിമ. അധികം പണം മുടക്കാനില്ലാത്ത സിനിമാപ്രേമികളായ ആളുകൾക്ക് 16 എം.എം ഫിലിമിൽ ഷൂട്ട് ചെയ്ത് 35 എം.എം-ലേക്ക് കൺവർട്ട് ചെയ്ത് തിയേറ്ററിൽ വലിയ സിനിമ പോലെ കാണിക്കാനുള്ള സംവിധാനമുണ്ടായിരുന്നു വർഷങ്ങൾക്കു മുമ്പ്. അങ്ങനെയാണ് മൺകോലങ്ങൾ ചെയ്തത്. സുബ്രമഹ്ണ്യൻ ശാന്തകുമാർ, വിജു വർമ, പ്രവീൺ പണിക്കർ എന്നിവരായിരുന്നു പ്രധാനമായും ആ ചിത്രത്തിനു പിന്നിലുണ്ടായിരുന്നത്. സംവിധായകന് സംസ്ഥാന അവാർഡ്, ഐ.എഫ്.എഫ്.കെ ഫിപ്രസി അവാർഡ് എന്നിവ ലഭിച്ചു. കൂടാതെ, നിരവധി ഇന്റർനാഷണൽ ഫെസ്റ്റിവലുകളിൽ ചിത്രം പ്രദർശിപ്പിക്കുകയും അംഗീകാരങ്ങൾ കരസ്ഥമാക്കുകയും ചെയ്തു. ഈ സിനിമയുടെ ബലത്തിലാണ് എഡിറ്റർ രഞ്ജൻ എബ്രഹാം വഴി സംവിധായകൻ ലാൽജോസിനെ പരിചയപ്പെടുന്നത്. ഞാൻ ഇന്നും അഭിനയിച്ചു ജീവിക്കുന്നതിനു കാരണക്കാരായ ഈ രണ്ടു പേരോടും ഞാൻ എന്നും കടപ്പെട്ടിരിക്കുന്നു.

സമാന്തര സിനിമയുടെ പാതയിലൂടെ പോയിരുന്ന ഒരാൾ വാണിജ്യ സിനിമയുടെ ചിട്ടവട്ടങ്ങൾ കൂടി കണ്ടു പഠിക്കട്ടെ എന്നേ അദ്ദേഹം വിചാരിച്ചിരുന്നുള്ളൂ. ഞാൻ കൂടെ മലയാള സിനിമയിലേക്കു വന്നതുകൊണ്ട് മലയാള സിനിമയ്ക്കു പറയത്തക്ക ദോഷങ്ങൾ സംഭവിക്കാൻ സാധ്യതയില്ല എന്ന അദ്ദേഹത്തിന്റെ തിരിച്ചറിവാണ് എനിക്കു തുണയായത്. അന്നദ്ദേഹം പരിഗണിക്കാതെ വിട്ടിരുന്നെങ്കിൽ ഞാൻ മറ്റിടങ്ങളിൽ പോയി ചാൻസ് ചോദിക്കുകയോ, ഭാവിയിൽ നടനാകുകയോ ചെയ്യില്ലായിരുന്നു. കാര്യമായ വേഷങ്ങളൊന്നും അദ്ദേഹത്തിന്റെ സിനിമയിൽ ചെയ്യാൻ സാധിച്ചില്ലെങ്കിലും ഞാൻ സന്തോഷവാനാണ്. പറ്റുന്ന സിനിമകളിൽ പറ്റുന്ന പോലെ സഹകരിപ്പിച്ചിട്ടുണ്ട്. മീശമാധവനിലെ ഒരു സീനിനെക്കുറിച്ച് ചോദിക്കുമ്പോൾ ലാൽ ജോസിനെയോർക്കാതെ സീനിനെപ്പറ്റി പറയുന്നതു ശരിയല്ലല്ലോ.

ചെയ്ത കഥാപാത്രത്തിന്റെ പേരിൽ അല്ലെങ്കിൽ ഏതെങ്കിലും ഡയലോഗിന്റെ പേരിൽ ഒരു നടൻ പ്രേക്ഷകമനസിൽ കാലങ്ങളോളം നിലനിൽക്കുന്നുവെന്നതു വലിയ ഭാഗ്യമാണ്. ആ ഷോട്ട് ചിത്രീകരിക്കുന്ന സമയത്ത് റിഹേഴ്‌സലിന് കവിളിൽ ചൊറിയുന്ന ആംഗ്യം ഞാൻ ചെയ്തില്ലായിരുന്നു. എന്നാൽ, ടേക്ക് സമയത്ത് ഞാൻ പോലുമറിയാതെ എന്റെ കൈ പൊങ്ങിവന്നു. പൊങ്ങിവന്ന കൈ പെട്ടെന്നു താഴ്ത്തുന്നതു ശരിയല്ലല്ലോ, പിന്നെ സന്ദർഭത്തിനനുയോജ്യമായ രീതിയിൽ ആ കൈ കൊണ്ടു ചെയ്യാവുന്നത്, കവിളിലൊന്നു ചൊറിയുകയാണ്. ഇതാണ് അന്നു സംഭവിച്ചത്. ഇതൊക്കെ നിമിഷങ്ങൾ കൊണ്ടു നടക്കുന്ന കാര്യങ്ങളാണ്. എങ്ങാനും പൊങ്ങിവന്ന കൈ കൊണ്ട് കവിൾ ചൊറിയാതെ ഞാൻ കൈ താഴ്ത്തിയിരുന്നെങ്കിൽ അന്നേ ചീട്ടു കീറുമായിരുന്നു. എന്നിട്ടും റിഹേഴ്‌സലിനു കാണിക്കാത്തത് എന്തിനു കാണിച്ചുവെന്ന് ക്യാമറമാൻ എസ്. കുമാർ സാർ വഴക്കു പറഞ്ഞു പരിഭ്രമിച്ചു. ഇയാളെന്തൊരു മനുഷ്യനാണെന്നു മനസിൽ ചിരിച്ചു. കാരണം അസ്ഥാനത്തു ചെയ്ത പോലെ ഒരാംഗ്യമായിരുന്നില്ല അത്, എന്ന് എനിക്കുറപ്പുതോന്നിയിരുന്നു. ഡയറക്ടർ ഓക്കെ പറഞ്ഞപ്പോൾ സെറ്റിൽ മാനം കിട്ടിയ പോലെ തോന്നി.

അഭിനയിക്കാൻ നിൽക്കുമ്പോൾ പലപ്പോഴും അങ്ങനെയാണ്. നമ്മൾ പോലുമറിയാതെ ഏതോ ബാഹ്യമായ ശക്തി നമ്മെ പലപ്പോഴും സപ്പോർട്ട് ചെയ്തുകൊണ്ടിരിക്കും. ഞാൻ എന്റെ കഴിവിൽ വിശ്വസിക്കുന്നതിനേക്കാൾ പുറമേ നിന്നുള്ള ഈ ബ്ലസിങ് കിട്ടാൻ സത്യസന്ധനായി നിലകൊള്ളനാണ് എപ്പോഴും മനസു കൊണ്ട് ആഗ്രഹിക്കുന്നത്.

  • ചിരിയും കരച്ചിലും

ആളുകളെ ചിരിപ്പിക്കുകയോ, കരയിപ്പിക്കുകയോ ചെയ്യുക എന്നതു പ്രയാസമുള്ള കാര്യമാണ് എന്നു ഞാൻ വിചാരിക്കുന്നില്ല. മാത്രമല്ല, അഭിനയം ഒരായാസമുള്ള, ഭാരമുള്ള ജോലിയാകാൻ പാടില്ല. സിനിമയോ, നാടകമോ കണ്ട് ഒരാൾ കരയുന്നതും ചിരിക്കുന്നതുമൊക്കെ, അയാൾ ജീവിച്ചുവന്ന ചുറ്റുപാടുകളെയും ജീവിത സാഹചര്യങ്ങളെയും, എത്രത്തോളം സഹൃദയത്വം അയാൾക്കുണ്ട് എന്നതിനെയുമൊക്കെ ആശ്രയിച്ചാണിരിക്കുന്നത്. ഒപ്പം നടനോ, നടിയോ ചെയ്യുന്ന കഥാപാത്രം എത്രത്തോളം വിശ്വസനീയമാണ് എന്നതും പ്രധാനമാണ്. നൂറു ശതമാനത്തോളം കഥാപാത്രമായി മാറുന്നുവെന്നു തന്റെ അഭിനയത്തിലൂടെ നടൻ തോന്നിപ്പിച്ചാൽ, സഹൃദയനായ സാധാരണ പ്രേക്ഷകനിൽ കരച്ചിലും ചിരിയും സ്വാഭാവികമായും ഒരുപോലെ ഉണ്ടായിവരും. നടൻ എന്തു ചെയ്യുന്നു, ഏതു സന്ദർഭത്തിലൂടെ കടന്നുപോകുന്നു, എത്രമാത്രം വിശ്വാസ്യത പ്രേക്ഷകനിൽ ജനിപ്പിക്കാൻ അയാൾക്കു സാധിക്കുന്നു എന്നതിനെയൊക്കെ ആശ്രയിച്ചാണ് ഈ പറയുന്ന വികാരങ്ങളൊക്കെ സംഭവിക്കുന്നത്. നടന്റെ സത്യസന്ധതയിൽ അയാളോടൊപ്പം സ്വയം വിശ്വസിച്ച് പ്രേക്ഷകൻ കൂടെ ചേരുകയാണു ചെയ്യുന്നത്. ഇങ്ങനെ പ്രേക്ഷകരെ തന്റെ ഒപ്പം നിർത്താൻ കഴിയുന്ന നടനു ചിരിയും കരച്ചിലും അവരിൽ നിറയ്ക്കാൻ ഒരു ബുദ്ധിമുട്ടും ഉണ്ടാകുന്നില്ല.

  • ചിരിയുടെ രസക്കൂട്ട്

ചിരിക്ക് പ്രത്യേകിച്ച് എന്തു രസക്കൂട്ട്..? രസകരമായ ചിരി ജനിപ്പിക്കുന്ന സന്ദർഭങ്ങൾ ഉണ്ടാവുക, അതു രസകരമായി അവതരിപ്പിക്കുക അതിലപ്പുറം ചിരിയുണ്ടാക്കാനുള്ള ഒന്നും നിലവിലില്ല എന്നാണ് എനിക്കു തോന്നുന്നത്. ചില സന്ദർഭങ്ങളിൽ വെറും നോട്ടങ്ങൾ ചിരി പടർത്തും. ചിലപ്പോൾ സംഭാഷണങ്ങൾ ആവാം. ഒന്നും ചെയ്യാനില്ലാത്ത അവസ്ഥ പോലും കാണികളിൽ ചിരി പടർത്താം. എല്ലാ ഹാസ്യവും അതു സംഭവിക്കുന്ന സന്ദർഭങ്ങളുമായി എത്രമാത്രം ചേർന്നുനിൽക്കുന്നു എന്നതിനെ ആശ്രയിച്ചു ചിരി വലിതോ, ചെറുതോ ആകാം.

ഇല്ലാത്ത കട്ട നുണകൾ ഉണ്ടെന്നു സമർത്ഥിക്കാനാണ് നടൻ ശ്രമിക്കുന്നത്. എന്ന് അയാൾക്കും പ്രേക്ഷകനുമറിയാം. എന്നിട്ടും പ്രേക്ഷകൻ അയാളെ വിശ്വസിക്കുന്നതെങ്ങനെയെന്നു ചിന്തിച്ചിട്ടുണ്ടോ? കള്ളത്തരമില്ലാത്ത, സത്യസന്ധമായ, നിഷ്‌കളങ്കമായ, സരസനായ മനുഷ്യനോടു നമുക്ക് ഇഷ്ടം തോന്നുക സ്വാഭാവികം. അത്രയേയുള്ളൂ. അയാൾ തമാശ പറയുമ്പോൾ നമ്മൾ ചിരിക്കുക, അയാൾക്കു വിഷമം വരുമ്പോൾ നമുക്കു സങ്കടം വരും. ആളുകളെ ചിരിപ്പിക്കാൻ ഗിമ്മിക്കുകളില്ല.

