January 2021

You Are Here: Home / January 2021

കഥകളി നടനും ചലച്ചിത്ര നടനും
മോഹൻലാൽ

Categories:

കഥകളി നടന്റെ ആത്മസംഘർഷങ്ങളുടെ പകർന്നാട്ടം മാത്രമായിരുന്നില്ല, ‘വാനപ്രസ്ഥം’ എന്ന സിനിമ എനിക്കു നൽകിയത്. കളിവിളക്കിനും വെള്ളിവെളിച്ചത്തിനുമിടയിൽ അപൂർവമായ ചില സൗഹൃദങ്ങളും വിശിഷ്ടമായ ഗുരു-ശിഷ്യ ബന്ധങ്ങളുമൊക്കെ രൂപപ്പെടുകയായിരുന്നു ആ സിനിമയിലൂടെ. സിനിമാനടൻ കഥകളിയിലേക്കും കഥകളിനടൻ സിനിമയിലേക്കും ചുവടുമാറ്റിയ അനുഭവം. സ്‌നേഹബന്ധങ്ങളുടെ ഊഷ്മളതയും ആഴത്തിലുള്ള ഗുരുഭക്തിയും വാനപ്രസ്ഥം എന്നിൽ നിറച്ചുതന്നു. കലയ്ക്കുവേണ്ടി, ജീവിതം ഉഴിഞ്ഞുവച്ച ഒരു കൂട്ടം കലാകാരന്മാർക്കൊപ്പമായിരുന്നു ആ നാളുകളിലെ എന്റെ ജീവിതം. കുട്ടിക്കാലത്ത് അച്ഛനൊപ്പം ക്ഷേത്രത്തിൽപോയി കഥകളികണ്ട ഓർമയുണ്ട്. കാലം കടന്നുപോകുമ്പോൾ ഒരു കഥകളി നടനായി എനിക്കും ചുട്ടികുത്തേണ്ടി വരുമെന്നു സ്വപ്‌നത്തിൽപോലും കരുതിയതല്ല. ഒരായുഷ്‌കാലത്തിൽ അപൂർവമായി മാത്രം വന്നുചേരുന്ന സൗഹൃദങ്ങൾ വാനപ്രസ്ഥം എനിക്കു സമ്മാനിച്ചു. ആ സ്‌നേഹത്തിന്റെ, സൗഹൃദത്തിന്റെ ഇഴയടുപ്പമാണ് കലാമണ്ഡലം ഗോപിയാശാൻ.

ക്ലാസിക്കൽ കലയുടെ ധന്യത വളരെ മുമ്പെ അറിയാനും അനുഭവിക്കാനും എന്നിലെ നടനു കഴിഞ്ഞിട്ടുണ്ട്. മുപ്പതുവർഷങ്ങൾക്കു മുമ്പ് ‘രംഗം’ എന്ന സിനിമയിലൂടെയായിരുന്നു അത്. പക്ഷേ, കഥകളിയിലെ സകല ഭാവതലങ്ങളും എന്റെ ശരീരഭാഷയോടു ചേർത്തു പകർന്നാടാനായത് വാനപ്രസ്ഥത്തിലായിരുന്നു. ‘വളരെ ഡൗൺ ടു എർത്താ’യിട്ടുള്ള കലാകാരന്മാരെ കണ്ട നിമിഷങ്ങളായിരുന്നു അത്. അവരിൽ നിന്ന് അറിഞ്ഞും അറിയാതെയും ഒത്തിരി കാര്യങ്ങൾ ഞാൻ പഠിച്ചു. അവരോടൊപ്പമുള്ള ജീവിതം എന്നെ തിരുത്തിയിട്ടുണ്ട്. എന്റെ പെരുമാറ്റം, സ്വഭാവം എന്നിവയിലെല്ലാം ആ ദിവസങ്ങളിൽ മാറ്റമുണ്ടായി. പിന്നെ കഥകളിയിലെ കുലപതികളായവരുടെ മുമ്പിൽ കഥകളി വേഷമിട്ടഭിനയിക്കുക എന്നത് ഒരു ഭാഗ്യവും ഗുരുത്വവുമായിട്ടാണ് ഞാൻ കാണുന്നത്.
‘വാനപ്രസ്ഥ’ത്തിൽ അഭിനയിക്കാൻ എത്തിയപ്പോഴാണ് ഗോപിയാശാനെ ആദ്യമായി കാണുന്നത്. വരിക്കാശേരി മനയുടെ മുറ്റത്തുവച്ച്. എത്രയോ അരങ്ങുകളിൽ, എണ്ണമറ്റ രാവുകളിൽ പ്രേക്ഷകരെ ആസ്വാദനത്തിന്റെ കൊടുമുടിയിലെത്തിച്ച ആ മഹാനടനെ കാണുന്നതുപോലും ഒരു പുണ്യമാണ്.

കഥകളിനടന്റെ ഭാവചേഷ്ടകൾ എന്റെ ശരീരം എങ്ങനെ ഏറ്റുവാങ്ങിയെന്ന് എനിക്ക് ഇന്നും മനസിലാകുന്നില്ല. അഭിനയത്തിന്റെ ഓരോ മാത്രയിലും കഥകളിയുടെ ആയിരക്കണക്കിന് അരങ്ങുകൾ താണ്ടിയ ഗോപിയാശാൻ എനിക്കുമുന്നിൽ പ്രോത്സാഹനങ്ങളുമായി നിന്നു. വാനപ്രസ്ഥത്തിൽ എന്റെ ഭാര്യയുടെ അച്ഛന്റെ വേഷത്തിലാണ് ഗോപിയാശാൻ എത്തിയത്. കഥകളിയെക്കുറിച്ചുള്ള എന്റെ സംശയങ്ങൾക്ക് അദ്ദേഹം ആഴത്തിലുള്ള മറുപടി തന്നു. സിനിമാഭിനയത്തെക്കുറിച്ച് ആശാനും എന്നോടു പലതും ചോദിക്കാനുണ്ടായിരുന്നു. എന്നാലാവും വിധം ഞാൻ അദ്ദേഹത്തിനു പറഞ്ഞുകൊടുത്തു. കഥകളി നടനും ചലച്ചിത്ര നടനും തമ്മിലുള്ള ഒരു കൊടുക്കൽ വാങ്ങൽ രീതിയായിരുന്നു അത്.

‘കർണ്ണഭാരം’ നാടകത്തിനു ശേഷം എന്റെ അഭിനയ ഭൂമികയിലേക്കു വീണ്ടും കടന്നുവന്ന ഇതിഹാസമാനമുള്ള മറ്റൊരു കഥാപാത്രമായിരുന്നു ‘ഛായാമുഖി’യിലെ ഭീമൻ. ഗോപിയാശാനെ ഓർക്കുമ്പോഴെല്ലാം മനസിൽ ആർത്തിരമ്പി വരുന്നതും ഭീമനാണ്. അരങ്ങിൽ ആശാന്റെ ഭീമനെ ഞാൻ കൊതിയോടെ കണ്ടുനിന്നിട്ടുണ്ട്. കഥകളി ആസ്വാദകരെ വിസ്മയങ്ങളുടെ മുൾമുനയിൽ നിർത്തിയ ആശാന്റെ രൗദ്രഭീമനെക്കുറിച്ച് എത്രയോവട്ടം കേട്ടിട്ടുമുണ്ട്. ഛായാമുഖി നാടകത്തിൽ എന്റെ കഥാപാത്രം ഭീമനാണെന്നറിഞ്ഞപ്പോൾ അദ്ദേഹത്തിനു വലിയ സന്തോഷമായിരുന്നു. റിഹേഴ്‌സലിനിടയ്ക്ക് ആശാൻ എന്റെ ഭീമനെ കാണാനെത്തി. അതു മറക്കാനാവാത്ത ഒരനുഭവമായിരുന്നു. കഥകളിയിൽ ഭീമനായുള്ള പകർന്നാട്ടങ്ങൾ എത്രയോവട്ടം നടത്തിയ ആശാൻ എനിക്കു മുമ്പിൽ എത്തിയപ്പോൾ ഞങ്ങൾ വാരിപ്പുണർന്നു. ഒരർത്ഥത്തിൽ രണ്ടുഭീമന്മാർ തമ്മിലുള്ള സമാഗമമായിരുന്നു അത്. കഥകളിയിലെ ഭീമൻ നാടകത്തിലെ ഭീമനു നൽകിയ അനുഗ്രഹം. ആ കരസ്പർശം ഇന്നും എന്റെ നെറുകയിലുണ്ട്.

subscribe

കഥാപാത്രങ്ങളും അനുഭവങ്ങളും
മധു

Categories:

ഓരോ ലൊക്കേഷനിൽ എത്തുമ്പോഴും പുതിയ കുറേ കുട്ടികളെ കാണാം. അഭിനയിക്കാൻ വേണ്ടിമാത്രമല്ല എഴുത്തിലെയും സംവിധാനത്തിലെയും സഹായികളായും എത്തുന്ന അവരെ പിന്നീട് കാണാറേയില്ല. സിനിമ അത്ര പെട്ടെന്ന് പഠിക്കാൻ പറ്റില്ല. മിക്കവർക്കും ഒറ്റ സിനിമയിലൂടെ പണവും പ്രശസ്തിയും നേടണം എന്നാണ് ആഗ്രഹം. അങ്ങനെയൊരു ആഗ്രഹത്തിന്റെ പുറത്ത് സിനിമയിലെത്തുന്നവർക്ക് ഒറ്റ സിനിമയോടുകൂടി ആ പരിപാടി അവസാനിപ്പിക്കേണ്ടതായി വരും. ക്ഷമയോടെ സഹിച്ചു പഠിച്ചു മുന്നേറുന്നവർക്കാണ് എന്നും ജീവിതത്തിൽ വിജയങ്ങൾ ഉണ്ടാകുക. അഭിനയരംഗം നൽകിയ പതിറ്റാണ്ടുകളുടെ അനുഭവങ്ങളിലേക്കു തിരിഞ്ഞുനോക്കുമ്പോൾ ഓർമകൾ നന്മയുടെയും സ്‌നേഹത്തിന്റെയും തണൽ മരങ്ങളായ് ഉയർന്നു നിൽക്കും. ചിലപ്പോൾ വേദനകളുടെ കൂടാരങ്ങളിൽ അകപ്പെട്ടപോലെ തോന്നും.

കടന്നുവന്ന വഴികളിലെ സന്തോഷവും സ്‌നേഹവും ദുഃഖവുമെല്ലാം സിൽവർ സ്‌ക്രീനിൽ എന്നപോലെ എനിക്കുമുന്നിൽ തെളിയും. ഒരർത്ഥത്തിൽ എന്നെ ഞാനാക്കിയത് അനുഭവങ്ങളാണ്. ആ അനുഭവങ്ങളോട് ഞാനെന്നും നന്ദിയുള്ളവനായിരിക്കും. അന്നും ഇന്നും എന്നും എനിക്കു കരുത്താകുന്നത് അനുഭവങ്ങൾ തന്നെയാണ്. നാടകത്തിലും സിനിമയിലും ഒരുപാട് മഹാരഥന്മാരോടൊപ്പം അഭിനയിക്കാൻ കഴിഞ്ഞത് എന്നിലെ അഭിനേതാവിന്റെ പുണ്യമായി ഞാൻ കാണുന്നു. ഓരോ കഥാപാത്രങ്ങളും ഓരോ അനുഭവങ്ങളാണ് എനിക്കും നൽകിയത്. ആ അനുഭവ പശ്ചാത്തലത്തിൽ നിന്നുകൊണ്ടു പറയുകയാണെങ്കിൽ പഴയതലമുറയ്ക്ക് ഉണ്ടായതിനേക്കാൾ വലിയ അനുഭവങ്ങളൊന്നും പുതിയ കാലത്തെ കുട്ടികൾക്കില്ല. എങ്കിലും അവരുടെ ഭാവനകൾ സമൃദ്ധമാണ്. സിനിമയിൽ വലിയ വലിയ സ്വപ്നങ്ങളാണ് അവർ കാണുന്നത്. അതിലെ സർഗാത്മകത വളരെ വലുതാണ്.

