Travel

You Are Here: Home / Archives / Category / Travel

മറക്കില്ല ആ രാത്രി, ഒരിക്കലും
അരുൺ ടോം

Categories:

സ്‌കൂളിൽ പഠിക്കുന്ന കാലത്ത് ക്ലാസിലെ കോമേഡിയനും അലമ്പനും എന്നാൽ, റിസൽറ്റ് വരുമ്പോൾ പഠിപ്പിസ്റ്റുമായി തീർന്നിരുന്ന ഒരേയൊരു വ്യക്തിയെ ഉണ്ടായിരുന്നുള്ളൂ അത് ഇംഗ്ലീഷ് പഠിപ്പിച്ചിരുന്ന ജോയിസാർ വിക്കിവീവി എന്ന് കളിയാക്കി വിളിച്ചിരുന്ന അജിത്ത് വി.വിയായിരുന്നു. അരുൺകുമാർ ജിയും അജിത്ത് വി.വിയും ഇരട്ടകൾ എന്നപോലെ ഒന്നിച്ചായിരുന്നു നടപ്പ്. അതിനു കാരണം ഉണ്ട്. ഇരുവരും അയൽക്കാരാണ്. 15 കിലോമീറ്ററുകൾ താണ്ടി ബസിൽ വരുന്ന എനിക്ക് ഇവർ ബസ്‌മെയിറ്റുകളും ക്ലാസ്‌മെയിറ്റുകളും ചങ്കുകളുമായിരുന്നു. എട്ടു മുതൽ പത്തുവരെയുള്ള മൂന്നു വർഷത്തെ പഠനകാലം ഓർമയിൽ നിന്ന് എടുത്താൽ ആദ്യം വരുന്ന മുഖങ്ങൾ ഇവരുടെതാകും. സ്‌കൂളിൽ ചങ്കായിട്ടു നടന്നവരാണു വലുതാകുമ്പോൾ ഏറ്റവും വലിയ അപരിചിതരായി മാറുന്നത് എന്നു പറയാറുണ്ട്. അതു സത്യവുമാണ്. സ്‌കൂൾ പഠനകാലത്ത് ഒരുപാത്രത്തിൽ നിന്നു ഭക്ഷണം കഴിച്ചു തോളിൽ കൈയിട്ട് ഒരിക്കലും പിരിയില്ല നമ്മളെന്ന് ഓട്ടോഗ്രാഫുമെഴുതിയവരാണ് ഇന്നു കണ്ടാൽപോലും മിണ്ടാതെ പലപ്പോഴും മുന്നിലൂടെ കടന്നു പോകാറുള്ളത്. സോഷ്യൽമീഡിയ വന്നതുകൊണ്ടു മാത്രം പല സൗഹൃദങ്ങളും നശിച്ചു പോകാതെ നിലനിന്നു പോകുന്നു എന്നതു മറ്റൊരു സത്യം. ഞാൻ പറഞ്ഞു വരുന്നത് ഈ അജിത്ത് വി.വിയെക്കുറിച്ചാണ്.

പത്ത് കഴിഞ്ഞു എല്ലാവരും പലവഴിയെ പിരിഞ്ഞുപോയി. ചിലരെ വഴിയിൽ വച്ചുകാണും ചിരിക്കും സംസാരിക്കും. ചിലരെ പിന്നീടു കണ്ടിട്ടേയില്ല. വർഷങ്ങൾ കടന്നുപോയതോടെ. വിദേശത്തും സ്വദേശത്തുമായി പല ജോലികളിൽ എല്ലാരും പ്രവേശിച്ചു. വാട്‌സ്ആപ്പിന്റെ വരവോടെ കുറച്ചു പേരെ കണ്ടെത്തി. ആ കൂട്ടത്തിൽ അജിത്തും ഉണ്ടായിരുന്നു. ഇടയ്ക്കു ഞങ്ങൾ ചാറ്റ് ചെയ്യും. അവനും ഭാര്യയും എന്റെ ബ്ലോഗുകൾ സ്ഥിരമായി വായിക്കാറുണ്ടെന്ന് കേട്ടപ്പോൾ ഒന്ന് ഞെട്ടി. ചുമ്മാ തള്ളിയതാകും ചിലപ്പോൾ.

ദുബായ് ഒരു ഫ്‌ളാഷ്ബാക്ക്
…………………………………………

ഒരാഴ്ച സന്ദർശനത്തിന് ദുബായിൽ എത്തിയതായിരുന്നു ഞാൻ. ഫേസ്ബുക്കിൽ ഫോട്ടോസ് പങ്കുവച്ചതുകൊണ്ട് ദുബായിൽ താമസമാക്കിയ ബന്ധുക്കളും സുഹൃത്തുക്കളും പരിചയക്കാരും എല്ലാം എന്നെ കോൺഡക്ട് ചെയ്തു. അപ്പോൾ ആണ് എനിക്ക് ഒരു കാര്യം മനസിലായത് കേരളത്തിലേക്കാളും കൂടുതൽ പരിചയക്കാർ ദുബായിലുണ്ടെന്ന്. ഒരു കല്ലെടുത്ത് എറിഞ്ഞാൽ അറിയാവുന്ന എതെങ്കിലും മലയാളിയുടെ തലയിൽ വീഴുമെന്നസ്ഥിതിയാണ്. ദുബായിലെ മൂന്നാമത്തെ ദിവസം. നേരം സന്ധ്യയായി തുടങ്ങുന്നു. എങ്ങോട്ടു പോകുമെന്ന് ഓർത്ത് റൂമിൽ ഇരിക്കുമ്പോഴാണ് ഒരു കോൾ വരുന്നത്. അളിയാ.. നീ എവിടെ…
ഞാൻ ഹോട്ടലിൽ ഉണ്ട്.. കട്ടപോസ്റ്റാണ്..
ഞാനും ഇവിടെ തന്നെയുണ്ട്. നീ ലോക്കേഷൻ വാട്‌സ്ആപ് ചെയ് അരമണിക്കൂറിനുള്ളിൽ എത്താം.

ഒരു കുളി പാസാക്കി ഹോട്ടലിനു പുറത്തിറങ്ങി വെറുതെ നടന്നു. ഒരു ടോയോട്ടോ കാർ ഹെഡ്‌ലൈറ്റ് മിന്നിക്കുന്നത് കണ്ടാണ് നോക്കുന്നത്. പത്താം ക്ലാസിൽ അവസാനമായി കണ്ടതാണ് പിന്നെ വർഷങ്ങൾക്ക് ശേഷം ദേ, ആ മുതൽ മുന്നിൽ നിൽക്കുന്നു. സാക്ഷാൽ അജിത്ത് വി.വി. പത്തു പതിനഞ്ച് വർഷം കഴിഞ്ഞെങ്കിലും അവന്റെ സ്വഭാവത്തിന് ഒരു മാറ്റവുമില്ല ആൾ പഴയ കാവടി തന്നെ. താടിയും മീശയും മുളച്ചുവെന്നത് ഒഴിച്ചാൽ രൂപത്തിനു പോലും മാറ്റമില്ല.

എന്താണ് അളിയാ അറബിനാട്ടിൽ പരിപാടി…
പറ്റുമെങ്കിൽ ഒരു അറബിച്ചിനെ ബാഗിലാക്കി കൊണ്ടുപോകണം അതിനു വന്നതാണ്..
ആ ബെസ്റ്റ്.. എന്നിട്ട് കിട്ടിയോ..
ഇല്ലാ.. നീ വേണം ഒരണ്ണത്തിനെ ഒപ്പിച്ച് തരാൻ..
ഫാ.. പുല്ലേ.. ഞാൻ എന്താ മാമയോ… വാ.. വണ്ടിയിൽ കയറ്, ഒരു കിടു സ്ഥലത്തു കൊണ്ടുപോകാം..

പിന്നെയങ്ങോട്ട് വിശേഷങ്ങൾ പറഞ്ഞുതീർക്കലായിരുന്നു. അപ്പോഴേക്കും കാർ ദുബായ് നഗരത്തെ രണ്ടുവട്ടം വലയം വച്ചു. രാത്രി ദുബായിയെ കുറച്ചുകൂടി സുന്ദരിയാക്കിയതായി തോന്നി. സ്വർണപ്രകാശത്തിൽ കുളിച്ചുകിടക്കുന്ന അംബരചുബികൾ.. ഒഴുകി നീങ്ങുന്ന വാഹനങ്ങൾ.. തിരക്കു പിടിച്ചു പായുന്ന മനുഷ്യർ.. നഗരംചുട്ടുപെള്ളുമ്പോഴും കാറിലെ എസി മനസ് തണുപ്പിച്ചുകൊണ്ടിരുന്നു.

subscribe

ആദിയോഗിയുടെ സന്നിധിയിൽ
അരുൺ ടോം

Categories:

ജഗ്ഗി വാസുദേവ് സ്ഥാപിച്ച ഇഷ ഫൗണ്ടേഷനിലേക്കാണു യാത്ര. എന്നാണ് ആദിയോഗി ശിവവിഗ്രഹം മനസിൽ കയറിപ്പറ്റിയതെന്ന് ഓർമയില്ല. പക്ഷേ ഒരുപാട് തവണ പോകാൻ ശ്രമിച്ചിട്ട് പാതിവഴിയിൽ ഉപേക്ഷിച്ച ട്രിപ്പായിരുന്നു ഇത്. പൂജാവധിക്കാണ് പോകാൻ പ്ലാനിട്ടത്. അങ്ങനെ, മഹാനവമിനാളിൽ പുലർച്ചെ നാലുമണിക്ക് കോയമ്പത്തൂർക്ക് യാത്ര പുറപ്പെട്ടു.

മഹാനവമി ചതിച്ചാശാനേ
………………………….

ഏതു യാത്രയ്ക്കിറങ്ങിയാലും തുടക്കം തന്നെ തടസങ്ങൾ ഉണ്ടാകുക പതിവാണ്. ഇത്തവണ തൃശൂർ-പാലക്കാട് റൂട്ടിലെ കുപ്രസിദ്ധമായ കുതിരാനിൽ ബ്ലോക്കിന്റെ രൂപത്തിലാകും അതു പ്രത്യക്ഷപ്പെടുകയെന്നാണു കരുതിയത്. പക്ഷേ, സംഭവിച്ചതു മറ്റൊന്നായിരുന്നു. കാറിന്റെ വലതു വശത്തെ ലൈറ്റ് അടിച്ചുപോയിക്കൊണ്ടായിരുന്നു തടസങ്ങളുടെ തുടക്കം. വാളയാർ കഴിഞ്ഞപ്പോൾ ഫോൺ സ്റ്റക്കായി, ഗൂഗിൾ പ്രവർത്തനരഹിതമായി. പ്രകൃതിരമണീയ പ്രദേശങ്ങൾ വരുമ്പോൾ ക്യാമറ ഹാങ് ആയി നിൽക്കും. അങ്ങനെ ഇഷാ ഫൗണ്ടേഷൻ സ്ഥിതി ചെയ്യുന്ന വെള്ളിയൻഗിരി മലകളുടെ താഴ്‌വാരം എത്തും വരെ തടസങ്ങളുടെ ഘോഷയാത്രയായിരുന്നു. കേരളത്തിലെ ഭക്ഷണം കഴിച്ചു മടുത്തതുകൊണ്ടു രാവിലെ മുതൽ രാത്രി വരെയുള്ള ഭക്ഷണം തമിഴ്‌നാട്ടിൽ നിന്നു കഴിക്കാമെന്നു വിചാരിച്ച് അതിർത്തി കടന്നു. പക്ഷേ സംഭവിച്ചത് മഹാനവമി കാരണം ഒറ്റഹോട്ടൽ പോലും തുറന്നിട്ടില്ലായിരുന്നു. വിശന്ന് കുടൽവരെ കരിഞ്ഞു മണം പുറത്തു വന്നു. അവസാനം ഒരു ബേക്കറി തുറന്നിരിക്കുന്നതു കണ്ടു അവിടെനിന്ന് ഒരു ചായയും സമൂസയും കഴിച്ച് ബ്രേക്ക്ഫാസ്റ്റ് ഒപ്പിച്ചു. ഉച്ചയ്ക്ക് ബട്ടർബണ്ണും ഷേയ്ക്കും. വൈകുന്നേരം പേരക്കാ ജൂസുമായിരുന്നു ഭക്ഷണം. സത്യത്തിൽ തിരിച്ച് കേരളത്തിൽ കയറിയപ്പോഴാണു വല്ലതും കനത്തിനു കഴിക്കാൻ പറ്റിയത്.