  • മറിമായം

മറിമായത്തിന്റെ ആരംഭം 2011 അവസാന മാസങ്ങളിലാണ്. ഒൻപതു വർഷമായി തുടരുന്നു. ആർ. ഉണ്ണികൃഷ്ണന്റെ സംവിധാനത്തിൽ മഴവിൽ മനോരമയിൽ തുടങ്ങിയ ഈ പ്രോഗ്രാം വർഷങ്ങളായുള്ള അതിന്റെ യാത്രയിൽ സ്വതസിദ്ധമായ ഒരു അവതരണരീതിയിലേക്കു വളരുകയും അതു സ്വീകരിക്കപ്പെടുകയും ചെയ്തു. ഇന്ന് മറിമായത്തിന് അതിന്റേതായ അസ്ഥിത്വമുണ്ട്, നിലപാടുകളുണ്ട്. മറിമായം ഒരു കോമഡി പരിപാടി എന്ന നിലയിലാണു പലരും കാണുന്നത്. എന്നാൽ, അതൊരു കോമഡി ഷോ മാത്രമല്ല. തികച്ചും കാലികമായ വിഷയങ്ങൾ ആക്ഷേപഹാസ്യരൂപേണ അവതരിപ്പിക്കാൻ ഉപയോഗിക്കുന്ന ഒരു വലിയ ടെലിവിഷൻ പ്ലാറ്റ്‌ഫോം ആണ് എന്നെ സംബന്ധിച്ചിടത്തോളം മറിമായം. തുടക്കം മുതലുള്ള എപ്പിസോഡിൽ ഉണ്ട്. ഈ കാലത്തിന്നിടയിൽ ഒന്നോ, രണ്ടോ എപ്പിസോഡിൽ മാത്രമാണ് അഭിനയിക്കാൻ കഴിയാതെ പോയത്. മറ്റെന്തൊക്കെ പ്രയാസങ്ങളുണ്ടെങ്കിലും അതെല്ലാം ഒഴിവാക്കി മറിമായത്തിനു വേണ്ടി പ്രത്യേകം ദിവസങ്ങൾ മാറ്റിവയ്ക്കുന്നതു ശീലമായിരിക്കുന്നു. ഞാൻ സ്‌നേഹത്തോടെ ഓർക്കാൻ ഇഷ്ടപ്പെടുന്ന ഒരാളാണ് അതിന്റെ സംവിധായകൻ ആർ. ഉണ്ണികൃഷ്ണൻ.

subscribe

Manju Warrier – Queen of Grace
മഞ്ജു വാര്യർ / രോഹിണി ആർ

Categories:

മലയാളികളുടെ മനസിലെ നായികാസങ്കൽപ്പത്തിന്റെ പൂർണതയാണ് മഞ്ജു വാര്യർ. കഥാപാത്രങ്ങളായി പകർന്നാടുമ്പോൾ അഭ്രപാളിയിൽ അന്നോളം കണ്ട സ്ത്രീസങ്കൽപ്പങ്ങളെ മാറ്റിയെഴുതുന്നു ആ അഭിനേത്രി. നൃത്തത്തിലും അഭിനയത്തിലും തന്റെ കയ്യൊപ്പു പതിപ്പിച്ച മഞ്ജു വാര്യരുടെ വിശേഷങ്ങൾ.

  • കഥാപാത്രങ്ങളുടെ കാര്യത്തിൽ സെലക്ടീവ്

ഞാൻ അഭിനയിക്കുന്ന സിനിമകളിൽ എന്റെ കഥാപാത്രങ്ങൾക്കു മാത്രമേ പ്രാധാന്യം ലഭിക്കാവൂ എന്ന രീതിയിലുള്ള നിബന്ധനകളൊന്നും ഇന്നേവരെ വച്ചുപുലർത്തിയിട്ടില്ല. അങ്ങനെയുള്ള കഥാപാത്രങ്ങളെ അന്വേഷിച്ചു പോയിട്ടുമില്ല. എന്നാൽ, അത്തരം കഥാപാത്രങ്ങൾ എന്നെ തേടിയെത്തിയതു യാദൃശ്ചികമായിട്ടാണ്. അതിന് ഞാൻ കടപ്പെട്ടിരിക്കുന്നത് അത്തരം കഥകൾ എഴുതിയവരോടും സംവിധായകരോടുമാണ്.
അഭിനയിക്കുന്ന സിനിമകൾ എല്ലാം നല്ലതായിരിക്കണം എന്നത് എന്റെ ആഗ്രഹമാണ്. അതേസമയം, ഞാൻ ഭാഗമാകുന്ന സിനിമകൾ മോശമായാൽ അതിൽ പ്രയാസപ്പെടുന്നതും ഞാൻ തന്നെയാണ്. ഞാൻ ജീവൻ പകർന്നിട്ടുള്ള കഥാപാത്രങ്ങൾ ഉൾക്കൊണ്ട ചെറുതും വലുതുമായ സിനിമകൾ വിജയിക്കുന്നതു മുൻജന്മസുകൃതമാകാം. ഒരുപാടു കഥകൾ എനിക്കു മുമ്പിൽ വരുന്നുണ്ടെങ്കിലും മനസിനു തൃപ്തി നൽകുന്നതു മാത്രമേ ഞാൻ ഇക്കാലം വരെ തെരഞ്ഞെടുത്തിട്ടുള്ളൂ. തുടർന്നും അങ്ങനെയൊക്കെ ആകണമെന്നാണ് എന്റെ ആഗ്രഹവും.

  • കഥാപാത്രങ്ങളും തയാറെടുപ്പുകളും

പൂർണമായും ഞാൻ സംവിധായകന്റൈ നടിയാണ്. സംവിധായകൻ പറയുന്നത് എന്താണോ, അതു ശ്രദ്ധിച്ചു കേട്ട്, അതിനുവേണ്ട പാകപ്പെടത്തലുകൾ മനസിൽ നടത്തും. എല്ലാ നടീനടന്മാരും അങ്ങനെയൊക്കെ ചെയ്യുന്നവരാണ്. എങ്കിൽ മാത്രമേ കഥാപാത്രവും സിനിമയും നന്നാകൂ. എന്നാൽ, കഥാപാത്രങ്ങൾക്കും കൃത്രിമമായ തയാറെടുപ്പുകളൊന്നും നടത്താറില്ല. അത്തരം മാനറിസങ്ങളൊക്കെ പഠിച്ചു ചെയ്യുന്നവരെക്കുറിച്ചു ധാരാളമായി കേട്ടിട്ടുണ്ട്. പക്ഷേ, അങ്ങനെയൊന്നും ഞാനിതു വരെ ചെയ്തിട്ടില്ല. ഇനി ചെയ്യാനും ആഗ്രഹമില്ല. ചെയ്താൽ ശരിയാകില്ല അല്ലെങ്കിൽ കൈയിലൊതുങ്ങില്ല എന്നുതോന്നുന്ന കഥാപാത്രങ്ങൾ എന്നെത്തേടി എത്തിയപ്പോൾ ഞാനതു വേണ്ടെന്നു വച്ചിട്ടുമുണ്ട്. ഇങ്ങനെയൊക്കെയാണ് എന്റെ രീതികൾ.

  • ഇംപ്രൂവ്‌മെന്റ് ആഗ്രഹിക്കാറുണ്ട്

ഇംപ്രവൈസേഷൻ ആണ് കഥാപാത്രങ്ങളുടെ വിജയം. സ്‌ക്രിപ്റ്റ് വായിക്കുമ്പോൾ തന്നെ കഥാപത്രം മനസിലേക്കെത്തും. അല്ലെങ്കിൽ ആ കഥാപാത്രമായി മാറാൻ കഴിയും. ചെയ്തു കഴിയുമ്പോൾ തോന്നും കുറച്ചുകൂടി നന്നാക്കാമായിരുന്നുവെന്ന്. സത്യം പറഞ്ഞാൽ, തുടക്കം മുതൽ ഞാനിതുവരെ ചെയ്ത കഥാപാത്രങ്ങളെല്ലാം ഇംപ്രൂവ് ചെയ്യണമെന്നു തോന്നിയിട്ടുണ്ട്. ഞാൻ ചെയ്തിട്ടുള്ള കഥാപാത്രങ്ങളെല്ലാം കണ്ടു വിലയിരുത്താൻ എപ്പോഴും കഴിയണമെന്നില്ല. സമയക്കുറവും ഷൂട്ടിങ് തിരക്കുകളെല്ലാം അതിനു കാരണമാകുന്നു. ലോഹിസാർ (ലോഹിതദാസ്) സ്‌ക്രിപ്റ്റ് എഴുതി സുന്ദർദാസ് സംവിധാനം ചെയ്ത സല്ലാപം, സത്യൻ അന്തിക്കാട് സംവിധാനം നിർവഹിച്ച തൂവൽകൊട്ടാരം, ലോഹിസാർ തന്നെ രചനയും സംവിധാനവും നിർവഹിച്ച കന്മദം എന്നീ സിനിമകളിലെ കഥാപാത്രങ്ങൾ ഇപ്പോഴും എന്നെ അലട്ടാറുണ്ട്. അതെല്ലാം എന്റെ കരിയറിലെ മികച്ച കഥാപാത്രങ്ങളാണ്. അഭിനേത്രി എന്ന നിലയിൽ വലിയ അനുഭവങ്ങളാണ് ആ സിനിമകൾ എനിക്കു നൽകിയത്.

subscribe

‘ ഞാൻ ഹാപ്പിയാണ്’
ചിപ്പി / രോഹിണി ആർ

Categories:

കൗമാരത്തിൽ സിനിമയിലെത്തി ചുരുക്കം നാളുകൾക്കൊണ്ട് പ്രേക്ഷകരുടെ പ്രിയങ്കരിയായി മാറിയ താരമാണ് ചിപ്പി. കേരളം കടന്ന് കന്നഡയുടെയും നായികയായി ഈ സുന്ദരി. നായിക എന്നതിലുപരി കുഞ്ഞനുജത്തിയായി സിനിമയിൽ സജീവമായി നിൽക്കുന്ന സമയത്തായിരുന്നു നിർമാതാവ് രഞ്ജിത്തുമായുള്ള പ്രണയവും വിവാഹവും. പിന്നീട് ഇടവേള. കുടുംബിനിയായ ചിപ്പിയുടെ തിരക്കുകൾ. രഞ്ജിത്തിനൊപ്പം സന്തുഷ്ട കുടുംബ ജീവിതം. ചിപ്പിയുടെ വിശേഷങ്ങൾ.

  • ഇടവേള

ഇടവേള എനിക്ക് ഫീൽ ചെയ്തിട്ടില്ല. ഞാൻ എവിടെയും പോയിട്ടില്ല. ഇവിടെത്തന്നെ ഉണ്ടായിരുന്നു. എന്നെ സംബന്ധിച്ചിടത്തോളം ഒരു സീരിയൽ ചെയ്തുകഴിഞ്ഞാൽ ഉടനെ മറ്റൊന്ന് കമ്മിറ്റ് ചെയ്യില്ല. അങ്ങനെ ചെയ്യുന്നവർ ഉണ്ടാകും. സീരിയലുകൾ എത്ര ചെയ്യുന്നുവെന്നല്ല. അഭിനയിക്കുന്നത് ഒരെണ്ണമായാൽപ്പോലും അതിന്റെ ഗുണമാണ് ഞാൻ നോക്കുന്നത്. പക്ഷേ, അങ്ങനെ ചെയ്താൽ കുടുംബകാര്യങ്ങൾ അവതാളത്തിലാകും. തിരുവനന്തപുരത്ത് ഷൂട്ടുള്ളതുകൊണ്ടാണ് ചില സീരിയലുകളിൽ അഭിനയിച്ചത്. എന്നെ സ്‌നേഹിക്കുന്ന പ്രേക്ഷകരുടെ മനസിൽ ഞാൻ ചെയ്യുന്ന കഥാപാത്രങ്ങൾ എപ്പോഴും തങ്ങിനിൽക്കണം.

  • അമ്മയുടെ അഭിനയവും മകളും

മകൾ നല്ല സപ്പോർട്ടാണ്. ഇഷ്ടമില്ലാത്തതു കണ്ടാൽ അവൾ തുറന്നുപറയും. ‘കല്യാണസൗഗന്ധികം’, ‘ദേവരാഗം’ തുടങ്ങി ഞാനഭിനയിച്ച സിനിമകൾ കണ്ടിട്ട് അവൾ എന്നെ ഒരുപാട് കളിയാക്കി. എന്റെ വേഷം, മേക്കപ്പ് തുടങ്ങി എല്ലാകാര്യങ്ങളും പറഞ്ഞവൾ കളിയാക്കും. പക്ഷേ ഇപ്പോൾ അങ്ങനെയൊന്നും പറയാറില്ല. ഒരുപക്ഷേ സീരിയലിലെ എന്റെ കഥാപാത്രം അവളെ ഒരുപാടുമാറ്റി. അതുകൊണ്ടല്ലേ. എന്റെ കഥാപാത്രത്തിന്റെ മരണം അവൾക്കു സഹിക്കാൻ പറ്റാതെ പോയത്. എങ്കിലും ചില സീനുകൾ കാണുമ്പോൾ അഭിനയം കുറച്ചുകൂടി നന്നാക്കാമായിരുന്നു, ഫീലിങ് കുറഞ്ഞുപോയി എന്നൊക്കെ അവൾ കമന്റ് പറഞ്ഞിട്ടുണ്ട്.

  • അവന്തികയെ ബിഗ്‌സ്‌ക്രീനിൽ പ്രതീക്ഷിക്കാമോ

മോൾക്ക് ഇപ്പോൾ താത്പര്യമില്ല. അവൾ ഇപ്പോൾ പഠിച്ചുകൊണ്ടിരിക്കുന്നതല്ലേയുള്ളൂ. ആദ്യം പഠനം. അതിനു ശേഷം അവൾക്കു താത്പര്യമാണെങ്കിൽ സിനിമയിൽ വന്നോട്ടെ. കാരണം ഞങ്ങൾ രണ്ടുപേരും സിനിമയുമായി ബന്ധമുള്ളതുകൊണ്ട് മകളെ വിലക്കേണ്ട ആവശ്യമില്ലല്ലോ.