സത്യൻ മാഷ് മുതൽ എത്രയോ നടന്മാർക്കൊപ്പവും ഷീല മുതൽ നിരവധി നായികന്മാർക്കൊപ്പവും കടന്നുപോയ എന്റെ അഭിനയജീവിതത്തിൽ ഇന്നത്തെ യുവതാരങ്ങൾക്കൊപ്പമുള്ള അഭിനയാനുഭവം ഏറെ വ്യത്യസ്തമാണ്. ഒരു സീനിയർ ആർട്ടിസ്റ്റിനു ലഭിക്കുന്ന എല്ലാ ആദരവും ഇന്നത്തെ കുട്ടികൾ എനിക്കു നൽകുന്നുണ്ട്. മുതിർന്നവരെ ബഹുമാനിക്കാൻ അവർക്കു പറഞ്ഞുകൊടുക്കേണ്ടതില്ല. അതൊരു ഗുരുത്വമാണ്. ചിലപ്പോൾ അച്ഛന്റെ സ്ഥാനത്തു മറ്റു ചിലപ്പോൾ സഹോദരന്റെ സ്ഥാനത്ത് അല്ലെങ്കിൽ ഗുരുതുല്യനായ ഒരാളുടെ സ്ഥാനത്ത് ഇങ്ങനെയൊക്കെ പുതിയതലമുറയിലെ കുട്ടികൾ എനിക്കു നൽകുന്ന സ്‌നേഹം പറഞ്ഞറിയിക്കാനാവില്ല.

ആദ്യമായി മൂവി ക്യാമറയെ അഭിമുഖീകരിക്കുമ്പോൾ എനിക്കുണ്ടായ ആശങ്കപോലും ഇന്നത്തെ കുട്ടികൾക്കില്ലെന്നാണു തോന്നുന്നത്. അത്രമാത്രം സ്വാഭാവികതയോടെയാണ് അവർ അഭിനയത്തെ സമീപിക്കുന്നത്. തൊണ്ണൂറുശതമാനം പേർക്കും ആക്ടിങ് ഒരു ആവേശവും ലഹരിയുമാണ്. എന്റെ അനുഭവത്തിൽ ഓരോ കാലത്തും സിനിമയിലേക്കു കടന്നുവന്ന പുതുതലമുറയുടെ അഭിനയരീതിയേക്കാൾ ഏറെ മുന്നിൽ നിൽക്കുന്നത് ഇന്നത്തെ ന്യൂജനറേഷൻ തന്നെയാണ്. സിനിമയുടെ ചരിത്രത്തെക്കുറിച്ചോ അല്ലെങ്കിൽ പഴയകാല നടീനടന്മാരെക്കുറിച്ചോ അതുമല്ലെങ്കിൽ അന്നത്തെ സിനിമാരീതികളെക്കുറിച്ചോ കാര്യമായ അറിവൊന്നും ഇന്നത്തെ കുട്ടികൾക്കില്ലെന്നാണു തോന്നുന്നത്. അതുകൂടി അവർ പഠിക്കാൻ ശ്രമിക്കണം. സിനിമയിൽ അഭിനയിച്ചു പേരും പ്രശസ്തിയും നേടുന്നതോടൊപ്പം നമ്മുടെ സിനിമയുടെ ഗതിവിഗതികൾ എന്തൊക്കെയായിരുന്നുവെന്ന് സാമാന്യമായെങ്കിലും ഒരു ആർട്ടിസ്റ്റ് അറിഞ്ഞിരിക്കണം.

subscribe

Experience taught me acting
അന്ന ബെൻ / മരിയ റാൻസം

Categories:

കുമ്പളങ്ങി നൈറ്റ്‌സ് എന്ന ചിത്രത്തിലൂടെ മലയാളിയുടെ മനം കവർന്ന യുവതാരമാണ് അന്ന ബെൻ. ഹെലനിൽ അന്നയുടെ കഥാപാത്രം ഏറെ സ്വീകരിക്കപ്പെട്ടു. കപ്പേള എന്ന ചിത്രത്തിലെത്തുമ്പോൾ പക്വതയുള്ള നായികയായി മാറുന്നു അന്ന. കുമ്പളങ്ങി നൈറ്റ്‌സിലെ ബേബി മോൾ, ഹെലനിലെ ഹെലൻ പോൾ, കപ്പേളയിലെ ജെസി എന്നീ മൂന്നു കഥാപാത്രങ്ങളും വ്യത്യസ്തമാണ്. അന്നയുടെ അഭിനയമികവും ഈ കഥാപാത്രങ്ങളിലൂടെ തിരിച്ചറിയാനാകും.
അന്ന ബെൻ ഞാൻ മലയാളിക്ക് അനുവദിച്ച പ്രത്യേക അഭിമുഖം.

  • തിരക്കഥാകൃത്ത് ബെന്നി പി. നായരമ്പലത്തിന്റെ മകൾ വളർന്നത് കഥകൾ കേട്ടും കഥാപാത്രങ്ങൾ വെള്ളിത്തിരയിൽ ജീവൻ വയ്ക്കുന്നതു കണ്ടുമാണ്. കുടുംബ പശ്ചാത്തലം കരിയറിനു സഹായകമായോ

ശരിയാണ്, പപ്പ പറഞ്ഞ കഥകൾ കേട്ടു വളർന്ന കുട്ടിയാണ് ഞാൻ. കുഞ്ഞുനാൾ മുതൽ സിനിമയുടെ/കഥയുടെ ലോകത്താണ്. കഥ കേൾക്കുന്നത് ഇഷ്ടമുള്ള കാര്യമാണ്. കഥകളുടെ കേൾവി, സിനിമകളുടെ തെരഞ്ഞെടുപ്പുകൾക്കും അഭിനയത്തിനും എനിക്ക് ഏറെ സഹായകമായിട്ടുമുണ്ട്. കാരണം, പപ്പയുടെ കഥകൾ കേൾക്കുമ്പോഴാണെങ്കിലും, മറ്റു തിരക്കഥാകൃത്തുക്കൾ കഥ പറയുന്ന അവസരങ്ങളിലും, ഡയറക്ടർ അഭിനയത്തിന്റെ സന്ദർഭങ്ങൾ വിവരിച്ചു തരുമ്പോഴുമെല്ലാം ഞാൻ അതു കേൾക്കുന്നതു പ്രേക്ഷകയായി മാത്രമാണ്. അപ്പോൾ മാത്രമേ കൃത്യമായ വിധി നിർണയത്തിനുള്ള സാധ്യത നമുക്കു ലഭിക്കൂ. സിനിമ എന്ന കലാരൂപത്തിന്റെ പ്രത്യേകതയും ഇതാണ്. പ്രേക്ഷകനിലേക്ക് ഒരു കഥാപാത്രമെത്തുമ്പോൾ അവർ എപ്രകാരം ആയിരിക്കും അതിനെ സ്വീകരിക്കുക എന്ന് അറിഞ്ഞാൽ മാത്രമേ ഈ സിനിമ ചെയ്യണമോ വേണ്ടയോ എന്ന തെരഞ്ഞെടുപ്പു സാധ്യമാകൂ. കൂടാതെ, കഥയുടെ പുതുമയും ഗുണദോഷങ്ങളും മനസിലാക്കാനും സാധിക്കൂ. കഥാപാത്രത്തെ ഉൾക്കൊള്ളാൻ എനിക്ക് ആകുമോ എന്നറിയണമെങ്കിലും പ്രേക്ഷക മനസ് ഉൾക്കൊണ്ടുള്ള കഥ കേൾക്കൽ ആവശ്യമാണ്. തിരക്കഥാകൃത്തും സംവിധായകനും ഓരോ കഥാപാത്രത്തിനും ഒരു ജീവൻ നൽകുന്നുണ്ട്. എന്നാൽ, ആ കഥാപാത്രം നമ്മുടേതാവുമ്പോൾ കുറച്ചു മാറ്റങ്ങൾ സ്വാഭാവികമായും സംഭവിക്കും. ചിലപ്പോഴത് എഴുതിയിരിക്കുന്ന കാര്യങ്ങളിൽ നിന്ന് ഒരുപടി മുന്നിലാവും മറ്റു ചിലപ്പോൾ തിരക്കഥാകൃത്ത് രൂപപ്പെടുത്തിയിരിക്കുന്നതിൽ നിന്നു ചെറിയ വ്യത്യാസങ്ങൾ കഥാപാത്രങ്ങൾക്കു വരാം. നമ്മുടെതായ ഒരു കാഴ്ചപ്പാടും സംഭാവനയും കൂടി ചേരുമ്പോഴാണ് ഇതു സംഭവിക്കുന്നത്. കഥാപാത്രത്തിന്റെ പൂർണതയ്ക്ക് ആവശ്യമാണത്. അപ്പോൾ മാത്രമാണ് ഒരു കഥാപാത്രം പൂർണമായി ജീവൻ വയ്ക്കുന്നതെന്നു പറയാം.

  • ആത്മവിശ്വാസമുള്ള നായികാ കഥാപാത്രങ്ങൾ

ഇന്നത്തെ തലമുറയുടെ പ്രത്യേകതയായിരിക്കാം അത്. ആത്മവിശ്വാസത്തിന്റെ കാര്യത്തിൽ, ഞാൻ ഇഷ്ടപ്പെടുന്ന കുറേ താരങ്ങൾ ഇതുപോലെ എന്നെയും പ്രചോദിപ്പിച്ചിട്ടുണ്ട്. എന്നെക്കൊണ്ട് എന്തൊക്കെ ചെയ്യാനാകും, എന്താണ് എന്റെ കഴിവ് എന്നൊക്കെ തിരിച്ചറിയാൻ എനിക്കു കഴിയാറുണ്ട്. എന്നാൽ, അതിലുപരിയായി സമ്മർദ്ദം അനുഭപ്പെടുന്ന ഒരു സാഹചര്യം വന്നാൽ എന്റെ ചുറ്റുമുള്ളവരാണ് പപ്പ, അമ്മ, അനിയത്തി, എന്റെ അടുത്ത ഫ്രണ്ട്‌സും കസിൻസും എനിക്കു സഹായമാകുന്നത്. എന്നാൽ, പുറമേ നിന്നല്ല, നമുക്കുള്ളിൽ നിന്നാണ് ആത്മധൈര്യം കൈവരിക്കേണ്ടത് എന്നാണ് എന്റെ വിശ്വാസം. ആത്മാർത്ഥമായി എന്റെ നന്മ ആഗ്രഹിക്കുന്നവർ എന്റെ ചുറ്റും ഉണ്ട് എന്ന ബോധ്യമാണു സത്യത്തിൽ എന്റെ ആത്മവിശ്വാസം.

  • കോവിഡ്, സിനിമ, ഒ.ടി.ടി റിലീസ്

കൊറോണ എന്ന പ്രശ്‌നം എല്ലാ മേഖലയെയും എന്നതുപോലെ സിനിമയെയും ബാധിച്ചു കഴിഞ്ഞു. എല്ലാ പ്രതിസന്ധി ഘട്ടത്തിലും മനുഷ്യർ ആദ്യം ഒഴിവാക്കുന്നത് വിനോദ കലാ മേഖലകൾ ആയിരിക്കുമല്ലോ. അതിന്റേതായ ബുദ്ധിമുട്ടുകൾ നന്നായിട്ടുണ്ട്. മറ്റെല്ലാ പ്രശ്‌നങ്ങളെയും അതിജീവിക്കുന്നതു പോലെ ഈ രംഗത്തും അതിജീവനത്തിനുള്ള പരിശ്രമങ്ങൾ നടക്കുന്നുണ്ട്. ഗവൺമെന്റ് നടപ്പാക്കിയ എല്ലാ നിയമങ്ങളും പാലിച്ച് ചെറിയ ഷൂട്ടുകളൊക്കെ പുനരാരംഭിച്ചു തുടങ്ങി. ഈയൊരു കാലയളവ് നല്ലൊരു നാളെക്കായുള്ള ഒരുക്കത്തിന്റേതാവണം.

