May 2019

You Are Here: Home / May 2019

ഉലകം പിറന്തത് എനക്കാകെ
-മോഹൻലാൽ

Categories:

വെളുത്ത തൊപ്പിയും കറുത്ത കണ്ണടയും ക്രീം കളർ ഫുൾ സ്ലീവ് ഷർട്ടും തന്റെ പാർട്ടി പതാകയിലെ നിറങ്ങൾ കരയായ മുണ്ടും ധരിച്ച്, കൈയിൽ ഒരു കർച്ചീഫുമായി ആ മഹാപ്രതിഭ ചെന്നൈയിലെ എ.വി.എം. സ്റ്റുഡിയോവിലേക്കു കടന്നു വന്നു. എന്നെ കിടിലം കൊള്ളിച്ചുകൊണ്ട് അദ്ദേഹം കൺമുന്നിലൂടെ കടന്നുപോയി. ആ കാഴ്ച, 30 വർഷങ്ങൾക്ക് മുമ്പ് മനസിൽ നിറച്ച ആഹ്ലാദത്തിരകൾ ഇന്നും ഒടുങ്ങിയിട്ടില്ല.

അതെ, എം.ജി.ആർ. എന്ന അതുല്യ നടനെ ഓർക്കുമ്പോഴെല്ലാം ആ അനുഭവം എന്നിൽ അലതല്ലിയെത്താറുണ്ട്. ചെറുപ്പത്തിൽ കണ്ട എം.ജി.ആർ സിനിമകളിലെ തീപ്പൊരി ചിതറുന്ന ആക്ഷൻ രംഗങ്ങളും ആവേശം നിറയ്ക്കുന്ന സംഭാഷണങ്ങളും ദൃശ്യസുരഭിലമായ ഗാനരംഗങ്ങളുമാണ് ആ കാഴ്ച എന്നിൽ നിറച്ചത്. നടിമാരായ അംബിക-രാധ സഹോദരിമാർ ചേർന്ന് നിർമിച്ച്, ഞാൻ നായകനായി അഭിനയിച്ച ‘അയിത്തം’ എന്ന സിനിമയുടെ പൂജയ്ക്കായാണ് അനാരോഗ്യം പോലും വക വയ്ക്കാതെ എം.ജി.ആർ. അന്ന് അവിടെയെത്തിയത്. പൊതുപരിപാടികൾക്കോ സിനിമാസംബന്ധമായ ചടങ്ങുകൾക്കോ അദ്ദേഹം പങ്കെടുക്കുന്ന സമയമായിരുന്നില്ല അത്. അംബികയുടെയും രാധയുടെയും അമ്മ സരസമ്മയുമായുള്ള സ്‌നേഹബന്ധമാകാം ആ ചടങ്ങിന് ഭദ്രദീപം കൊളുത്താൻ എം.ജി.ആറിനെ പ്രേരിപ്പിച്ചത്.

അത്ഭുതാദരങ്ങളോടെ അന്ന് ഞാൻ എം.ജി.ആറിനെ നോക്കിക്കണ്ടു. അത്യാകർഷണീയമായ വേഷവും ആകാരവും. എന്നെ കണ്ടപ്പോൾ പുഞ്ചിരിച്ചുകൊണ്ട് ദേഹത്ത് തട്ടി പതിഞ്ഞ സ്വരത്തിൽ അദ്ദേഹം പറഞ്ഞു, ‘മോഹൻലാലിനെ എനിക്കറിയാം’. സംസാരിക്കാൻ ഏറെ പ്രയാസമുള്ള അവസ്ഥയിലും അദ്ദേഹം എന്നോടു ചോദിച്ചു, ‘എപ്പം കല്യാണം?’ എനിയ്‌ക്കൊന്നും മനസിലായില്ല. സരസമ്മയാണ് പിന്നീട് വിശദീകരിച്ചു തന്നത്. നടൻ എന്നതിലപ്പുറം, ബാലാജിയുടെ മകളെ വിവാഹം കഴിക്കാൻ പോകുന്ന ആൾ എന്ന നിലയിൽ എം.ജി.ആർ. എന്നെ മനസിലാക്കിയിരുന്നു. അതാണ് എപ്പോഴാണ് കല്യാണം എന്നു ചോദിച്ചത്. പിരിയാൻ നേരം തൊഴുകൈകളോടെ ഏവർക്കും ആശംസകൾ നേർന്ന് കടന്നുപോയ ആ സാന്നിധ്യം പകർന്ന അനുഭൂതി ഇന്നും ഞാൻ ഹൃദയത്തിൽ സൂക്ഷിച്ചിട്ടുണ്ട്.