രാവിലെ, 9.30-ാടെ 1992-ൽ സദ്ഗുരു ജഗ്ഗി വാസുദേവ് സ്ഥാപിച്ച ഇഷ ഫൗണ്ടേഷന്റെ കവടത്തിലൂടെ കാർ അകത്തേക്കു കടന്നു. ഇഷ ഫൗണ്ടേഷൻ പൂർണമായും സന്നദ്ധസേവകരാൽ പ്രവർത്തിക്കുന്ന ലാഭേച്ഛയില്ലാത്ത മതേതര സ്ഥാപനമാണ്. യോഗയിലൂടെ അവബോധമുയർത്താനുതകുന്ന പ്രോഗ്രാമുകളുടെ ഒരു പരമ്പര തന്നെ ഇവിടെ നടത്തുന്നുണ്ട്. ഐക്യരാഷ്ട്ര സംഘടനയിലെ ഇക്കണോമിക് & സോഷ്യൽ കൗൺസിൽ പോലെയുള്ള അന്താരാഷ്ട്ര സംഘടനകളുമായും ഇഷ ഫൗണ്ടേഷൻ സഹകരിച്ചു പ്രവർത്തിക്കുന്നുണ്ട്. ഇഷയിൽ ലോകം മുഴുവനായി ഒൻപത് ദശലക്ഷത്തിലധികം വോളന്റിയർമാരുണ്ടെന്നാണു പറയപ്പെടുന്നത്. കല്ല് പാകിയ റോഡിലൂടെ അകത്തേക്കു പോകുന്തോറും അങ്ങ് അകലെ ലോകത്തെ ഏറ്റവും വലിയ അർദ്ധകായ പ്രതിമ ദൃശ്യമായിത്തുടങ്ങി.

കാണേണ്ട കാഴ്ച
……………………………

ഒരു മരമോ ചെടികളോ ഇല്ലാത്ത അതിവിശാലമായ തരിശുഭൂമിക്കു നടുവിലാണ് ആദിയോഗി ശിവവിഗ്രഹം തലയുയർത്തി നിൽക്കുന്നത്. ഈ വിഗ്രഹത്തിന് സദ്ഗുരു രണ്ടു വർഷം കൊണ്ട് ഡിസൈൻ ചെയ്ത് എട്ടുമാസം കൊണ്ട് നിർമിച്ചു എന്നൊരു പ്രത്യേകത കൂടിയുണ്ട്. കാർ ഗ്രൗണ്ടിൽ പാർക്ക് ചെയ്തു പുറത്തേക്കിറങ്ങി. രാവിലെയാണെങ്കിലും വെയിലിനു നല്ല ചൂടാണ്. കണ്ണുതുറന്നു നോക്കാൻ പറ്റാത്ത തരം തീപാറുന്ന ചൂട്. കൈയിൽ സൺഗ്ലാസ് ഉണ്ടായിരുന്നതു രക്ഷയായി. വിഗ്രഹത്തിന് അരികിലേക്കു നടന്നു. രാവിലെ തന്നെ നിരവധി സന്ദർശകർ ഉണ്ട്. 112 അടി ഉയരമുള്ള ആദിയോഗി ലോകത്തെ ഏറ്റവും വലിയ അർദ്ധകായ പ്രതിമയെന്ന ഗിന്നസ് വേൾഡ് റിക്കോർഡ് നേടിയിട്ടുണ്ട്. പൂർണമായും സ്റ്റീൽ കൊണ്ടാണ് വിഗ്രഹം നിർമിച്ചിരിക്കുന്നത്. 2017-ൽ മഹാശിവരാത്രി ദിനത്തിലായിരുന്നു പ്രധാനമന്ത്രി നരേന്ദ്ര മോദി ഈ പ്രതിമ അനാവരണം ചെയ്തത്. പ്രതിമയുടെ 112 അടി ഉയരം എന്നത് യോഗികളുടെ സംസ്‌കാരത്തിൽ സൂചിപ്പിച്ചിട്ടുള്ള മോക്ഷം നേടാനുള്ള 112 മാർഗങ്ങളെയാണ് സൂചിപ്പിക്കുന്നത്. ചെറിയ പടികൾ കയറി കൂറ്റൻ പ്രതിമയ്ക്ക് അരികിലെത്തി. പ്രതിമയെ തെടാതിരിക്കാൻ ചുറ്റിനും ശൂലം സ്ഥാപിച്ചിട്ടുണ്ട്. ഇത് മറികടന്ന് തൊടാൻ ശ്രമിക്കുന്നവരെ സെക്യൂരിറ്റി കൈയോടെ പിടികൂടി കൊണ്ടുപോകുന്നത് കണ്ടു. ഞങ്ങളെ അത്ഭുതപ്പെടുത്തിയ മറ്റൊരു കാര്യം വിഗ്രഹത്തിൽ അണിയിച്ചിരിക്കുന്ന രുദ്രക്ഷമാലയായിരുന്നു. വലിയ വടത്തിന്റെ വണ്ണവുമുണ്ട് മാലയ്ക്ക്. ആദിയോഗി പ്രതിമയിൽ നിന്ന് ഒരു കിലോമീറ്റർ ദൂരമുണ്ടാകും ആശ്രമത്തിലേക്ക്. രണ്ടു തരത്തിൽ അവിടെ എത്താം. ഒന്ന് കാൽനടയായും മറ്റൊന്ന് 10 രൂപ കൊടുത്ത് കാളകെട്ടിവലിക്കുന്ന പ്രത്യേക വണ്ടിയിലും. മഹാനവമി പ്രമാണിച്ച് കാളകൾക്കു വേണ്ടി പ്രത്യേക ചടങ്ങുകൾ നടക്കുന്നതിനാൽ രാവിലെ കാളവണ്ടി സർവീസ് ഇല്ലായിരുന്നു. കല്ലുപാകിയ റോഡിന്റെ നടുവിൽ വളർന്നുവരുന്ന ചെറിയമരങ്ങളുടെ തണലുപറ്റി ഇഷയിലേക്കു നടന്നു.

കൺഫ്യൂഷൻ ഉണ്ടാക്കുന്ന വഴികൾ
……………………………………….

ആശ്രമത്തിലേക്കു പോകും വഴി നിരവധി കടകൾ ഉണ്ട്. കൂടുതലും ഭക്ഷണ സാധനങ്ങൾ വിൽക്കുന്നവയാണ്. തമിഴ്‌നാട് സർക്കാരിന്റെ ബസ് സർവീസ് അവസാനിപ്പിക്കുന്ന റോഡ് ക്രോസ് ചെയ്യുന്നിടത്താണ് കല്ലിൽ കൊത്തിയ കൂറ്റൻ നാഗസർപ്പമുള്ള ആശ്രമ കവാടം. രണ്ടാൾ പൊക്കത്തിൽ ഏക്കറുകണക്കിന് ഭൂമി കല്ലുപാളികൾകൊണ്ട് വേലികെട്ടി മറച്ചാണ് ആശ്രമം സൂക്ഷിക്കുന്നത്. കവാടം കടന്നു ചെല്ലുന്നത് ഇടതൂർന്നു മനോഹരമായി നിൽക്കുന്ന കവുങ്ങിൻ തോട്ടത്തിലേക്കാണ്. എല്ലായിടത്തും കല്ലുപാകിയ വഴികളാണെന്നതാണു മറ്റൊരു പ്രത്യേകത. അതുപോലെതന്നെ കെട്ടിടങ്ങളുടെ നിർമിതിക്കായി കല്ലുപാളികളും കൂറ്റൻ കൽത്തൂണുകളുമാണ് ഉപയോഗിച്ചിരിക്കുന്നത്.

ആശ്രമത്തിനുള്ളിൽ സന്ദർശകരായി എത്തുന്നവരെ കാത്തിരിക്കുന്നത് മൂന്നു കാര്യങ്ങളാണ്. ലിംഗഭൈരവി, ധ്യാനലിംഗം, സൂര്യ/ചന്ദ്രകുണ്ടുകൾ എന്നിവയാണ് ഇവ. ആശ്രമത്തിനുള്ളിൽ ചെരുപ്പിനും ഫോണിനും നിരോധനമുള്ളതുകൊണ്ട് ഇവ രണ്ടും കൗണ്ടറിൽ കൊടുത്തശേഷം സെക്യൂരിറ്റി ചെക്കിങ്ങും കഴിഞ്ഞാണ് അകത്തേക്കു പ്രവേശിച്ചത്. കയറി ചെല്ലിന്നിടത്ത് ആശ്രമത്തിന്റെ പ്രത്യേകതകൾ വിവരിക്കുന്ന രണ്ടുമിനിറ്റ് വിഡീയോ പ്രദർശനം നടക്കുന്നുണ്ട്. മലയാളം, കന്നട, തമിഴ്, ഇംഗ്ലീഷ്, ഹിന്ദി തുടങ്ങിയ ഭാഷകളിലാണു വിവരണം. കയറി ചെല്ലുന്നിടത്താണ് പുരുഷൻമാർക്കു സ്‌നാനം നടത്താനുള്ള സൂര്യകുണ്ട്. ചൂട് അല്ലേ ഒന്ന് കുളിച്ച് ശരീരം തണപ്പിക്കാമെന്ന് ആരും വിചാരിക്കണ്ട. കാരണം എണ്ണയും സോപ്പും തേച്ച് നീന്തിക്കുളിക്കുന്നയിടമല്ല ഇത്. യോഗയും ധ്യാനവുമായി ശാന്തതയുടെ ഇടമാണ് ഇവിടം. സൂര്യകുണ്ടിൽ നിന്നു പടികൾ കയറി മറുവശത്തു ചെല്ലുമ്പോൾ ചെറിയ ഒരുതാമരക്കുളമുണ്ട്. അതു കടന്നു ചെല്ലിന്നിടത്ത് ധ്യാനലിംഗത്തിന് അഭിമുഖമായി വലിയൊരു നന്ദിയുടെ പ്രതിമയുണ്ട്. ഇവിടെ നിന്ന് ഇടത്തേക്കാണു പേകേണ്ടിയിരുന്നത്. പക്ഷേ, ഞങ്ങൾ വലത്തേക്കു തിരിഞ്ഞു നടന്നു. ഇവിടെ വലിയൊരു ഭക്ഷണശാലയും യോഗയ്ക്ക് ആവശ്യമായ വസ്ത്രങ്ങൾ, സോപ്പ്, ചന്ദനത്തിരികൾ, ബുക്ക്, ഫോട്ടോഫ്രയിമുകൾ തുടങ്ങിയവ വിൽക്കുന്ന രണ്ടു ഷോപ്പുകളുമാണ് ഉള്ളത്. ഒരു സോപ്പിന് വില 180 രൂപയാണ്. ഇനി ഊഹിക്കാലോ ബാക്കിയുള്ളതിന്റെ വിലകൾ. വഴിതെറ്റിയെന്നു മനസിലായപ്പോൾ തിരിച്ചു നടന്നു.