കപ്പേള റിലീസ് ചെയ്ത് ഒന്നര ആഴ്ചയ്ക്കുള്ളിൽ തിയേറ്ററുകളെല്ലാം അടച്ചു. ആദ്യം വിഷമമായി. പക്ഷേ, നമ്മുടെ മുന്നിൽ മറ്റു വഴികളൊന്നും ഇല്ലല്ലോ. രണ്ടാമത് ഒ.ടി.ടി പ്ലാറ്റ്‌ഫോമിൽ റിലീസ് എന്നത് തിയേറ്ററിൽ First day@ First Show അനുഭവമായിരുന്നു എനിക്ക്. ഒരുപാട് ഫോൺ കോളുകളും മെസേജുകളും വന്നു. നല്ല പ്രതികരണങ്ങളും കുറേ കുറേലേഖനങ്ങളുമൊക്കെ ഉണ്ടായിരുന്നു. ഇത്രയും നല്ല പ്രതികരണങ്ങൾ കിട്ടിയതിനാൽ ഞങ്ങളുടെ ടീമും വലിയ സന്തോഷത്തിലായിരുന്നു

  • തട്ടിപ്പു സംഘങ്ങളും സിനിമയും

പ്രലോഭനങ്ങളിൽപ്പെടുത്തി സാമ്പത്തിക തട്ടിപ്പു നടത്തുന്ന സംഘങ്ങൾ മറയായി സിനിമയെ ഉപയോഗിക്കുന്ന വാർത്തകൾ വീണ്ടും കേൾക്കുന്നു. എല്ലാ തൊഴിൽ മേഖലയിലുമുള്ള ചതിക്കുഴികൾ എന്നതിനപ്പുറം സിനിമയിൽ ഇത്തരം സാധ്യതകൾ കൂടുതലുണ്ടോ എന്നറിയില്ല. അടുത്തിടെ നടന്ന തട്ടിപ്പിനെക്കുറിച്ചുള്ള വാർത്തകൾ വരുന്നത് സിനിമാ മേഖലയെ മുഴുവനും ബാധിക്കുന്ന തരത്തിലാണ്.

subscribe

മായമില്ലാതെ മണികണ്ഠൻ
മണികണ്ഠൻ / പി.ടി. ബിനു

Categories:

മീശമാധവൻ സിനിമയിലെ ” കൃഷ്ണവിലാസം ഭഗീരഥൻ പിള്ള വലിയ വെടി നാല് ചെറിയ വെടി നാല് ” എന്ന ഡയലോഗ് ഇന്നും പ്രേക്ഷകർ മറന്നിട്ടില്ല. സിനിമ റിലീസ് ചെയ്ത് വർഷങ്ങൾ കഴിഞ്ഞിട്ടും മീശമാധവനിൽ മണികണ്ഠൻ പറഞ്ഞ ഡയലോഗ് ഇന്നും പ്രേക്ഷകരെ ചിരിപ്പിക്കുന്നു. സോഷ്യൽ മീഡിയ പ്ലാറ്റ്‌ഫോമുകളിൽ മീശമാധവനിലെ കോമഡി രംഗങ്ങൾ പ്രേക്ഷകരെ ചിരിപ്പിച്ചുകൊണ്ടിരിക്കുന്നു. നാടകത്തിന്റെ പിൻബലവുമായി സിനിമയിലും ടെലിവിഷനിലും സജീവമായ മണികണ്ഠന്റെ അഭിനയജീവിതം ആരംഭിക്കുന്നത് പട്ടാമ്പിയിലെ സ്‌കൂൾ കാലഘട്ടം മുതലാണ്. സ്‌കൂൾ ഓഫ് ഡ്രാമയിൽ നാടക പഠനത്തിനു ചേർന്ന മണികണ്ഠന്റെ അഭിനയജീവിതം അവിടെ ആരംഭിക്കുകയായിരുന്നു. ശ്രദ്ധേയമായ നിരവധി നാടകങ്ങൾ ചെയ്തു. സുഹൃത്തുക്കൾപ്പൊപ്പം ചെയ്ത ആദ്യ സിനിമ മൺകോലങ്ങൾ നിരവധി അവാർഡുകൾ കരസ്ഥമാക്കി. തുടർന്ന്, ചലച്ചിത്ര രംഗത്തും ടെലിവിഷൻ രംഗത്തും സജീവമായി. എൺപതോളം സിനിമകളിൽ അഭിനയിച്ചു. സാമൂഹ്യവിമർശനം അടിസ്ഥാനമാക്കി മഴവിൽ മനോരമയിൽ അവതരിപ്പിക്കുന്ന മറിമായം പരമ്പരയിലെ കേന്ദ്രകഥാപാത്രം മണികണ്ഠൻ അവതരിപ്പിക്കുന്ന സത്യശീലൻ ആണ്. പച്ചയായ ജീവിതത്തിന്റെ കലർപ്പില്ലാത്ത ഹാസ്യത്തിലൂടെ പ്രേക്ഷകരെ ചിരിപ്പിക്കുകയും ചിന്തിപ്പിക്കുകയും ചെയ്യുന്നു മണികണ്ഠൻ.

  • മീശമാധവനും ” വലിയ വെടി നാല് ചെറിയ വെടി നാല് ” എന്ന ഡയലോഗും

മീശമാധവൻ റിലീസ് ആയിട്ട് 18 വർഷം കഴിയുന്നു. കാലം പോകുന്നത് അറിയുന്നേയില്ല. സിനിമ തിയേറ്ററിൽ ഓടിക്കൊണ്ടിരുന്നപ്പോഴും ടി.വിയിൽ സംപ്രേക്ഷണം ചെയ്യുമ്പോഴും സോഷ്യൽ മീഡിയയിലൂടെ കാര്യങ്ങൾ പൊടിപൊടിക്കുന്ന വർത്തമാനകാലത്തും മീശമാധവൻ സിനിമയിലെ രസകരമായ സീനുകൾ ആളുകൾ ആസ്വദിക്കുന്നു എന്നതു വലിയ സന്തോഷമുള്ള കാര്യമാണ്. എന്റെ രണ്ടാമത്തെ സിനിമയാണത്. ഞാനെഴുതുകയും പ്രധാന വേഷത്തിൽ അഭിനയിക്കുകയും ചെയ്ത ‘മൺകോലങ്ങൾ’ ആണ് ആദ്യ സിനിമ. അധികം പണം മുടക്കാനില്ലാത്ത സിനിമാപ്രേമികളായ ആളുകൾക്ക് 16 എം.എം ഫിലിമിൽ ഷൂട്ട് ചെയ്ത് 35 എം.എം-ലേക്ക് കൺവർട്ട് ചെയ്ത് തിയേറ്ററിൽ വലിയ സിനിമ പോലെ കാണിക്കാനുള്ള സംവിധാനമുണ്ടായിരുന്നു വർഷങ്ങൾക്കു മുമ്പ്. അങ്ങനെയാണ് മൺകോലങ്ങൾ ചെയ്തത്. സുബ്രമഹ്ണ്യൻ ശാന്തകുമാർ, വിജു വർമ, പ്രവീൺ പണിക്കർ എന്നിവരായിരുന്നു പ്രധാനമായും ആ ചിത്രത്തിനു പിന്നിലുണ്ടായിരുന്നത്. സംവിധായകന് സംസ്ഥാന അവാർഡ്, ഐ.എഫ്.എഫ്.കെ ഫിപ്രസി അവാർഡ് എന്നിവ ലഭിച്ചു. കൂടാതെ, നിരവധി ഇന്റർനാഷണൽ ഫെസ്റ്റിവലുകളിൽ ചിത്രം പ്രദർശിപ്പിക്കുകയും അംഗീകാരങ്ങൾ കരസ്ഥമാക്കുകയും ചെയ്തു. ഈ സിനിമയുടെ ബലത്തിലാണ് എഡിറ്റർ രഞ്ജൻ എബ്രഹാം വഴി സംവിധായകൻ ലാൽജോസിനെ പരിചയപ്പെടുന്നത്. ഞാൻ ഇന്നും അഭിനയിച്ചു ജീവിക്കുന്നതിനു കാരണക്കാരായ ഈ രണ്ടു പേരോടും ഞാൻ എന്നും കടപ്പെട്ടിരിക്കുന്നു.

സമാന്തര സിനിമയുടെ പാതയിലൂടെ പോയിരുന്ന ഒരാൾ വാണിജ്യ സിനിമയുടെ ചിട്ടവട്ടങ്ങൾ കൂടി കണ്ടു പഠിക്കട്ടെ എന്നേ അദ്ദേഹം വിചാരിച്ചിരുന്നുള്ളൂ. ഞാൻ കൂടെ മലയാള സിനിമയിലേക്കു വന്നതുകൊണ്ട് മലയാള സിനിമയ്ക്കു പറയത്തക്ക ദോഷങ്ങൾ സംഭവിക്കാൻ സാധ്യതയില്ല എന്ന അദ്ദേഹത്തിന്റെ തിരിച്ചറിവാണ് എനിക്കു തുണയായത്. അന്നദ്ദേഹം പരിഗണിക്കാതെ വിട്ടിരുന്നെങ്കിൽ ഞാൻ മറ്റിടങ്ങളിൽ പോയി ചാൻസ് ചോദിക്കുകയോ, ഭാവിയിൽ നടനാകുകയോ ചെയ്യില്ലായിരുന്നു. കാര്യമായ വേഷങ്ങളൊന്നും അദ്ദേഹത്തിന്റെ സിനിമയിൽ ചെയ്യാൻ സാധിച്ചില്ലെങ്കിലും ഞാൻ സന്തോഷവാനാണ്. പറ്റുന്ന സിനിമകളിൽ പറ്റുന്ന പോലെ സഹകരിപ്പിച്ചിട്ടുണ്ട്. മീശമാധവനിലെ ഒരു സീനിനെക്കുറിച്ച് ചോദിക്കുമ്പോൾ ലാൽ ജോസിനെയോർക്കാതെ സീനിനെപ്പറ്റി പറയുന്നതു ശരിയല്ലല്ലോ.

ചെയ്ത കഥാപാത്രത്തിന്റെ പേരിൽ അല്ലെങ്കിൽ ഏതെങ്കിലും ഡയലോഗിന്റെ പേരിൽ ഒരു നടൻ പ്രേക്ഷകമനസിൽ കാലങ്ങളോളം നിലനിൽക്കുന്നുവെന്നതു വലിയ ഭാഗ്യമാണ്. ആ ഷോട്ട് ചിത്രീകരിക്കുന്ന സമയത്ത് റിഹേഴ്‌സലിന് കവിളിൽ ചൊറിയുന്ന ആംഗ്യം ഞാൻ ചെയ്തില്ലായിരുന്നു. എന്നാൽ, ടേക്ക് സമയത്ത് ഞാൻ പോലുമറിയാതെ എന്റെ കൈ പൊങ്ങിവന്നു. പൊങ്ങിവന്ന കൈ പെട്ടെന്നു താഴ്ത്തുന്നതു ശരിയല്ലല്ലോ, പിന്നെ സന്ദർഭത്തിനനുയോജ്യമായ രീതിയിൽ ആ കൈ കൊണ്ടു ചെയ്യാവുന്നത്, കവിളിലൊന്നു ചൊറിയുകയാണ്. ഇതാണ് അന്നു സംഭവിച്ചത്. ഇതൊക്കെ നിമിഷങ്ങൾ കൊണ്ടു നടക്കുന്ന കാര്യങ്ങളാണ്. എങ്ങാനും പൊങ്ങിവന്ന കൈ കൊണ്ട് കവിൾ ചൊറിയാതെ ഞാൻ കൈ താഴ്ത്തിയിരുന്നെങ്കിൽ അന്നേ ചീട്ടു കീറുമായിരുന്നു. എന്നിട്ടും റിഹേഴ്‌സലിനു കാണിക്കാത്തത് എന്തിനു കാണിച്ചുവെന്ന് ക്യാമറമാൻ എസ്. കുമാർ സാർ വഴക്കു പറഞ്ഞു പരിഭ്രമിച്ചു. ഇയാളെന്തൊരു മനുഷ്യനാണെന്നു മനസിൽ ചിരിച്ചു. കാരണം അസ്ഥാനത്തു ചെയ്ത പോലെ ഒരാംഗ്യമായിരുന്നില്ല അത്, എന്ന് എനിക്കുറപ്പുതോന്നിയിരുന്നു. ഡയറക്ടർ ഓക്കെ പറഞ്ഞപ്പോൾ സെറ്റിൽ മാനം കിട്ടിയ പോലെ തോന്നി.