ആക്ടർ എന്ന നിലയിൽ എന്നെ ഏറെ സ്വാധീനിച്ച ആളാണ് എം.ജി.ആർ. കുട്ടിക്കാലത്ത് തോന്നിയ ആ ഇഷ്ടം ഇന്നും എന്നിലുണ്ട്. ഫൈറ്റും ഡാൻസും പാട്ടുമൊക്കെയായി വളരെ കളർഫുൾ ആയ എന്റർടൈയ്‌നറുകളായിരുന്നു അദ്ദേഹത്തിന്റെ ചിത്രങ്ങൾ. ശിവാജി ഗണേശൻ സാറിന്റെ സിനിമകളേക്കാൾ കൂടുതൽ ഞാൻ കണ്ടിട്ടുള്ളത് എം.ജി.ആർ സിനിമകളാണ്. തിരുവനന്തപുരം ശക്തി, ശ്രീകുമാർ തിയേറ്ററുകളിൽ നിന്നും കണ്ട എം.ജി.ആർ ചിത്രങ്ങൾ എന്റെ ബാലമനസിലും തീപ്പൊരി വിതറി. ‘ഉലകം ചുറ്റും വാലിബൻ’, ‘റിക്ഷാക്കാരൻ’, ‘ഒളിവിളക്ക്’, ‘അടിമൈപ്പെൺ’, ‘ഇദയക്കനി’, ‘നാളെ നമതേ’, ‘മധുരൈ മീണ്ട സുന്ദര പാണ്ഡ്യൻ’, ‘നവരത്‌നം’, ‘പട്ടിക്കാട്ടു പൊന്നയ്യ’, ‘നേരും നെരിപ്പും’, ‘തലൈവൻ’, ‘മാട്ടുക്കാര വേലൻ’, ‘നാൻ ആണയിട്ടാൽ’, ‘തൊഴിലാളി’, ‘വേട്ടക്കാരൻ’, ‘വ്യവസായി’ തുടങ്ങി ഒട്ടനവധി എം.ജി.ആർ. ചിത്രങ്ങൾ ആ കാലത്തെ എന്റെ സിനിമാ സ്വപ്‌നങ്ങളെ ചൂടുപിടിപ്പിച്ചു. മാജിക്ക് കാണുന്നതുപോലെ ആസ്വദിക്കാൻ കഴിയുന്നവയായിരുന്നു ആ സിനിമകളെല്ലാം. ഒരിക്കലും മലയാളത്തിൽ കാണാൻ കഴിയാത്ത ആക്ഷൻ സീക്വൻസുകളും ഗാനചിത്രീകരണങ്ങളുമായിരുന്നു എം.ജി.ആർ സിനിമകൾ പകർന്നു നൽകിയത്. കമ്പ് വച്ചുള്ള അടിയും ഉശിരൻ വാൾപ്പയറ്റും തിയറ്ററുകളെ ഇളക്കിമറിച്ച ആ കാലം മനസിലിപ്പോഴും ആവേശം നിറയ്ക്കുന്നുണ്ട്.

എം.ജി.ആർ വളരെ അഡ്വാൻസ്ഡ് ആയിരുന്നുവെന്ന് എനിക്ക് തോന്നിയിട്ടുണ്ട്. പ്രത്യേക ഡ്രസുകളാണ് സിനിമയിൽ അദ്ദേഹം ഉപയോഗിച്ചിരുന്നത്. ചുവന്ന പാന്റും പച്ച ഷർട്ടുമൊക്കെ! ഇന്നത് ഫാഷനാണെങ്കിൽ വർഷങ്ങൾക്കുമുമ്പേ അതുപയോഗിച്ച നടനാണ് എം.ജി.ആർ. ഒരു സിനിമയിൽ വെറുതേ പോയി അഭിനയിക്കില്ല അദ്ദേഹം. കഥ കേട്ടശേഷം ആവശ്യമായ മാറ്റങ്ങൾ നിർദ്ദേശിക്കും. പാട്ടിലും ഫൈറ്റിലുമെല്ലാം ക്രിയാത്മകമായ ഇടപെടൽ ഉണ്ടാകും. വെള്ളത്തിനടിയിൽ ഗാനരംഗം ചിത്രീകരിക്കുക, ജപ്പാനിലും അമേരിക്കയിലും പോയി ഷൂട്ട് ചെയ്യുക. ഇങ്ങനെ വളരെ അഡ്വാൻസ്ഡ് ആയി ചിന്തിച്ചു അദ്ദേഹം.
ജീവിതത്തിലെ പരുക്കൻ അനുഭവങ്ങളെ സർഗാത്മകമായി മറികടക്കാനുള്ള സമരമായിരുന്നു എംജിആറിന്റെ ജീവിതം.

subscribe

നാടകം പഠിച്ചു; സിനിമാനടനായി !
-മധു

Categories:

അരങ്ങ് ഒരു വിസ്മയക്കാഴ്ചയായി മാറിയത് എന്റെ ഏഴാം വയസിലാണ്. ആദ്യമായി നാടകം കണ്ടത് വി.ജെ.ടി ഹാളിൽ വച്ചായിരുന്നു. നാടകത്തിന്റെ പേര് ഇപ്പോൾ ഓർമയില്ല. ആ നാടകത്തിനോട് ഇഷ്ടം തോന്നാനുള്ള പ്രധാന കാരണം എന്റെ അപ്പൂപ്പൻ പത്മനാഭൻപിള്ള ഹാസ്യകഥാപാത്രമായി അതിലഭിനയിച്ചിരുന്നു എന്നതുകൊണ്ടാണ്. ഭാര്യയെ ഭയമുള്ള ഒരു കഥാപാത്രമായാണ് അപ്പൂപ്പൻ അരങ്ങിലെത്തിയത്. മുളവനമുക്കിലെ വായനശാലയിലയായിരുന്നു നാടകം അവതരിപ്പിച്ചത്. വായനശാലാപ്രവർത്തകരെല്ലാം കൂടി നാടകത്തിൽ അഭിനയിച്ചപ്പോൾ അപ്പൂപ്പനും ഒപ്പം കൂടിയതാവണം. അല്ലാതെ അതിനു മുമ്പോ പിമ്പോ അപ്പൂപ്പന് നാടകഭ്രമമൊന്നും ഉള്ളതായി കണ്ടിട്ടില്ല. അപ്പൂപ്പന്റെ തകർപ്പൻ അഭിനയമായിരിക്കാം നാടകത്തോടുള്ള താത്പര്യം എന്നിലുണ്ടാക്കിയത്. എന്റെ നാടകതാത്പര്യം ആദ്യമൊന്നും വീട്ടുകാർ ശ്രദ്ധിച്ചിരുന്നില്ല. കുട്ടിക്കളിക്കപ്പുറം പ്രാധാന്യമൊന്നും അവരതിനു നൽകിയില്ല. അമ്മാവന്റെ വീട്ടിലെ തൊഴുത്തുകളായിരുന്നു അക്കാലത്ത് ഞങ്ങളുടെ നാടകക്കളരികൾ. പകൽ കന്നുകാലികളെ അഴിച്ചുകെട്ടിയാൽ പിന്നെ തൊഴുത്ത് ഒന്നു കഴുകിവൃത്തിയാക്കേണ്ട കാര്യമേയുള്ളൂ. സ്റ്റേജിന്റെ ആകൃതിയാണ് തൊഴുത്തിന്, ചുറ്റും ഓലകൊണ്ട് മറച്ച് ടിക്കറ്റ് വച്ചാണ് നാടകം കളി. നാലുകാശ്, എട്ടുകാശ്, ഒരു ചക്രം ഇങ്ങനെയായിരുന്നു ടിക്കറ്റ് നിരക്ക്. ടിക്കറ്റെടുക്കാത്ത ആർക്കും പ്രവേശനമില്ല. അക്കാലത്ത് നാടകവുമായി ബന്ധപ്പെട്ട രസകരമായ ഒട്ടേറെ അനുഭവങ്ങളുണ്ടായിട്ടുണ്ട്. അതിലൊന്നാണ് ‘ദുർവാസാവിന്റെ ഭിക്ഷ’ എന്ന നാടകത്തിന്റെ അവതരണം. നാലാം ക്ലാസിലെ ടെക്സ്റ്റ് ബുക്കിൽ നിന്നെടുത്തതാണ് ആ നാടകം. നാടകത്തിന്റെ റിഹേഴ്‌സലും നാലു ചക്രം വച്ചുള്ള ടിക്കറ്റ് വിൽപ്പനയും നന്നായി നടന്നു. നാടകം അരങ്ങേറാനായപ്പോൾ പാഞ്ചാലിയുടെ വേഷം കെട്ടിയിരുന്ന ചങ്ങാതിയെ കാണാനില്ല. അന്വേഷിച്ചപ്പോൾ ടിക്കറ്റ് വിറ്റ കാശുമായി പാഞ്ചാലി മുങ്ങിയെന്നാണറിയുന്നത്. നാടകം കാണാനെത്തിയവർ വേണ്ടപോലെ ശകാരവും തന്നു മടങ്ങി. സ്‌കൂൾ പഠനകാലത്ത് നാടകം ലഹരിയും ആവേശവുമായി. പക്ഷേ, എം.ജി കോളേജിലെയും യൂണിവേഴ്‌സിറ്റി കോളേജിലെയും പഠനനാളുകളിൽ കലാലയ അരങ്ങിൽ നാടകങ്ങളൊന്നും ഞാൻ അവതരിപ്പിച്ചിരുന്നില്ല. കോളേജിനുപുറത്തെ ആർട്‌സ് ക്ലബ്ബുകളുമായി ബന്ധപ്പെട്ടായിരുന്നു എന്റെ നാടകപ്രവർത്തനങ്ങൾ.

subscribe

നമസ്‌ക്കാരം ദിനേശാണ് പി ആർ ഒ
-എ എസ് ദിനേശ്

Categories:

സിനിമയിലെത്തി വർഷങ്ങൾ കഴിഞ്ഞ് നാലാളുകൾ അറിഞ്ഞു തുടങ്ങി ഇത്തിരി ചില്ലറ കിട്ടിയൊന്നു പച്ച പിടിച്ചു തുടങ്ങിയതോടെ സ്ഥിരം കേൾക്കുന്ന ഒരു വാചകമുണ്ടായിരുന്നു.
‘ഇനിയൊരു കാർ വാങ്ങാനുള്ള സമയമായിട്ടോ…’
സുഖമുള്ള വാക്കുകളായിരുന്നെങ്കിലും എനിക്കതിൽ താത്പര്യവും ആഗ്രഹവുമില്ലായിരുന്നു. എന്റെ ജോലിക്ക് അതിന്റെ ആവശ്യവുമില്ല. അതിനേക്കാൾ ഉപരി കാർ ഓടിക്കുന്നതിൽ എന്തോ ഭയവുമുണ്ടായിരുന്നു.
ലൈസൻസ് എടുക്കു, കാറിന്റെ കാര്യം നമുക്ക് പരിഗണിക്കാമെന്ന് ഒരു നിർമാതാവ് പറഞ്ഞപ്പോഴും ഞാൻ അതിനൊന്നും ശ്രമിച്ചില്ല. സൈക്കിളിൽ സഞ്ചരിച്ചിരുന്ന എനിക്കിപ്പോളുള്ള ആക്ടീവ തന്നെ ധാരാളം. അതു കൊണ്ട് സ്വന്തമായ ഒരു കാർ എന്റെ മനസിലില്ല. മറ്റുള്ളവരെ കാണിക്കാൻ മുറ്റത്ത് ഒരു കാർ വേണ്ടയെന്നാണ് വീട്ടുകാരും.

ഇനിയാണ് ട്വിസ്റ്റ്.
അറുപതാം പിറന്നാളിനു ഒരു മാസം മുമ്പ് പെട്ടെന്നൊരു തോന്നൽ. ഈ വിശേഷ പിറന്നാളിനു ഞാൻ എനിക്ക് എന്തു സമ്മാനമാണ് നൽകാൻ കഴിയുക?
ഈ പ്രായത്തിൽ എന്താണ് പഠിക്കാനുള്ളത്? വെളിച്ചം മിന്നി. കാർ ഓടിക്കാൻ പഠിച്ചാല്ലോ? ആലോചിച്ചപ്പോഴേ ഭയം വിരുന്നെത്തി. പിന്നെ അതിനെ ക്കുറിച്ചായി ചിന്ത. എത്രയോ പേർ ഓടിക്കുന്നു. അപ്പോ എനിക്കും കഴിയണം. മാത്രമല്ല അറുപതിൽ പഠിക്കാൻ പോകുകയെന്നത് ഒരു ത്രില്ലല്ലേ?
അങ്ങനെ എന്തും വരട്ടെയെന്നു കരുതി ഡ്രൈവിങ് സ്‌കൂളിൽ ചേർന്നു. എന്റെ ജീവിതത്തിലെ കുട്ടിത്തം നിറഞ്ഞ ഓർമകൾ സമ്മാനിച്ച അസുലഭ ദിവസങ്ങൾ.