  • തിരിച്ചു വരവും സീരിയലും

എനിക്കു കുഞ്ഞുണ്ടായ ശേഷമാണ് സീരിയലിലേക്കു ക്ഷണമുണ്ടായത്. കഥ ഇഷ്ടപ്പെട്ടപ്പോൾ അഭിനയിച്ചു. പോരാത്തതിനു മിക്ക സീരിയലുകളുടെയും ഷൂട്ടിങ് തിരുവനന്തപുരത്താകും. ഞാൻ താമസിക്കുന്നതും തിരുവനന്തപുരത്താണ്. ആ സമയത്തൊക്കെ എന്തെങ്കിലും ആവശ്യം വന്നാൽ വീട്ടിലേക്കു പോകാം. ഇപ്പോൾ വീട്ടിൽ ഗസ്റ്റ് വന്നുവെന്നിരിക്കട്ടെ, എന്റെ ഷോട്ട് ആദ്യം തീർത്ത് എനിക്കു പോകാം. പക്ഷേ, സിനിമയെ സംബന്ധിച്ചിടത്തോളം ഇത്തരം എസ്‌ക്യുസുകൾ പറയാൻ പറ്റില്ല. പിന്നെ സീരിയലിൽ അഭിനയിച്ച് അതിന്റെ സുഖം പിടിച്ചപ്പോൾ ഞാനും സീരിയൽ മതിയെന്നുവച്ചു (ചിരിക്കുന്നു). പിന്നെ സിനിമയിൽ വന്നത് അപ്രതീക്ഷിതമായിട്ടായിരുന്നല്ലോ. ചെറുപ്പം തൊട്ടേ എന്റെ മുഖത്തെ ചിലനേരത്തെ ഭാവങ്ങൾ കാണുമ്പോൾ നീ സിനിമാ നടിയാകുമെന്നു പറഞ്ഞു കളിയാക്കുമായിരുന്ന എന്റെ ഒരാന്റി കെ.പി.എ.സി. ലളിതാന്റിയുടെ സുഹൃത്താണ്. ഭരതൻ അങ്കിളിന്റെ ‘പാഥേയം’ എന്ന സിനിമയിൽ ഒരു പെൺകുട്ടിയെ ആവശ്യമുണ്ടെന്ന് ലളിതാന്റി പറഞ്ഞപ്പോൾ എനിക്കാണ് നറുക്കുവീണത്. എന്റെ ഫോട്ടോ അയച്ചുകൊടുക്കാൻ പറഞ്ഞതനുസരിച്ച് ഫോട്ടോയും അയച്ചുകൊടുത്തു. അപ്പോഴും സിനിമയിൽ വരുമെന്ന പ്രതീക്ഷയൊന്നും എനിക്കുണ്ടായിരുന്നില്ല.

കുറച്ചു ദിവസം കഴിഞ്ഞപ്പോൾ വീട്ടിലേക്കൊരു ഫോൺകോൾ. ഫോണെടുത്തത് അമ്മയാണ്. മറുവശത്ത് ആൺസ്വരമാണ്. ‘നാളെ ഞങ്ങൾ ചിപ്പിയുടെ വീട്ടിൽ വരും, കുറച്ച് സീനുകൾ ഷൂട്ടു ചെയ്യണം.’കേട്ടപാതി അമ്മ പറഞ്ഞ മറുപടി; ‘ഇവിടെയാരും അഭിനയിക്കുന്നില്ല, നിങ്ങൾക്ക് നമ്പർ മാറിയതാകും.’ മറുവശത്ത് മൗനം. കുറച്ചു കഴിഞ്ഞപ്പോൾ വീണ്ടുമൊരു ഫോൺ. ഇത്തവണ വിളിച്ചത് ലളിതാന്റിയാണ്. ആന്റി പറഞ്ഞിട്ടാണ് അവർ വിളിച്ചത്. നാളെ റെഡിയായിരിക്കണമെന്ന് ആന്റി പറഞ്ഞു. പിറ്റേന്നു രാവിലെ പത്തുമണിയായപ്പോൾ ക്യാമറയുമായി അവരെത്തി. അങ്ങോട്ടുമിങ്ങോട്ടും നടക്കാൻ അവർ പറഞ്ഞതനുസരിച്ച് ഞാൻ ചെയ്തു. ഇന്ന് അതിനെ സ്‌ക്രീൻ ടെസ്റ്റ് എന്നുവിളിക്കാം. കൊടൈക്കനാലിലായിരുന്നു ‘പാഥേയ’ത്തിന്റെ ഷൂട്ട്. ആദ്യത്തെ രണ്ടുമൂന്നു ദിവസം എനിക്ക് ഷൂട്ടുണ്ടായിരുന്നില്ലയെങ്കിലും എന്നും ലൊക്കേഷനിൽ പോകും. നിരന്തരമായ പോക്കുവരവിനിടയിൽ ലൊക്കേഷനിലുള്ള എല്ലാവരുമായി നല്ല കമ്പനിയായി. സത്യം പറഞ്ഞാൽ ഞാനഭിനയിച്ച ഓരോ സീനുകൾ കാണുമ്പോൾ എനിക്ക് തന്നെ അത്ഭുതമാണ്. അതായത്. ഒരു മുറിയിൽ നിന്നും മറ്റൊരു റൂമിലേക്കു വരാൻ പറയും. അപ്പോൾ ഞാനങ്ങനെ ചെയ്യും. അത് ഒരു സീനാണെന്ന് പിന്നെയാണു മനസിലായത്. അഭിനയിക്കുകയാണെന്ന് എനിക്കു തോന്നിയതേയില്ല. അദ്യ ചിത്രത്തിന്റെ ഷൂട്ടിങ് തീരുന്നനിനു മുമ്പ് രണ്ടാമത്തെ ചിത്രത്തിന്റെ ഷൂട്ടിങ് തുടങ്ങിയിരുന്നു. അന്നു മുതൽ തുടർച്ചയായി അഭിനയിച്ചുകൊണ്ടിരുന്നു.1993 മുതൽ 2001 വരെ അഭിനയിച്ചു. ഇതിനിടയിലാണ് രഞ്ജിത്തേട്ടനെ കാണുന്നതും പരിചയപ്പെടുന്നതും. പരിചയം പിന്നീടു പ്രണയത്തിലേക്കു വഴിമാറുന്നതും വിവാഹം കഴിക്കുന്നതും.

  • സിനിമാരംഗത്തെ മങ്ങലേൽക്കാത്ത ദാമ്പത്യം

എല്ലാവരുടെയും ജീവിതത്തിലുണ്ടാകുന്നതു പോലെ ഞങ്ങളുടെ ജീവിതത്തിലും ഇണക്കങ്ങളും പിണക്കങ്ങളും ഉണ്ടാകാറുണ്ട്. ചെറിയ കാര്യങ്ങൾക്കുപോലും പൊട്ടിത്തെറിക്കുന്ന സ്വഭാവമാണ് എന്റേത്. ചിട്ടയായ ജീവിതശൈലിയാണ് രഞ്ജിത്തേട്ടന്റേത്. എന്റേതു നേരെ തിരിച്ചും. ഞങ്ങൾ തമ്മിലുള്ള വഴക്കു കേൾക്കുന്നവർ വിചാരിക്കുന്നത് അൽപ്പസമയത്തിനകം രണ്ടുപേരും അടിച്ചുപിരിയും എന്നാണ്. പക്ഷേ, ഞങ്ങൾക്കിടയിലെ വഴക്ക് താഴെ ഡൈനിങ് റൂമിൽ തീരും. ചില കാര്യങ്ങളിൽ ചേട്ടൻ സൈലന്റാകുമ്പോൾ ഞാൻ വയലന്റാകും. പാവം ഏട്ടൻ ഒന്നും മിണ്ടില്ല. ക്ഷമയാണ് ഏട്ടനിൽ ഞാനിഷ്ടപ്പെടുന്ന ഗുണം. പിന്നെ എന്ത് ടെൻഷൻ ഉണ്ടെങ്കിലും പുറത്തു കാട്ടില്ല. ചേട്ടൻ അത്യാവശ്യത്തിനു പുറത്തുപോകാൻ നിൽക്കുമ്പോഴാകും ആരെങ്കിലും കാണാൻ വരിക. തിരക്കുകൾ പറഞ്ഞു മടക്കി അയയ്ക്കില്ല. പകരം കാണാൻ വരുന്നവരുടെ ആവശ്യങ്ങളെല്ലാം ശ്രദ്ധയോടിരുന്നു കേൾക്കും. ഇതിനിടയിൽ ധാരാളം ഫോൺകോളുകൾ വരുമെങ്കിലും ഒന്നും അറ്റൻഡ് ചെയ്യില്ല. എനിക്കൊന്നും ഏട്ടനെപോലെ പെരുമാറാൻ സാധിക്കില്ല.

എല്ലാവരുടെയും വിഷമങ്ങൾ മനസിലാക്കാൻ അദ്ദേഹത്തിനു കഴിയും. ഉള്ളിൽ നിറയെ സ്‌നേഹമുണ്ടെങ്കിലും പുറത്തു പ്രകടിപ്പിക്കാത്ത സ്വഭാവക്കാരനാണ് ഏട്ടൻ. പുറത്തുനിന്ന് ഫുഡ് കഴിക്കില്ല. പുറത്തുപോയിട്ട് വരുമ്പോൾ എനിക്കും മോൾക്കും ഫുഡ് പാഴ്‌സലായി വാങ്ങും. പക്ഷേ ഏട്ടൻ എത്ര മണി രാത്രിയായാലും വീട്ടിൽ വന്നേ ഭക്ഷണം കഴിക്കൂ. വിവാഹം കഴിഞ്ഞ സമയത്ത് പാചകം എനിക്കത്ര വശമില്ലായിരുന്നു. പിന്നെപ്പിന്നെ പാചകപുസ്തകങ്ങൾ നോക്കിയാണ് എല്ലാം ഉണ്ടാക്കാൻ പഠിച്ചത്. ഏട്ടൻ ഡൈനിങ് റൂമിൽ വരുമ്പോൾ തന്നെ ഞാനുണ്ടാക്കുന്ന കറിയേതാണെന്നു നേത്തെ പറയും. അപ്പോൾ പിന്നെ ഏട്ടനു കഴിക്കാതെ പറ്റില്ലല്ലോ? ഭാര്യ കഷ്ടപ്പെട്ടുണ്ടാക്കിയതല്ലേ?. അഥവാ ഏട്ടനതു കഴിച്ചു നല്ലതാണെന്നു പറഞ്ഞാൽ അതു മാത്രമാകും തുടർന്നുള്ള ദിവസങ്ങളിൽ ഞാനുണ്ടാക്കി കൊടുക്കുക. മൂന്നാലു ദിവസം ഏട്ടൻ ഒന്നും മിണ്ടാതെ കഴിക്കും. ഒടുവിൽ ‘ഈ വീട്ടിലിത് മാത്രമേയുള്ളോ?’ എന്നുള്ള ഏട്ടന്റെ ചോദ്യം കേൾക്കുമ്പോൾ ഒരാഴ്ചത്തേക്ക് അടുക്കളയിൽ കയറില്ല. ഏട്ടനോടുള്ള പ്രതിഷേധം. രണ്ടു കാര്യങ്ങളിൽ ഞങ്ങൾക്ക് ഒരേ മനസാണ്. എന്താണെന്നല്ലേ..? പരസ്പരം സർപ്രൈസ് ഗിഫ്റ്റുകൾ കൊടുക്കുക എന്നതിനോട് ഞങ്ങൾക്കു യോജിപ്പില്ല. രണ്ടുപേരുടെയും ബർത്ത്‌ഡേ, വാലന്റൈൻസ് ഡേ, വിവാഹ വാൾഷികം തുടങ്ങി എല്ലാ കാര്യങ്ങൾക്കും പരസ്പരം ഗിഫ്റ്റുകൾ കൈമാറുന്നതിൽ ഞങ്ങൾക്കു താത്പര്യമില്ല. ഒരുപക്ഷേ ഇങ്ങനെ മുടങ്ങാതെ ഗിഫ്റ്റുകൾ കൈമാറുന്നവരിൽ ഒരാൾക്ക് ജോലിയുടെ ടെൻഷനാണെന്നു വയ്ക്കുക. അയാൾക്കന്ന് ഗിഫ്റ്റ് വാങ്ങാൻ സാധിച്ചില്ല. അവിടെ തുടങ്ങും പ്രശ്‌നം. എന്തിനാ വെറുതെ പ്രശ്‌നങ്ങൾ നമ്മളായിട്ടു തുടങ്ങുന്നത്.

subscribe

ചിരിക്കാൻ എനിക്കും ഇഷ്ടം
Shalu Kurian

Categories:
  • പുതിയ പ്രതീക്ഷകൾ

പ്രതീക്ഷകളുടെ വർഷമാണിത്. പുതിയ പ്രോജക്ടുകളുണ്ട്, നല്ല കഥാപാത്രങ്ങളും. കിട്ടുന്ന കഥാപാത്രങ്ങൾ വലിതോ ചെറുതോ എന്നു തരം തിരിക്കാറില്ല. സംവിധായകൻ ഏൽപ്പിച്ച ജോലി ഭംഗിയായി നിറവേറ്റാൻ കഴിയുക എന്നതാണ് ഒരു ആർട്ടിസ്റ്റിന്റെ കടമ. മുമ്പു ചെയ്തതിൽ നിന്നു വ്യത്യസ്തമായ കഥാപാത്രങ്ങളാണ് ചെയ്യാൻ പോകുന്നത്.
പിന്നെ, വ്യക്തിപരമായി പറഞ്ഞാൽ നല്ല ഭാര്യയായി, നല്ല മകളായി, നല്ല മരുമകളായി തുടരാൻ കഴിയുക തുടങ്ങിയ പ്രാർത്ഥനകളും മാത്രം.