പ്രതീക്ഷിച്ചത് ശാന്തത, സംഭവിച്ചത് കൂട്ടയിടി
……………………………………

ഇഷ നിറയെ വേളണ്ടിയർമാർ ഉണ്ടെങ്കിലും എങ്ങോട്ടു പോകണം എന്നത് കൺഫ്യൂഷൻ ഉണ്ടാക്കുന്നുണ്ട്. ആശ്രമത്തിന്റെ ഏറ്റവും പ്രധാനമായ മുറ്റത്തേക്കു കടന്നു. ചെറിയ തണുപ്പുള്ള വൃക്ഷങ്ങളാലും ചെടികളാലും പച്ചപ്പു നിറഞ്ഞയിടം. അവിടെയാണ് ലിംഗഭൈരവിയും ധ്യാനലിംഗവും സ്ഥിതി ചെയ്യുന്നത്. ഇഷയുടെ നിർമാണം കൗതുകകരമാണ്. എവിടെ നോക്കിയാലും ഗ്രാനേറ്റും കല്ലുപാളികളും മാത്രമാണ്. പടവുകൾ കയറുകയും ഇറങ്ങുകയും ചെയ്യുന്ന വിധമാണ് എല്ലായിടങ്ങളിലെയും എൻട്രി. ധ്യാനലിംഗം ഒഴികേ മറ്റു പ്രധാനയിടങ്ങൾ ഭൂമിക്കടിയിലേക്ക് ഇറങ്ങും വിധമാണു നിർമാണം. സ്‌ത്രൈണ ദൈവികതയുടെ പ്രതീകമായ ലിംഗഭൈരവി ദേവി പ്രതിഷ്ഠ കാണുവാൻ ഞങ്ങൾ ക്യൂവിൽ പ്രവേശിച്ചു. ഉച്ചയായതോടെ സന്ദർശകരുടെ തിരക്ക് കൂടിയിരുന്നു. അവധി ദിവസം ആയതുകൊണ്ടു നല്ലതിരക്കാണ്. ആശ്രമം, ധ്യാനം, ശാന്തത, സമാധാനം, മനസുഖം ഇതായിരുന്നു മനസിൽ പക്ഷേ ക്യൂവിലെ ഇടികണ്ടപ്പോൾ ഉള്ള മനസമാധാനവും കൂടിപ്പോയി. ശബരിമലയിൽ പതിനെട്ടാംപടി കയറുന്നവരെ പോലീസ് പൊക്കിയെടുത്തു വിടുന്നതു കണ്ടിട്ടുണ്ട്. ഏതാണ്ട് അതിനു തുല്യമായ അനുഭവമായിപ്പോയി ഇതും. സ്വസ്ഥമായി ലിംഗഭൈരവിയെ കാണുവാൻ കഴിഞ്ഞില്ല. ഒരു മിന്നായം പോലെ എന്തോ കണ്ടു അത്രതന്നെ. പ്രസാദമായി സൗജന്യമായി ആഹാരം കൊടുക്കുന്നയിടത്തു നാട്ടിലെ മുഴുവൻ ആളുകൾ ഉണ്ടെന്നു തോന്നുന്നു. ക്യൂ നിന്ന് കുഴഞ്ഞു വീണു മരിക്കുന്നതിലും നല്ലതു പുറത്തു പോയി ഭക്ഷണം കഴിക്കുന്നതാണെന്നു തോന്നിയതുകൊണ്ടു നടപ്പു തുടർന്നു. സ്ത്രീകളുടെ സ്‌നാന കേന്ദ്രമായ ചന്ദ്രകുണ്ടിനു മുന്നിലെത്തി. സ്ത്രീകൾക്കു മാത്രമേ ഇവിടേക്കു പ്രവേശനമുള്ളൂ.

subscribe

ക്ഷേത്രനഗരികളിലേക്കുള്ള യാത്രകൾ
-ഷാഹിന ഇ. കെ

Categories:

ബംഗളൂരുവിൽ നിന്ന് ഏതാണ്ട് 60 കിലോമീറ്റർ യാത്രചെയ്താൽ നന്ദി ഗ്രാമത്തിൽ (ചികബല്ലാപ്പൂർ ജില്ല) നന്ദി കുന്നുകളുടെ അടിവാരത്തിൽ ഒൻപതാം നൂറ്റാണ്ടിൽ പണിത ഈ ക്ഷേത്രസമുച്ചയത്തിൽ എത്താം. നന്ദിക്കുന്നുകളിൽ പുലരി വരുന്നതും കോട നീങ്ങുന്നതും കാണാൻ വെളുപ്പിനെ ഇറങ്ങിയതാണ് ഞാനും സ്‌നേഹിത ജിതയും. അവിടെ നിന്നാണു കുറച്ചുകൂടി യാത്ര ചെയ്ത് ഭോഗനന്ദീശ്വരക്ഷേത്രത്തിലെത്തിയത്. ശിവന് സമർപ്പിതമായ ക്ഷേത്രമാണ് ഭോഗനന്ദീശ്വര. ഇത് കർണാടകയിലെ ഏറ്റവും പഴക്കമുള്ള ക്ഷേത്രങ്ങളിലൊന്നായി കരുതപ്പെടുന്നു. ഒൻപതാം നൂറ്റാണ്ടിലാണ് ഇതു പണിതിട്ടുള്ളത്. ഗംഗാ, ചോളാ, ഹൊയ്‌സാല, വിജയനഗര സാമ്രാജ്യങ്ങളുടെ പരിരക്ഷണയിൽ വന്നിട്ടുള്ള, ദ്രവീഡിയൻ വാസ്തുരീതിയിലുള്ള ഈ ക്ഷേത്രസമുച്ചയ പരിസരം ശാന്ത ഗംഭീരമാണ്. മധ്യകാലത്തിനു ശേഷം ചിക്ബല്ലാപുരയിലെ പ്രാദേശിക ഭരണാധികാരികളും മൈസൂർ രാജാക്കന്മാരായ ഹൈദരാലിയും ടിപ്പു സുൽത്താനും ഈ പ്രദേശം നിയന്ത്രണത്തിൽ കൊണ്ടു വന്നതായി പറയുന്നു. ടിപ്പുവിനു ശേഷം അവ ബ്രിട്ടീഷ് നിയന്ത്രണത്തിൽ വന്നു. പച്ചപ്പും നിശ്ശബ്ദതയും നിറഞ്ഞ പരിസരങ്ങൾ കൊണ്ടാണ് ഈ ഇടത്തോട് ഏറെ ഇഷ്ടംതോന്നിയത്. ക്ഷേത്ര സമുച്ചയം പണിതിട്ടുള്ള ഭൂമിയിലെ നേർത്ത നനവുള്ള പുല്ലിൽ നിറയെ ഓറഞ്ചു നിറമുള്ള വലിയ പൂക്കൾ വീണുകിടക്കുന്നു. ഏതോ പേരറിയാ പൂവ്. ഓരോ കാറ്റിലും അതിന്റെ എണ്ണം കൂടുന്നതും നോക്കി എത്ര നേരമിരുന്നാലും മടുപ്പുണ്ടാവില്ല.

കൽത്തൂണുകളും കൊത്തിവയ്പ്പുകളും നിറഞ്ഞ ക്ഷേത്രത്തിൽ രണ്ടു പ്രധാന പ്രതിഷ്ഠകളാണ് ഉള്ളത്. അരുണാചലേശ്വരനും ഭോഗനന്ദീശ്വരനും. രണ്ടും ശിവനെ പ്രതിനിധീകരിക്കുന്നു. ശിവന്റെ കുട്ടിക്കാലവും യൗവനവുമാണത്രെ ഇവ രണ്ടും. അവിടെ കാണാവുന്ന മറ്റൊരു ചെറിയ പ്രതിഷ്ഠ ഉമാമഹേശ്വരന്റേതാണ്. ശിവ പാർവതി വിവാഹത്തെ സൂചിപ്പിക്കുന്നു ഇത് എന്നാണു കരുതപ്പെടുന്നത്. അതു കൊണ്ട് കൂടിയാവാം വിവാഹച്ചടങ്ങുകൾക്കും നവ വിവാഹിതരുടെ സന്ദർശനങ്ങൾക്കും ഇവിടെ ഏറെ തിരക്കുമുണ്ട്. ശൈത്യം നിറഞ്ഞ കൽത്തറകളിലൂടെ ക്ഷേത്രത്തിനുള്ളിലൂടെ കടന്നുപോകുമ്പോൾ ചെറിയ കൽമണ്ഡപത്തിൽ രണ്ടു വിവാഹങ്ങളുടെ നിറഭംഗികൾ കൂടി കാണാനായി. പ്രധാന ചടങ്ങുകൾ കാണാൻ കുറച്ചു നേരം അവർക്കൊപ്പം ചേരുകയും ചെയ്തു.

subscribe

ഹാങിങ് മൊണാസ്ട്രി അഥവാ തക്‌സങ് ദ് സങ്
-ശ്രീപ്രിയ കെ

Categories:

യാത്ര ഉന്മാദവുമായി പ്രണയത്തിലാവുന്ന അപൂർവ സുന്ദര നിമിഷങ്ങളുണ്ട്. പഞ്ചേന്ദ്രിയങ്ങളും കൊട്ടിയടക്കപ്പെട്ട് ശൂന്യമായ് മാറുന്ന ചില സന്ദർഭങ്ങൾ. മനുഷ്യാഹങ്കാരത്തിന്റെ കൊടുമുടിക്കെട്ടഴിഞ്ഞു വീഴുന്ന അത്തരം നിമിഷങ്ങളിലാണ് നമ്മൾ ഉന്മാദികളാവുന്നത്. കാശ്മീർ താഴ്‌വരകളിലൂടെ യാത്ര ചെയ്തപ്പൊഴും അറ്റമില്ലാത്ത, നിറഞ്ഞ, ബ്രഹ്മപുത്രയെ കൈക്കുമ്പിളിലെടുത്തറിഞ്ഞപ്പൊഴും നാഗാലാൻഡിലെ ഗോത്ര ജീവിതങ്ങളിലേക്കു സ്വയം സന്നിവേശിച്ചപ്പൊഴും ശരിക്കും ഞാനീ ഉന്മാദത്തിന്റെ നിർവൃതിയോളമെത്തിയിട്ടുണ്ട്.