അറുപതുക്കാരൻ ആറു വയസുകാരനായി ഒന്നാം ക്ലാസിൽ പോകുമ്പോഴുള്ള അത്ഭുതവും ഒന്നുമറിയാത്തവന്റെ മാനസികാവസ്ഥയും. എനിക്കിപ്പോൾ അത് ഏറ്റവും മൂല്യമുള്ള അനുഭവമാണ്. ഞാൻ ഒന്നുമല്ലയെന്ന് വീണ്ടും ബോധ്യപ്പെട്ട നിമിഷങ്ങൾ. എന്നെക്കാൾ പകുതിയിലധികം പ്രായക്കുറവുള്ള ആശാൻ
വഴക്കു പറയുമ്പോൾ പരിഹസിക്കുമ്പോൾ ഒടുവിൽ നിവൃത്തിയില്ലാതെ ചെവിക്കു പിടിക്കുമ്പോൾ ഭയത്താൽ വിറക്കുന്ന ആറുകാരനായി. വാക്കുകൾക്കതീതമാണ് ആ അനുഭവം.

subscribe

മഹാഗുരുവിലെ കാരുണ്യവാനായ മനഃശാസ്ത്രജ്ഞൻ
-സുഗത പ്രമോദ്

Categories:

ആർക്കും എന്തും തുറന്നു പറയാനുള്ള ഒരു കുമ്പസാരക്കൂടായിരുന്നു ഗുരു നിത്യ ചൈതന്യ യതി. ഒരിക്കൽ, ഞാൻ ഗുരുവിന്റെ അടുത്തിരുന്നു അന്നത്തെ തപാലിൽ വന്ന കത്തുകൾ ഓരോന്നായി വായിച്ചു കൊടുക്കുകയായിരുന്നു. ഓരോ കത്തും പൊട്ടിക്കുമ്പോൾ ഗുരു വാങ്ങി നോക്കും. തീർത്തും വ്യക്തിപരമല്ലാത്തതാണെങ്കിൽ ഉറക്കെ വായിക്കാൻ പറയും.

ഒരു ദിവസം അങ്ങനെ ഒട്ടും പരിചയമില്ലാത്ത ഒരാളുടെ കവർ പൊട്ടിച്ചു നോക്കിയിട്ട് ”ഇതെന്താ മോളേ ലേഖനമോ മറ്റോ ആണെന്ന് തോന്നുന്നു. അഞ്ചെട്ട് പേജുണ്ടല്ലോ. നീ ഇതൊന്ന് വായിച്ചേ…” എന്നു പറഞ്ഞ് എന്റെ കൈയിൽ തന്നു.
അത്യന്തം ക്ഷമയോടെ ആ പേജുകൾ മുഴുവൻ ഞാൻ ഉറക്കെ വായിച്ചു. ഗുരു അതു മുഴുവൻ കേട്ടിരുന്നു. പിന്നെ, ഒരു പോസ്റ്റ് കാർഡ് എടുത്ത് അതിൽ ഇങ്ങനെ എഴുതി. ‘പ്രിയപ്പെട്ട പ്രശാന്ത്…. ഈ കാർഡ് കിട്ടിയാൽ ഉടൻ പുറപ്പെടുക. ഇവിടെ നല്ല തണുപ്പാണ്. അതുകൊണ്ട് കമ്പിളി വസ്ത്രങ്ങൾ എന്തെങ്കിലും ഉണ്ടെങ്കിൽ അതും എടുത്ത് രണ്ടാഴ്ച എന്റെ കൂടെ വന്നു താമസിക്കൂ. ഭക്ഷണവും താമസിക്കാനുള്ള മുറിയും ഞാൻ തരാം.
ഇനി കമ്പിളി വസ്ത്രങ്ങൾ ഇല്ലെങ്കിൽ വിഷമിക്കേണ്ട. അതും നമുക്കു ശരിയാക്കാം. എത്രയും വേഗം പുറപ്പെട്ടോളൂ. സ്‌നേഹപൂർവ്വം നിത്യ’. ഇത്ര മാത്രം. എഴുതി പോസ്റ്റ് ചെയ്യാൻ കൊടുത്തു.

എനിക്കു ഭയമാണ് തോന്നിയത്. കാരണം ആ കത്തിന്റെ ഉള്ളടക്കം ഇങ്ങനെയായിരുന്നു. ഫൈനൽ ഇയർ ഡിഗ്രിക്കു പഠിക്കുന്ന ഒരു യുവാവിന് അയാളെ നൊന്തു പെറ്റ അമ്മയോടു കാമം തോന്നുന്നു. ഒരു മകന്റെ ധാർമികതയിൽ അയാൾ സ്വയം നിയന്ത്രിച്ച് നിയന്ത്രിച്ച് പൊട്ടിത്തകരുമെന്ന അവസ്ഥയായപ്പോൾ എന്തും വരട്ടെ എന്നു കരുതി അയാൾ ധൈര്യപൂർവം തുറന്നു പറയാൻ കണ്ടെത്തിയതാണ് നിത്യ ഗുരുവിനെ. അമ്മയോടുള്ള അചഞ്ചലമായ സ്‌നേഹവും ആദരവും ഉള്ളു നിറയെ തുളുമ്പുമ്പോഴും അമ്മ അടുത്തു വരുമ്പോൾ അവൻ വല്ലാതാകും.