  • പ്രോജക്ടകൾ

പുതിയ പ്രോജക്ടുകളുണ്ട്. റോസ് പെറ്റൽസിന്റെ ഒരു സീരിയൽ ചെയ്യുന്നുണ്ട്. മഴവിൽ മനോരമയ്ക്കു വേണ്ടിയാണ് സീരിയൽ. എന്നാൽ, സീരിയലിന്റെ പേര് തീർച്ചപ്പെടുത്തിയിട്ടില്ല.

  • ശ്രീകുമാരൻ തമ്പിയും ചട്ടമ്പിക്കല്ല്യാണിയും

നായികയാകുന്ന ആദ്യ സീരിയൽ ആയിരുന്നു ശ്രീകുമാരൻ തമ്പി സാറിന്റെ ചട്ടമ്പിക്കല്ല്യാണി. ടൈറ്റിൽ വേഷമായിരുന്നു അതിലെനിക്ക്. തുടക്കക്കാലത്തു തന്നെ ലെജൻഡ് എന്നു വിശേഷിപ്പിക്കപ്പെടുന്ന ശ്രീകുമാരൻ തമ്പി സാറിന്റെ കൂടെ വർക്ക് ചെയ്യാൻ കഴിഞ്ഞത് വലിയ ഭാഗ്യമായി കരുതുന്നു. ചട്ടമ്പിക്കല്ല്യാണി എന്ന സിനിമ റീമേക്ക് ചെയ്തതായിരുന്നു സീരിയിൽ. തന്റെ കൂടെ വർക്ക് ചെയ്യുന്ന എല്ലാവരുടെയും കാര്യങ്ങൾ കൃത്യമായി ശ്രദ്ധിക്കുന്ന വ്യക്തിയാണ് അദ്ദേഹം. പ്രൊഡക്ഷനിൽ തയാറാക്കുന്ന ഭക്ഷണം അദ്ദേഹം രുചിച്ചു നോക്കിയ ശേഷം മാത്രമാണു വിളമ്പുക. അഭിനയത്തെക്കുറിച്ചുള്ള അദ്ദേഹത്തിന്റെ കാഴ്ചപ്പാടുകൾ, നൽകുന്ന വിവരണങ്ങൾ, ഉപദേശങ്ങളെല്ലാം എന്റെ കരിയറിൽ ഗുണം ചെയ്തിട്ടുണ്ട്. തമ്പി സാർ പിന്നീട് ചെയ്ത് സിനിമയിലെ ഒരു പാട്ട് സീനിൽ ഞാൻ ഉണ്ടായിരുന്നു. ലെങ്ത് കൂടിപ്പോയതിനാൽ പാട്ട് കട്ട് ചെയ്യുകയായിരുന്നു.

  • പ്രിയപ്പെട്ട അഭിനേതാക്കളും കമൽഹാസനും

നിരവധി ആർട്ടിസ്റ്റുകൾ എന്നെ സ്വാധീനിച്ചിട്ടുണ്ട്. ലാലേട്ടൻ, മമ്മൂക്ക, മുരളി സാർ തുടങ്ങിയവരൊക്കെ എന്നെ സ്വാധീനിച്ചവരാണ്, ഏറെ പ്രിയപ്പെട്ടവരാണ്. ഞാൻ കമൽഹാസൻ സാറിന്റെ കടുത്ത ഫാനാണ്. ആ മഹാനടന്റെ എല്ലാ സിനിമകളും ഞാൻ കണ്ടിട്ടുണ്ട്. അദ്ദേഹത്തിന്റെ പല സിനിമകളും വീണ്ടും വീണ്ടും കാണാൻ തോന്നുന്നവയാണ്. അദ്ദേഹത്തോടൊപ്പം ഒരു സീനിലെങ്കിലും അഭിനയിക്കമെന്നാണ് എന്റെ ഏറ്റവും വലിയ ആഗ്രഹം.

  • തട്ടീം മുട്ടീം

ആളുകളെ ചിരിപ്പിക്കുക എന്നത് നിസാരകാര്യമല്ല. ചിരിപ്പിക്കുന്നവരെ ആർക്കാണ് ഇഷ്ടമല്ലാത്തത്. സമ്മർദ്ദങ്ങളേറിയ ഫാസ്റ്റ് ലൈഫിൽ കോമഡി പ്രോഗ്രാമുകൾക്ക് ജനപ്രീതിയേറുന്നുണ്ട്. തട്ടീം മുട്ടീം എന്ന കോമഡി സീരിയലിനു മുമ്പ് കുടുംബ പോലീസ് എന്നൊരു കോമഡി സീരിയൽ ചെയ്തിട്ടുണ്ട്. അതേസമയം ചന്ദനമഴയിലെ നെഗറ്റീവ് വേഷവും ചെയ്തു. ക്യാരക്ടർ നെഗറ്റീവ് ആണോ പോസിറ്റീവ് ആണോ എന്നു നോക്കാറില്ല.
തട്ടീം മുട്ടീം പ്രേക്ഷകപ്രീതി പിടിച്ചുപറ്റിയതിൽ സന്തോഷമുണ്ട്. കോമഡി ചെയ്യുന്നതിൽ പ്രയാസങ്ങളൊന്നുമില്ല. ഒപ്പമുള്ള ആർട്ടിസ്റ്റുകൾ നന്നായി സപ്പോർട്ട് ചെയ്യുന്നുണ്ട്. അത്തരത്തിലുള്ള കോംപിനേഷനുകൾ സീനിനു ഗുണം ചെയ്യും. ഒരു സീനിൽ ഒരാൾ മാത്രം വിചാരിച്ചാൽ ചിലപ്പോൾ കോമഡി വർക്കൗട്ട് ആകണമെന്നില്ലല്ലോ. എന്ന സംബന്ധിച്ച് കോമഡി മാത്രമല്ല, എല്ലാ കഥാപാത്രങ്ങളും ഇഷ്ടപ്പെട്ടു ചെയ്തതാണ്. കഥാപാത്രങ്ങളെ ഉൾക്കൊണ്ട് അവതരിപ്പിച്ചില്ലെങ്കിൽ പരാജയപ്പെടുമെന്നാണ് എന്റെ വിശ്വാസം.

  • മിനിസ്‌ക്രീനിൽ സന്തുഷ്ടയാണോ

തീർച്ചയായും സന്തുഷ്ടയാണ്. സിനിമ ചെയ്യാൻ ആഗ്രഹമുണ്ട്. നല്ല കഥാപാത്രങ്ങൾ സിനിമയിൽ ലഭിച്ചാൽ സ്വീകരിക്കും. സിനിമയിലൂടെയാണ് അഭിനയലോകത്തേക്കു പ്രവേശിക്കുന്നത്. പിന്നീടാണ് മിനിസ്‌ക്രീനിലേക്ക് എത്തുന്നത്. ഇപ്പോൾ സീരിയലുകളിൽ നല്ല കഥാപാത്രങ്ങൾ കിട്ടുന്നുണ്ട്.

  • സീരിയലുകൾക്കെതിരേയുള്ള വിമർശനങ്ങൾ

വിമർശനങ്ങളെ സംയമനത്തോടെ നോക്കിക്കാണുകയാണ് എന്റെ രീതി. ജനങ്ങൾക്ക് എന്തിനേയും വിമർശിക്കാം. അവർക്കതിനുള്ള അവകാശമുണ്ട്. വിമർശനങ്ങളിലെ നല്ല വശങ്ങളെ ഉൾക്കൊള്ളാൻ ശ്രമിക്കാറുണ്ട്. സീരിയലുകളെക്കുറിച്ചു വിമർശനങ്ങൾ ഉണ്ടാകാറുണ്ട്. സ്ഥിരം ഒരേ സബ്ജക്ട് തന്നെ കാണിക്കുന്നു. അമ്മായിയമ്മ, രണ്ടാനച്ഛൻ, ദുർമാർഗിയായ ഭർത്താവ് അങ്ങനെ പോകുന്ന ക്ലീഷേ സംഭവങ്ങൾ. എന്നാലും സീരിയലുകളിലെ പോസിറ്റിവ് വശങ്ങൾ നാം കാണാതെ പോകരുത്. ഇതൊക്കെ നമ്മുടെ സമൂഹത്തിൽ സാധാരണ നടക്കുന്നതാണ്. സീരിയൽ ഇൻഡസ്ട്രി സിനിമ പോലെ തന്നെ വലിയൊരു മേഖലയാണ്. നൂറുകണക്കിന് ആർട്ടിസ്റ്റുകളും ടെക്‌നീഷ്യൻമാരുമാണ് ഇതുമായി ബന്ധപ്പെട്ടു പ്രവർത്തിക്കുന്നത്.

  • യാത്രകൾ

കുട്ടിക്കാലം തൊട്ടേ യാത്രകൾ എനിക്കിഷ്ടമാണ്. അച്ഛന്റെ ബൈക്കിന്റെ പെട്രോൾ ടാങ്കിന്റെ മുകളിലിരുന്നുള്ള കുട്ടിക്കാലത്തെ യാത്രകളുടെ ഓർമകൾ എന്നും മധുരിക്കുന്നതാണ്. ബൈക്കിൽ അച്ഛന്റെയും അമ്മയുടെയും കൂടെ ബന്ധു വീടുകളിലൊക്കെ പോകും. ഞായറാഴ്ചകളിലായിരിക്കും അധികവും യാത്രകൾ.
പുതിയ സ്ഥലങ്ങൾ കാണുക, പുതിയ ആളുകളെ കാണുക, അവരുടെ സംസ്‌കാരം, പാരമ്പര്യം തുടങ്ങിയവ അടുത്തറിയുക ഇതെല്ലാം ഇഷ്ടമാണ്. കുട്ടിക്കാലം തൊട്ടു യാത്രയോടുള്ള ഇഷ്ടം വലിതായപ്പോൾ കൂടി എന്നു മാത്രം. സ്വന്തമായി വരുമാനമായപ്പോൾ യാത്രകൾ വിവിധ രാജ്യങ്ങൾ വരെ എത്തി. ഹിൽ സ്റ്റേഷനുകൾ സന്ദർശിക്കാനാണു കൂടുതൽ ഇഷ്ടം.
അടുത്തിടെ നടത്തിയത് റഷ്യൻ യാത്രയാണ്. എന്റെ ഭർത്താവ് മെൽവിൻ ഫിലിപ്പും കൂടെയുണ്ടായിരുന്നു. അദ്ദേഹവും എന്നെപ്പോലെയാണ്. യാത്രകളിൽ താത്പര്യമുള്ള ആളാണ്.

  • റഷ്യ

റഷ്യയിലെ പ്രധാനപ്പെട്ട സ്ഥലങ്ങൾ ചുറ്റിക്കറങ്ങി എന്നു പറയാം. ഞങ്ങൾ തിരിച്ചുവരാൻ തുടങ്ങിയപ്പോൾ ശക്തമായി മഞ്ഞുവീഴാൻ തുടങ്ങിയിരുന്നു. മഞ്ഞ് ഇഷ്ടമായതുകൊണ്ട് കുറച്ചു ദിവസങ്ങൾ കൂടി അവിടെ തങ്ങാൻ ആഗ്രഹിച്ചു. പക്ഷേ കഴിഞ്ഞില്ല. ഡോസ്‌റ്റോയേവ്‌സ്‌കി, ചെക്കോവ്, ടോൾസ്‌റ്റോയി തുടങ്ങിയവരുടെ രചനകളിലൂടെ പരിചിതമായ റഷ്യൻ നഗരങ്ങളും അവിടത്തെ തെരുവുകളും വായന തുടങ്ങിയ കാലം തൊട്ടേ ഉള്ളിലുള്ളതാണ്.
റഷ്യയിലെ സ്ട്രീറ്റ് ഫുഡ് കഴിക്കാൻ ആഗ്രഹമുണ്ടായിരുന്നു. കഴിച്ചപ്പോൾ നമ്മുടെ ടേയ്‌സറ്റിന് ഇഷ്ടട്ടപ്പെട്ടില്ല. തീരെ പരിചിതമല്ലാത്തെ പാചകക്കൂട്ടുകൾ. കൂടുതൽ വെറൈറ്റികൾ ടേയ്സ്റ്റ് ചെയ്ത് നോക്കിയില്ല.
സെന്റ് പീറ്റേഴ്‌സ് ബെർഗ്, പുഷ്‌കിൻ, മോസ്‌കോ തുടങ്ങിയ നഗരങ്ങളാണ് പ്രധാനമായും സന്ദർശിച്ചത്.
വിവാഹശേഷമാണ് വിദേശരാജ്യങ്ങളിലേക്കുള്ള യാത്രകൾ ആരംഭിച്ചത്. റഷ്യൻ സന്ദർശനത്തിനു മുമ്പ് മെൽവിനും ഞാനും തായ്‌ലൻഡ് പോയിരുന്നു. മനസിൽ പോകാൻ ആഗ്രഹിക്കുന്ന രാജ്യങ്ങളും നഗരങ്ങളും ഇനിയുമുണ്ട്. യൂറോപ്പ്, അമേരിക്ക, ആഫ്രിക്ക തുടങ്ങിയ രാജ്യങ്ങൾ സന്ദർശിക്കാൻ പദ്ധതിയുണ്ട്.