അഭിനയിക്കാൻ നിൽക്കുമ്പോൾ പലപ്പോഴും അങ്ങനെയാണ്. നമ്മൾ പോലുമറിയാതെ ഏതോ ബാഹ്യമായ ശക്തി നമ്മെ പലപ്പോഴും സപ്പോർട്ട് ചെയ്തുകൊണ്ടിരിക്കും. ഞാൻ എന്റെ കഴിവിൽ വിശ്വസിക്കുന്നതിനേക്കാൾ പുറമേ നിന്നുള്ള ഈ ബ്ലസിങ് കിട്ടാൻ സത്യസന്ധനായി നിലകൊള്ളനാണ് എപ്പോഴും മനസു കൊണ്ട് ആഗ്രഹിക്കുന്നത്.

  • ചിരിയും കരച്ചിലും

ആളുകളെ ചിരിപ്പിക്കുകയോ, കരയിപ്പിക്കുകയോ ചെയ്യുക എന്നതു പ്രയാസമുള്ള കാര്യമാണ് എന്നു ഞാൻ വിചാരിക്കുന്നില്ല. മാത്രമല്ല, അഭിനയം ഒരായാസമുള്ള, ഭാരമുള്ള ജോലിയാകാൻ പാടില്ല. സിനിമയോ, നാടകമോ കണ്ട് ഒരാൾ കരയുന്നതും ചിരിക്കുന്നതുമൊക്കെ, അയാൾ ജീവിച്ചുവന്ന ചുറ്റുപാടുകളെയും ജീവിത സാഹചര്യങ്ങളെയും, എത്രത്തോളം സഹൃദയത്വം അയാൾക്കുണ്ട് എന്നതിനെയുമൊക്കെ ആശ്രയിച്ചാണിരിക്കുന്നത്. ഒപ്പം നടനോ, നടിയോ ചെയ്യുന്ന കഥാപാത്രം എത്രത്തോളം വിശ്വസനീയമാണ് എന്നതും പ്രധാനമാണ്. നൂറു ശതമാനത്തോളം കഥാപാത്രമായി മാറുന്നുവെന്നു തന്റെ അഭിനയത്തിലൂടെ നടൻ തോന്നിപ്പിച്ചാൽ, സഹൃദയനായ സാധാരണ പ്രേക്ഷകനിൽ കരച്ചിലും ചിരിയും സ്വാഭാവികമായും ഒരുപോലെ ഉണ്ടായിവരും. നടൻ എന്തു ചെയ്യുന്നു, ഏതു സന്ദർഭത്തിലൂടെ കടന്നുപോകുന്നു, എത്രമാത്രം വിശ്വാസ്യത പ്രേക്ഷകനിൽ ജനിപ്പിക്കാൻ അയാൾക്കു സാധിക്കുന്നു എന്നതിനെയൊക്കെ ആശ്രയിച്ചാണ് ഈ പറയുന്ന വികാരങ്ങളൊക്കെ സംഭവിക്കുന്നത്. നടന്റെ സത്യസന്ധതയിൽ അയാളോടൊപ്പം സ്വയം വിശ്വസിച്ച് പ്രേക്ഷകൻ കൂടെ ചേരുകയാണു ചെയ്യുന്നത്. ഇങ്ങനെ പ്രേക്ഷകരെ തന്റെ ഒപ്പം നിർത്താൻ കഴിയുന്ന നടനു ചിരിയും കരച്ചിലും അവരിൽ നിറയ്ക്കാൻ ഒരു ബുദ്ധിമുട്ടും ഉണ്ടാകുന്നില്ല.

  • ചിരിയുടെ രസക്കൂട്ട്

ചിരിക്ക് പ്രത്യേകിച്ച് എന്തു രസക്കൂട്ട്..? രസകരമായ ചിരി ജനിപ്പിക്കുന്ന സന്ദർഭങ്ങൾ ഉണ്ടാവുക, അതു രസകരമായി അവതരിപ്പിക്കുക അതിലപ്പുറം ചിരിയുണ്ടാക്കാനുള്ള ഒന്നും നിലവിലില്ല എന്നാണ് എനിക്കു തോന്നുന്നത്. ചില സന്ദർഭങ്ങളിൽ വെറും നോട്ടങ്ങൾ ചിരി പടർത്തും. ചിലപ്പോൾ സംഭാഷണങ്ങൾ ആവാം. ഒന്നും ചെയ്യാനില്ലാത്ത അവസ്ഥ പോലും കാണികളിൽ ചിരി പടർത്താം. എല്ലാ ഹാസ്യവും അതു സംഭവിക്കുന്ന സന്ദർഭങ്ങളുമായി എത്രമാത്രം ചേർന്നുനിൽക്കുന്നു എന്നതിനെ ആശ്രയിച്ചു ചിരി വലിതോ, ചെറുതോ ആകാം.

ഇല്ലാത്ത കട്ട നുണകൾ ഉണ്ടെന്നു സമർത്ഥിക്കാനാണ് നടൻ ശ്രമിക്കുന്നത്. എന്ന് അയാൾക്കും പ്രേക്ഷകനുമറിയാം. എന്നിട്ടും പ്രേക്ഷകൻ അയാളെ വിശ്വസിക്കുന്നതെങ്ങനെയെന്നു ചിന്തിച്ചിട്ടുണ്ടോ? കള്ളത്തരമില്ലാത്ത, സത്യസന്ധമായ, നിഷ്‌കളങ്കമായ, സരസനായ മനുഷ്യനോടു നമുക്ക് ഇഷ്ടം തോന്നുക സ്വാഭാവികം. അത്രയേയുള്ളൂ. അയാൾ തമാശ പറയുമ്പോൾ നമ്മൾ ചിരിക്കുക, അയാൾക്കു വിഷമം വരുമ്പോൾ നമുക്കു സങ്കടം വരും. ആളുകളെ ചിരിപ്പിക്കാൻ ഗിമ്മിക്കുകളില്ല.

  • മറിമായം

മറിമായത്തിന്റെ ആരംഭം 2011 അവസാന മാസങ്ങളിലാണ്. ഒൻപതു വർഷമായി തുടരുന്നു. ആർ. ഉണ്ണികൃഷ്ണന്റെ സംവിധാനത്തിൽ മഴവിൽ മനോരമയിൽ തുടങ്ങിയ ഈ പ്രോഗ്രാം വർഷങ്ങളായുള്ള അതിന്റെ യാത്രയിൽ സ്വതസിദ്ധമായ ഒരു അവതരണരീതിയിലേക്കു വളരുകയും അതു സ്വീകരിക്കപ്പെടുകയും ചെയ്തു. ഇന്ന് മറിമായത്തിന് അതിന്റേതായ അസ്ഥിത്വമുണ്ട്, നിലപാടുകളുണ്ട്. മറിമായം ഒരു കോമഡി പരിപാടി എന്ന നിലയിലാണു പലരും കാണുന്നത്. എന്നാൽ, അതൊരു കോമഡി ഷോ മാത്രമല്ല. തികച്ചും കാലികമായ വിഷയങ്ങൾ ആക്ഷേപഹാസ്യരൂപേണ അവതരിപ്പിക്കാൻ ഉപയോഗിക്കുന്ന ഒരു വലിയ ടെലിവിഷൻ പ്ലാറ്റ്‌ഫോം ആണ് എന്നെ സംബന്ധിച്ചിടത്തോളം മറിമായം. തുടക്കം മുതലുള്ള എപ്പിസോഡിൽ ഉണ്ട്. ഈ കാലത്തിന്നിടയിൽ ഒന്നോ, രണ്ടോ എപ്പിസോഡിൽ മാത്രമാണ് അഭിനയിക്കാൻ കഴിയാതെ പോയത്. മറ്റെന്തൊക്കെ പ്രയാസങ്ങളുണ്ടെങ്കിലും അതെല്ലാം ഒഴിവാക്കി മറിമായത്തിനു വേണ്ടി പ്രത്യേകം ദിവസങ്ങൾ മാറ്റിവയ്ക്കുന്നതു ശീലമായിരിക്കുന്നു. ഞാൻ സ്‌നേഹത്തോടെ ഓർക്കാൻ ഇഷ്ടപ്പെടുന്ന ഒരാളാണ് അതിന്റെ സംവിധായകൻ ആർ. ഉണ്ണികൃഷ്ണൻ.

subscribe

യക്ഷിയും വേദികയും പിന്നെ ശരണ്യയും
ശരണ്യ ആനന്ദ് / മഞ്ജു ചന്ദ്ര

Categories:

ഭയത്തിന്റെ ആഴങ്ങളിൽ പ്രേക്ഷകരെ പിടിച്ചിലുച്ച ആകാശഗംഗ 2 – ലെ യക്ഷിയെ പെട്ടെന്നൊന്നും മറക്കാൻ കഴിയില്ല. യക്ഷി ഗ്രാഫിക്‌സ് ആണെന്നാണ് പ്രേക്ഷകർ ആദ്യം വിശ്വസിച്ചത്. എന്നാൽ, യക്ഷിയായി വേഷമിട്ടത് ശരണ്യ ആനന്ദ് എന്ന യുവനടിയാണെന്ന വാർത്ത എല്ലാവരെയും അത്ഭുതപ്പെടുത്തി. ഇപ്പോൾ ശരണ്യ കുടുംബവിളക്ക് എന്ന സീരിയലിലെ വേദികയായി എത്തി കുടുംബപ്രേക്ഷകരുടെ പ്രിയപ്പെട്ട താരമായി മാറിയിരിക്കുന്നു. ശരണ്യ ആനന്ദിന്റെ വിശേഷങ്ങൾ.

സിനിമയിൽ തുടക്കക്കാർ എന്ന നിലയിൽ ഏതൊരു ആർട്ടിസ്റ്റിനും തന്നെ തിരിച്ചറിയുന്ന മുഖമാണു പ്രേക്ഷകരുടെ മുന്നിൽ തന്റെ അഭിനയ സാധ്യത പ്രകടിപ്പിക്കാനുള്ള ഒരു ഉപാധി. എന്നാൽ, ആരാണ് അഭിനയിക്കുന്നതെന്ന് ഒരിക്കലും തിരിച്ചറിയാൻ കഴിയാത്ത ഒരു കഥാപാത്രത്തെ അവതരിപ്പിക്കാൻ ആത്മവിശ്വാസത്തോടെ തയാറായി എന്നതാണ് യുവനടിയായ ശരണ്യ ആനന്ദിന്റെ മനസിന്റെ വലിപ്പം.

വിനയൻ സംവിധാനം ചെയ്ത ആകാശഗംഗ-2 എന്ന ചിത്രത്തിൽ കത്തിക്കരിഞ്ഞു വികൃത വേഷത്തിൽ പ്രേതമായി അഭിനയിക്കുമ്പോൾ ശരണ്യ ആനന്ദിൻെ മനസിൽ ഉണ്ടായിരുന്നത് ഒരു ലക്ഷ്യം മാത്രം. തനിക്കു ലഭിച്ച കഥാപാത്രത്തെ ഭംഗിയായി അവതരിപ്പിക്കുക എന്നത്. മൂന്നു നാലു മണിക്കൂർ കൊണ്ട് മേക്കപ്പിട്ട് എല്ലാ അർത്ഥത്തിലും കഷ്ടപ്പെട്ട് അവതരിപ്പിച്ചത് ആരും അറിയാതെ പോകുമോയെന്ന വിഷമമുണ്ടായിരുന്നു. എന്നാൽ, ആകാശഗംഗ-2 റിലീസ് ചെയ്ത് ഒരാഴ്ച കഴിഞ്ഞപ്പോൾ, യക്ഷിയായി അഭിനയിച്ചത് സുന്ദരിയായ ശരണ്യ ആനന്ദാണെന്ന് സംവിധായകൻ വിനയൻ തന്നെ പ്രേക്ഷകരെ പരിചയപ്പെടുത്തി.

