Star Chat

You Are Here: Home / Archives / Category / Star Chat

ഇഷ്ടം സംവിധാനം
– വിനീത് ശ്രീനിവാസൻ / രാജ്കുമാർ ആർ

Categories:

അച്ഛനു വേണ്ടി മകന്റെ പാട്ട്! വിനീത് ശ്രീനിവാസന്റെ സിനിമയിലെ തുടക്കം അങ്ങനെയാണ്, കിളിച്ചുണ്ടൻ മാമ്പഴത്തിലെ പാട്ടിലൂടെ. അച്ഛൻ തിരക്കഥ എഴുതിയ ഉദയനാണ് താരം എന്ന സിനിമയിലും വിനീത് ശ്രീനിവാസൻ അച്ഛനുവേണ്ടി പാടി. സൈക്കിൾ എന്ന ചിത്രത്തിലൂടെ വിനീത് നടനുമായി. പിന്നീട് നിരവധി ചിത്രങ്ങളിൽ കഥാപാത്രങ്ങളായി വിനീത് സ്‌ക്രീനിൽ എത്തി. അതിനിടയിൽ മലർവാടി ആർട്‌സ് ക്ലബിലൂടെ തിരക്കഥാകൃത്തിന്റെയും സംവിധായകന്റെയും പാട്ടെഴുത്തുകാരന്റെയും തൊപ്പിയും അണിഞ്ഞു. ആനന്ദം, ഹെലൻ എന്നീ ചിത്രങ്ങൾ നിർമിച്ചു. അക്ഷരാർത്ഥത്തിൽ തന്നെ വിനീതിനെ അച്ഛന്റെ മകൻ എന്നുവിളിക്കാം. വിനീത് നായകനായ തണ്ണീർമത്തൻ ദിനങ്ങൾ വൻവിജയമായി. ഒടുവിൽ നിർമിച്ച ഹെലൻ മികച്ച ചിത്രമെന്ന അഭിപ്രായം നേടി. അന്നും ഇന്നും ലാളിത്യമാണ് വിനീതിന്റെ മുഖമുദ്ര.
സിനിമയിലേക്കു ആഗ്രഹം തോന്നിയപ്പോൾ മലർവാടി ആർട്‌സ് ക്ലബ് തന്നു. പിന്നീട് ഒരു ചവിട്ടുപടിയായി തട്ടത്തിൻ മറയത്ത് തന്നു. വർഷങ്ങൾ കഴിഞ്ഞു ഒരു മാറ്റം ആവശ്യമായി വന്നപ്പോൾ ഹെലനും തന്നു. ഒരൊറ്റ പേര് വിനീത് ശ്രീനിവാസൻ… മലർവാടിയിലൂടെ വിനീത് കൈപിടിച്ചുയർത്തിയ അജു വർഗീസ് ഫേസ്ബുക്കിൽ കുറിച്ചതാണിത്. ഇതുപോലെയുള്ള സൗഹൃദങ്ങളാണ് വിനീതിന്റെ കരുത്ത്.