ഭൂട്ടാനിലെ പാരോയിലുള്ള തക്‌സങ് ദ് സങ് (Tiger nest) സന്ദർശനം ഇത്തരമൊരനുഭവമാണ് എന്നിലുണ്ടാക്കിയത്. 2019 മേയിലാണ് കൾച്ചറൽ കൊളീഗ് സിന്റെ നേതൃത്വത്തിലുള്ള സംഘം ഭൂട്ടാനിലേക്കു യാത്ര തിരിച്ചത്. കോഴിക്കോട് കേന്ദ്രമായി പ്രവർത്തിക്കുന്ന കൾച്ചറൽ കൊളീഗ്‌സ് എന്ന യാത്രാസംഘം പത്തു വർഷത്തിലധികമായി നിരവധി യാത്രകൾ സംഘടിപ്പിച്ചിട്ടുണ്ട്. കണ്ടെടുക്കാത്ത പറുദീസകൾ തേടിയുള്ള അനന്തമായ പലായനമാണ് ഇവർക്ക് യാത്ര. വിവിധ സംസ്‌കാരങ്ങളുടെ അനിയന്ത്രിതമായ കലർപ്പു കൂടിയാണ് ഈ സംഘം. അതു കൊണ്ടു തന്നെ കേരളത്തിൽ മാത്രം ഒതുങ്ങുന്നതല്ല ഇതിലെ അംഗങ്ങൾ. വിവിധ സാംസ്‌കാരിക സൗഹൃദങ്ങളുടെ ഭാഗമായി അസമിൽ നിന്നുള്ള കവികളും കുട്ടികളും മുതിർന്നവരും ചേർന്ന ഒരു കൂട്ടായ്മയാണത്. ഇത്തവണത്തെ യാത്ര ഭൂട്ടാനിലേക്കായിരുന്നു.

തീർച്ചയായും, ഭൂട്ടാൻ യാത്രയെ ഇത്രമേൽ ഹൃദ്യമാക്കിയത് തക്‌സങ് സന്ദർശനം തന്നെയാണ്. ജമോൽഹരി മലനിരകളുടെ ഭാഗമായ മാനം മുട്ടുന്ന കരിങ്കൽ കുന്നിന്റെ ചരിവിലായി തൂങ്ങിക്കിടക്കുന്ന രീതിയിലാണ് തക്‌സങ് സ്ഥിതി ചെയ്യുന്നത്. അതു കൊണ്ടു തന്നെ Hanging മൊണാസ്ട്രി എന്ന വിശേഷണവും ഇതിനുണ്ട്.. തക് സങ് എന്ന വാക്കിന്റെ പ്രത്യക്ഷ തർജമയാണത്രെ ഇംഗ്ലീഷിലെ ടൈഗർ നെസ്റ്റ്. എട്ടാം നൂറ്റാണ്ടിൽ ഗുരു പത്മസംഭവ ( സെക്കൻഡ് ബുദ്ധൻ എന്ന പേരിൽ ഭൂട്ടാനിലെ ജനം ആരാധിക്കുന്നു) പണി കഴിപ്പിച്ച ഈ മൊണാസ്ട്രി നാലു ചെറു ക്ഷേത്ര സമുച്ചയങ്ങൾ ചേർന്നതാണ്. പാരോയിൽ നിന്ന് 10240 അടി മുകളിലുള്ള തക് സങ്ങിൽ എത്തിച്ചേരാൻ ചെങ്കുത്തായ കയറ്റിറക്കങ്ങൾ നിറഞ്ഞ കാനനപാത താണ്ടേണ്ടതുണ്ട്. ചെറിയ കുട്ടികളും 60നു മേൽ പ്രായമുള്ളവരും ഉൾപ്പെടുന്ന ഞങ്ങളുടെ 59 അംഗ സംഘത്തിന് അവിടെ എത്തിച്ചേരുക പ്രയാസമായിരുന്നു. അതു കൊണ്ടു തന്നെ യാത്രാ ചാർട്ടിൽ Tiger nest ദൂരെ നിന്ന് കാണാനുള്ള അവസരം മാത്രമേ ഉൾപ്പെടുത്തിയിരുന്നുള്ളൂ.

നേരത്തെ ഭൂട്ടാൻ സന്ദർശിച്ച സുഹൃത്തുക്കൾ എഴുതിയും പറഞ്ഞും എന്റെ മനസിൽ തക് സങ് ഒരു സ്വപനമായി തിളങ്ങി നിന്നിരുന്നു. തിം ഫുവിൽ നിന്ന് പാരോയിലേക്കു തിരിക്കുന്നതിന്റെ തലേ രാത്രിയിലാണ് കാര്യങ്ങൾ മലക്കം മറിഞ്ഞത്. ബിനോയ് മാഷും മുവും വാസു മാഷും ചേർന്ന് നാളെ ടൈഗർ നെസ്റ്റിൽ പോയേ പറ്റൂ എന്ന് ഉറപ്പിക്കുകയും പാരോയിലേക്കു യാത്ര തിരിക്കുന്നതിനു മുമ്പു സംഘത്തെ ഈ കാര്യം അറിയിക്കുകയും ചെയ്തു. എല്ലാവരും ഒന്നിച്ച്, സാധിക്കുന്ന പോലെ കയറാം എന്ന തീരുമാനത്തിലെത്തി. പാരോയിലേക്കുള്ള യാത്രയിലുടനീളം മനസിൽ തക്‌സങ് മാത്രമായി. മറ്റു കാഴ്ചകളെ പിന്നിലാക്കിക്കൊണ്ട് ദൂരെ നിന്നു കാണുന്ന മലമടക്കുകളിലങ്ങോളം ആ കൊച്ചു കടുവാ കൂടിനെ അന്വേഷിച്ചു കൊണ്ടേയിരുന്നു.

ഒടുവിൽ അതാ ഒരു മലഞ്ചരുവിൽ കുഞ്ഞു കിളിക്കൂടു പോലെ Tiger nest കാണായി. Bace camp ൽ വണ്ടിയൊതുക്കി ഞങ്ങൾ യാത്രയ്ക്കു തയാറായി. ഇവിടെ നിന്ന് മൂന്നു മണിക്കൂർ നടന്നു കയറിയാലേ തക്‌സങ്ങിലെത്തൂ. നടത്തത്തിന് സഹായിയായി 50 രൂപ നിരക്കിൽ വൃത്തിയിൽ വെട്ടി ഒതുക്കിയ നിറം കൊടുത്ത ഊന്നുവടികൾ വിൽപ്പനക്കായി വച്ചിരിക്കുന്നു. 500 രൂപയാണ് Etnrance fee. നാൽപ്പതോളം പേർക്ക് ടിക്കറ്റെടുത്ത്, ചിലർ വടികളും കരസ്ഥമാക്കി ഞങ്ങൾ യാത്ര ആരംഭിച്ചു. കുടജാദ്രി മല രണ്ടു തവണ കയറിയിറങ്ങിയ ആത്മവിശ്വാസത്തിന്റെ ബലത്തിൽ വടിയൊന്നും വാങ്ങാതെ ഞാൻ നടത്തം തുടങ്ങി. കൂടെ രജനിയും. നാലഞ്ചു പേർ കുതിരയോട്ടക്കാരായ പെൺകുട്ടികളോട് സംസാരിച്ച് റേറ്റ് ഉറപ്പിച്ച് പകുതി ദൂരം കുതിരപ്പുറത്ത് സഞ്ചരിക്കാൻ തീരുമാനിച്ചു. ചെറു സംഘങ്ങളായി ഞങ്ങൾ യാത്ര തുടങ്ങി.

ആളുകൾ നടന്നു തെളിഞ്ഞ വഴികളിലൂടെയാണു യാത്രക്കാർ നടക്കേണ്ടത്. അവയിൽ ചിലത് എളുപ്പവഴികളാണെങ്കിലും കയറ്റം ദുഷ്‌കരമാവും. ഓരോ കയറ്റങ്ങൾ കഴിയുമ്പോഴും തക് സങ് കൂടുതൽ കൂടുതൽ അടുത്തു തുടങ്ങി. നടത്തത്തിനിടയിൽ ഇടക്കിടെ നിന്ന് ഞങ്ങൾ ദൂരത്തെ അളക്കാൻ തുടങ്ങി.

കയറ്റത്തിനിടയിൽ രണ്ടു മൂന്നു തത്ക്കാല വിശ്രമകേന്ദ്രങ്ങളുണ്ട്. വിശ്രമിക്കാനായി ഇരുന്നു കഴിഞ്ഞാൽ മടി പിടിക്കുമെന്നതു കൊണ്ട് ഞങ്ങൾ പതുക്കെ അവയും പിന്നിട്ടു നടന്നു. അവസാന Halting station ൽ ചെറിയൊരു കടയുണ്ട്. അവിടെ 130 രൂപയ്ക്കു ചായയും ബിസ്‌കറ്റും കിട്ടും. ചോറിന് 530 രൂപ. ഞങ്ങളാണെങ്കിൽ ഭക്ഷണ സാധനങ്ങളോ തണുപ്പത്തു ധരിക്കാനുള്ള വസ്ത്രങ്ങളോ കരുതാതെയാണ് യാത്ര. പാരോയിലേക്കുള്ള യാത്രയിൽ റാസി, ഒരു സ്ഥലത്തു നിന്ന് രണ്ടു പിടി Lettuce വാങ്ങുകയും അതെന്നെ ഏൽപിക്കുകയും ചെയ്തിരുന്നു. മല കയറുന്നതിനു മുമ്പ് ഞാനവ എന്റെ അണ്ഡകടാഹമായ ബാഗിൽ (അതിൽ കൊള്ളാത്തവയില്ലെന്ന് രജനി അത്ഭുതപ്പെടാറുണ്ട്) നിക്ഷേപിച്ചു. കയറ്റത്തിനിടക്ക് ഞങ്ങൾ ഇടക്കിടെ അത് പച്ചയ്ക്കു തിന്നുകൊണ്ടിരുന്നു. അധികം വെള്ളം കുടിക്കാതെ യാത്ര ചെയ്യാൻ അതു ഞങ്ങളെ സഹായിച്ചു.