യക്ഷി ഗ്രാഫിക്‌സ് ആണെന്നാണ് എല്ലാവരും കരുതിയത്. ആ വാർത്ത ഏവരെയും അത്ഭുതപ്പെടുത്തി. ഇതിനകം രണ്ടു മൂന്നു വർഷത്തിനുള്ളിൽ നായികയായും മറ്റു ചെറുതും വലിതുമായ ഒരു ഡസനിലധികം ചിത്രങ്ങളിൽ അഭിനയിച്ചു ശ്രദ്ധ നേടിയ ശരണ്യ അനന്ദ്, വളരെ വികൃതമായി മുഖം തിരിച്ചറിയാത്ത കഥാപാത്രത്തെ അവതരിപ്പിച്ചതിൽ പ്രേക്ഷകരുടെ പ്രശംസ പിടിച്ചുപറ്റി.

‘അഭിനയിക്കുമ്പോൾ സങ്കടമുണ്ടായിരുന്നു. ഇത്ര കഷ്ടപ്പെട്ടിട്ടും ആരും അറിയാതെ പോകുമല്ലൊയെന്ന്. എന്നാൽ, വിനയൻ സാർ പറഞ്ഞിരുന്നു, ചിത്രം റിലീസാകുമ്പോൾ ശരണ്യയെ കൂടുതൽ അറിയുമെന്ന്. അത് സംഭവിച്ചു. ഇപ്പോൾ എനിക്കു വളരെ സന്തേഷമുണ്ട് വിനയൻ സാറിന്റെ പടത്തിൽ ആ കഥാപാത്രത്തെ അവതരിപ്പിച്ചതിൽ’ ശരണ്യ പറഞ്ഞു.

ആകാശഗംഗയ്ക്കു ശേഷം പ്രശസ്ത സംവിധായകരുടെ ചിത്രങ്ങളിൽ മികച്ച കഥാപാത്രങ്ങൾ ലഭിക്കുമെന്ന് ഏറേ പ്രതീക്ഷയോടെ കാത്തിരിക്കുമ്പോഴാണ് ഏവരേയും ദുരിതക്കഴത്തിൽ താഴ്ത്തി കൊണ്ട് മഹാമാരി പിടിമുറുക്കിയത്. ദീർഘകാലത്തെ സ്വപ്നങ്ങളുടെ നിറം മങ്ങുന്ന നേരം. ഇനി എന്തു ചെയ്യണമെന്നറിയാതെ നിസംഗതയുടെ ആഴങ്ങളിലേക്കു താഴ്ന്നു കൊണ്ടിരിക്കുമ്പോഴാണു വീണ്ടും സ്വപ്നങ്ങളെ തൊട്ടുണർത്തിയ ആ മഹാഭാഗ്യം ശരണ്യയെ തേടിയെത്തിയത്.

ഇപ്പോൾ ശരണ്യ ആനന്ദ് വീണ്ടും ആത്മസംതൃപ്തിയുടെ നിറവിലാണ്. കോവിഡ് കാലത്തെ പ്രതിസന്ധികൾക്കിടയിൽ നിൽക്കുമ്പോഴും ഏഷ്യാനെറ്റിലെ ഹിറ്റ് പരമ്പരയായ ‘കുടുംബ വിളക്കി’ൽ വേദിക എന്ന ശക്തമായ കഥാപാത്രത്തെ അവതരിപ്പിച്ച് മിനി സ്‌ക്രീൻ പ്രേക്ഷകരുടെ ഇഷ്ട താരമായി മാറി ശരണ്യ. അഭിനയം തന്നെയാണെങ്കിലും ശരണ്യ തന്റെ പുതിയ കർമപഥം നന്നായി ആസ്വദിക്കുകയാണ്.

”ഇതിനു മുമ്പു പലപ്പോഴും സീരിയലിൽ അവസരം വന്നിട്ടുണ്ട്. പക്ഷേ, സിനിമയായിരുന്നു എന്റെ ലക്ഷ്യം. ഇപ്പോഴത്തെ പ്രത്യേക സാഹചര്യത്തിൽ കുടുംബ വിളക്കിലെ അവസരം പ്രയോജനപ്പെടുത്തുന്നതാണു നല്ലതെന്നു തോന്നി. മാത്രമല്ല, സീരിയലിൽ അഭിനയിച്ചതുകൊണ്ട് സിനിമയിലെ അവസരം നഷ്ടപ്പെടില്ലെന്ന വിശ്വാസവുമുണ്ടായിരുന്നു. എന്റെ തീരുമാനം വളരെ ശരിയായിരുന്നവെന്ന് എന്നെ തന്നെ ബോധ്യപ്പെടുത്തുന്ന തരത്തിലാണ്, എന്റെ ഭാഗം ടെലികാസ്റ്റ് ചെയ്തു തുടങ്ങിയത്തോടെ പ്രേക്ഷകരിൽ നിന്നു ലഭിക്കുന്ന ഫോൺ വിളികളും മെസേജുകളും…’ ശരണ്യ ആനന്ദിന്റെ സന്തോഷം നിറഞ്ഞ വാക്കുകൾ.

1971 ബിയോണ്ട് ബോർഡേഴ്‌സ്, അച്ചായൻസ്, കാപ്പിച്ചീനോ, ചങ്ക്‌സ്, ചാണക്യ തന്ത്രം, മാമാങ്കം, ആകാശമിഠായി, തനഹ, ലാഫിങ് അപ്പാർട്ട്‌മെന്റ്‌സ് നിയർ ഗിരി നഗർ, ആകാശഗംഗ-2, എ ഫോർ ആപ്പിൾ എന്നി ചിത്രങ്ങളിൽ വ്യത്യസ്തങ്ങളായ കഥാപാത്രങ്ങളെ അവതരിപ്പിച്ചതിനു ശേഷമാണ് വളരെ യാദൃചികമായി ശരണ്യ കുടുംബ വിളക്ക് എന്ന ഹിറ്റ് പരമ്പരയിലൂടെ മിനിസ്‌ക്രീനിൽ അരങ്ങറ്റം കുറിക്കുന്നത്. ഗുജറാത്തിൽ ബിസിനസ് ചെയ്തിരുന്ന ആനന്ദ് രാഘവന്റെയും സുജാതയുടെയും മകളായി സൂററ്റിൽ ജനിച്ച ശരണ്യ ആനന്ദ്, പത്തനംത്തിട്ട അടൂർ സ്വദേശിനിയാണ്.

subscribe

മൂഴിക്കുളം ശാല പ്രകൃതി ജീവിത പാഠങ്ങൾ
ടി.ആർ. പ്രേംകുമാർ / പി. ടി. ബിനു

Categories:

മറ്റൊരു ലോകവും ജീവിതവും സാധ്യമാണെന്നു ലോകത്തോടു വിളിച്ചു പറയുകയാണ് മൂഴിക്കുളം ശാല ജൈവ ക്യാംപസ്. പരിസ്ഥിതി പ്രവർത്തകനും എഴുത്തുകാരനുമായ ടി.ആർ. പ്രേംകുമാർ ആണ് ശാലയുടെ സാരഥി. പ്രകൃതി-പരിസ്ഥിതി നാശത്തിന്റെ തിക്തഫലങ്ങൾ കേരളം അനുഭവിച്ചുകൊണ്ടിരിക്കുന്ന ഇക്കാലത്ത് പ്രകൃതിയോടിണങ്ങിയല്ലാതെ മനുഷ്യജീവിതം സാധ്യമല്ല എന്ന വലിയ പാഠം നാം പഠിച്ചുകഴിഞ്ഞു. വികസനം എന്നതു പ്രകൃതിയെ നശിപ്പിക്കുക എന്നതല്ല. പ്രകൃതിക്കിണങ്ങിയ മാതൃകയിൽ മനുഷ്യജീവിതത്തെ നിലനിർത്തുക എന്നതായിരിക്കണം. പ്രകൃതിയിൽ നിന്നു നാം എന്തു നേടി എന്നതല്ല, പ്രകൃതിയുടെ നിലനിൽപ്പിനായി വരും തലമുറയ്ക്ക് നാം എന്തു കരുതിവച്ചു എന്നതായിരിക്കണം നമ്മുടെ കർമം. ടി.ആർ. പ്രേംകുമാർ ഞാൻ മലയാളിക്ക് അനുവദിച്ച പ്രത്യേക അഭിമുഖം.

  • മൂഴിക്കുളം ശാലയുടെ ആരംഭം

കോളേജ് പഠനകാലത്ത് ചരിത്ര പുസ്തകത്തിൽ മൂഴിക്കളത്തെക്കുറിച്ചുള്ള പരാമർശം കണ്ട് വിസ്മയം പൂണ്ട് കിട്ടാവുന്ന എല്ലാ ചരിത്ര പുസ്തകങ്ങളും സംഘടിപ്പിച്ചു വായിച്ചിരുന്നു. തുടർന്ന് ട്രാവൻകൂർ ആർക്കിയോളജിക്കൽ സിരീസും റഫർ ചെയ്തു. മനസിൽ പതിഞ്ഞ ഒരു പേരായിരുന്നു മൂഴിക്കുളം ശാല. പിന്നീട് എറണാകുളം ഡി.സി. ബുക്‌സിലെ ഓപ്പൺ സ്‌പേസും വിസ്തൃത സൗഹൃദവും ആണ് മൂഴിക്കുളം ശാല കൂട്ടായ്മക്ക് ഊർജമായത്. അങ്ങനെ 2003 മാർച്ച് 19-ന് ചവറ കൾച്ചറൽ സെന്ററിൽ വച്ച് മൂഴിക്കുളം ശാല ഉദ്ഘാടനം ചെയ്യപ്പെടുകയാണ്. പ്രകൃതിയെക്കുറിച്ച്, ഭൂമിയെക്കുറിച്ച്, മനുഷ്യരെക്കുറിച്ച് കരുതലുള്ളവരുടെ ഒരു കൂട്ടായ്മയായി വളർന്നു. തുടക്കം നാട്ടറിവ്, പരിസ്ഥിതി, പൈതൃകം തുടങ്ങിയ മേഖലകളിലായിരുന്നു.

  • ശാലയുടെ പ്രവർത്തനങ്ങൾ

എറണാകുളം നഗരത്തിലാണ് ആദ്യം മൂഴിക്കുളം ശാല പ്രവർത്തനം ആരംഭിക്കുന്നത്. ചുരുങ്ങിയ കാലം കൊണ്ട് വേറിട്ട പരിപാടികൾ കൊണ്ട് മൂഴിക്കുളം ശാല ഏറെ ശ്രദ്ധിക്കപ്പെട്ടു. ഞാറ്റുവേലയായിരുന്നു ആദ്യ പരിപാടി. ഗ്രാമീണ ഉത്പന്നങ്ങളുടെ പ്രദർശനവും വിൽപ്പനയും. കൂടെ സംഗീതവും കലയും സാഹിത്യവും ഉണ്ടായിരുന്നു. ഞാറ്റുവേലയെ തടർന്ന് സംക്രാന്തി, കളം, തുടങ്ങിയ പ്രദർശനങ്ങൾ, റാന്തൽ വെട്ടത്തുള്ള ഒരപൂർവ കൂട്ടായ്മ, പൗർണമി കൂട്ടായ്മ, സൂര്യനോടൊത്തുള്ള ദക്ഷിണായനം, ഉത്തരായനം യാത്രകൾ, പത്തില, പാനകം പരിപാടികൾ, ആഴ്ച തോറുമുള്ള കൂട്ടായ്മകൾ, കാഴ്ച ലോക ചലച്ചിത്ര മേള, ഋതു സംക്രാന്തി സ്റ്റേജ് ഷോ, മൂഴിക്കുളം ശാല ജൈവ ക്യാംപസ്, എം.ടിയുടെ വാനപ്രസ്ഥം കഥയുടെ സംഗീത വ്യാഖ്യാനം, മഴ രാഗങ്ങളുടെ ആൽബം, മാർഗി മധുവിന്റെ പുരുഷാർത്ഥ കൂത്തിന്റെ ഡോക്യുമെന്റേഷൻ, ക്ലിന്റ് ചിത്രങ്ങളുടെ ഡോക്യുമെന്റേഷൻ, വാർഷിക കൂട്ടായ്മ… അങ്ങനെ പോകുന്നു പ്രവർത്തനങ്ങൾ.