  • സൗഹൃദങ്ങൾ ഭാഗ്യം

നല്ല സൗഹൃദങ്ങൾ എക്കാലത്തും എന്റെ ജീവിതത്തിൽ ഉണ്ടായിട്ടുണ്ട്. അവരവരുടെ കാര്യങ്ങളുമായി ചിലർ മാറിപ്പോയിട്ടുണ്ട്. എല്ലാവരുടെയും ജീവിതത്തിൽ മാറ്റം ഉണ്ടാവുമല്ലോ. അങ്ങനെയുള്ള ബന്ധങ്ങളും അതിനൊപ്പം ജീവിതത്തിൽ എല്ലാക്കാലത്തും കൂടെയുള്ളവയും ഉണ്ട്. സൗഹൃദങ്ങൾ ജീവിതത്തിനു ബലം നൽകുന്ന വലിയ ശക്തിയാണ്. കോളേജ് പഠനകാലം മുതൽ കൂടെയുള്ള സുഹൃത്തുക്കൾ മാത്രമല്ല, കഴിഞ്ഞ അഞ്ചാറു വർഷത്തിനിടയിൽ ഞാൻ പ്രവർത്തിച്ച സിനിമകളിൽ എനിക്കൊപ്പം നിന്നവരുമായും അടുത്ത സൗഹൃദമുണ്ട്. അങ്ങനെ ആ സൗഹൃദം വളരുന്നുണ്ട്. അതൊരു വലിയ അനുഗ്രഹമാണ്. ഒരു പ്രായം കഴിഞ്ഞാൽ നല്ല സുഹൃത്തുക്കളെ സമ്പാദിക്കുക എന്നത് പ്രയാസമാണ്. ലോകത്തെ കൂടുതൽ മനസിലാക്കുന്നതിന്റെ കുഴപ്പമാണത്. പക്ഷേ, അങ്ങനെയുള്ള സമയത്തുപോലും എനിക്ക് നല്ല സൗഹൃദങ്ങൾ ഉണ്ടാകുന്നുണ്ട്. അത് എന്റെ ഭാഗ്യമാണ്. അജു വർഗീസും ഷാൻ റഹ്മാനും അൽഫോൺസ് പുത്രനും എനിക്കൊപ്പം സിനിമയിൽ വന്നവരാണ്. എന്റെ ചിത്രം നന്നാവണമെന്നു അവരും അവരുടെ ചിത്രം നന്നാവണമെന്നു ഞാനും ആഗ്രഹിക്കാറുണ്ട്. സുഹൃത്തുക്കൾ എന്നതിനപ്പുറം പരസ്പരം പിന്തുണയോടെ നിൽക്കുന്നവരാണ് ഞങ്ങൾ. ഞങ്ങൾക്കിടയിൽ മത്സരങ്ങളില്ല. സിനിമ ഒരു സീസണിൽ സംഭവിക്കുന്നതാണ്. എന്നാൽ, സൗഹൃദങ്ങൾ അങ്ങനെയല്ല; എന്നെന്നും കൂടെയുള്ളതാണ്.
സിനിമയുമായി ബന്ധപ്പെട്ടതെല്ലാം ഞാൻ ആദ്യം പറയുന്നത് ഭാര്യ ദിവ്യയോടാണ്. പിന്നെ ഷാൻ റഹ്മാനോടും നോബിൾ ബാബു തോമസിനോടും പറയും. എന്റെ എല്ലാക്കാര്യങ്ങളും അറിയുന്നത് ഈ മൂന്നുപേരാണ്. ഏറ്റവും വലിയ ഭാഗ്യമായി കരുതുന്നത് ഇത്തരം സൗഹൃദങ്ങളാണ്.

subscribe

സ്‌കൂളിലെ ഷോർട്ട് ഫിലിമും ഹെലനും ഞാനും
– മാത്തുക്കുട്ടി സേവ്യർ / രാജ്കുമാർ ആർ

Categories:

രണ്ടു മാത്തുക്കുട്ടികളും ഒരുമിച്ചുള്ള ഫോട്ടോ ഫേസ്ബുക്കിൽ ഷെയർ ചെയ്ത് ആർ.ജെ മാത്തുക്കുട്ടി കുറിച്ചു: ഇതാണ് പലരും ഞാനാണെന്ന് വിചാരിച്ചിരിക്കുന്ന മാത്തുക്കുട്ടി സേവ്യർ. കൺഗ്രാജുലേഷൻസ് ബ്രദർ. നീ പൊളിക്കും എന്ന് എനിക്കുറപ്പായിരുന്നു. ഒന്നൂല്ലേൽ ഇത് എന്റെ പേരല്ലേ… മാത്തുക്കുട്ടി സേവ്യറിന്റെ ആദ്യ ചിത്രം ഹെലനെപ്പറ്റി മറ്റൊരു പോസ്റ്റിൽ ആർ.ജെ മാത്തുക്കുട്ടി എഴുതി: മുണ്ട് മടക്കിക്കുത്തുമ്പോഴും മീശ പിരിക്കുമ്പോഴുമല്ല, മേലെ നിന്നൊരു സ്റ്റീൽ പാത്രം താഴെ വീഴുമ്പോൾ ഒരു തിയേറ്റർ മുഴുവൻ കൈയടിക്കുന്നത് കണ്ടിട്ടുണ്ടോ? ഹെലൻ കാണണം!
പൊള്ളുന്ന പകലുകളും നിയോൺ രാത്രികളുമില്ലാതെ നമുക്കൊരു തണുത്തുറഞ്ഞ ത്രില്ലർ സിനിമയുണ്ടാക്കാമോ?
ഹെലൻ കാണണം. എല്ലാ മരവിപ്പുകൾക്കും മീതെ സ്‌നേഹത്തിന്റെ ഊഷ്മളത വന്ന് പൊതിയുന്നത് അനുഭവിക്കണോ? ഹെലൻ കാണണം. അന്ന ബെൻ, ലാൽ, അജു വർഗീസ് എന്നിവർ പ്രധാന വേഷത്തിൽ അഭിനയിച്ച സർവൈവൽ ത്രില്ലർ ജോണറിലുള്ള ഹെലൻ ഒരു അത്ഭുത ചിത്രമാണ്. മാത്തുക്കുട്ടിയുടെ മനസിൽ സ്‌കൂൾ പഠനകാലത്തേ കയറിക്കൂടിയതാണ് സിനിമ. പഠനശേഷം നിരവധി ഹ്രസ്വചിത്രങ്ങൾ സംവിധാനം ചെയ്തു. ആദ്യ ചിത്രം തിയേറ്ററുകളിൽ സ്വീകരിക്കപ്പെട്ടതിന്റെ സന്തോഷത്തിലാണ് മാത്തുക്കുട്ടി.

  • സ്‌കൂളിലെ ഷോർട്ട് ഫിലിം

സ്‌കൂൾ പഠനകാലത്താണ് ആദ്യ ഷോർട്ട് ഫിലിം ചെയ്തത്. സ്‌കൂളുകളിൽ സ്മാർട്ട് ക്ലാസുകൾ തുടങ്ങിയ കാലം. സ്‌കൂളിൽ ഒരു പ്രൊജക്ടർ ഉണ്ടായിരുന്നു. അതിന്റെ ആവേശത്തിലാണ് ആദ്യ ഷോർട്ട് ഫിലിം ഒരുക്കിയത്. അന്ന് ഓൺലൈനിൽ നോക്കി പഠിച്ചൊക്കെയാണ് എടുത്തത്. ആ പ്രായത്തിൽ അതിന്റെ പ്രാധാന്യത്തെക്കുറിച്ചൊന്നും അറിയില്ലായിരുന്നു. ഇപ്പോൾ കാണുമ്പോൾ പൊട്ടത്തരമായി തോന്നും. ഷോർട്ട് ഫിലിം എടുത്ത ശേഷം റിലീസ് ചെയ്യാനുള്ള അനുമതി വാങ്ങി. രണ്ടായിരത്തി അഞ്ഞൂറോളം കുട്ടികൾ പഠിക്കുന്ന സ്‌കൂളാണ്. ഓരോ ക്ലാസിനും പ്രിവ്യൂ വച്ചു. പന്ത്രണ്ടാം ക്ലാസിലെ ചേട്ടന്മാർക്ക് ഞങ്ങളുടെ ഷോർട്ട് ഫിലിം കണ്ടപ്പോൾ പ്രത്യേകിച്ചൊന്നും തോന്നിയില്ല. എന്നാൽ, ചെറിയ ക്ലാസിലെ കുട്ടികൾ കൈയടിച്ചു. അതു നൽകിയ ആത്മവിശ്വാസവും സന്തോഷവും വലുതായിരുന്നു. അതാണ് സിനിമയിലേക്ക് വരാനുള്ള ആത്മവിശ്വാസം നൽകിയത്. പിന്നീട് അനിമേഷൻ ആൻഡ് ഗ്രാഫിക് ഡിസൈനാണ് പഠിച്ചത്.