subscribe

ഉയരങ്ങൾ കീഴടക്കി മനു അശോകൻ
-മനു അശോകൻ / ബി. ഹൃദയനന്ദ

Categories:

ഉയരെ കണ്ടു. കണ്ടു ശീലിച്ച രീതിയിലുള്ള സിനിമയല്ല. ഒരു ഹിറ്റ് സിനിമയ്ക്ക് നിർബന്ധമായും ഉണ്ടാകണമെന്ന് വിചാരിക്കുന്ന സ്ഥിരം ചേരുവകളൊന്നുമില്ല. എന്നിട്ടും പടം തീർന്നപ്പോൾ തിയേറ്ററിലുയർന്ന കൈയടി എന്നെ ഏറെ സന്തോഷിപ്പിച്ചു. മനു അശോകൻ ഒരു വലിയ പ്രതീക്ഷയാണ്…’
സംവിധായകൻ സത്യൻ അന്തിക്കാട് ഫേസ്ബുക്കിൽ കുറിച്ചതാണിത്. പാർവതിയും ആസിഫലിയും ടൊവിനോയും മുഖ്യവേഷത്തിലെത്തിയ ‘ഉയരെ’ ഉയരങ്ങൾ കീഴടക്കുമ്പോൾ സംവിധായകൻ മനു അശോകൻ സംസാരിക്കുന്നു.

  • സിനിമ എന്ന സ്വപ്നം

പ്ലസ്ടുവിനു പഠിക്കുമ്പോഴാണ് സിനിമ സ്വപ്‌നമായി മനസിൽ കയറിയത്. എങ്ങനെയും സിനിമയിൽ എത്തണമെന്ന ചിന്തയായിരുന്നു. ഒരിക്കൽ തിരക്കഥാകൃത്തും സംവിധായകനുമായ രഞ്ജൻ പ്രമോദിനെ പരിചയപ്പെട്ടു. സിനിമാമോഹം അദ്ദേഹത്തെ അറിയിച്ചു. വിഷ്വൽ മീഡിയയെപ്പറ്റി പഠിക്കാനായിരുന്നു അദ്ദേഹത്തിന്റെ ഉപദേശം. അങ്ങനെയാണ് കാക്കനാട്ടെ സ്‌കൂൾ ഒഫ് വിഷ്വൽ സ്റ്റഡീസിൽ വിഷ്വൽ കമ്മ്യൂണിക്കേഷനിൽ പിജി ഡിപ്ലോമ ചെയ്തത്. പിന്നീട് കാലടി സംസ്‌കൃത സർവകലാശാലയിൽ നിന്ന് തിയേറ്ററിൽ ബിരുദാനന്തരബിരുദവും നേടി.

  • നാടകം നൽകിയ കോൺഫിഡൻസ്

പഠനകാലത്ത് കലാപ്രവർത്തനങ്ങളൊന്നും ഉണ്ടായിരുന്നില്ല. തെരുവുനാടകങ്ങളിലൂടെയാണ് ഞാൻ കലാരംഗത്തേക്കുവരുന്നത്. നാടകം എന്നെ ഏറെ സ്വാധീനിച്ചിട്ടുണ്ട്. ഞാൻ കോഴിക്കോട്ടുകാരനാണ്. നാടകത്തെ പിന്തുണക്കുന്ന നാടാണ് കോഴിക്കോട്. അന്നത്തെ കലാപ്രവർത്തനങ്ങളാണ് എന്റെ കൈമുതലും ആത്മവിശ്വാസവും. ആക്ഷനും കട്ടും പറയൽ മാത്രമല്ല സിനിമാസംവിധാനം. നിരവധി പേരെ ഒരുമിപ്പിച്ചുനിർത്തുകയാണ് സംവിധായകൻ എന്ന നിലയിൽ എന്റെ പ്രധാന വെല്ലുവിളി. അതിനുള്ള ആത്മവിശ്വാസം ലഭിച്ചത് നാടകത്തിൽ നിന്നാണ്.

  • എന്നെ സിനിമയിലെടുത്തു

2007 ൽ അന്തിപ്പൊൻവെട്ടം എന്ന സിനിമയിൽ അസിസ്റ്റന്റ് ഡയറക്ടറായിട്ടായിരുന്നു തുടക്കം. പിന്നീട് നിരവധി സംവിധായകർക്കൊപ്പം പ്രവർത്തിച്ചു. സിനിമ പഠിക്കുക മാത്രമായിരുന്നു ലക്ഷ്യം. പിന്നീടാണ് ദിലീഷ് പോത്തനെ പരിചയപ്പെട്ടത്. സംവിധായകൻ നന്ദകുമാർ കാവിലിനൊപ്പവും പ്രവർത്തിച്ചു. അങ്ങനെ ഒരുപാടുനാളത്തെ അലച്ചിലിനൊടുവിൽ ഞാൻ എന്റെ റൂട്ടിൽ എത്തി. രാജേഷ് പിള്ളയുടെ സംവിധാനസഹായിയായി എത്തിയതാണ് വഴിത്തിരിവായത്. ഇരുപതോളം സിനിമകളിൽ സംവിധാന സഹായിയായി പ്രവർത്തിച്ചിട്ടുണ്ട്.

subscribe

Mahindra Marazzo
-അമൽ കെ. ജോബി

Categories:

മഹീന്ദ്ര മറാസോ മൾട്ടി പർപ്പസ് വാഹനം ഉപഭോക്താക്കളുടെ മനം കീഴടക്കി. എം2, എം4, എം6, എം8 എന്നീ നാല് വേരിയന്റുകളിൽ ഓൾ-ന്യൂ മഹീന്ദ്ര മറാസോ എംപിവി ലഭിക്കുക. 9.99 ലക്ഷം രൂപ മുതൽ 13.90 ലക്ഷം രൂപ വരെയാണ് വാഹനത്തിന്റെ ഇന്ത്യ എക്‌സ് ഷോറൂം വില. മഹീന്ദ്രയുടെ പൂർണമായും പുതിയ മോഡലാണ് മറാസോ. മഹീന്ദ്രയുടെ ഇന്ത്യയിലെ ഫ്‌ളാഗ്ഷിപ്പ് മോഡലും ഇനി മറാസോ തന്നെ. എംപിവി സെഗ്‌മെന്റിൽ ലീഡറായി വിലസുന്ന ടൊയോട്ട ഇന്നോവ ക്രിസ്റ്റ, ടാറ്റ ഹെക്‌സ എന്നിവയാണ് മഹീന്ദ്ര മറാസോയുടെ എതിരാളികൾ. മാരുതി സുസുകി എർട്ടിഗയും ഒന്നു കരുതിയിരിക്കുന്നത് നന്ന്.

പുതിയ 1.5 ലിറ്റർ, 4 സിലിണ്ടർ ഡീസൽ എൻജിനാണ് മഹീന്ദ്ര മറാസോ മൾട്ടി പർപ്പസ് വാഹനത്തിന് കരുത്തേകുന്നത്. 120 ബിഎച്ച്പി പരമാവധി പവറും 300 എൻഎം പരമാവധി ടോർക്കും പുറപ്പെടുവിക്കും വിധം എൻജിൻ ട്യൂൺ ചെയ്തിരിക്കുന്നു. എൻജിനുമായി 6 സ്പീഡ് മാന്വൽ ഗിയർബോക്‌സ് ചേർത്തുവച്ചു. ഓട്ടോമാറ്റിക് ട്രാൻസ്മിഷനെക്കുറിച്ച് തത്ക്കാലം മഹീന്ദ്ര ഒന്നും പറയുന്നില്ല. മറാസോയുടെ പെട്രോൾ എൻജിൻ വേർഷന്റെ പണിപ്പുരയിലാണ് മഹീന്ദ്ര. പിന്നീട് പുറത്തിറക്കുമെന്ന് പ്രതീക്ഷിക്കാം.

മഹീന്ദ്ര വാഹനങ്ങളിൽ ഏറ്റവുമധികം ഫൂട്ട്പ്രിന്റുള്ള മോഡലാണ് മറാസോ. വലിയ അളവുകളും അഗ്രസീവ് സ്‌റ്റൈലിംഗുമാണ് മറാസോയുടെ പ്രത്യേകത. സ്രാവിൽ നിന്ന് പ്രചോദനമുൾക്കൊണ്ടതാണ് മഹീന്ദ്ര മറാസോയുടെ സ്റ്റൈലിങ്. സ്റ്റൈലിഷ് എന്ന് വിശേഷിപ്പിക്കാവുന്ന ക്രോം ടൂത്ത് ഗ്രിൽ, പൈലറ്റ് ലൈറ്റുകൾ സഹിതം ഡബിൾ ബാരൽ ഹെഡ്‌ലാംപുകൾ, ഇന്റഗ്രേറ്റഡ് എൽഇഡി ഡേടൈം റണ്ണിംഗ് ലൈറ്റുകൾ, കണ്ണിന്റെ ആകൃതിയുള്ള ഫോഗ് ലാംപുകൾ എന്നിവ മൾട്ടി പർപ്പസ് വാഹനത്തിന്റെ വിശേഷങ്ങളാണ്. 17 ഇഞ്ച് അലോയ് വീലുകൾ, വലിയ പുറം കണ്ണാടികൾ, സ്രാവിന്റെ വാലിൽ നിന്ന് പ്രചോദനമുൾക്കൊണ്ട ടെയ്ൽലാംപുകൾ, ടെയ്ൽലാംപുകളെ ബന്ധിപ്പിച്ച് തടിച്ച ക്രോം സ്ലാറ്റ് എന്നിവയും ഫീച്ചറുകൾ തന്നെ.

subscribe

അപ്പോഴും അച്ഛന്റെ ചിത കത്തുകയായിരുന്നു
– ഭാനുപ്രകാശ്

Categories:

മുപ്പത്തിമൂന്ന് വർഷങ്ങൾക്കു മുമ്പുള്ള ആ അരങ്ങ് ബാലുശേരി സരസ ജീവിതത്തിലൊരിക്കലും മറക്കില്ല. എറണാകുളത്തിനടുത്ത് ഒരു വേദിയിൽ സ്റ്റേജ് ഇന്ത്യക്കു വേണ്ടി പി.എം. താജ് രചിച്ച് വിക്രമൻ നായർ സംവിധാനം ചെയ്ത ‘അഗ്രഹാരം’ എന്ന നാടകത്തിലെ പട്ടത്തിയായി നിറഞ്ഞാടുകയായിരുന്നു സരസ. കാഴ്ചക്കാരെയും സഹനടീനടന്മാരെയും ഒരുപോലെ അമ്പരപ്പിച്ചുകൊണ്ടായിരുന്നു മഞ്ഞച്ചരടിട്ട്, മുഖത്ത് മഞ്ഞൾ തേച്ച് പട്ടത്തിയായുള്ള അവരുടെ പ്രകടനം. പലരും ചോദിച്ചു: ‘ഇവർ ശരിക്കും പട്ടത്തിതന്നെയാണോ?’. അത്രമാത്രം കഥാപാത്രമായി മാറിക്കഴിഞ്ഞിരുന്നു സരസ. ഇതെല്ലാം കണ്ടുകൊണ്ട് സ്റ്റേജിന്റെ സൈഡ് കർട്ടനരികിൽ എന്താണ് വേണ്ടതെന്നറിയാത്ത ചിന്താക്കുഴപ്പത്തിൽ നിൽക്കുകയാണ് വിക്രമൻ നായർ. ഇത്രമാത്രം ഇഴുകിച്ചേർന്ന് അഭിനയിക്കുന്ന ഒരു നടിയോട് നാടകത്തിനിടയിൽ ആ സത്യം പറയാൻ അയാൾക്ക് തോന്നിയില്ല. രണ്ടും കൽപ്പിച്ച് പറഞ്ഞാൽത്തന്നെ അത് അഭിനേതാവിനോടും നാടകത്തോടുമുള്ള അവഹേളനമായിത്തീരില്ലേ സന്ദേഹത്തിൽ വിക്രമൻ നായർ മൗനം കടിച്ചുപിടിച്ചുനിന്നു. അവസാന രംഗവും കഴിഞ്ഞ് തിരശീല താഴുമ്പോൾ നിലയ്ക്കാത്ത ഹർഷാരവം. ബാലുശേരി സരസയുടെ അഭിനയസിദ്ധിക്കു ലഭിച്ച അംഗീകാരം കൂടിയായിരുന്നു ആ ഹർഷാരവം.