  • മൂഴിക്കുളം ശാല എന്ന ജൈവ ക്യാംപസ് സങ്കൽപ്പവും പ്രത്യേകതകളും

മറ്റൊരു ലോകം, മറ്റൊരു ജീവിതം സാധ്യമാണെന്ന് ലോകത്തോടു വളരെ പതുക്കെ വിളിച്ചു പറയാൻ ശ്രമിച്ചപ്പോഴാണ് മൂഴിക്കുളം ശാല ജൈവ ക്യാംപസ് പിറവിയെടുക്കുന്നത്. 1200 വർഷം മുമ്പു ജീവിച്ചിരുന്ന മനുഷ്യർക്കുള്ള ട്രിബ്യൂട്ട്. മൂഴിക്കുളം ശാലയ്ക്കുള്ളാരു ഇടമായി തുടങ്ങി. പ്രകൃതി വിഭവങ്ങൾ ഏറ്റവും കുറച്ച് ഉപയോഗിച്ചു കൊണ്ട് എങ്ങനെ കാറ്റും വെളിച്ചവും യഥേഷ്ടം കയറിയിറങ്ങിപ്പോവുന്ന വീടുകൾ നിർമിക്കാം എന്നതിന്റെ ഒരു പരീക്ഷണശാലയായിരുന്നു ക്യാംപസ്. രണ്ട് ഏക്കർ 40 സെന്റിലായി 52 ലാറി ബേക്കർ പ്രകൃതി സൗഹൃദ വീടുകളുടെ സമുച്ചയമാണ് ജൈവ ക്യാംപസ്്. 23 നാലുകെട്ടുകൾ. 29 ഒറ്റമുറി വീടുകൾ. മതിൽ കെട്ടുകളില്ലാത്ത വീടുകൾ. അപ്സ്റ്റയറുകൾ അനുവദിക്കാത്ത വീടുകൾ, മൺപാതകൾ, നിറയെ മരങ്ങൾ ഒക്കെ ഉള്ള ഒരു ഇടം. ചാലക്കുടിപ്പുഴയുടെ തീരത്താണ് ജൈവ ക്യാംപസ് നിർമിച്ചിരിക്കുന്നത്. രാസവളം, കീടനാശിനി, കളനാശിനി എന്നിവ ശാലയ്ക്കുള്ളിൽ ഉപയോഗിക്കാൻ പാടില്ല.

  • വീടുകളുടെ സവിശേഷതകൾ

പ്രകൃതി സൗഹൃദ വീടുകളുടെ ഇടമാണ് മൂഴിക്കുളം ശാല ജൈവ ക്യാംപസ്. സൂക്ഷ്മജീവികൾ തിങ്ങിപ്പാർക്കുന്ന ഇടം. കുരുപ്പകുത്തിയ മണ്ണ്. ഞണ്ടളകൾ സുലഭമായി കാണുന്ന ഇടം. എല്ലാത്തരത്തിലും ജൈവികമായ മണ്ണ്. ഈ മണ്ണിലാണ് 52 വീടുകൾ തല ഉയർത്തി പ്രകൃതിയോടിണങ്ങി മരങ്ങൾക്കിടയിൽ നിൽക്കുന്നത്. അഞ്ച് സെന്റ് വീതമുള്ള 23 നാലുകെട്ടുകൾ. 1089 ച.അടി വിസ്തീർണമുള്ള വീടുകൾ. മൂന്ന് കിടപ്പുമുറികൾ. എല്ലാം ബാത്ത്‌റൂം അറ്റാച്ഡ് ആണ്. അടുക്കള, സ്റ്റോർ റൂം, സിറ്റൗട്ട്, നടുമുറ്റത്തിനു ചുറ്റുമായി ഏതാണ്ട് 400 ച.അടി വിസ്തീർണത്തിൽ പരന്നുകിടക്കുന്ന കിഴക്കിനി, പിടിഞ്ഞാറ്റിനി, തെക്കിനി, വടക്കിനികൾ. അഞ്ചു സെന്റിൽ പണിയാവുന്ന ഏറ്റവും വലിയ നാലു കെട്ട്. എന്നാൽ നാലുകെട്ടുകളിൽ ഏറ്റവും ചെറുതുമാണ്. വീട്ടിലിരുന്നാൽ നടുമുറ്റത്ത് വെയിലും കാറ്റും വെളിച്ചവും മഴയും മഞ്ഞും നിലാവും താഴെയ്ക്ക് ഇറങ്ങി വരുന്നതു കാണാം, അനുഭവിക്കാം.

  • പ്രകൃതി സംരക്ഷണ പദ്ധതികൾ

എന്റെ ജീവിതമാണ് മൂഴിക്കുളം ശാല. ഞാൻ നടത്തുന്ന എല്ലാ പരിപാടികളും മൂഴിക്കുളം ശാലയുടെ പേരിലാണ്. എന്റെ ഇമെയിൽ ഐഡി പോലും മൂഴിക്കും ശാലയുടെ പേരിലാണ്. ഇതാണെന്റെ ലോകം. എന്റെ അമേരിക്കയും റഷ്യയും ക്യൂബയുമൊക്കെ ഇതു തന്നെ. ചാലക്കുടി പുഴ സംരക്ഷണവുമായി ബന്ധപ്പെട്ട പ്രവർത്തനങ്ങൾ, പുഴ മലിനീകരണത്തിനെതിരേ നീറ്റ ജെലാറ്റിൻ കമ്പനിയ്‌ക്കെതിരെ നടന്ന സമരം, നല്ല ഭൂമിയ്ക്കു വേണ്ടിയുള്ള സമരങ്ങൾ, ആഗോളതാപനം, കാലാവസ്ഥാ വ്യതിയാനത്തെ അഭിസംബോധന ചെയ്യുന്ന കാർബൺ ന്യൂടൽ പഞ്ചായത്ത് പ്രവർത്തനങ്ങൾ, വേവിയ്ക്കാത്ത ഭക്ഷണ വിതരണം, കാർബൺ ന്യൂട്രൽ അടുക്കള, പ്രകൃതി ഉത്പന്നങ്ങൾ വിൽക്കുന്ന കടയുടെ പ്രവർത്തനം, സ്വാതന്ത്ര്യസമര സേനാനി കെ.ജി. നമ്പ്യാർ ലൈബ്രറി ആൻഡ് റിസർച്ച് സെന്റർ, ഞാറ്റുവേല ഗ്രാമീണ വിദ്യാപീഠവും ഞാറ്റുവേല നാട്ടറിവ് ഓൺലൈൻ പഠന കളരിയും, കൊവിഡ് പ്രതിരോധ പ്രവർത്തനങ്ങൾ, വഞ്ചി യാത്രകൾ, വയൽ യാത്രകൾ, ഹെറിറ്റേജ് വാക്കുകൾ, ബോധവത്ക്കരണ പരിപാടികൾ, പുസ്തകങ്ങൾ, പശ്ചിമഘട്ട സംരക്ഷണ പരിപാടികൾ, സാമൂഹ്യ ഇടപെടലുകൾ, നവമാധ്യമ പ്രവർത്തനങ്ങൾ… അങ്ങനെ പോകുന്നു.

  • കേരളത്തിൽ ആവർത്തിക്കപ്പെടുന്ന പ്രകൃതി ദുരന്തങ്ങൾ, പരിസ്ഥിതി നാശം

ആഗോള താപനത്തിന്റെയും കാലാവസ്ഥാ വ്യതിയാനത്തിന്റെയും പശ്ചാത്തലത്തിൽ, കേരളത്തിൽ ആവർത്തിക്കപ്പെടുന്ന പ്രകൃതി ദുരന്തങ്ങൾ ഗൗരവതരമായി പരിഗണിക്കേണ്ടതാണ്. പക്ഷേ, നമ്മുടെ ഭരണകൂടങ്ങൾ തീവ്ര വികസനത്തിന്റെ പേരിൽ പ്രകൃതിയെ വർദ്ധിച്ച തോതിൽ തകർക്കുകയാണ്. പ്രകൃതി ചൂഷണം അതിഭീകരമാണ്. 2018, 19, 20-ലെ പ്രളയങ്ങൾ നമ്മെ ഒന്നും പഠിപ്പിച്ചില്ല. ഉരുൾപ്പൊട്ടൽ, മണ്ണിടിച്ചിൽ, മണ്ണുതാഴ്ച, കാട്ടുതീ, ചുഴലിക്കാറ്റുകൾ, വരൾച്ച, വനനശീകരണം അനിയന്ത്രിതമായ പാറ-മണ്ണു ഖനനം തുടങ്ങിയവ നമ്മുടെ കേരളത്തെ ഒരു ദുരന്ത ഭൂമിയാക്കി മാറ്റിയിരിക്കുന്നു. മനുഷ്യകേന്ദ്രീകൃതമായ പരിസ്ഥിതിയിൽ നിന്ന് നാം പ്രകൃതി കേന്ദ്രീകൃതമായ ഇക്കോളജിയിലേക്കു മാറുക തന്നെ വേണം.

ഓരോ രാജ്യവും കാർബൺ ന്യൂട്രലോ നെഗറ്റീവോ ആയി മാറണം. ഓരോ ജീവിതവും ഓരോ പ്രവൃത്തിയും കാർബൺ ന്യൂട്രലാകണം. ജീവിതം കൊണ്ടൊരു നിത്യ പ്രതിരോധം കാലം ആവശ്യപ്പെടുന്നുണ്ട്. ഈ വർഷത്തെ ഭൗമപരിധി ദിനം ഓഗസ്റ്റ് 22-ന് ആയിരുന്നു. ഡിസംബർ 31 വരെ ഉപയോഗിക്കേണ്ടിയിരുന്ന പ്രകൃതിവിഭവങ്ങൾ നന്മൾ ഓഗസ്റ്റ് 22-നു തന്നെ ഉപയോഗിച്ചു തീർത്തുവെന്നർത്ഥം. ഈ രീതിയിൽ നമുക്കു ജീവിക്കണമെങ്കിൽ ഒരു ഭൂമി മതിയാകാതെ വരും. 1.7 ഭൂമി വേണ്ടി വരും. അമേരിക്കക്കാരെപ്പോലെ ജീവിക്കണമെങ്കിൽ 4 ഭൂമി വേണ്ടി വരും. ഭൗമ പരിധി ദിനം (Earth over shoot Day) സിസംബർ 31-ലേക്ക് ഉയർത്തുന്നതിനു വേണ്ട നടപടികളാണ് ഭൂമി നമ്മോടു ആവശ്യപ്പെടുന്നത്. കാർബൺ ഫുട്ട്പ്രിന്റും വാട്ടർ ഫുട്ട്പ്രിന്റും കണക്കിലെടുത്തു കൊണ്ടുള്ള ഒരു നയം നാം രൂപപ്പെടുത്തേണ്ട കാലം അതിക്രമിച്ചിരിക്കുന്നു.

subscribe

ചിത്രകലയിൽ സാധ്യതകൾ മാത്രം
രാജേഷ് ചിറപ്പാട്/ റെമീസ് രാജയ്

Categories:

രാജേഷ് ചിറപ്പാട് ചിത്രകാരൻ മാത്രമല്ല. എഴുത്തുകാരൻ, ഗ്രന്ഥകാരൻ, നിരൂപകൻ, കോളമിസ്റ്റ്, എഡിറ്റർ തുടങ്ങിയ മേഖലകളിലൊക്ക പ്രവർത്തിക്കുന്ന വ്യക്തിയാണ്. കോവിഡ് കാലം അദ്ദേഹത്തിന് വരയുടെയും വർണങ്ങളുടെയും കാലമാണ്. രാജേഷ് ചിറപ്പാടിന്റെ പ്രത്യേക അഭിമുഖം.