  • സ്വപ്‌നമാണ് ഈ സിനിമ

ഹെലന്റെ കഥ വർഷങ്ങളായി മനസിലുണ്ട്. ഹെലന്റെ തിരക്കഥാകൃത്തുക്കളിൽ ഒരാളായ ആൽഫ്രഡിന് ന്യൂസ് പേപ്പർ ക്ലിപ്പിങ്‌സ് ശേഖരിക്കുന്ന സ്വഭാവമുണ്ട്. ചിത്രത്തിന്റെ ത്രെഡിൽ സന്ദർഭത്തിന് അനുസരിച്ച് ഈ വാർത്തകൾ ചേർത്തുവച്ചപ്പോഴാണ് ഹെലന്റെ തിരക്കഥ യാഥാർത്ഥ്യമായത്. കഴിഞ്ഞ ജനുവരിയിൽ തിരക്കഥ പൂർത്തിയാക്കി. പുതിയ ആശയങ്ങൾ വരുമ്പോൾ ഞങ്ങൾ വിനീതേട്ടനോട് പറയും. ഹെലന്റെ കഥ വിനീതേട്ടനോട് പറഞ്ഞു. ‘ഞാൻ നിർമിക്കാം’ എന്ന് അദ്ദേഹം ഇങ്ങോട്ടുപറയുകയായിരുന്നു.

subscribe

ratheesh balakrishnan poduval ഒരു പയ്യന്നൂർക്കാരന്റെ സ്വപ്‌നങ്ങൾ
– രതീഷ് ബാലകൃഷ്ണൻ പൊതുവാൾ / രാജ്കുമാർ ആർ

Categories:

രസകരമായ മുഹൂർത്തങ്ങളിലൂടെ കടന്നുപോകുന്ന ചിത്രമാണ് ആൻഡ്രോയിഡ് കുഞ്ഞപ്പൻ. നവാഗതനായ രതീഷ് ബാലകൃഷ്ണൻ പൊതുവാൾ സംവിധാനം ചെയ്യുന്ന ചിത്രത്തിൽ സൗബിൻ ഷാഹിറും സുരാജ് വെഞ്ഞാറുമൂടുമാണ് പ്രധാന വേഷത്തിൽ. റോബോട്ട് പ്രധാന കഥാപാത്രമായി എത്തുന്ന ചിത്രം മലയാളികളുടെ ഹൃദയം കവർന്നു. രതീഷ് സംസാരിക്കുന്നു.

  • എന്റെ നാടും കഥാപാത്രങ്ങളും

ഞാൻ പയ്യന്നൂർ സ്വദേശിയാണ്. ആൻഡ്രോയിഡ് കുഞ്ഞപ്പനിലെ കഥാപാത്രങ്ങളെ കണ്ടെത്തിയത് എന്റെ നാടായ പയ്യന്നൂരിൽ നിന്നാണ്. നാട്ടിൽ എനിക്ക് പരിചിതമായ സ്ഥലങ്ങളിലായിരുന്നു ഷൂട്ടിങ്ങും. പയ്യന്നൂർ, അന്നൂർ ഭാഗങ്ങളിൽ നിരവധി നാടകനടന്മാരുണ്ട്. അവരെ സിനിമയിലെ കഥാപാത്രങ്ങളാക്കണം എന്ന ആഗ്രഹമുണ്ടായിരുന്നു. നാട്ടുകാരായ അഭിനേതാക്കളെ ഓഡിഷനിലൂടെ കണ്ടെത്തുന്നത് അങ്ങനെയാണ്. ഭൂരിഭാഗം അഭിനേതാക്കളും വടക്കൻ കേരളത്തിൽ നിന്നുള്ളവരാണ്. കഥാപാത്രങ്ങളുടെയും സംഭാഷണങ്ങളുടെയും പൂർണതയ്ക്കുവേണ്ടിയാണ് ഇങ്ങനെ ചെയ്തത്.