ഗ്രീൻ റൂമിലേക്കെത്തി മുഖത്തുതേപ്പുകൾ കഴുകിക്കളയുമ്പോൾ അവരുടെ മനസ് ആഹ്ലാദദീപ്തമായിരുന്നു. അപ്പോഴും കഥാപാത്രത്തിൽ നിന്നും സരസ പൂർണമായും മോചിതയായിരുന്നില്ല. പട്ടത്തിയുടെ അടയാളങ്ങളിൽ അവരുടെ ചലനങ്ങളിൽ അവശേഷിക്കുന്നുണ്ടായിരുന്നു. നാടകം കഴിയാൻ കാത്തുനിന്ന വിക്രമൻ നായർ ആ സമയത്ത് അവിടേക്കു കടന്നുവന്നു. ഇനിയും പറയാൻ വൈകരുതെന്ന തിടുക്കത്തോടെ അദ്ദേഹം പറഞ്ഞു: ‘സരസയുടെ അച്ഛന് അസുഖം അൽപ്പം കൂടുതലാണ്. കോഴിക്കോട്ടു നിന്നും വിളിച്ചിരുന്നു. നാടകം നടന്നുകൊണ്ടിരിക്കുന്ന സമയമായതിനാൽ പറയാതിരുന്നതാണ്’. സരസയുടെ മുഖത്തെ ആഹ്ലാദത്തിന്റെ തിരയിളക്കങ്ങളെ മുറിച്ചുകൊണ്ട് ദുഃഖത്തിന്റെ മിന്നലാട്ടങ്ങൾ അതിവേഗം കടന്നുപോയി. അഗ്രഹാരത്തിലെ പട്ടത്തി പെട്ടെന്ന് സരസയായി മാറി. അരങ്ങിന് പുറത്തെ പച്ചയായ ജീവപരിസരത്തേക്ക് പെട്ടെന്ന് ഇറങ്ങിവന്നുകൊണ്ട് അവർ ചോദിച്ചു: ”അച്ഛന് അസുഖം കൂടുതലാണെന്നല്ലേ പറഞ്ഞിട്ടുള്ളൂ, വേറെയൊന്നുമില്ലല്ലോ?”. ”ഒരു കുഴപ്പവുമില്ല, സരസ പേടിക്കേണ്ട”. വിക്രമൻ നായർ ആശ്വസിപ്പിച്ചു.

subscribe

കോട്ടപ്പാറയിലെ മേഘങ്ങൾ
– അരുൺ

Categories:

ഇടുക്കി എന്ന പേരു കേൾക്കുമ്പോൾ, മനസിലേക്ക് ഒടിയെത്തുക കണ്ണിനു കുളിർമയേകുന്ന പച്ചപ്പും കോടമഞ്ഞിറങ്ങുന്ന താഴ്‌വാരങ്ങളും തേയിലച്ചെടികളും കാടും മേടും കുന്നും പുഴകളും കാട്ടരുവിയും അവയിൽ വിഹരിക്കുന്ന വന്യമൃഗങ്ങളുമൊക്കെയാണ്. ഇടുക്കിക്കു പെരുവിരൽ മുതൽ നെറുകു വരെ കാഴ്ചകൾ ആണ്. ദിനവും പുതിയ പുതിയ കാഴ്ചകളുമായി സഞ്ചാരികളെ അവൾ മാടിവിളിക്കും. ഇത്തവണ യാത്ര വണ്ണപ്പുറം അടുത്തുള്ള കോട്ടപ്പാറ എന്ന സ്ഥലത്തേക്കാണ്. വീട്ടിൽ നിന്ന് 13 കിലോമീറ്റർ ദൂരമേയൊള്ളൂ കോട്ടപ്പാറയ്ക്ക്. പലവട്ടം കോട്ടപ്പാറവഴി സഞ്ചരിച്ചിട്ടുണ്ടെങ്കിലും ഇങ്ങനെ ഒരു അത്ഭുതം അവിടെയുണ്ടായിരുന്നതായി അറിയില്ലായിരുന്നു. എന്തിന് ഏറെപ്പറയണം ആ നാട്ടുകാർക്ക് പോലും അതിനെക്കുറിച്ച് അറിവുണ്ടായിരുന്നില്ല.