നടത്തത്തിന്റെ ശക്തിയും വേഗതയും കുറഞ്ഞു വന്നു. ദൂരെ കൈമാടി വിളിച്ചു കൊണ്ട് ടൈഗർ നെസ്റ്റ്. മനസിലെ സ്വപ്നം പാതിയിൽ ഉപേക്ഷിക്കേണ്ടി വരുമോ? രണ്ടും കൽപ്പിച്ചു ശക്തിയിൽ കുറേ ദൂരം മുന്നോട്ടു നടന്നു. വഴി ഇടയ്ക്കു കൂടുതൽ കയറ്റമാവുന്നു. ഒപ്പം ചാറ്റൽ മഴയും. പിറകോട്ടു തിരിഞ്ഞപ്പോൾ കൂടെ 10 അടി പിറകിലുണ്ടായിരുന്ന രജനിയെ കാണാനില്ല. ഞങ്ങളുടെ സംഘത്തിലുള്ള ആരും മുന്നിലോ പിറകിലോ ഇല്ല. ചെറിയൊരു അങ്കലാപ്പുണ്ടായി. എതിരെ മലയിറങ്ങി വരുന്നവർ ആരും ആരെയും ശ്രദ്ധിക്കുന്നില്ല. ഞാൻ ധൈര്യമായി മുന്നോട്ടു നടന്നു. ഒറ്റയ്ക്കുള്ള യാത്രയുടെ രസം ഞാനനുഭവിച്ചു തുടങ്ങുകയായിരുന്നു. കാടിനെ ആസ്വദിച്ച്. മഴയത്ത്… ഒരു ക്യാപ്പോ കുടയോ ഇല്ലാതെ ശബ്ദകോലാഹലങ്ങളില്ലാതെ. ഇറങ്ങിവരുന്ന രണ്ടു പേർ കൂട്ടം തെറ്റിപ്പോയോ എന്ന കരുതൽ അന്വേഷണം നടത്തി. വഴിയങ്ങനെ കുത്തനെ.. കുത്തനെ… കിടക്കുന്നു.

subscribe

സ്ത്രീ രോഗങ്ങളും ഹോമിയോപ്പതിയും
– ഡോ. ഷിബി പി. വർഗീസ്

Categories:

ഹോമിയോപ്പതി ഒരു വ്യക്ത്യാധിഷ്ഠിത ചികിത്സയാണ്. അതായത് ഓരോ വ്യക്തിയുടെയും പ്രത്യേകതകളെയും സ്വഭാവവിശേഷങ്ങളെയും കണക്കിലെടുത്ത് ഒരേ രോഗം ബാധിക്കുന്ന വിവിധ രോഗികൾക്കു വ്യത്യസ്ഥ മരുന്നുകൾ നൽകി ചികിത്സിക്കുന്ന രീതി ആണ് ഹോമിയോപ്പതിയിൽ ഉള്ളത്. ഒരേ രോഗം ബാധിച്ച വിവിധ രോഗികളിൽ വ്യത്യസ്തങ്ങളായ മരുന്നുകൾ നൽകിയുള്ള ചികിത്സയാണ് വ്യക്ത്യാധിഷ്ഠിത ചികിത്സ. ചികിത്സയിൽ ഒരു രോഗിക്ക് നൽകാവുന്ന ഏറ്റവും വലിയ പരിഗണനയാണ് വ്യക്ത്യാധിഷ്ഠിത ചികിത്സ എന്നത്. രോഗത്തോടൊപ്പമോ ചിലപ്പോൾ അതിനെക്കാളേറെയോ രോഗിക്കു നൽകുന്ന ഈ പരിഗണന തന്നെയാണ് ഹോമിയോപ്പതി ചികിത്സയെ കൂടുതൽ ജനകീയമാക്കുന്നതും.

എല്ലാ ചികിത്സാരീതികളിലും സ്ത്രീരോഗ ചികിത്സക്കു പ്രത്യേക വിഭാഗങ്ങൾ ഉണ്ട്. മോഡേൺ മെഡിസിനിൽ അത് ഗൈനക്കോളജി എന്ന് അറിയപ്പെടും. പ്രസവ ശുശ്രൂഷ മാത്രം പ്രതിപാദിക്കുന്ന പ്രസൂതികാശാസ്ത്രം ആയുർവേദത്തിൽ ഉണ്ട്. ഹോമിയോപ്പതിയിൽ ഔഷധ ഗുണ വിജ്ഞാനിയം എന്ന മരുന്നുകളെ പ്രതിപാദിക്കുന്ന മെറ്റീരിയ മെഡിക്ക എന്ന ഗ്രന്ഥത്തിൽ മരുന്നുകളെ തന്നെ സ്ത്രീ മരുന്നുകൾ എന്നു തരംതിരിച്ചിരിക്കുന്നു. ചില മരുന്നുകൾ സ്ത്രീകൾക്കു വേണ്ടി മാത്രമുള്ളവയാണ് അല്ലെങ്കിൽ പുരുഷന്മാരിൽ വളരെ അപൂർവമായേ ഉപയോഗിക്കേണ്ടി വരാറുള്ളൂ എന്നാണ് മെറ്റീരിയ മെഡിക്കയിൽ പറയുന്നത്. പ്രായോഗിക തലത്തിലും അത് ഏറെ ശരിയാണെന്ന് ബോധ്യപ്പെട്ടിട്ടുണ്ട്. പൾസാറ്റില്ല, സെപിയ തുടങ്ങിയ മരുന്നുകൾ വിവിധങ്ങളായ സ്ത്രീ രോഗങ്ങളിൽ ഏറെ ഫലപ്രദമായി ഉപയോഗിച്ച് വരുന്നു. അമ്പതിലധികം സ്ത്രീ പ്രാമുഖ്യം ഉള്ള മരുന്നുകൾ ദൈനംദിന ചികിത്സയിൽ ഹോമിയോപ്പതിയിൽ വിവിധ രോഗങ്ങൾക്ക് ഉപയോഗിച്ചു വരുന്നു.

സംസ്ഥാന സർക്കാർ ഹോമിയോപ്പതി വകുപ്പിനു കീഴിൽ പ്രവർത്തിക്കുന്ന ജനനി എന്ന വന്ധ്യതാചികിത്സാപദ്ധതിയിലൂടെ അഞ്ഞൂറിലേറെ ദമ്പതികൾക്കു കുട്ടികൾ ഉണ്ടായിക്കഴിഞ്ഞു. വന്ധ്യത എന്നത് പുരുഷന്മാരേക്കാൾ അധികം സ്ത്രീകളെ ബാധിക്കുന്ന പ്രശ്‌നം ആണ്. പലപ്പോഴും വന്ധ്യതയ്ക്കു കാരണം പുരുഷന്മാരിലെ പ്രശ്‌നങ്ങൾ ആണെങ്കിലും എപ്പോഴും കുറ്റപ്പെടുത്തലുകൾക്ക് വിധേയമാകുന്നത് സ്ത്രീകളാണ്.

subscribe

BA’GAL HOLIDAYS a biblical discovery of the holyland
– റെജി സി. വർക്കി / പി. ടി. ബിനു

Categories:

ബാഗൽ ഹോളിഡേയ്‌സ് പ്രവർത്തനത്തിന്റെ 20 വർഷം പിന്നിടുന്നു. തീർത്ഥാടകരുടെ വിശ്വാസമാർജിച്ച ബാഗൽ വർഷത്തിൽ മൂന്നു പ്രാവശ്യം ജറുസലേം പുണ്യയാത്ര സംഘടിപ്പിക്കുന്നു. പ്രവർത്തനത്തിന്റെ 20 വർഷം പിന്നിടുന്ന വേളയിൽ ബാഗലിന്റെ മാനേജിങ് ഡയറക്ടർ റെജി സി. വർക്കി പ്രവർത്തന മേഖലയിലെ അനുഭവങ്ങൾ പങ്കുവയ്ക്കുന്നു.

  • ബാഗൽ ആരംഭവും പ്രവർത്തനവും

1999 നവംബർ 11 ആണ് ബാഗൽ പ്രവർത്തനം ആരംഭിക്കുന്നത്. കരിമുഗൾ ആണ് ഓഫിസ്. എന്റെ ആത്മീയ ആചാര്യനായ എബ്രഹാം കോറെപ്പിസ്‌കോപ്പ അച്ചന്റെ അനുഗ്രഹാശംസകളടെ, പി.പി. ജോസഫ് നടാപ്പുഴ കത്തനാരുടെ പ്രചോദനവും ഉൾക്കൊണ്ടാണ് ബാഗൽ ഹോളിഡേയ്‌സ് പ്രവർത്തനം ആരംഭിക്കുന്നത്. സ്ഥാപനത്തിന് ബാഗൽ എന്നു പേരിടുന്നതും അദ്ദേഹമാണ്. എന്റെ ഭാര്യാകുടുംബത്തിന്റെ അയൽവാസിയും ആത്മീയ ആചാര്യനുമായിരുന്നു നടാപ്പുഴ കത്തനാർ.
പ്രവർത്തനത്തിന്റെ 20 വർഷം പിന്നിടുന്ന വേളയിൽ ബാഗലിന്റെ ഓഫിസിൽ ആത്മീയ ആചാര്യന്മാരുടെ പ്രത്യേക ഒത്തുചേരലും പ്രാർത്ഥനയും നടന്നു. 99-ൽ കരിമുകളിൽ ചെറിയ മുതൽ മുടക്കിലാണ് ബാഗലിന്റെ ആരംഭം. മുന്നൂറു രൂപ വാടകയ്ക്കാണ് കരിമുഗൾ സിറ്റിയിൽ മുറി എടുക്കുന്നത്. ഏഴായിരം രൂപ മാത്രമായിരുന്നു എന്റെ മുതൽ മുടക്ക്. ട്രാവൽ ആൻഡ് ടൂറിസം കോഴ്‌സ് പഠിച്ചിട്ടുള്ളതും ഗുരുക്കന്മാരും ആത്മീയ ആചാര്യന്മാരും നൽകിയ പ്രചോദനവുമാണ് ബാഗൽ.
ഹോളിലാൻഡ് ട്രാവൽ ഏജൻസിയായ റോയൽ ഒമാനിയയിലെ അച്ചന്റെ സഹോദരിയുടെ മകൻ ജിയോ പോൾ എന്റെ അടുത്ത സുഹൃത്തുക്കളിൽ ഒരാളാണ്. ജിയോയുടെ സഹകരണങ്ങളും സഹായവും എനിക്കുണ്ടായിട്ടുണ്ട്. സബ് ഏജന്റ് ആയിട്ടായിരുന്നു തുടക്കം. എല്ലാ പ്രസ്ഥാനങ്ങളും അഭിമുഖീകരിക്കുന്നതു പോലെ എനിക്കും നിരവധി ബാലാരിഷ്ടതകൾ ഉണ്ടായിട്ടുണ്ട്. അതെല്ലാം ഒന്നൊന്നായി അതിജീവിച്ചു.

  • ആത്മീയ പിൻബലം

ആത്മീയ ആചാര്യന്മാരുടെ പ്രചോദനവും പിൻബലവും എനിക്ക് എന്നുമുണ്ട്. കുട്ടിക്കാലം തൊട്ടേ, പള്ളിയുമായും ഇടവകയുമായി ബന്ധപ്പെട്ട കാര്യങ്ങളിൽ ഞാൻ സജീവമായി പ്രവർത്തിച്ചിരുന്നു. ദേവാലയത്തിൽ ശുശ്രുഷ കാര്യങ്ങളിൽ വൈദികരോടൊപ്പം പ്രവർത്തിച്ചിരുന്നു അഞ്ചാം ക്ലാസിൽ പഠിക്കുന്ന കാലം മുതൽ. ഇക്കാര്യങ്ങളിൽ എന്റെ ഗുരുനാഥൻ പണത്തുള്ളിൽ കോറെപ്പിസ്‌കോപ്പ അച്ചനാണ്. വൈദികർ അഭ്യസിക്കുന്ന എല്ലാ സുശ്രുഷകളും പണത്തുള്ളിൽ അച്ചൻ എന്നെ പഠിപ്പിച്ചിട്ടുണ്ട്. മൂറോൻ കൂദാശ വരെ അർപ്പിക്കാനുള്ള ഭാഗ്യം എനിക്കു ലഭിച്ചിട്ടുണ്ട്. വൈദികനാകാൻ കഴിഞ്ഞില്ല എന്നു മാത്രം. ജറുസലേം പുണ്യയാത്രകളിൽ സംഘത്തിലുള്ള തീർത്ഥാടകർക്കു വേണ്ടി ഇക്കാര്യങ്ങളെല്ലാം പ്രയോജനപ്പെടുത്താറുണ്ട്.