  • സീരിയലുകളിൽ മാറ്റം

സിനിമ പോലെ തന്നെ സീരിയലുകളിലും മാറ്റങ്ങളും പരീക്ഷണങ്ങളും നടക്കുന്നുണ്ട്. ചിത്രീകരണത്തിലും മറ്റ് ടെക്‌നിക്കൽ മേഖലകളിലും വലിയ മാറ്റങ്ങൾ ഇക്കാലത്ത് ഉണ്ടാകുന്നുണ്ട്. ഇപ്പോൾ ഞാൻ ചെയ്യന്ന തട്ടീം മുട്ടീം എന്ന സീരിയൽ പതിവു രീതികളിൽ നിന്നൊക്ക വ്യത്യസ്തമാണ്. ഇതുപോലെ വ്യത്യസ്തമായ സീരിയലുകളാണ്, മറിമായം, ഉപ്പും മുളകും തുടങ്ങിയവ. ഇതിന്റെ പ്രത്യേകത ഒരു എപ്പിസോഡിൽ ഒരു കഥ തീരുന്നു എന്നതാണ്. പ്രേക്ഷകർ ഇടയ്ക്ക് കാണാൻ വിട്ടു പോയാലും പ്രശ്‌നമൊന്നുമില്ല. സീരിയലുകളിൽ നിന്നു വ്യത്യസ്തമായി വലിയ കാഴ്ചക്കാരും ഇത്തരം പരിപാടികൾക്കുണ്ട്.
സിനികളെല്ലാം കാണാറുണ്ട്. തമിഴ് മാസ് സിനിമകൾ മിസ് ചെയ്യാറില്ല. സമയം കണ്ടെത്തി കാണും.

subscribe

സജീദിന്റെ രണ്ടാം വരവ്
സജീദ് പുത്തലത്ത് / ബി. ഹൃദയനന്ദ

Categories:
  • നാടകവും അഭിനയരംഗത്തെ തുടക്കവും

സുൽത്താൻ ബത്തേരി സെന്റ് മേരീസ് കോളേജിൽ ബി.എ പൊളിറ്റിക്കൽ സയൻസിനു പഠിക്കുന്ന കാലഘട്ടം. ജീവിതത്തിൽ ആദ്യമായി സ്റ്റേജിൽ ഒരു നാടകം ചെയ്തു, ‘മൂന്നാംയാമം’ എന്നായിരുന്നു നാടകത്തിന്റെ പേര്. അതിലെ അഭിനയത്തിനു മികച്ച നടനുള്ള സമ്മാനം കിട്ടി. അവാർഡ് എനിക്ക് പ്രോത്സാഹനവും ആത്മവിശ്വാസവും തന്നു. അഭിനയത്തോടുള്ള അടങ്ങാത്ത ആഗ്രഹം അക്കാലത്ത് മനസിൽ മുളപൊട്ടി വളരുകയായിരുന്നു. നാടകം മാത്രമല്ല, മിമിക്രി, മോണോആക്ട്, കഥാപ്രസംഗം തുടങ്ങിയ ഇനങ്ങളിലും മത്സരിച്ചിട്ടുണ്ട്. ‘ബി’ സോൺ കലോത്സവ വേദികളിൽ പങ്കെടുക്കാനും ഭാഗ്യമുണ്ടായി. അതെല്ലാം കലാവഴികളിലെ ആദ്യകാല പാഠങ്ങളാണ്.

ചെറുപ്പം തൊട്ടു കലയോടുള്ള പ്രണയം മനസിൽ സൂക്ഷിച്ചിരുന്നു. പക്ഷേ, കഴിവു തെളിയിച്ചിരുന്നത് നോൺ സ്റ്റേജ് ഐറ്റംസ് ആയ ചിത്രരചനയിലും കളിമൺ മോഡലിങ്ങിലും ആയിരുന്നു. അനശ്വരനായ പ്രണയിതാവ് മൊയ്തീന്റെ നാടായ മുക്കം ചേന്ദമംഗലൂർ ഇസ്‌ലാഹിയയിൽ പഠിച്ച (ഒരു വർഷം) താണ് കലയോടുള്ള പ്രണയം കൂടിവരാൻ കാരണം. മറ്റു വിദ്യാർത്ഥികൾ നാടകങ്ങളും പാട്ടുകളും കഥാപ്രസംഗങ്ങളും അവതരിപ്പിക്കുന്നതു കണ്ടപ്പോൾ തോന്നിയ ആഗ്രഹമാണ് എന്റെ കലാജീവിതത്തിന്റെ തുടക്കത്തിലെ ഒരു തീപ്പൊരി. ഹൈസ്‌കൂളിൽ പഠിക്കുമ്പോൾ കണ്ട ‘നഖക്ഷതങ്ങൾ’ എന്ന സിനിമയാണ് സിനിമയോടുള്ള താത്പര്യമുണ്ടാക്കിയത്.

  • സിനിമയിൽ

മലബാർ മേഖലയിലുള്ളവർക്ക് സിനിമയിലേക്കുള്ള പ്രവേശനത്തിനു പൊതുവെ സാധ്യത കുറവാണ്. 2010-നു ശേഷം അതു മാറിയെന്നു തോന്നുന്നു. ജനിച്ചത് തലശേരി കടവത്തൂരിൽ ആണെങ്കിലും വളർന്നതും പഠിച്ചതും വയനാട്ടിലായിരുന്നു. അക്കാലത്ത് വയനാട്ടിൽ നിന്ന് സിനിമയിലേക്ക് എത്താൻ വളരെ പ്രയാസമായിരുന്നു. സിനിമയിൽ ചാൻസ് ചോദിക്കണമെങ്കിൽ ചുരമിറങ്ങി എറണാകുളത്തും ചെന്നൈയിലും എത്തണം. സിനിമയിൽ ശ്രദ്ധിക്കാൻ ഒരു സിനിമയുടെ നിർമാണ പ്രവർത്തനവുമായി ബന്ധമുണ്ടായാലേ സാധിക്കുകയുള്ളു എന്നുപറഞ്ഞു വയനാട്ടിലെ ഒരു സംവിധായകൻ. അവസാനം ആ പ്രൊജക്ട് ‘കൂട്ടം തെറ്റിയ സുൽത്താൻ’ എന്ന സീരിയൽ പരമ്പരയായി മാറുന്നു. 2001 ജനുവരി 14 മുതൽ ഏപ്രിൽ വരെ കൈരളിയിൽ മികച്ച പ്രതികരണം കിട്ടിയെങ്കിലും ബിസിനസ് പരമായ അജ്ഞത ആ സീരിയൽ ഒരു വൻ പരാജയമായി മാറി. പിന്നീട് അത് ‘മരുഭൂമിയിലെ ആന’ എന്ന പേരിൽ 2016 ൽ സിനിമയായി. പിന്നീട് അതേ സംവിധായകൻ ശരത്ചന്ദ്രൻ വയനാടിന്റെ ചെറിയ ചെറിയ ഷോർട്ട് ഫിലിമും മറ്റും ചെയ്തുകൊണ്ടിരുന്നു. 2004 ആയപ്പോഴേക്കും നരേൻ – കാവ്യാ മാധവൻ, ശരത്ചന്ദ്രൻ വയനാടിന്റെ ‘അന്നൊരിക്കൽ’എന്ന സിനിമയുടെ ക്രിയേറ്റീവ് കോൺട്രിബ്യൂട്ടർ ആയി വർക്ക് ചെയ്തു. ആ സിനിമയിൽ ജോണി എന്ന കഥാപാത്രത്തെ അവതരിപ്പിച്ചു.

  • ബിഗ് സ്‌ക്രീനിൽ നിന്ന് മിനി സ്‌ക്രീനിലേക്ക്

‘അന്നൊരിക്കൽ’ എന്ന സിനിമയുടെ തിരക്കഥ, സംഭാഷണത്തിൽ പങ്കാളിയായ ജി.എസ്. അനിലിനെ കണ്ടുമുട്ടിയതാണ് ജീവിതത്തിലെ വഴിത്തിരിവാകുന്നത്. അദ്ദേഹത്തിന്റെ രചനയിൽ പി.സി. വേണുഗോപാൽ സാറിന്റെ ‘കായംകുളം കൊച്ചുണ്ണി’ എന്ന സീരിയലിൽ ഇത്തിക്കര പക്കി എന്ന കഥാപാത്രം അഭിനയിക്കാൻ അവസരം കിട്ടി. 100 -ാമത്തെ എപ്പിസോഡിൽ വന്ന് 127-ാമത്തെ എപ്പിസോഡിൽ മരിക്കാൻ തീരുമാനിച്ചിരുന്ന എന്റെ കഥാപാത്രം വളർന്ന് 565-ാമത്തെ എപ്പിസോഡ് (ഒന്നര വർഷം) വരെ ആ കഥാപാത്രം ചെയ്തു.

  • കായംകുളം കൊച്ചുണ്ണിയും ഇത്തിക്കര പക്കിയും

127-ാമത്തെ എപ്പിസോഡിൽ ഞാൻ മരിച്ചുകൊണ്ടിരിക്കുന്ന ഭാഗം ഷൂട്ട് ചെയ്യുന്ന ദിവസമാണ് ചെന്നൈ സൂര്യാ ടിവിയിൽ നിന്ന് സർവേ റിപ്പോർട്ട് പ്രകാരം ഇത്തിക്കര പക്കിയെ കൊല്ലരുത് എന്നു തീരുമാനിക്കുന്നത്. അതുവരെ കൊച്ചുണ്ണിയുടെ ശത്രുവായി വില്ലൻ കഥാപാത്രം ചെയ്ത ഇത്തിക്കര പക്കിയുടെ ട്വിസ്റ്റ് അവിടെ നിന്നാണ് ആരംഭിക്കുന്നത്. കൊച്ചുണ്ണിയും കടുവാശേരി ബാവയും സംഘവും പാവപ്പെട്ടവർക്ക് അരിയും ഗോതമ്പും വിതരണം ചെയ്യാൻ വരുന്ന രംഗം (പക്ഷേ അരിയിലും മറ്റു ധാന്യങ്ങളിലും ക്രൂരന്മാരായ നാടുവാഴികളുടെ ശിങ്കിടികൾ വിഷം കലർത്തിയ വിവരം അറിയുന്ന ഇത്തിക്കര പക്കി കൊച്ചുണ്ണിയോടും കൂട്ടുകാരോടും അരിയും മറ്റു ധാന്യങ്ങളും പാവപ്പെട്ടവർക്കു വിതരണം ചെയ്യരുതെന്നു കേണപേക്ഷിക്കുന്നു. പക്ഷേ, കൊച്ചുണ്ണിയുടെ ശത്രുവായിരുന്ന ഇത്തിക്കര പക്കിയെ വിശ്വസിക്കാൻ ആരും തയാറാവുന്നില്ല. അവസാനം അവരുടെ മുമ്പിൽ വച്ച് തന്റെ കത്തികൊണ്ട് ചാക്കിൽ കുത്തി, ധാന്യമണികൾ പുറത്തെടുത്തു വായിലിട്ടു ചവച്ചരച്ച് ചോര ഛർദ്ദിച്ച് മരണത്തിന്റെ വഴിയിലേക്കു പോകുന്ന രംഗമാണ് ഇത്തിക്കര പക്കിക്കു പ്രേക്ഷകർക്കിടയിൽ സ്വീകാര്യത വർദ്ധിപ്പിച്ചത്.

അന്ന്, കൊച്ചുണ്ണിയായി അഭിനയിക്കുന്ന മണിക്കുട്ടന് വിനയൻ സാറിന്റെ സിനിമയിൽ ഓഫർ കിട്ടി. പുതിയ കൊച്ചുണ്ണിയെ തിരയുന്നതിനിടയിൽ ഇത്തിക്കര പക്കിയുടെ കഥാപാത്രം വളർന്നുവന്നു. പിന്നീട് മുളമൂട്ടിൽ അടിമയുടെ (ടോഷ് ക്രിസ്റ്റി) രംഗപ്രവേശവും തുടർന്ന് കാക്ക ശങ്കരന്റെ മാസ്മരിക പ്രകടനവും (ഹരീഷ് പേരടി) അവരൊക്കെ വന്നപ്പോൾ കായംകുളം കൊച്ചുണ്ണി കൂടുതൽ ജനപ്രീതിയാർജിച്ചു.