പിന്നെയെങ്ങനെ പുറംലോകം അറിഞ്ഞു എന്നതിനെക്കുറിച്ച് ഒരുപിടിയുമില്ല. പക്ഷേ കാട്ടുതീ പടരുന്നതിലും വേഗത്തിലാണ് ആ വാർത്ത പടർന്നതും സന്ദർശകരുടെ കുത്തൊഴുക്ക് തുടങ്ങിയതും. ഹൈസ്‌കൂളിൽ പഠിക്കുന്ന കാലത്ത് സീനിയറായി പഠിച്ച ഫെലിക്‌സ് ആണ് ആദ്യമായി ഈ സ്ഥലത്തെക്കുറിച്ച് പറയുന്നത്. അവിടെ പോയതിന്റെ ചിത്രങ്ങൾ വാട്‌സ്ആപ് വഴി അയച്ചുതരുകയും ചെയ്തു. അവൻ അയച്ചു തന്ന ചിത്രങ്ങൾ കണ്ടപ്പോൾ ആദ്യം വിചാരിച്ചത് പറ്റിക്കുന്നതാണെന്നാണ്. കാരണം, മൂന്നാർ പോലെ വളരെ ഉയരത്തിലുള്ള ഇടങ്ങളിൽ മാത്രമാണ് ഈ കാഴ്ച കണ്ടിട്ടുള്ളൂ. വണ്ണപ്പുറം പോലെയുള്ള താഴ്ന്ന പ്രദേശത്തുള്ള കുന്നിൻ മുകളിൽ കയറിയാൽ മേഘങ്ങളെ കീഴടക്കാമെന്ന് സ്വപ്‌നത്തിൽ പോലും ആരും വിചാരിക്കില്ല. ആദ്യം ചിരിച്ചു തള്ളിയെങ്കിലും ഫെലിക്‌സ് എന്നെ വിടാൻ ലക്ഷണമില്ലായിരുന്നു. നീ ഒരു ബ്ലോഗ് ചെയ്യണം ഇത് പുറംലോകം അറിയണം എന്നൊക്കെയായിരുന്നു അവന്റെ ആഗ്രഹങ്ങൾ. ഫെലിക്‌സിനെ വിശ്വസിച്ച് ലീവ് എടുത്ത് തലേദിവസം രാത്രി വീട്ടിലെത്തി. രാവിലെ ആറുമണിക്ക് എത്തിയാലെ കാണുകയുള്ളൂ എട്ടുമണിയോടെ മേഘങ്ങൾ മാഞ്ഞുപോകുമെന്നും മുന്നറിയിപ്പ് നൽകിയിരുന്നു. പാറു വിട്ടീൽ ഇല്ലാത്തതുകൊണ്ട് തലേദിവസം നാട്ടിലെ ചാങ്കുകളെ കോട്ടപ്പാറയിലേക്ക് പോകുന്ന കാര്യം പറഞ്ഞ് വിളിച്ചെങ്കിലും രാവിലെ എഴുന്നേൽക്കുന്ന കാര്യമോർത്ത് എല്ലാവരും പിൻവാങ്ങി. എന്നാൽ അലക്‌സ് മാത്രം ഞാൻ ആയച്ചുകൊടുത്ത ഫോട്ടോസിൽ വീണു.

രാവിലെ 5.30-ന് കാർ സ്റ്റാർട്ട് ചെയ്യുന്നത് കണ്ട് അമ്മ വിചാരിച്ചു ഞാൻ രാവിലെ തന്നെ മുങ്ങുവായിരിക്കുമെന്ന്, പതിവ് അതായതുകൊണ്ട് അമ്മയെയും തെറ്റുപറയാൻ പറ്റില്ല. എങ്ങോട്ടു പോകാനാണെങ്കിലും ഫുഡ് കഴിച്ചിട്ട് പോയാൽ മതിയെന്നായി അമ്മ. ഫോട്ടോസ് കണിച്ചിട്ട് വണ്ണപ്പുറം വരെയൊള്ളൂ ഇപ്പം വരാം എന്നു പറഞ്ഞപ്പോൾ ഇത് മൂന്നാർ അല്ലേ അപ്പോൾ നീ മൂന്നാറിനാണോ പോകുന്നതെന്ന് അമ്മ. ഇതിനിടെ അലക്‌സിന്റെ കോൾ വന്നത് രക്ഷയായി. രാവിലെ തന്നെ വഴിയിൽ നല്ല മഞ്ഞുണ്ട്. റോഡിലൊന്നും ആരെയും കാണുന്നില്ല. സാധാരണ നടക്കാനും ഓടാനും ഒക്കെയായി ധാരളം ആളുകളെ കാണുന്നതാണ്. ഒരു പക്ഷേ തണുപ്പായതുകൊണ്ട് താമസിച്ചാകും എഴുന്നേൽക്കുന്നത്. വഴിയിൽ നിന്ന് അലക്‌സിനെയും കൂട്ടി കോട്ടപ്പാറക്ക് അടുത്ത ഗിയർ ഇട്ടു. ഫെലിക്‌സിനെ വിളിച്ചപ്പോൾ പുറകെയെത്തിക്കൊള്ളാമെന്ന് അറിയിച്ചു. പോകുന്ന വഴിയിലാണ് സുഹൃത്ത് ഫൈസലിന്റെ വീട്. വണ്ണപ്പുറത്ത് എത്തിയപ്പോൾ നേരെ ഫൈസലിന്റെ ഭാര്യ പാത്തുവിനെ വിളിച്ച് അവൻ വീട്ടിൽ ഉണ്ടോയെന്ന് തിരക്കി. ഇക്ക കടയിലേക്കു പോകുവാൻ റെഡിയായി നിൽക്കുവാന്ന് പാത്തു. ഫൈസലിനെ നേരിട്ടു വിളിച്ചാൽ മുങ്ങാനുള്ള സാധ്യതയുള്ളതുകൊണ്ടാണ് പാത്തുനെ വിളിച്ചത്. ഏതായാലും അവന് മുങ്ങുവാനുള്ള സമയം കൊടുക്കാതെ ഞങ്ങൾ അവനെ പൊക്കി.