  • ടൂർസ് ആൻഡ് ട്രാവൽസ്

2000-ൽ ബാഗൽ ഒരു ടാറ്റ ഇൻഡിക്ക കാർ വാങ്ങി. അധികം വൈകാതെ തന്നെ ടവേര വാങ്ങി. പിന്നെ, ക്വാളിസ് വാങ്ങി. ബിസിനസ് കുഴപ്പമില്ലാതെ മുന്നോട്ടു നീങ്ങി. പിന്നീട് ഇരുപതോളം വാഹനങ്ങൾ ടൂർ ഓപ്പറേഷനുമായി ബന്ധപ്പെട്ടു വാങ്ങി. ആ സമയങ്ങളിൽ ബാഗൽ കമ്യൂണിക്കേഷൻ എന്നായിരുന്നു സ്ഥാപനത്തിന്റെ പേര്. വാഹനങ്ങളെല്ലാം ആയപ്പോൾ ബാഗൽ ടൂർസ് ആൻഡ് ട്രാവൽസ് എന്ന് പരിഷ്‌കരിച്ചു. പിന്നീട് ബാഗൽ ഹോളിഡേയ്‌സ് എന്നാക്കി.

subscribe

ഹിമാലയത്തിലെ വിസ്മയക്കാഴ്ചകളും ഹോളിയാഘോഷവും
– അരുൺ ടോം

Categories:

ഉറക്കമുണർന്നയുടൻ പുറത്തിറങ്ങി നോക്കാനാണ് തോന്നിയത്. രാത്രിയിൽ എത്തിയതിനാൽ പുറത്തെ അവസ്ഥ എന്താണെന്ന് അറിയാൻ കഴിഞ്ഞിരുന്നില്ല. പൂർണമായി തടിയിൽ തീർത്ത ഒരു കെട്ടിടം ആയിരുന്നതിനാൽ അകത്ത് തണുപ്പുണ്ടായിരുന്നെങ്കിലും താങ്ങാൻ പറ്റുന്നതായിരുന്നു. വാതിൽ തുറന്ന് പുറത്തിറങ്ങിയ എനിക്കെന്റെ കണ്ണുകളെ വിശ്വസിക്കാൻ കഴിഞ്ഞില്ല. ചുറ്റും മഞ്ഞുമൂടിക്കിടക്കുന്ന മലനിരകൾ. വേറൊരു ലോകത്ത് വന്നെത്തിപ്പെട്ടതുപോലെ. കണ്ണെടുക്കാനേ കഴിഞ്ഞില്ല. അങ്ങനെ തന്നെ നിന്നു അവിടെ കുറെയേറെ നേരം. ഭൂമിയിലെ സ്വർഗം എന്നു വിശേഷിപ്പിക്കുന്നതാവും നല്ലത്. സമുദ്രനിരപ്പിൽനിന്ന് 6150 അടി ഉയരത്തിലാണ് ഇപ്പോൾ നിൽക്കുന്നത്. ഇവിടെ ഇങ്ങനെയാണെങ്കിൽ ഇനിയും മുകളിലേക്കു ചെല്ലുന്തോറും കാണാൻ പോകുന്ന കാഴ്ചകൾ എന്താവും എന്നോർത്ത് അത്ഭുതപ്പെട്ടു നിന്നു.

നിറങ്ങളുടെ ഉത്സവം
…………………………

രാവിലെ ജോൺസൺ അച്ചൻ തന്നെ ഞങ്ങളുടെ മുഖത്ത് നിറങ്ങൾ തേച്ചു ഹോളി ആഘോഷത്തിനു തുടക്കമിട്ടു. അച്ചന്റെ ആവേശം ഞങ്ങളും ഏറ്റെടുത്തു. പരസ്പരം മുഖത്ത് ചായം പൂശി ഞങ്ങളും ആഘോഷം തുടങ്ങി. ഗ്രാമഭംഗി ആസ്വദിക്കാനും സ്ഥലങ്ങൾ കാണിച്ചു തരാനും അച്ചനും ഞങ്ങൾക്കൊപ്പം കൂടി. മലയിടുക്കുകളിൽ തീപ്പെട്ടിക്കൂടുകൾ അടുക്കിവച്ചിരിക്കുന്നതു പോലെ നിരനിരയായി ചെറിയ വീടുകൾ. പരന്ന ആകൃതിയിലുള്ള കല്ലുകൾ അടുക്കിയാണ് മിക്ക പഴയ വീടുകളുടെയും മേൽക്കൂരകൾ നിർമിച്ചിരിക്കുന്നത്. കനത്ത മഞ്ഞുവീഴ്ചയെ പ്രതിരോധിക്കാനുള്ള മാർഗമാണ് ഇത്. ഒരു വീട്ടിൽ തന്നെ രണ്ടും മൂന്നും കുടുംബങ്ങൾ വരെ താമസിക്കുന്നുണ്ട്. ചെറിയ കുട്ടികൾ മുതൽ പ്രായമായവർവരെ നിറങ്ങളുടെ ഉത്സവം ആഘോഷിക്കുന്നതിന്റെ തിരക്കിലാണ്. കുട്ടികൾ വർണപ്പൊടികൾ വാരിയെറിയുകയും നിറങ്ങൾ വെള്ളത്തിൽ കലക്കി പരസ്പരം എറിഞ്ഞ് കളിക്കുമ്പോൾ കുടുംബത്തിലെ മുതിർന്ന ആണുങ്ങൾ എല്ലാം മദ്യലഹരിയിലാണ്. സ്ത്രീകളാകട്ടെ ഒരുമിച്ച് കൂടി പാട്ടും ഡാൻസുമായി ഇരിക്കുന്നു. ചുരുക്കിപ്പറഞ്ഞാൽ ഗ്രാമത്തിന്റെ മുക്കിലും മൂലയിലും വരെ ആഘോഷം തകൃതിയായി നടക്കുന്നു. ഞങ്ങളങ്ങനെ കാഴ്ചകൾ കണ്ട് അച്ചനോടൊത്തു പൊതുനിരത്തിലൂടെ നടക്കുകയായിരുന്നു. പെട്ടെന്ന് ഒരു നിറമഴപെയ്തു. അച്ചൻ ഓടിക്കോയെന്ന് വിളിച്ചു പറഞ്ഞതും ഞങ്ങൾ ചിതറിയോടി. പിന്നെയാണ് മനസിലാകുന്നത് കുട്ടികൾ വീടിന്റെ മുകളിൽ ഒളിച്ചിരുന്ന് താഴെക്കൂടെ പോകുന്നവരുടെ മേൽ നിറം കലക്കിയ വെള്ളം ഒഴിക്കുന്നതാണെന്ന്. പലപ്പോഴും ഓടിമാറാൻ ശ്രമിച്ചെങ്കിലും നടന്നില്ല. എല്ലാവരും നിറങ്ങളിൽ കുളിച്ചു.

ഹോളികയും ഗുജിയയും
………………..

ഹോളിയുടെ അന്നേദിവസം ഗുജിയ എന്ന പേരിൽ ഒരു പലഹാരം എല്ലാ വീടുകളിലും ഉണ്ടാക്കും ഹോളി സ്‌പെഷ്യൽ വിഭവമാണ്. നമ്മുടെ നാട്ടിൽ ഉണ്ടാക്കുന്ന മടക്കപ്പം പോലെയിരിക്കും. ഇതിനുള്ളിൽ തേങ്ങയും മലരും പഞ്ചസാരയുമൊക്കെ മിക്‌സ് ചെയ്ത് നിറച്ച ഒരു വിഭവം. ഞങ്ങൾ സന്ദർശിച്ച വീടുകളിൽ നിന്നെല്ലാം ഗുജിയ കഴിച്ചു. അച്ചനോടൊപ്പം അവിടെയുള്ള വീടുകളും സ്‌കൂളും കോൺവെന്റും ഞങ്ങൾ സന്ദർശിച്ചതിനു ശേഷം ഉച്ചയോടു കൂടി തിരിച്ചു വീട്ടിലെത്തി. ഉച്ചകഴിയുന്നതോടു കൂടി ഹോളിയാഘോഷത്തിന്റെ പരിസമാപ്തി എന്ന രീതിയിൽ എല്ലാവരും കുളിച്ചു നിറങ്ങളൊക്കെ കഴുകിക്കളയും. അതോടുകൂടി ഹോളിയാഘോഷം അവസാനിച്ചു.
മൂന്ന് ലോകങ്ങൾ കീഴടക്കിയ ഹിരണ്യകശ്യപു മൂന്ന് ലോകത്തുള്ളവരും തന്നെ ആരാധിക്കണമെന്ന് ഉത്തരവിട്ടു. എന്നാൽ അഞ്ചരവയസുകാരൻ മകൻ പ്രഹ്ലാദൻ അച്ഛനെ അരാധിച്ചില്ല. ഇതിൽ കലിപൂണ്ട ഹിരണ്യകശ്യപു മകനെ കൊല്ലാൻ ഉത്തരവിടുകയും വിഷ്ണുഭക്തനായ പ്രഹ്ലാദനെ ആർക്കും കൊല്ലാൻ സാധിക്കാതെ വരുകയും ഒടുവിൽ ഹിരണ്യകശ്യപു സഹോദരി ഹോളികയുടെ സഹായം തേടുകയും ചെയ്തു. ഹോളിക അഗ്‌നിക്കിരയാകില്ല എന്ന വരം ഉപയോഗിച്ച് പ്രഹ്ലാദനുമായി തീയിൽ ചാടുകയും തെട്ടടുത്ത നിമിഷം ഹോളിക കത്തിയെരിയുകയും പ്രഹ്ലാദൻ രക്ഷപ്പെട്ടുവെന്നുമാണ് ഐതിഹ്യം. ഹോളിക കത്തിയെരിഞ്ഞതിന്റെ പ്രതീകമായിട്ടാണ് ഹോളിയുടെ തലേന്ന് രാത്രി വിറകുകൾക്കൂട്ടി തീ കത്തിക്കുകയും പിറ്റേന്ന് നിറങ്ങൾ വാരിയെറിഞ്ഞ് സന്തോഷം പങ്കുവയ്ക്കുകയും ചെയ്യുന്നത്.

subscribe

ഋഷികേശിൽ നിന്ന് ജോഷിമഠ്
– അരുൺ ടോം

Categories:

ഹിമാലയൻ യാത്രയുടെ ആദ്യ ദിനം, പ്രഭാതത്തിൽ ഋഷികേശിൽ ബസിറങ്ങുമ്പോൾ സാഹസിക യാത്രകളുടെ ഒരു തുടക്കമാണെന്ന് ഒരിക്കലും പ്രതീക്ഷിച്ചില്ല. ആദ്യദിനം പ്രശ്‌നങ്ങളുടെ ഒരു പരമ്പര തന്നെയായിരുന്നു. ഋഷികേശിൽ ഞങ്ങളെ അത്ഭുതപ്പെടുത്തിയ കാര്യമാണ് ഇവിടുത്തെ ബസ് സ്റ്റാൻഡിലെ കഫംർട് സ്റ്റേഷൻ. നമ്മുടെ വീടുകളിലെ ടോയ്‌ലെറ്റുകൾ പോലെ വൃത്തിയുള്ള ടോയ്‌ലെറ്റുകൾ. ആവിശ്യത്തിലധികം വെള്ളവും മറ്റു സൗകര്യങ്ങളും. ബാഗ് സൂക്ഷിക്കാനും ഡ്രസ് മാറാനും കിടക്കാൻ വരെ സൗകര്യമുള്ള പ്രത്യേകം മുറി ഇതിനോട് ചേർന്നുണ്ട്. ഇവയെല്ലാം ഉപയോഗിക്കുന്നതിനു വെറും അഞ്ചു രൂപ മാത്രം. ചുരുക്കിപ്പറഞ്ഞാൽ ഹോട്ടലിൽ റൂം എടുക്കാതെ ഫ്രെഷ് ആകാൻ പറ്റിയ ഇടം. എല്ലാവരും ഫ്രഷ് ആയി വസ്ത്രം മാറിയെത്തി. സാഹസിക വിനോദങ്ങളുടെ വിളനിലമായ ഋഷികേശിലെ ആദ്യദിനം. ബംഗി ജംപിങ്, ട്രാഫ്റ്റിങ് പോലുള്ള അഡ്വഞ്ചർ ആക്റ്റിവിറ്റീസ് ചെയ്യണമെന്ന് യാത്രാസംഘത്തിലെ ചിലർക്കു നിർബന്ധം. തിരിച്ചു വരുമ്പോൾ ചെയ്യാമെന്നു മറ്റു ചിലർ. അഡ്വഞ്ചർ ആക്റ്റിവിറ്റീസ് നടത്തുന്ന നിരവധി സ്ഥാപനങ്ങളുണ്ട് ഇവിടെ. അവിടെ അന്വേഷിച്ചപ്പോഴാണ് ഹോളി പ്രമാണിച്ച് മൂന്നു ദിവസത്തെക്ക് അഡ്വഞ്ചർ ആക്റ്റിവിറ്റീസ് നിർത്തിവച്ചിരിക്കുകയാണെന്ന് അറിഞ്ഞത്.

തിരിച്ച് ബസ്റ്റ് സ്റ്റാൻഡിൽ എത്തി ജോഷിമഠിലേക്കുള്ള വണ്ടി അന്വേഷിച്ചപ്പോൾ രാവിലെ 7.15ന് ലാസ്റ്റ് ബസ് പോയെന്ന് അവർ പറഞ്ഞു. 13 മണിക്കൂർ യാത്രയുണ്ട് ജോഷിമഠിന്. 150 കി.മീ. അകലെയുള്ള ശ്രീനഗർ വരെ ബസുണ്ട് അതിൽ കയറി ശ്രീനഗറിൽ ഇറങ്ങിയാൽ അവിടെന്ന് ട്രിപ്പ് ടാക്‌സികൾ ഉണ്ടെന്ന് നല്ലവരായ നാട്ടുകാർ ഞങ്ങളെ അറിയിച്ചു. മറ്റൊരു ഞെട്ടിക്കുന്ന കാര്യം കൂടി ഇവർ പറഞ്ഞു, നാളെ ഹോളിയായതുകൊണ്ട് ഉച്ചകഴിയുന്നതോടെ ബസ്, ടക്‌സി സർവീസുകൾ നിർത്തും. കടകൾ അടയ്ക്കും. താമസിക്കാൻ ഹോട്ടൽ പോലും കിട്ടില്ല. ബന്ദിന് സമാനമായ അവസ്ഥ. പണികിട്ടാൻ പോകുവാണെന്നു മനസിലാക്കി ഞങ്ങൾ ശ്രീനഗറിനുള്ള ബസിൽ ഓടിക്കയറി. എത്രയും വേഗം ജോഷിമഠിൽ എത്തുകയെന്ന ഒറ്റ ലക്ഷ്യം മാത്രം. ഒരുവശം അഗാധമായ കൊക്കകൾ ഉള്ള വളഞ്ഞുപുളഞ്ഞു കിടക്കുന്ന വഴിയിലൂടെ ബസ് ശ്രീനഗർ ലക്ഷ്യമാക്കി നീങ്ങി.

ആദ്യ ആക്രമണം

ബസ് ചെറിയ ഒരു പട്ടണത്തിലൂടെ കടന്ന് പോകുമ്പോഴാണ് ആദ്യ ഹോളി ആക്രമണം ഉണ്ടാകുന്നത്. ഞങ്ങളിരുന്ന സീറ്റിന്റെ സൈഡിൽ ഇരുന്നയാൾ വേഗത്തിൽ ഗ്ലാസ് അടയ്ക്കാൻ ശ്രമിക്കുന്നതു കണ്ട് അങ്ങോട്ട് നോക്കിയതാണ്. എന്തോ ഒന്ന് ഗ്ലാസിനു ഇടയിലൂടെ എന്റെ മുഖത്തു വന്ന് അടിച്ചു. പിന്നെ കാണുന്നത് ഞാൻ രക്തവർണത്തിൽ കുളിച്ചിരിക്കുന്നതാണ്. എല്ലാം പെട്ടെന്നായിരുന്നു. പത്തിരുപതുപേർ വരുന്ന സംഘം ബസ് തടഞ്ഞു നിർത്തി ബലൂണിനകത്ത് നിറമുള്ള വെള്ളം നിറച്ച് ചറപറ ഏറ്. ബസിന്റെ ചില്ലടയ്ക്കാൻ താമസിച്ചവരെയൊക്കെ കളർവെള്ളത്തിൽ കുളിപ്പിച്ചു.

subscribe

ഹിമഗിരി ശൃംഗത്തിലേക്ക്
-അരുൺ ടോം

Categories:

ഹിമാലയം, ഒരു സ്വപനമായിരുന്നു… മഞ്ഞുമലകൾ ചവിട്ടി കൊടുമുടികൾ കീഴടക്കാനുള്ള മനസിന്റെ വെമ്പൽ സ്വപ്‌നമായി പെയ്തിറങ്ങിയ എത്രയോ രാവുകൾ… പൗലോ കൊയ്‌ലോയുടെ വാക്കുകളെ മുറുകെ പിടിച്ചു നടന്ന ദിനങ്ങൾ… സത്യമായിരുന്നു ആ വാക്കുകൾ…
നമ്മൾ ഒരു കാര്യം ചെയ്യാൻ ആഗ്രഹിക്കുന്നുവെങ്കിൽ, ആ ആഗ്രഹം ദൃഢമാണെങ്കിൽ അത് വന്നു ചേരാൻ നമുക്കു ചുറ്റുമുള്ള അദൃശ്യശക്തികളെല്ലാം കൂടെയുണ്ടാകുമെന്ന് തെളിയിച്ചുകൊണ്ട് ഞാനും ഭാര്യയും സുഹൃത്തുക്കളായ നിമേഷും രാകേഷും ഹിമാലയൻ കൊടുമുടികൾ കയറാൻ പുറപ്പെട്ടു. കൊച്ചിൻ ഇന്റർനാഷണൽ എയർപോർട്ടിൽ നിന്നായിരുന്നു യാത്ര. രാത്രിയായിരുന്നു ഡൽഹി ഫ്‌ളൈറ്റ്. ഞങ്ങളെ എയർപോട്ടിൽ കൊണ്ടുവിടാൻ പ്രിയ സുഹൃത്തുക്കൾ ബിൻസും ആൽഫിയും സനുവുമുണ്ടായിരുന്നു. മലപ്പുറത്തു നിന്ന് നിമേഷും കോഴിക്കോട്ടു നിന്ന് രാകേഷും നേരെ എയർപോട്ടിലേക്കാണ് എത്തിയത്. കൊച്ചിയോടു ടാറ്റാ പറഞ്ഞ് ഞങ്ങൾ നാലുപേരും സ്വപ്നലോകത്തേക്കു പറന്നുയർന്നു.

രാവിലെ 5.30-ന് ഡൽഹിയിൽ ലാൻഡ് ചെയ്തു. ആദ്യദിനം ഡൽഹി ചുറ്റിക്കറങ്ങാനായിരുന്നു പദ്ധതിയിട്ടിരുന്നത്. പക്ഷേ, കേരളഹൗസിൽ മുറി കിട്ടാത്തതുകൊണ്ട് താജ്മഹൽ കാണാൻ നേരെ ആഗ്രയ്ക്കു ട്രെയിൻ കയറി. ആഗ്ര സ്റ്റേഷനിൽ ഞങ്ങളെ സ്വാഗതം ചെയ്തത് ടാക്‌സി ഡ്രൈവർമാരും റിക്ഷാവാലകളും റൂം ഏജന്റുമാരുമാണ്. ഇവരുടെ പിടിയിൽ നിന്ന് രക്ഷപ്പെടുകയെന്നത് ശ്രമകരമായ ജോലിയാണ്. പുസ്തകങ്ങളിലും ചിത്രങ്ങളിലും മാത്രം കണ്ടുപരിചയമുള്ള ആ വെണ്ണെക്കൽ കൊട്ടാരത്തിന് ഉള്ളിലേക്ക് കാലെടുത്തു വയ്ക്കുമ്പോൾ ഷാജഹാന് മുംതാസിനോടുള്ള പ്രണയം ഒരോ ചുവരുകളിലും പ്രതിഫലിക്കുന്നുണ്ടായിരുന്നു. മുംതാസിന്റെ ശവകുടീരം കണ്ട് തിരിച്ചിറങ്ങിയ ഞങ്ങൾ കുറച്ച് നേരം ആ പ്രണയസൗധത്തിന്റെ പിറകിൽ യമുനാ നദിയെ നോക്കി അലസമായി ഇരുന്നു. വെണ്ണക്കല്ലിനെ തഴുകി കടന്നുപോകുന്ന കാറ്റിനും ഒഴുകുന്ന നദിക്കും പ്രണയത്തിന്റെ ഭാവമാണ്. സഞ്ചാരികളുടെ തിരക്കേറിയപ്പോൾ താജ്മഹലിനോട് യാത്ര പറഞ്ഞ് അടുത്ത ലക്ഷ്യമായ ആഗ്രകോട്ടയിലേക്കു നടന്നു.