  • രാജേഷ് ചിറപ്പാട് അറിയപ്പെടുന്നത് എഴുത്തുകാരൻ, എഡിറ്റർ, പരിഭാഷകൻ എന്ന നിലയിലൊക്കെയാണ്. മികച്ച ചിത്രകാരൻ കൂടിയാണ് താങ്കൾ. ഒരു പ്രതിഭ എന്ന നിലയിൽ താങ്കൾ സ്വയം എങ്ങനെയാണ് പരിചയപ്പെടുത്തുക

നല്ലൊരു ചോദ്യമാണിത്. ഒരാൾക്കു വ്യത്യസ്തമായ പ്രതിഭകൾ ഉണ്ടാവുക എന്നതു പുതിയൊരു കാര്യമല്ല. കവിത എഴുതുന്ന ഒരാൾക്ക് നോവലും ചെറുകഥയും സാധ്യമായേക്കാം. അവർ ചിലപ്പോൾ ചിത്രകാരന്മാരോ ചിത്രകാരികളോ ആയേക്കാം. പക്ഷേ, അവരുടെ പ്രതിഭയിൽ ഒന്നുമാത്രമായിരിക്കാം കൂടുതൽ തെളിഞ്ഞുകാണുന്നത് എന്നു മാത്രം. ലോക പ്രശസ്ത്രരായ പല ചിത്രകാരന്മാരും നല്ല എഴുത്തുകാർ കൂടിയായിരുന്നു. ഡാവിഞ്ചിയെ നോക്കൂ അദ്ദേഹം ഒരു ബഹുൂമുഖ പ്രതിഭയായിരുന്നതായി നമുക്കറിയാം. സാൽവദോർ ദാലി എന്ന എക്കാലത്തെയും മികച്ച ചിത്രകാരൻ പുസ്തകങ്ങൾ എഴുതുകയും ലൂയിബുനുവലിനൊപ്പം തിരക്കഥകളിലും ചലച്ചിത്ര പ്രവർത്തനങ്ങളിൽ ഏർപ്പെടുകയും ചെയ്തിട്ടുണ്ട്. ലോർക്കയെപ്പോലുള്ള കവികളുമായി ആഴത്തിലുള്ള ചങ്ങാത്തം അദ്ദേഹത്തിനുണ്ടായിരുന്നു. മലയാളത്തിലേക്ക് വന്നാൽ ഒ.വി. വിജയൻ, മലയാറ്റൂർ, എം.വി. ദേവൻ എന്നിവരൊക്കെ എഴുത്തുകാരും ചിത്രകാരന്മാരുമായിരുന്നു. കമലസുരയ്യയെയും ഓർത്തുപോകുന്നു. എന്റെ കാര്യത്തിൽ എഴുത്തുപോലെ തന്നെ പ്രിയപ്പെട്ടതാണ് ചിത്രകലയും. ചിത്രകാരനായ എഴുത്തുകാരൻ എന്നാവും ഞാൻ സ്വയം വിശേഷിപ്പിക്കുക.

  • സ്വതസിദ്ധമായ കഴിവും ചിത്രകലാ വിദ്യാഭ്യാസവും തമ്മിൽ എങ്ങനെ ബന്ധപ്പെട്ടിരിക്കുന്നു

ഞാൻ ചിത്രകല ശാസ്ത്രീയമായി അഭ്യസിച്ച ഒരാളാണ്. അത്തരമൊരു വിദ്യാഭ്യാസത്തിലേക്കു നാം പോകുന്നത് ചിത്രം വരയ്ക്കാനുള്ള നൈസർഗികമായ ഒരു കഴിവു നമുക്കുണ്ട് എന്ന ബോധ്യത്തിന്റെ അടിസ്ഥാനത്തിലാണ്. അഭിരുചികളെ കൂടുതൽ മെച്ചപ്പെടുത്താനും അതുമായി ബന്ധപ്പെട്ട കാര്യങ്ങൾ കൂടുതൽ മനസിലാക്കുവാനും ഇത്തരം പരിശീലനങ്ങൾ ഉപകരിക്കും. എന്നാൽ ഇതൊന്നുമില്ലാതെ മികച്ച ചിത്രങ്ങൾ വരയ്ക്കുന്ന എത്രയോ കലാകരന്മാരും കലാകാരികളും നമുക്കുണ്ട്.

  • ഡിജിറ്റൽ സാങ്കേതികവിദ്യയുടെ കാലത്ത് ചിത്രകല അതിലേക്കു മാറിയിട്ടുണ്ട്. ക്യാൻവാസുകളിൽ നിന്ന് ഗ്രാഫിക് ടാബുകളിലേക്ക് ലോകം മാറി. ഈ മാറ്റത്തോടു പൊരുത്തപ്പെടുന്നുണ്ടോ

കലയും സാങ്കേതികവിദ്യയും ശത്രുക്കളല്ല എന്നാണ് എന്റെ പക്ഷം. പ്രത്യേകിച്ച് കാഴ്ചയുടെ കലയ്ക്കു സാങ്കേതികവിദ്യ പരമപ്രധാനമാണ്. സിനിമ അതിന് ഏറ്റവും വലിയ ഉദാഹരണമാണ്. ഇത്തരം മാറ്റങ്ങളിൽ ഏറെ സന്തോഷിക്കുന്ന ഒരാളാണു ഞാൻ. യാഥാസ്ഥിതികമായ ഒരു കാഴ്ചപ്പാടും ഇക്കാര്യത്തിൽ എനിക്കില്ല. പക്ഷേ, ഡിജിറ്റൽ സാങ്കേതികവിദ്യയോടു പിണങ്ങിനിൽക്കുന്ന നിരവധി കലാകാരന്മാരുണ്ട് എന്നതു വാസ്തവമാണ്. ഞാൻ എന്റെ ചിത്രങ്ങളിൽ സാങ്കേതികവിദ്യകൾ കൂടുതലായി ഉപയോഗിച്ചിട്ടില്ല. നാളെ അങ്ങനെ ഉപയോഗിക്കില്ല എന്നൊരു പിടിവാശിയും ഇക്കാര്യത്തിലില്ല.

  • ചിറപ്പാടിന്റെ ചിത്രങ്ങൾ രാഷ്ട്രീയം സംസാരിക്കുന്നെണ്ടെന്ന് പറഞ്ഞാൽ അതിനോട് എങ്ങനെ പ്രതികരിക്കും

തീർച്ചയും എന്റെ ചിത്രങ്ങളിൽ രാഷ്ട്രീയമുണ്ട്. പക്ഷേ, ദൈനംദിനം ഉണ്ടാവുന്ന രാഷ്ട്രീയ പ്രശ്‌നങ്ങളോട് ഉപരിപ്ലവമായി പ്രതികരിക്കുന്ന ചിത്രരചനാരീതിയോട് എനിക്ക് ഒട്ടും ബഹുമാനമില്ല. പക്ഷേ, മനുഷ്യനും പ്രകൃതിയും അവർ ജീവിക്കുന്ന സമൂഹവും അതിന്റെ സംഘർഷങ്ങളും ഒക്കെ ചിത്രകലയ്ക്ക് വിഷയമാകാറുണ്ട്. ഒപ്പം സൗന്ദര്യത്തിനുകൂടി പ്രാധാന്യം കൽപ്പിക്കാൻ എനിക്കെന്തോ തോന്നിപ്പോകുന്നു.

  • മലയാളത്തിലെ പ്രമുഖ ആനുകാലികങ്ങളിൽ താങ്കൾ ചിത്രം വരയ്ക്കുന്നു. മറ്റൊരാളുടെ കൃതിക്കുവേണ്ടി ചിത്രം വരയ്ക്കുന്നതാണോ സ്വന്തമായ ആശയത്തിൽ വരയ്ക്കുന്ന ചിത്രങ്ങളാണോ എളുപ്പമായി തോന്നിയിട്ടുള്ളത്
subscribe

കഥ സിനിമയുടെ മാണിക്യക്കല്ല്
എം. മോഹനൻ / മിനീഷ് മുഴപ്പിലങ്ങാട്

Categories:

ഇടത്തരക്കാരുടെ ജീവിതങ്ങളെ കഥകളിലാവാഹിച്ചും അഭ്രപാളിയിൽ ആവിഷ്‌കരിച്ചും മലയാളികളുടെ മനസ് കീഴടക്കിയവരായിരുന്നു ശ്രീനിവാസനും സത്യൻ അന്തിക്കാടും. അവരുടെ കഥ-സംവിധാന സങ്കൽപ്പങ്ങളിൽ നിന്നും ഊർജം ഉൾക്കൊണ്ട്, മലയാള സിനിമയ്ക്ക് പുത്തൻ പ്രതീക്ഷകൾ ഉണർത്തി ഇതാ അവർക്കൊരു പിൻഗാമി-എം. മോഹനൻ. തിരക്കഥയുടെ മർമ്മം ശ്രീനിവാസനിൽ നിന്നും സംവിധാനപാടവം സത്യൻ അന്തിക്കാടിൽ നിന്നും അഭ്യസിച്ച മോഹനന് അങ്ങനെ ആകാതിരിക്കാൻ കഴിയില്ലല്ലൊ!

അതേസമയം സിനിമയോടുള്ള സമീപനത്തിൽ തന്റേതുമാത്രമായ രീതികളും കാഴ്ചപ്പാടും അദ്ദേഹം വച്ചുപുലർത്തുകയും ചെയ്യുന്നുണ്ട്. ആദ്യസംവിധാന സംരംഭമായ കഥപറയുമ്പോൾ കഴിഞ്ഞ് അദ്ദേഹം തന്നെ കഥയും തിരക്കഥയും സംഭാഷണവും സംവിധാനവും നിർവഹിച്ച മാണിക്യക്കല്ലിൽ എത്തുമ്പോൾ സ്വന്തം കഴിവിന്റെ പിൻബലത്തിൽ തനിക്കു മികച്ച സിനിമകൾ ചെയ്യാനാവും എന്നദ്ദേഹം തെളിയിക്കുകയായിരുന്നു. ഒരർഥത്തിൽ എം. മോഹനൻ എന്ന സംവിധായകന്റെ സ്വാതന്ത്ര്യ പ്രഖ്യാപനം കൂടിയായിരുന്നു, മാണിക്യക്കല്ല്. തുടർന്ന് അദ്ദേഹം സംവിധാനം ചെയ്ത 916, മൈ ഗോഡ്, അരവിന്ദന്റെ അതിഥികൾ എന്നീ സിനിമകളിലും ആ സ്വാതന്ത്ര്യത്തിന്റെ സവിശേഷമായ സിദ്ധി തെളിഞ്ഞു കാണാം.

നമുക്കു ചുറ്റും അശ്രദ്ധമായി അവഗണിക്കപ്പെട്ടു പോകുന്ന ചില നിർണായക ജീവിത മുഹൂർത്തങ്ങളെ പ്രമേയമാക്കുന്ന കഥയുടെ മാണിക്യക്കല്ലു തേടിയുള്ള യാത്രയാണ് മോഹനന് ഓരോ സിനിമയും. അതിലൂടെ സാധാരണക്കാരന്റെ സങ്കടങ്ങളുടെയും സ്വപ്നങ്ങളുടെയും കഥപറയുകയാണ് അദ്ദേ ഹം ചെയ്യുന്നത്. എം. മോഹനൻ ഞാൻ മലയാളിക്ക് അനുവദിച്ച പ്രത്യേക അഭിമുഖം.