  • ഇത്തിക്കര പക്കിയും ഞാനും

പത്തൊമ്പതാം നൂറ്റാണ്ടിൽ തിരുവിതാംകൂർ കൊല്ലം ജില്ലയിൽ ഇത്തിക്കര ദേശത്താണ് ഇത്തിക്കര പക്കി എന്നറിയപ്പെടുന്ന അബ്ദുൾ ഖാദർ ജനിച്ചത്. നീന്തലിൽ അസാമാന്യ പാടവമുള്ള വ്യക്തിയായിരുന്നു പക്കി. ഇംഗ്ലീഷുകാർ, നാടുവാഴികൾ ഇവരിൽ നിന്നു പണം പിടിച്ചെടുത്ത് പാവപ്പെട്ടവർക്കു വിതരണം ചെയ്തിരുന്നു പക്കി. അദ്ദേഹം മരിച്ചത് ക്യാൻസർ മൂലമാണെന്നു പറയപ്പെടുന്നു.
സീരിയലിൽ ഇത്തിക്കരപക്കി മരിക്കുന്നത് കൊച്ചുണ്ണിയെ കുന്തമെറിഞ്ഞു കൊല്ലാൻ ശ്രമിക്കുന്നതിനിടയിൽ അതു സ്വന്തം ശരീരം കൊണ്ടു തടുത്തു കൊണ്ടാണ്. മരിക്കുന്നതിനു മുമ്പ് ചെയ്ത തെറ്റിന് ദൈവത്തോടു മാപ്പിരന്നു പ്രാർത്ഥിച്ചുകൊണ്ടിരിക്കുമ്പോൾ ചോര ഛർദ്ദിച്ചാണു മരണം. ആ സീൻ ചിത്രീകരിക്കുന്ന സമയം കാണാൻ ജി.എസ്. അനിൽ വന്നിരുന്നില്ല. കുറേ ദൂരം മാറി ഇരിക്കുകയായിരുന്നു. പി.സി. വേണുഗോപാൽ കുറേ സമയം ഒന്നും മിണ്ടാതിരുന്നു. ഒരു മരണം സംഭവിച്ച വീട്ടിലെ അംഗങ്ങളെ പോലെ കൊച്ചുണ്ണി ഗ്രൂപ്പിലുള്ളവർ ഒരനക്കവുമില്ലാതെ നിന്നു. 13 വർഷം കഴിഞ്ഞിട്ടും ഇന്നും എന്റെ ഉള്ളിൽ നിന്ന് ആ കഥാപാത്രം ഇറങ്ങിയിപോയിട്ടില്ല.

subscribe

ബാലേട്ടന്റെ സമ്മാനം
-മോഹൻലാൽ

Categories:

ജീവിതത്തിലാദ്യമായി ദൈവത്തിനോട് എനിക്കു ദേഷ്യം തോന്നിയത് ബാലേട്ടന്റെ കാര്യത്തിലാണ്. ബാലൻ കെ. നായരെ ഞാൻ സ്‌നേഹത്തോടെ വിളിച്ചിരുന്നത് ബാലേട്ടൻ എന്നാണ്. സിനിമയിൽ വില്ലൻ കഥാപാത്രങ്ങളെ അവതരിപ്പിച്ച് ഏറെ വെറുപ്പു സമ്പാദിച്ച നടനായിരുന്നു അദ്ദേഹം. പക്ഷേ, സ്‌ക്രീനിലെ വില്ലത്തരങ്ങളെ ഒരിക്കലും സിനിയ്മക്കു പുറത്തേക്കു കൊണ്ടുപോകാത്ത ബാലേട്ടന്റെ ജീവിതത്തിലേക്ക് രോഗം വില്ലനായി കടന്നുവന്നതോടെയാണ് ദൈവത്തിനോട് എനിക്കു ദേഷ്യം തോന്നിത്തുടങ്ങിയത്. അത്രമാത്രം ക്രൂരമായാണു രോഗം ബാലേട്ടനെ കാർന്നുതിന്നത്. നീണ്ട പത്തു വർഷം അദ്ദേഹം ഏറ്റുമുട്ടിയത് രോഗത്തോടായിരുന്നു. ആ കാഴ്ച മനസിനെ വല്ലാതെ ഉലച്ചുകളഞ്ഞ ഒന്നായിരുന്നു. ഇന്നും ആ വലിയ നടന്റെ ജീവിതത്തെ കുറിച്ചോർക്കുമ്പോൾ വിഷമം തോന്നാറുണ്ട്. ചിലരുടെ ജീവിതത്തിലേക്ക് അപ്രതീക്ഷിതമായി എത്തുന്ന ദുരന്തങ്ങൾ പോലെയായിരുന്നു ബാലേട്ടന്റെ ജീവിതത്തിലേക്കു രോഗം കടന്നുവന്നത്. നല്ല മനുഷ്യരെ ദൈവം പെട്ടെന്നു വിളിക്കും എന്നു നമ്മൾ പലപ്പോഴും പറയാറുണ്ടല്ലോ. പക്ഷേ, ബാലേട്ടന്റെ കാര്യത്തിൽ അങ്ങനെയായിരുന്നില്ല. വർഷങ്ങളോളം രോഗവുമായി മല്ലിട്ട് വേദനയിൽ പൊതിഞ്ഞ് ഒടുവിൽ തിരിച്ചറിയാൻപോലും ആകാത്തവിധം മരണത്തിനു കീഴടങ്ങുക. ആ ക്രൂര വിധിയെ നമ്മൾ ശപിച്ചില്ലെങ്കിലല്ലേ അത്ഭഭുതമുള്ളൂ.

സിനിമയിൽ ഞാൻ വന്നകാലം മുതലേയുള്ള അടുപ്പമാണ് ബാലേട്ടനുമായുണ്ടായിരുന്നത്. അന്ന് അദ്ദേഹം നെഗറ്റീവ് വേഷങ്ങളിൽ നിറഞ്ഞാടുകയാണ്. എന്റെ കഥാപാത്രങ്ങളും വില്ലൻമാരായിരുന്നു. ശശികുമാർ സാറിന്റെ ‘അട്ടിമറി’ എന്ന സിനിമയിലാണ് ഞങ്ങൾ ആദ്യം ഒന്നിക്കുന്നതെങ്കിലും ശശിയേട്ട (ഐ.വി. ശശി) ന്റെ ‘അഹിംസ’യിലൂടെയാണ് ഞങ്ങളുടെ സൗഹൃദം ദൃഢമാകുന്നത്. സെറ്റിൽ തമാശ പറഞ്ഞിരിക്കുന്ന ബാലേട്ടനെ മറക്കാനാവില്ല. പുതുമുഖമായ എന്നെപ്പോലുള്ളവർക്ക് അദ്ദേഹത്തിൽ നിന്ന് ഒരുപാടു പഠിക്കാനുണ്ടായിരുന്നു. ക്യാമറയ്ക്കു മുന്നിലെത്തിയാൽ ബാലേട്ടൻ കഥാപാത്രമായി മാറുകയാണ്. പലപ്പോഴും അഭിനയിക്കുകയാണെന്ന കാര്യം അദ്ദേഹം മറന്നുപോകും. സ്റ്റണ്ടുരംഗമാണെങ്കിൽ പ്രത്യേകിച്ചും. എന്റെ മുഖത്ത് ഇപ്പോഴും മായാതെ കിടക്കുന്ന ഒരു പാടുണ്ട്. ഏതോ ഒരു സിനിമയിലെ സംഘട്ടനരംഗത്തിന്റെ ചിത്രീകരണത്തിൽ ബാലേട്ടൻ തന്ന സമ്മാനമാണത്. ഫൈറ്റ് സീനിൽ ബാലേട്ടൻ ശരിക്കും ഇടിച്ചുകളയും. അങ്ങനെ കിട്ടിയ ഒരടിയായിരുന്നു അത്. ബാലേട്ടന്റെ ഓർമയായി ഇപ്പോഴും ആ പാടു ശേഷിക്കുന്നു.

ബാലേട്ടനും ഞാനും സുഹൃത്തുക്കളെപ്പോലെയായിരുന്നു. പ്രായവ്യത്യാസമൊന്നും ഞങ്ങൾക്കിടയിൽ ഉണ്ടായിരുന്നില്ല. എന്തും പറയാനുള്ള സ്വാതന്ത്ര്യം അദ്ദേഹം എനിക്കു തന്നിരുന്നു. ആ സ്വാതന്ത്ര്യം ഞാൻ മിക്കപ്പോഴും എടുത്തിട്ടുമുണ്ട്. അപ്പോഴൊക്കെ ഞാൻ മനസിലാക്കിയ ഒരു കാര്യം നിഷ്‌കളങ്കനായ ഈ മനുഷ്യനെ എന്തിനാണു പ്രേക്ഷകർ ഇത്രയേറെ വെറുക്കുന്നത് എന്നാണ്. അതിന്റെ പ്രധാന കാരണം അദ്ദേഹം അവതരിപ്പിച്ച കഥാപാത്രങ്ങൾ തന്നെയായിരുന്നു. ഒരു കാലഘട്ടം മുഴുവൻ വില്ലൻ വേഷങ്ങളിൽ മാത്രം തളച്ചിടപ്പെടുകയായിരുന്നു ആ പ്രതിഭ. അപ്പോഴും കഥാപാത്രം ആവശ്യപ്പെടുന്നതെന്താണോ അത് നൂറുശതമാനവും പെർഫെക്ഷനോടെ ബാലേട്ടൻ നൽകി. ആറാട്ടും അങ്ങാടിയും ലോറിയും ചാട്ടയുമൊക്കെ പ്രത്യേകിച്ച് സ്ത്രീ പ്രേക്ഷകർക്കിടയിൽ ബാലേട്ടന് ക്രൂരമുഖമാണ് നൽകിയത്. അത് നടന്റെ വിജയമായി കാണാം. പക്ഷേ, തന്നെ കാണുമ്പോൾ സ്ത്രീകൾ ഭയത്തോടുകൂടി മാറിപ്പോകുന്നത് അദ്ദേഹത്തിൽ പലപ്പോഴും വലിയ വിഷമം ഉണ്ടാക്കിയിരുന്നു. എന്നിട്ടും പരാതികളോ പരിഭവങ്ങളോ ഇല്ലാതെ തനിക്കു ലഭിക്കുന്ന വേഷങ്ങളെ സമർപ്പണത്തോടെ അദ്ദേഹം മികവുറ്റതാക്കി.

ഒട്ടനവധി ചിത്രങ്ങളിൽ ബാലേട്ടനും ഞാനും ഒന്നിച്ചിട്ടുണ്ട്. ആദ്യകാലചിത്രങ്ങളിൽ മിക്കതിലും അദ്ദേഹവും ഞാനും വില്ലൻ വേഷങ്ങൾ തന്നെയായിരുന്നു അണിഞ്ഞിരുന്നത്. വില്ലനായ അച്ഛനും മകനും. അല്ലെങ്കിൽ എതിരാളികളായ രണ്ടു വില്ലന്മാർ. ഇങ്ങനെയൊക്കെയായിരുന്നു അക്കാലത്ത് ഞങ്ങളെ തേടിയെത്തിയ വേഷങ്ങൾ. ഒരിക്കലും കഥാപാത്രങ്ങളുടെ വലുപ്പ ചെറുപ്പം ബാലേട്ടനു പ്രശ്‌നമായിരുന്നില്ല. ഏതു വേഷവും ഒരേ മനസോടെയാണ് അദ്ദേഹം സ്വീകരിച്ചത്. ” ലാലേ, അഭിനയം എന്റെ തൊഴിലാണ്. ഞാൻ ആഗ്രഹിക്കുന്ന വേഷങ്ങൾ ചെയ്യണമെന്നു വിചാരിച്ചാൽ വീട്ടിലിരിക്കേണ്ടി വരും.” പലപ്പോഴും ബാലേട്ടൻ പറയാറുണ്ടായിരുന്നു. ഞാൻ നായകനായ പല ചിത്രങ്ങളിലും അദ്ദേഹം സ്വഭാവ കഥാപാത്രങ്ങളെ അവതരിപ്പിച്ചു.