താജിൽ നിന്ന് നോക്കിയാൽ കാണാവുന്ന ദൂരമേ ആഗ്രകോട്ടയ്ക്കുള്ളതെങ്കിലും നടന്നു തുടങ്ങിയപ്പോഴാണ് നല്ല ദൂരം ഉണ്ടെന്നു മനസിലായത്. മുഗൾ ചക്രവർത്തി അക്ബർ പണി കഴിപ്പിച്ചതാണ് ആഗ്ര കോട്ട. കോട്ടയ്ക്കുള്ളിലെ മൂസമ്മൻ ബുർജിൽ നിന്ന് താജ്മഹൽ മനോഹരമായി വീക്ഷിക്കാനാകും. പുത്രനായ ഔറംഗസീബ് തടവിലാക്കിയതിനെത്തുടർന്ന് ഷാജഹാൻ തന്റെ ജീവിതത്തിന്റെ അവസാന ഏഴുവർഷം കഴിച്ചുകൂട്ടിയത് മൂസമ്മൻ ബുർജിൽ ആയിരുന്നു എന്നും പറയപ്പെടുന്നു. കോട്ടയ്ക്കുള്ളിലെ വഴികളെക്കുറിച്ച് കൃത്യമായ നിർദേശം നൽകാൻ ആരും ഇല്ലാത്തതുകൊണ്ട് പലപ്പോഴും വഴി തെറ്റി കോട്ടയ്ക്കുള്ളിൽ എവിടെയ്ക്കയോ എത്തി. തിരിച്ചിറങ്ങാനോ മുന്നോട്ട് പോകാനോ വഴിയറിയാതെ പലപ്പോഴും കുഴങ്ങി.

കോട്ടയിൽ നിന്ന് പുറത്തിറങ്ങിയപ്പോഴാണ് രാകേഷ് പറയുന്നത് ആസിഡ് ആക്രമണത്തിന്റെ ഇരകൾ നടത്തുന്ന ഒരു കഫേ ആഗ്രയിൽ ഉണ്ടെന്ന്. നന്നായി വിശക്കുന്നുണ്ടായിരുന്നതുകൊണ്ട് ഞങ്ങൾ നേരെ ഷീറോസ് ഹാങ്ഔട്ട് കഫേയിലേക്ക് ഓട്ടോ പിടിച്ചു. രാത്രിയോടെ ഞങ്ങൾ തിരികെ ഡൽഹിയിലെത്തി. ആഗ്രയിൽ വച്ചുതന്നെ മൊബൈൽ ആപ് വഴി രാകേഷ് ഡൽഹിയിൽ റൂം ബുക്ക് ചെയ്തിരുന്നതുകൊണ്ട് ഞങ്ങൾ നേരേ ഹോട്ടലിലേക്കാണു പോയത്.

subscribe

ദേവഭൂമിയിലേക്കൊരു യാത്ര
-അരുൺ ടോം

Categories:

തിരശീലയിൽ മാത്രം പരിചയമുള്ള സാറിനെ ആദ്യമായി കാണുന്നതും പരിചയപ്പെടുന്നതും ബംഗളൂരുവിലെ എന്റെ സുഹൃത്ത് മാത്യു വഴിയാണ്. ഏറെ സവിശേഷതകളുള്ള വ്യക്തിയാണ് മാത്യു. പലപ്പോഴും സാറിന്റെ വീട്ടിൽ പോകാറുണ്ട്. സാറിന്റെ മക്കൾ മാത്യുവിന്റെ സുഹൃത്തുക്കളാണ്. ‘മോഹൻലാലിന്റെ സുഹൃത്താണ്’ എന്നു പറഞ്ഞാണ് മാത്യുവിനെ മക്കൾ ആദ്യം പരിചയപ്പെടുത്തിയത്. അതു കേട്ടപ്പോൾ സാർ പറഞ്ഞത്രേ: ‘എനിക്കൊരു പാട് ഫാൻസുണ്ട്. പക്ഷേ, ഞാൻ മോഹൻലാലിന്റെ ഫാനാണ്. ലാലിന്റെ കുറേ പടങ്ങൾ ഞാൻ കണ്ടിട്ടുണ്ട്. എനിക്കദ്ദേഹത്തെ ഒന്നു കാണണം.’
ഈ വിവരം മാത്യു എന്നോട് പറഞ്ഞു. അങ്ങനെയാണ് സാറിനെ കാണാൻ ഞാൻ ബംഗളൂരുവിലെ വീട്ടിൽ പോകുന്നത്. വീടിന്റെ പടികൾ കയറിവന്ന എന്നെ ‘ഞാൻ നിന്റെ പെരിയ ഫാൻ; വാ…’ എന്നുപറഞ്ഞ് കെട്ടിപ്പിടിച്ചു കൊണ്ടാണ് അദ്ദേഹം സ്വീകരിച്ചത്. ഏറെ വശ്യതയുള്ള ഒരാളായിരുന്നു രാജ്കുമാർ സാർ. അദ്ദേഹം നന്നായി യോഗ ചെയ്തിരുന്നു. കെട്ടിപ്പിടിച്ചപ്പോൾ ഒരുനിമിഷം വല്ലാത്തൊരു എനർജി എന്റെ ശരീരത്തിൽ ഫീൽ ചെയ്തത് യോഗയുടെ ഫലമാകാം. അന്ന് സാറുമായി ഒരുപാട് സംസാരിച്ചു. എന്റെ സിനിമകളെക്കുറിച്ചും കഥാപാത്രങ്ങളെ കുറിച്ചുമൊക്കെ അദ്ദേഹം വാചാലനായി. അത് രാജ്കുമാർ എന്ന മഹാനടൻ മോഹൻലാൽ എന്ന നടനു നല്കിയ ആദരവു കൂടിയായിരുന്നു.

സാഹസിക സഞ്ചാരികളുടെ ഇഷ്ടയിടമാണ് ഹിമാലയം. വിവിധ വഴികളിൽ ഹിമാലയം കയറാമെങ്കിലും ദേവഭൂമിയെന്ന് അറിയപ്പെടുന്ന ഉത്തരാഖണ്ഡ് വഴിയുള്ള യാത്രയിൽ എന്തൊക്കെ കാഴ്ചകളാണ് സഞ്ചാരികൾക്കായി കാത്തിരിക്കുന്നതെന്ന് അറിയേണ്ടതുണ്ട്. ദേവഭൂമിയെങ്കിലും ഹിമാലയൻ യാത്രയെ തീർത്ഥാടനമെന്നു പറയാൻ കഴിയില്ല. ഇന്ത്യയിലെ ഏറ്റവും വലിയ സാഹസിക വിനോദകേന്ദ്രം മുതൽ ആറു മാസം മഞ്ഞിനടിയിൽ ഉറങ്ങുന്ന ഇന്ത്യൻ ഗ്രാമം വരെയുണ്ട് ഈ വഴിയിൽ. തീർത്ഥാടകർക്കും സാഹസികർക്കും ഒരേപോലെ ഇഷ്ടപ്പെടുന്ന ഹിമാലയൻ യാത്രയെക്കുറിച്ച്

ഹരിദ്വാർ
……………………

ഹരിദ്വാർ എന്നതിന്റെ സംസ്‌കൃത അർത്ഥം വിഷ്ണുവിലേക്കുള്ള കവാടം എന്നാണ്. വിഷ്ണുവിന്റെ ഇടമായി ഹിന്ദുമത വിശ്വാസികൾ കരുതപ്പെടുന്ന ബദരിനാഥ് ക്ഷേത്രത്തിലേക്കുള്ള വഴി ഇവിടെ നിന്നാണ് ആരംഭിക്കുന്നത്. ഹിന്ദുമത വിശ്വാസികളെ സംബന്ധിച്ചിടത്തോളം ഏഴു പുണ്യസ്ഥലങ്ങളിൽ ഒന്നാണ് ഹരിദ്വാർ. 12 വർഷത്തിലൊരിക്കൽ ഇവിടെ കുംഭമേള നടക്കാറുണ്ട്. ഹരിദ്വാറിൽ ഗംഗയിൽ നടത്തുന്ന ആരതി എന്ന ആരാധന പ്രസിദ്ധമാണ്. പ്രധാന സ്‌നാനഘട്ടമായ ഹർ കി പൗരീ (ഹരിപാദം) അഥവാ ബ്രഹ്മകുണ്ഡത്തിലാണ് പൂജകൾ നടക്കുക. ഇവിടെ സ്‌നാനം ചെയ്താൽ പാപമോചനമുണ്ടാകുമെന്നും മുക്തി ലഭിക്കുമെന്നുമാണ് ഹിന്ദുമത വിശ്വാസം.

ഋഷികേശ്
…………………………

ഇന്ത്യയിൽ സാഹസികവിനോദങ്ങൾക്ക് പേരുകേട്ട ഇടമാണ് ഋഷികേശ്. റിവർ റാഫ്റ്റിങ്, കയാക്കിങ്്, ട്രെക്കിങ്്, ക്യാംപിങ്, ബങ്കി ജംപിങ് തുടങ്ങിയ സാഹസിക വിനോദങ്ങൾ ഇവിടെയുണ്ട്. ഋഷികേശിലെ പ്രധാനപ്പെട്ട രണ്ടു തൂക്കുപാലങ്ങളാണ് ലക്ഷ്മൺ ജൂളയും രാം ജൂളയും. ടേഹ്രി, പൗരി എന്നീ ജില്ലകളെ ബന്ധിപ്പിച്ചിരിക്കുന്ന പാലം കൂടിയാണ് ലക്ഷ്മൺ ജൂള. ഗംഗയ്ക്കു കുറുകെ ചണക്കയറിലൂടെ ശ്രീരാമന്റെ സഹോദരനായ ലക്ഷ്മണൻ കടന്നുപോയിട്ടുണ്ടെന്ന വിശ്വാസത്തിന്മേലാണ് പാലത്തിന് ഈ പേരു ലഭിച്ചത്. ലക്ഷ്മൺ ജൂള പോലെ തന്നെ പ്രശസ്തമായ മറ്റൊരു തൂക്കുപാലമാണ് രാം ജൂള. ശിവാനന്ദ ആശ്രമവും സ്വർഗാശ്രമവും തമ്മിൽ ബന്ധിപ്പിക്കാനാണ് ഈ പാലം നിർമിച്ചിരിക്കുന്നത്.

ദേവപ്രയാഗ്
………………………

ഹിമാലയത്തിലെ നന്ദാദേവി കൊടുമുടിയിൽ നിന്നുള്ള ഹിമനദിയിൽ നിന്ന് ഉദ്ഭവിക്കുന്ന അളകനന്ദയും ഗംഗോത്രി ഹിമാനിയിലെ ഗോമുഖിൽ നിന്ന് ഉദ്ഭവിക്കുന്ന ഭാഗീരഥിയും കൂടിച്ചേർന്ന് ഗംഗാനദി രൂപം കൊള്ളുന്നിടമാണ് ദേവപ്രയാഗ്. നിരവധി വിദേശ സഞ്ചാരികൾ എത്തുന്ന ഒരു സ്ഥലം കൂടിയാണിത്.

യമുനോത്രി
…………………………

യമുനാനദിയുടെ ഉദ്ഭവസ്ഥാനമാണ് യമുനോത്രി. ഹിന്ദുമത വിശ്വാസപ്രകാരം ദൈവങ്ങളുടെ ഇരിപ്പിടമാണിവിടം.

subscribe