  • പുതിയ പ്രോജക്ടുകൾ

പുതിയ സിനിമയുടെ തയാറെടുപ്പിലാണ്. അതുമായി ബന്ധപ്പെട്ട ചർച്ചകളും മറ്റും നടക്കുന്നതേയുള്ളൂ. കൃത്യമായി ഒന്നും പറയാറായിട്ടില്ല.

  • കഥകൾ തേടി

ഇതൊന്നുമല്ല കാര്യം. അതൊക്കെ അങ്ങനെ സംഭവിക്കുന്നതാണ്. ഉദാഹരണത്തിനു കഥപറയുമ്പോൾ ശ്രീനിയേട്ടന്റെ കഥയായിരുന്നു. തുടർന്ന് മാണിക്യക്കല്ല് ചെയ്യുമ്പോൾ എനിക്കു തന്നെ പറയാൻ ഒരു കഥ ഉണ്ടായിരുന്നു. അത് ഉപയോഗിച്ചു എന്നു മാത്രം. തുടർന്നു വന്ന 916-ന്റെ കഥ, ഞാൻ കഥപറയുമ്പോൾ ചെയ്യുന്നതിന് മുമ്പേ മനസിൽ ഉണ്ടായിരുന്നതാണ്. പിന്നീട് വന്ന മൈ ഗോഡിലും അരവിന്ദന്റെ അതിഥികളിലും മറ്റുള്ളവരുടെ കഥകളാണ് ഞാൻ ഉപയോഗിച്ചത്. ഇപ്പോൾ ചെയ്യാൻ പോകുന്ന പുതിയ സിനിമയുടെ കഥയും മറ്റൊരാളുടേതാണ്. കഥ, സിനിമയുടെ മാണിക്യക്കല്ലാണ്. അത് കണ്ടെത്തുക എന്നതാണ് മുഖ്യം. അതു ശ്രമകരവുമാണ്.

  • സിനിമകൾ തമ്മിലുള്ള ഇടവേളകൾ

2007-ലാണ് കഥപറയുമ്പോൾ ഇറങ്ങുന്നത്. 2011 ആരംഭത്തിലാണ് മാണിക്യക്കല്ല് വരുന്നത്. 2012 അവസാനമാണ് 916 റിലീസാകുന്നത്. മൈ ഗോഡ് 2015-ലും അരവിന്ദന്റെ അതിഥികൾ 2018-ലുമാണ് ഇറങ്ങുന്നത്. പലപ്പോഴും ഗ്യാപ്പ് ഉണ്ടാകുന്നു. എന്തുകൊണ്ടാണിങ്ങനെ എന്നു ചോദിച്ചാൽ അതിനു പ്രത്യേകിച്ചു കാരണം പറയാനില്ല. സത്യത്തിൽ സിനിമയിൽ ഈ കാലയളവ് വലിയ ഗ്യാപ്പ് ഒന്നുമല്ല. കഥ പറയുമ്പോൾ സമ്മാനിച്ചത് ഒരു വലിയ വിജയമായിരുന്നു. അതോടെ അടുത്തത് ഒരു നല്ല പടമായി ചെയ്തു വിജയിപ്പിക്കേണ്ട വലിയ ഉത്തരവാദിത്വം തലയിൽ കയറി. പ്രേക്ഷകരുടെ പ്രതീക്ഷയ്‌ക്കൊത്ത് ഉയരേണ്ടതുണ്ടായിരുന്നു. ഓഫറുകൾ അനവധി വന്നു. പക്ഷേ, വന്നവർക്കൊക്കെ കഥപറയുമ്പോൾ എന്ന പടത്തിന്റെ തന്നെ ചുവടുപിടിച്ചുള്ള ഒരു സിനിമയായിരുന്നു വേണ്ടിയിരുന്നത്. അത്തരം ഒരു സിനിമ ചെയ്യുന്നില്ല എന്നു ഞാൻ ഉറപ്പിച്ചിരുന്നു. വ്യത്യസ്തമായ കഥകൾ പ്രമേയമാക്കുമ്പൊഴേ സത്യത്തിൽ ഒരു സിനിമാക്കാരൻ ശ്രദ്ധിക്കപ്പെടുകയുള്ളൂ എന്ന വിശ്വാസക്കാരനാണ് ഞാൻ. അതിനായുള്ള കാത്തിരിപ്പിനിടയിലാണ് ഇടവേളകൾ സംഭവിക്കുന്നത്. പടം നന്നാകാൻ ഇടവേളകൾ പലപ്പോഴും സഹായിക്കുന്നുണ്ട് എന്നു ഞാൻ കരുതുന്നു.

  • ശ്രീനിവാസനോടൊപ്പം

എത്തിപ്പെട്ടതല്ല, മനസിൽ സിനിമ എന്നത് ഉറപ്പിച്ചു തന്നെ വന്നതാണ്. പഠിക്കുന്ന കാലത്തേ ഞാൻ ധാരാളം കഥകളെഴുതിയിരുന്നു. എന്റെ തലമുറയിലെ കഥയെഴുത്തുകാരായ കുറേപ്പേരുടെയെങ്കിലും സ്വപ്നം അന്ന് സിനിമയായിരുന്നു. സിനിമ കണ്ടും സിനിമയെക്കുറിച്ച് ചിന്തിച്ചും സംസാരിച്ചും സിനിമയ്ക്കു പറ്റുന്ന കഥകളെഴുതിയും ചർച്ച ചെയ്തും നടന്ന കാലം. സിനിമയിലെത്തുക എന്നതല്ലാതെ മറ്റൊരു ജോലിയെക്കുറിച്ചും അന്നു ചിന്തിച്ചിരുന്നില്ല. അതിനാൽ ഡിഗ്രി കഴിഞ്ഞ ഉടനെ ചെന്നൈയിലേക്ക് വണ്ടികയറി ശ്രീനിയേട്ടനൊപ്പം കൂടി (പ്രമുഖ നടനും തിരക്കഥാകൃത്തും സംവിധായകനുമായ ശ്രീനിവാസന്റെ ഭാര്യാ സഹോദരനാണ് എം. മോഹനൻ) ഇന്ന് ഞാൻ സിനിമയിൽ എന്തെങ്കിലും ആയിത്തീർന്നിട്ടുണ്ടെങ്കിൽ അത് അദ്ദേഹത്തിന്റെ സഹായം ഒന്നു കൊണ്ടു മാത്രമാണ്.

  • കഥാകാരനും സംവിധായകനും

സംവിധായകനാവുക എന്ന സ്വപ്നവുമായി തന്നെയാണ് ഞാൻ ശ്രീനിയേട്ടനൊപ്പം കൂടിയത്. കഥയെഴുത്തും തിരക്കഥാരചനയും ഒക്കെയായി കുറേ നാളുകൾ കഴിഞ്ഞെങ്കിലും സംവിധായകൻ ആവുക എന്ന സ്വപ്നം ഞാൻ കൈവിട്ടില്ല. അതിൽ കുറഞ്ഞ ഒന്നും ആകാൻ ഞാൻ ആഗ്രഹിച്ചിരുന്നില്ല എന്നതാണ് സത്യം. സിനിമ ഒരു ടീം വർക്കാണെങ്കിൽ കൂടി, ആത്യന്തികമായി അത് സംവിധായകന്റെ കലയാണ് എന്നു കരുതിയിരുന്നതു കൊണ്ടാണ് ആ വിചാരം എന്നിൽ ബലപ്പെട്ടത്. സംവിധാനം പഠിക്കാനാണ് എനിക്ക് താത്പര്യം എന്ന് ഞാൻ ശ്രീനിയേട്ടനോടു പറഞ്ഞു. അദ്ദേഹമാണ് എന്നെ സത്യേട്ടന് (സത്യൻ അന്തിക്കാട്) പരിചയപ്പെടുത്തുന്നതും തുടർന്ന് ഞാൻ അദ്ദേഹത്തിന്റെ സംവിധാന സഹായിയായി സിനിമാ ജീവിതം തുടങ്ങുന്നതും.

  • സത്യൻ അന്തിക്കാടിന്റെ കൂടെയുള്ള കാലം

എന്നും നൻമകൾ എന്ന സിനിമയിൽ തുടങ്ങി തൂവൽ കൊട്ടാരം വരെ യുള്ള 14 സിനിമകളിൽ ഞാൻ അദ്ദേഹത്തിന്റെ സംവിധാന സഹായിയായും അസോസിയേറ്റായും പ്രവർത്തിച്ചിട്ടുണ്ട്. ആ സുവർണ കാലത്തിന്റെ അനുഭവങ്ങളാണ് എന്നിലെ സംവിധായകനെ രൂപപ്പെടുത്തിയത് എന്നു പറയാം. ഒരു സംവിധായകൻ എന്തായിരിക്കണമെന്നും എങ്ങനെയായിരിക്കണമെന്നും ഒപ്പം എന്തായിരിക്കരുത് എന്നും എന്നെ പഠിപ്പിച്ചത് അദ്ദേഹമാണ്. സത്യത്തിൽ അദ്ദേഹം ഒരു സ്‌കൂൾ ഓഫ് ലെസൻ ആണ്. സിനിമയുടെ എല്ലാ സൂഷ്മാംശങ്ങളിലേക്കും ശ്രദ്ധ ചെലുത്തുന്ന സത്യൻ അന്തിക്കാട് വാസ്തവത്തിൽ ഇനിയും വിലയിരുത്തപ്പെടേണ്ട ഒരു സംവിധായക പ്രതിഭയാണ്. കഥ പറയുമ്പോൾ എന്ന ചിത്രത്തിലൂടെ ഒരു സ്വതന്ത്ര സംവിധായകനായി മാറാനുള്ള ആത്മവിശ്വാസം എനിക്കു നൽകിയത് അദ്ദേഹമാണ്. സിനിമയിലെ എന്റെ ഗുരുനാഥനാണ് സത്യൻ അന്തിക്കാട്; വഴികാട്ടി ശ്രീനിവാസനും.

  • കഥ പറയുന്നതിനും മുമ്പ്

കഥ പറയുന്നതിനു മുമ്പു നടക്കാതെ പോയ മറ്റൊരു സിനിമ പ്രോജക്ട് ഉണ്ടായിരുന്നു. കഥയും നിർമാതാവും നടീനടൻമാരും ഷൂട്ടിങ് ലൊക്കേഷനുമെല്ലാം തീരുമാനിക്കപ്പെട്ടതായിരുന്നു. പക്ഷേ, അവസാന നിമിഷം നിർമാതാവ് ഏതോ കാരണത്തിൽ പിൻമാറിക്കളഞ്ഞു. അതോടെ പടം മുടങ്ങി. ആദ്യ സിനിമ മുടങ്ങിയതിൽ വലിയ വിഷമം തോന്നിയില്ല. കുറേ വർഷങ്ങളായി ഞാൻ സിനിമാ രംഗത്തുണ്ട്.ഒരു പാട് കണ്ടും കേട്ടും അനുഭവിച്ചും ശീലമായി. ഒന്നിലും അമിതമായി ദുഖി ക്കുകയോ സന്തോഷിക്കുകയോ ചെയ്യരുത് എന്നാണ് ഞാനീ രംഗത്ത് നി ന്നും പഠിച്ച വലിയ പാഠം. സിനിമയിൽ പലപ്പോഴും നാം വിചാരിച്ചതു പോ ലെയല്ല കാര്യങ്ങൾ നടക്കുക. ആദ്യ സിനിമ മുടങ്ങിയപ്പോൾ ഞാൻ എന്നോ ട് തന്നെ പറഞ്ഞത്, സാരമില്ല, മറ്റൊന്ന് എവിടെയോ നിനക്കായി ഒരുങ്ങുന്നു ണ്ട് എന്നാണ്. വൈകാതെ കഥ പറയുമ്പോൾ എന്ന സിനിമ ചെയ്യാൻ കഴിഞ്ഞു.

subscribe