ബാലേട്ടനൊപ്പമുള്ള ഓരോ സിനിമയും ഓരോ അനുഭവമായിരുന്നു. അനുഭവം എന്നു പറഞ്ഞത് ഷൂട്ടിങ് അനുഭവത്തെ കുറിച്ചു മാത്രമല്ല. ഒരുപക്ഷേ, കോഴിക്കോടൻ നാടകവേദിയെക്കുറിച്ച് ഞാൻ കൂടുതലായി അറിഞ്ഞത് ബാലേട്ടനും പപ്പുവേട്ടനും കുഞ്ഞാണ്ടിയേട്ടനും നെല്ലിക്കോട് ഭാസ്‌കരേട്ടനുമൊപ്പമുള്ള അഭിനയാനുഭവങ്ങളിലൂടെയാണ്. നാടകരംഗത്തും മികച്ച നടൻ തന്നെയായിരുന്നു ബാലേട്ടൻ. അരങ്ങിന്റെ കരുത്തുമായാണ് അദ്ദേഹം സിനിമയിലെത്തിയത്. കെ.ടി. സാറിന്റെയും തിക്കോടിയൻ മാഷിന്റെയും ദാമോദരൻ മാഷിന്റെയുമൊക്കെ നാടകങ്ങളിൽ പ്രധാന വേഷം കൈകാര്യം ചെയ്ത നടനായിരുന്നു ബാലേട്ടൻ. ആ വേഷങ്ങളെക്കുറിച്ചൊക്കെ അദ്ദേഹം ഒരുപാടു സംസാരിക്കുമായിരുന്നു. വിശേഷിച്ച് ഒരു കഥാപാത്രത്തെ അദ്ദേഹം ഇഷ്ടപ്പെട്ടിരുന്നു. സോഫാക്ലീസിന്റെ ‘ഈഡിപ്പസി’ലെ ക്രയോണിന്റെ വേഷമായിരുന്നു അത്. കുഞ്ഞാണ്ടിയേട്ടൻ ഈഡിപ്പസായും ബാലേട്ടൻ ക്രയോണായും അരങ്ങു തകർത്ത ഇതിഹാസമായിരുന്നു ആ നാടകമെന്നു പലരും പറഞ്ഞു കേട്ടിട്ടുണ്ട്. നാടകത്തിനുവേണ്ടി ജീവിതം സമർപ്പിച്ച പലരും സിനിമയിലെത്തിയപ്പോൾ ചിലരിലൊക്കെ നാടകാഭിനയം മുഴച്ചു നിന്നിട്ടുണ്ട്. എന്നാൽ ബാലേട്ടൻ സിനിമയിലൊരിക്കലും സ്റ്റേജി ആയിരുന്നില്ല. നാടകത്തിലെയും സിനിമയിലെയും അഭിനയങ്ങൾ വ്യക്തമായി തിരിച്ചറിഞ്ഞിരുന്നു അദ്ദേഹം.

subscribe

Intelligent Writer Versatile Actor
-മുരളി ഗോപി / രാജ്കുമാർ ആർ

Categories:

നടൻ, എഴുത്തുകാരൻ – രണ്ടു റോളുകളും മുരളി ഗോപിയിൽ ഭദ്രം. മലയാളിയെ രസിപ്പിക്കുകയും ചിന്തിപ്പിക്കുകയും ചെയ്ത ഒരുപിടി ചിത്രങ്ങളുടെ തിരക്കഥാകൃത്ത്. ബ്രഹ്മാണ്ഡ ചിത്രം ലൂസിഫർ പിറന്നതും മുരളി ഗോപിയുടെ തൂലികയിൽ. നടനവൈഭവം പ്രകടമാക്കുന്ന, ഓർമയിൽ തങ്ങിനിൽക്കുന്ന എത്രയോ കഥാപാത്രങ്ങൾ. മുരളി ഗോപി സംസാരിക്കുന്നു.

  • മുരളി ഗോപിയെ എല്ലാത്തരം പ്രേക്ഷകർക്കും ഇഷ്ടമാണ്. അതിന്റെ രസതന്ത്രം എന്താണ്

ഞാൻ വളരെ ആത്മാർത്ഥമായിട്ടാണ് എന്റെ ജോലി ചെയ്യുന്നത്. എന്റെ സിനിമ, ഞാൻ എഴുതുന്ന സിനിമ പരമാവധി ജനങ്ങൾ കാണുകയും ആസ്വദിക്കുകയും ചെയ്യണം എന്നാണ് തിരക്കഥാകൃത്തെന്ന നിലയിൽ എന്റെ ഏറ്റവും വലിയ ആഗ്രഹം. നിരൂപകരുടെ ഇടനിലയില്ലാതെ, സിനിമയുമായി മുഖാമുഖം സംവദിക്കുന്നവരാണ് യഥാർത്ഥ ആസ്വാദകർ. അവർ എനിക്കു സ്‌നേഹം തരുന്നു എന്നറിയുന്നതിൽ സന്തോഷം. അതാണെനിക്ക് പരമപ്രധാനം.

  • മാസ് സിനിമകൾ, ലൂസിഫർ

എനിക്ക് ഇഷ്ടമുള്ള പല ജനുസുകളിൽ ഒന്നാണ് മാസ് എന്റടെയ്‌നറുകൾ. ഈ വിഭാഗത്തിൽപ്പെട്ട ഞാനെഴുതിയ സിനിമ എന്ന നിലയിലാണ് ലൂസിഫറിനെ ഞാൻ കാണുന്നത്. ആളുകളെ രസിപ്പിക്കുമ്പോൾത്തന്നെ, കാഴ്ചയ്ക്കു ശേഷമുള്ള ഒരു ചെറു ചിന്താപ്രതലം അവശേഷിപ്പിച്ചുപോകുക എന്നതായിരുന്നു ലക്ഷ്യം. അതിൽ വിജയിച്ചതിൽ സന്തോഷം.
കാസ്റ്റിങ്ങും എഴുത്തും രണ്ടും രണ്ടു പ്രക്രിയകളാണ്. എഴുതിക്കഴിഞ്ഞാൽ എനിക്ക് ഏറ്റവും പ്രിയപ്പെട്ട പ്രക്രിയയും കാസ്റ്റിങ് തന്നെയാണ്. ശരിയായ കാസ്റ്റിങ് നടന്നാൽത്തന്നെ ഒരു സിനിമ പ്രാഥമിക വിജയം കൈവരിച്ചു എന്നു ഞാൻ പറയും. ലൂസിഫറിന്റെ കാസ്റ്റിൽ ഒരിടത്തും ഞാൻ എന്ന നടനെ എനിക്ക് ദർശിക്കാനായില്ല. അതുകൊണ്ടുതന്നെയാണ് ഞാൻ അതിൽ അഭിനയിക്കാത്തത്.

  • കഥാപാത്രങ്ങൾ

കഥാപാത്രം എത്ര തന്നെ നന്നായാലും അതിന്റെ മർമം അറിഞ്ഞ് അഭിനയിക്കുന്നവർ ഇല്ലെങ്കിൽ അത് ഓർമിക്കപ്പെടുകയേ ഇല്ല. കഥാപാത്രത്തിന്റെ ശക്തി പോലെ തന്നെ നടന്റെ വൈഭവവും ഓർമിക്കപ്പെടലിന്റെ ഒരു വലിയ ഘടകമാണ്.

  • മോഹൻലാലിനൊപ്പം

ഇന്ത്യൻ സിനിമയിലെ അതുല്യ താരമായ ലാലേട്ടനൊപ്പം പ്രോജക്ട് ചെയ്യാനായത് സന്തോഷകരമാണ്. ലൂസിഫറിന്റെ കാര്യത്തിലാണെങ്കിൽ, ആ സിനിമ നേടിയ വിജയവും മധുരിക്കുന്നതാണ്. സാധാരണ മാസ് സിനിമകളിൽ ഒരുപാട് ഡയലോഗടിക്കുന്ന നായകന്മാരാണ്. സ്റ്റീഫൻ നെടുമ്പള്ളി എന്ന മോഹൻലാൽ കഥാപാത്രം ഒരു മഞ്ഞുമലയുടെ അറ്റം മാത്രമാണ്. കാണാത്ത ഒരു വശം അയാളിലുണ്ട്. പറയപ്പെടാത്ത ദു:ഖങ്ങളും. അങ്ങനെയുള്ള കഥാപാത്രങ്ങൾ പ്രകൃതവശാൽ കുറച്ചേ സംസാരിക്കൂ എങ്കിലും പറയുന്നതിൽ യുക്തിയുണ്ടാവും. സ്റ്റീഫൻ നെടുമ്പള്ളിയുടെ കണ്ണുകൾ സംസാരിക്കുന്നത്ര അയാൾ വാക്കുകളിലൂടെ സംസാരിക്കുന്നില്ല. ആ നിലയിൽ അതിയായ ആഴമുണ്ട് ലാലേട്ടന്റെ പ്രകടനത്തിന്. എഴുതുന്ന വാക്കുകൾക്കിടയിലുള്ള മൗനങ്ങളെ വായിക്കാൻ കെൽപ്പുള്ളവരാണ് മഹാനടന്മാർ. ലാലേട്ടൻ അങ്ങനെയൊരു നടനാണെന്ന് ഞാൻ പറഞ്ഞ് അറിയിക്കേണ്ട ആവശ്യമില്ലല്ലോ..!

  • മമ്മൂക്കയുമായി ഒരു പ്രോജക്ട് പ്രതീക്ഷയും

മഹാനടനാണ് അദ്ദേഹം. മലയാള ഭാഷയുടെ തേജസും വീര്യമുള്ള നടനത്തിന്റെ ഓജസും ഒരുമിച്ചൊന്നായ മഹാനടൻ. അതുകൊണ്ടുതന്നെ, എഴുത്തുകാരൻ എന്ന നിലയിൽ എന്നെ കൊതിപ്പിക്കുന്ന നടനും കൂടിയാണ്. അദ്ദേഹവുമായി ഒന്നല്ല, ഒരുപാട് ചിത്രങ്ങൾ ചെയ്യാൻ താത്പര്യമുണ്ട്. അദ്ദേഹത്തെ അതിനായി വിട്ടുതരേണ്ടത് അദ്ദേഹം തന്നെയാണ് (ചിരിക്കുന്നു).

  • താങ്കളുടെ കഥാപാത്രമായി തിരശീലയിൽ കാണാൻ ആഗ്രഹമുള്ള അഭിനേതാക്കൾ

അമിതാഭ് ബച്ചൻ, അൽ പച്ചീനോ, മെറിൽ സ്ട്രീപ്പ്, കേറ്റ് ബ്ലാൻചറ്റ്, ജൂഡി ഫോസ്റ്റർ, കമൽഹാസൻ, മമ്മൂട്ടി… പോരേ…? (ചിരിക്കുന്നു)

  • ലെഫ്റ്റ് റൈറ്റ് ലെഫ്റ്റ്, ടിയാൻ, കമ്മാരസംഭവം തുടങ്ങിയവ പ്രവചന സ്വഭാവമുള്ള ചിത്രങ്ങളാണ്. ഇപ്പോൾ വലിയ അപ്രീസിയേഷനാണ് കിട്ടുന്നത്

പ്രവചനസ്വഭാവം ഉണ്ടാവുക എന്നത് അത് ശരിയായ ശ്രമമായിരുന്നു എന്നതിന്റെ വലിയ തെളിവാണ്. ഒരു കലാകാരന് അന്നന്നു ചെയ്യുന്ന ജോലിക്ക് അന്നുതന്നെ കൂലി കിട്ടിക്കൊള്ളണമെന്നില്ല. സമകാലിക നിരൂപകരെന്ന ഇടനിലക്കാരും അവാർഡ് കമ്മിറ്റികളിലെ കൊച്ചുമുതലാളിമാരുമല്ല അവന്റെ കൂലി നിശ്ചയിക്കുക, കാലം എന്ന വലിയ മുതലാളിയാണ്.

  • പ്രചോദിപ്പിച്ച തിരക്കഥാകൃത്തുകൾ

പി. പത്മരാജൻ, ക്രിസ്റ്റഫർ നോലൻ, ക്വിന്റിൻ ടാരന്റ്‌റീനോ, സത്യജിത്ത് റായ്, സലിംജാവെദ്, ശ്രീനിവാസൻ, അടൂർ ഗോപാലകൃഷ്ണൻ, ലോഹിതദാസ്… അങ്ങനെ ഒരു വലിയ നിര തന്നെയുണ്ട്. എല്ലാ ജോണറുകളിലുമുള്ള, രീതികളിലുമുള്ള എഴുത്തുകൾ ഇഷ്ടമാണ്.

subscribe

ഞാൻ സാധാരണക്കാരൻ
-മണികണ്ഠൻ ആചാരി / ബി. ഹരികൃഷ്ണൻ

Categories:

ആദ്യ ചിത്രമായ കമ്മട്ടിപ്പാടത്തിലെ ബാലേട്ടൻ എന്ന കഥാപാത്രത്തിലൂടെ മലയാളി പ്രേക്ഷകരുടെ മനസിൽ ഇടം നേടിയ നടനാണ് മണികണ്ഠൻ ആചാരി. മികച്ച സ്വഭാവനടനുള്ള പുരസ്‌കാരവും ബാലേട്ടനിലൂടെ അദ്ദേഹത്തെ തേടിയെത്തി. അലമാര, ഈട, വർണ്യത്തിൽ ആശങ്ക, കാർബൺ, കായംകുളം കൊച്ചുണ്ണി തുടങ്ങിയ ചിത്രങ്ങളിലും ബ്രഹ്മാണ്ഡ ചിത്രം പേട്ടയിലും മണികണ്ഠൻ അഭിനയിച്ചു. മണികണ്ഠൻ സിനിമാവിശേഷങ്ങൾ പറയുന്നു.

  • മാമാങ്കത്തിലെ കുങ്കൻ

മാമാങ്കത്തിൽ വളരെ ചെറിയൊരു കഥാപാത്രത്തെയാണ് ഞാൻ അവതരിപ്പിച്ചത്. പത്തുപതിനഞ്ച് മിനിറ്റ് മാത്രമേ ഞാൻ ആ ചിത്രത്തിൽ ഉള്ളൂ. ആ കഥയും കഥാപാത്രങ്ങളെയും എല്ലാവർക്കും അറിയാവുന്നതാണ്. എന്റെ കഥാപാത്രം മമ്മൂക്ക ചെയ്യുന്ന കഥാപാത്രത്തിന്റെ യാത്രയിൽ സഹായിക്കുന്ന ഒരു കഥാപാത്രമാണ്. സാമൂതിരിക്കെതിരേ പടപൊരുതുന്നവരെ സഹായിക്കുന്ന കഥാപാത്രം. കുങ്കൻ എന്നാണ് കഥാപാത്രത്തിന്റെ പേര്. അത് ചെയ്യാനായിട്ട് പ്രത്യേകിച്ച് തയാറെടുപ്പുകൾ ഒന്നും നടത്തിയിട്ടില്ല. ആ കാലത്തെ ഭാഷയാണ് ഉപയോഗിക്കുന്നത് അത് പറഞ്ഞു തരുമ്പോൾ പഠിക്കാൻ ശ്രമിച്ചു. ശാരീരികമായിട്ടോ മറ്റു വലിയ തയാറെടുപ്പുകൾ ഒന്നും വേണ്ടുന്ന ഒരു കഥാപാത്രമല്ല. ഒരു സപ്പോർട്ടിങ് കഥാപാത്രമാണ്. വളരെ കുറച്ചു സ്ഥലങ്ങളിൽ മാത്രം വരുന്നു.

  • നടൻ ഓപ്പണാവണം

ഒരു നടൻ എന്ന നിലയിലും മനുഷ്യൻ എന്ന നിലയിലും സംതൃപ്തി ലഭിക്കുന്നത്, എന്റെ അഭിപ്രായത്തിൽ നിർവാണ അവസ്ഥയിൽ നിൽക്കുമ്പോഴാണ്. നിർവാണ അവസ്ഥ എന്ന് പറയുന്നത് നമ്മൾ ഒന്നുമില്ലാതെ, അതായത് ഉള്ളതെല്ലാം തുറന്ന് കാണിച്ച് ഓപ്പണായി നിൽക്കുമ്പോഴാണ്. അപ്പോൾ ലഭിക്കുന്ന ഒരു പരമാനന്ദ സുഖമുണ്ട്. അത് മനുഷ്യജീവിതത്തിൽ എല്ലാവർക്കും കിട്ടുന്നതല്ല. അതിന് വേണ്ടിയാണ് എല്ലാവരും ജീവിക്കുന്നതെന്ന് തോന്നുന്നു. ഒന്നുമില്ലാത്ത അവസ്ഥയിലേക്ക്, നഗ്‌നമായ അവസ്ഥയിലേക്ക് എത്താൻ വേണ്ടിയുള്ള പ്രയാണമാണ് ജീവിതം. അതുപോലെ തന്നെയാണ് അഭിനയവും. എന്റെ എല്ലാ കഴിവുകളും തുറന്ന് കാണിച്ച് നിൽക്കാൻ കഴിയുക. അങ്ങനത്തെ ഒരവസരം കിട്ടുക. അതിന് വേണ്ടിയിട്ടാണ് എന്റെ മുന്നോട്ടുള്ള പോക്ക്. അതാണ് ഏറ്റവും വലിയ ആഗ്രഹവും. അത് ഏതു വരെ സാധിച്ചിട്ടുണ്ട് എന്ന് ചോദിച്ചാൽ, കമ്മട്ടിപ്പാടം എന്റെ ആദ്യ സിനിമയാണ്. ആദ്യ സിനിമയിൽത്തന്നെ അതിന്റെ അടുത്തുവരെ എത്താൻ കഴിഞ്ഞു. തുണിയില്ലാതെ നിൽക്കുക എന്നല്ല അതിന്റെ അർത്ഥം. നമ്മുടെ മനസിനെ നിയന്ത്രിക്കാതെ, നമ്മുടെ വികാരങ്ങളെ കടിഞ്ഞാണിട്ട് പൂട്ടിവയ്ക്കാതെ എല്ലാം തുറന്ന് ഓപ്പണാവാൻ പറ്റിയിട്ടുള്ളത് കമ്മട്ടിപ്പാടത്തിലെ ബാലൻ എന്ന കഥാപാത്രം മാത്രമാണ്. അതിനുശേഷം എല്ലാത്തിനും ഒരു ഒളിവും മറയും ഉണ്ട്. ഒരു മതിൽ കെട്ടിനകത്ത് നിന്നു കൊണ്ടാണ് എല്ലാ കഥാപാത്രങ്ങളും നിൽക്കുന്നത്. അപ്പോൾ അത് ഇതുവരെ പൊളിക്കാൻ പറ്റിയിട്ടില്ല. അതാണ് എന്റെയൊരാഗ്രഹം. അതിനു വേണ്ടിയാണ് ഞാൻ കാത്തിരിക്കുന്നത്.

subscribe

Udhayraj rising star of Kollywood
-Udhayraj

Categories:
  • തമിഴിയിൽ നായകനായി അരങ്ങേറ്റം

നായകനായി തുടക്കം തമിഴിൽ ആണെങ്കിലും ആറു വർഷം മുമ്പ് മലയാളത്തിൽ ആസിഫ് അലി നായകനായ കൗബോയ് എന്ന ചിത്രത്തിൽ ഒരു പ്രധാന വേഷം ചെയ്തിരുന്നു. അതായിരുന്നു സിനിമയിലേക്കുള്ള എന്റെ കാൽവയ്പ്പ്. ചെറുപ്പം മുതലേ തമിഴ് സിനിമയോട് ഒരു പ്രത്യേക ഇഷ്ട്ടം ഉണ്ടായിരുന്നു. 2019 സെപ്റ്റംബർ REEL എന്ന തമിഴ് സിനിമയിലൂടെ എനിക്ക് തമിഴ് ഫിലിം ഇൻഡുസ്ട്രിയിൽ എത്തിപ്പെടാൻ കഴിഞ്ഞു. ലിംഗുസാമി എന്ന പ്രശസ്ത സംവിധായകന്റെ കൂടെ വർക്ക് ചെയ്ത മുനുസാമി ആയിരുന്നു REEL ന്റെ സംവിധായകൻ. കോയമ്പത്തൂരിൽ ‘Kovai stars ‘ ഷാഹുലിന്റെ നേതൃത്വത്തിൽ നടന്ന ഓഡിഷനിൽ പങ്കെടുത്തിരുന്നു. അങ്ങനെയാണ് ഈ പ്രോജക്ടിന്റെ ഭാഗമാകുന്നത്. മലയാള സിനിമയിലെ ജനപ്രിയനായകൻ ദിലീപിന്റെ സഹോദരി ഭർത്താവ് സൂരജിന്റെയാണ് കഥയും തിരക്കഥയും. വിജയ് ടിവി ഫെയിം ശരത്തിന്റെ കൂടെയുള്ള അഭിനയ മുഹൂർത്തങ്ങൾ അവസ്മരണീയമായിരുന്നു. നായിക മലയാളിയായ അവന്തിക ആയിരുന്നു. എന്റെ തമിഴിലെ അരങ്ങേറ്റം ഉദയ്‌രാജ് എന്ന പേരിലായിരുന്നു.
REEL എന്ന സിനിമ ശ്രദ്ധിക്കപ്പെട്ടിരുന്നു. ആദ്യമായി കേന്ദ്രകഥാപാത്രത്തെ അവതരിപ്പിച്ച സിനിമയിൽ എനിക്കും പ്രേക്ഷപ്രീതി കിട്ടിയെന്നത് നടനെന്ന നിലയിൽ തുടരാനുള്ള ആത്മവിശ്വാസവും ലഭിച്ചു.

  • വീണ്ടും തമിഴിൽ

രണ്ടാമത്തെ തമിഴ് ചിത്രം ‘ അഗ്‌നിനക്ഷത്രം ‘ ഷൂട്ട് നടന്നുകൊണ്ടിരിക്കുന്നു. ജനുവരി അവസാനം ചിത്രീകരണം പൂർത്തിയാകും. ശരൺ ആണ് ചിത്രത്തിന്റെ സംവിധായകൻ. ഈ ചിത്രത്തിൽ വിവേക് , വിദ്ധാർത്ഥ്, ഉദയ, സ്മൃതി വെങ്കിട്, ശ്രീപല്ലവി, രതിക എന്നിവരും അഭിനയിക്കുന്നു. വേദമൂർത്തി എന്ന പേരിൽ ഒരു ഇൻവെസ്റ്റിഗേഷൻ ഓഫീസർ ആയി ഒരു പ്രധാന വേഷം ഞാൻ കൈകാര്യം ചെയ്യുന്നു. വ്യത്യസ്തമായ കഥാസന്ദർഭങ്ങളിലൂടെ കടന്നുപോകുന്ന സിനിമ മികച്ച ത്രില്ലർ ആയിരിക്കും.

  • ഷോർട്ട് ഫിലിമുകൾ, ആൽബങ്ങൾ

സത്യം ഓഡിയോസ്, മില്ലേനിയം ഓഡിയോസ് എന്നീ മ്യൂസിക് കമ്പനികളുടെ നിരവധി വീഡിയോ ആൽബങ്ങളിൽ അഭിനിയിക്കാൻ കഴിഞ്ഞു. 2006 മുതലുള്ള കാലഘട്ടങ്ങളിലാണ് വീഡിയോ ആൽബങ്ങളിലും ഷോർട്ട് ഫിലിമുകളിലും അഭിനയിച്ചത്. അതെല്ലാം നടനെന്ന നിലയിൽ എന്നെ വാർത്തെടുക്കാൻ സഹായിച്ചു. ‘നാം പാതി ദൈവം പാതി ‘എന്ന ഷോർട് ഫിലിം വളരെയധികം ശ്രദ്ധിക്കപ്പെട്ടു. കൗബോയ് എന്ന സിനിമയിൽ എനിക്ക് അവസരം ലഭിക്കാനുള്ള വാതിൽ തുറന്നത് ഇത്തരം ആർബങ്ങളിലെ പരിചയമാണ്. പി. ബാലചന്ദ്രകുമാർ കൗബോയ് സിനിമയുടെ സംവിധായകൻ. ആസിഫ് അലി കേന്ദ്ര കഥാപാത്രമായ സിനിമയിൽ ബാല, മൈഥിലി എന്നിവരും മുഖ്യകഥാപാത്രങ്ങളെ അവതരിപ്പിച്ചു. ബാലചന്ദ്രകുമാറിന്റെ അടുത്ത ചിത്രമായ പിക്ക്‌പോക്കറ്റിൽ അഭിനയിക്കാൻ ക്ഷണം ലഭിച്ചിട്ടുണ്ട്.

  • പഠനകാലവും കലാപ്രവർത്തനങ്ങളും

സ്‌കൂൾ-കോളേജ് തലങ്ങളിൽ മിമിക്രി, മോണോആക്ട്, ഡ്രാമ തുടങ്ങിയവയിൽ സജീവമായി പങ്കെടുത്തിരുന്നു. കവിതകളും എഴുതുമായിരുന്നു. നിരവധി കവിതകൾ എഴുതിയിട്ടുണ്ട്. ‘പ്രണയം പറഞ്ഞ കഥകൾ ‘എന്നൊരു സമാഹാരം പ്രസിദ്ധീകരിച്ചിട്ടുണ്ട്. അന്നു പൊതുമരാമത്തു മന്ത്രിയായിരുന്ന വി.കെ. ഇബ്രാഹിംകുഞ്ഞ്, കൊച്ചി മേയറായിരുന്ന ടോണി ചമ്മണി എന്നിവരാണ് കവിതസമാഹാരം പ്രകാശനം ചെയ്തത്. നിരവധി ആൽബം, ഭക്തിഗാനങ്ങൾ രചിച്ചിട്ടുണ്ട്. യൂറോപ്പിൽ ഷൂട്ട് ചെയ്ത ഡ്രീം, നിന്നോർമയിൽ എന്നീ ആൽബങ്ങൾ ജനശ്രദ്ധ ആകർച്ചിവയാണ്. കൂടാതെ, നടൻ ജയസൂര്യ ആലപിച്ച ഓർമത്താളുകൾ എന്ന ആൽബവും ശ്രദ്ധിക്കപ്പെട്ടു. പൂവുതേടും പൂങ്കാറ്റ്, തൊട്ടാവാടിപെണ്ണ് തുടങ്ങിയ നിരവധി ആൽബങ്ങളിൽ അഭിനയിച്ചിട്ടുണ്ട്. പൂർണമായും യൂറോപ്പിൽ ഷൂട്ട് ചെയ്ത ‘ ഷാഡോ ഓഫ് ട്രൂത് ‘ എന്ന ഷോർട് ഫിലിം എടുത്തുപറയേണ്ടതാണ്. 45 മിനിറ്റ് ദൈർഘ്യമുള്ള ഷോർട് ഫിലിം വളരെ വിജയകരമായി ഷൂട്ട് ചെയ്യാൻ സാധിച്ചു. ബിജോയ് കണ്ണൂർ എന്ന പേരിലാണ് ഇതെല്ലാം ഇറക്കിയിട്ടുള്ളത്.

subscribe