  • സിനിമയിൽ പതിനഞ്ചു വർഷം

ആൻഡ്രോയ്ഡ് കുഞ്ഞപ്പന്റെ സ്‌ക്രിപ്റ്റിന്റെ വർക്ക് തുടങ്ങിയിട്ട് നാലഞ്ചു വർഷമായി. ശരിക്കും ഞാൻ പ്രൊഡക്ഷൻ ഡിസൈനറാണ്. മുംബൈയിലാണ് വർക്ക് ചെയ്യുന്നത്. അസിസ്റ്റന്റായും ഇൻഡിപെന്റന്റായും സിനിമയിൽ പതിനഞ്ചു വർഷമായി ആർട്ട് ഡയറക്ടറാണ്. പത്ത് വർഷമായി മുംബൈയിലാണ്. പ്രൊഡക്ഷൻ ഡിസൈനറായി പ്രവർത്തിച്ചതാണ് സംവിധായകനാകാനുള്ള എന്റെ പരിചയം. പ്രൊഡക്ഷൻ ഡിസൈനർ എപ്പോഴും ഡയറക്ടറുടെ കൂടെയാണ് വർക്ക് ചെയ്യുന്നത്. ഒരു സിനിമയിൽ എങ്ങനൊക്കെ പ്രവർത്തിക്കാനാവുവോ അങ്ങനെയൊക്കെ ചെയ്തിട്ടുണ്ട്.

  • സംവിധാനം എന്ന സ്വപ്നം

സംവിധാനം നേരത്തെ മനസിലുണ്ടായിരുന്ന ആഗ്രഹമാണ്. ഈ കഥ എന്റെ സുഹൃത്തുക്കളുമായി പങ്കുവച്ചപ്പോൾ വർക്കാവാൻ സാധ്യതയുണ്ടെന്നു ബോധ്യം വന്നതുകൊണ്ടാണ് പ്രോജക്ടുമായി മുന്നോട്ടുപോയത്. സിനിമയുടെ കാമറമാൻ ഷാനു ജോൺ വർഗീസിന്റെ സുഹൃത്തും സഹപാഠിയുമാണ് നിർമാതാവ് സന്തോഷ് ടി. കുരുവിള. സ്‌ക്രിപ്റ്റ് എഴുതിക്കഴിഞ്ഞ് ഷാനു വഴിയാണ് അദ്ദേഹത്തെ സമീപിച്ചത്. ആൻഡ്രോയിഡ് കുഞ്ഞപ്പനു മുമ്പു ചില തിരക്കഥകൾ എഴുതിയിരുന്നു എങ്കിലും ജോലിത്തിരക്കുമൂലം പൂർത്തിയാക്കാനായില്ല. ആൻഡ്രോയിഡ് കുഞ്ഞപ്പന്റെ ആശയം തോന്നിയപ്പോൾ എഴുതിനോക്കി. പൂർത്തിയായപ്പോഴാണ് സൗബിനോട് പറഞ്ഞത്.

subscribe

Kamal Haasan ‘Apoorva Nayagan’
– കമൽഹാസൻ / ഭാനുപ്രകാശ്

Categories:

പതിനഞ്ചു വർഷം മുമ്പ്, ആൾവാർപേട്ടിലുള്ള കമൽഹാസന്റെ പഴയ വീട്ടിലേക്കുള്ള പടികൾ ആദ്യമായി കയറുമ്പോൾ ‘ഇന്ത്യൻ’ മുതൽ ‘കളത്തൂർ കണ്ണമ്മ’വരെയുള്ള സിനിമകളിലെ കഥാപാത്രങ്ങളുടെ ഛായാചിത്രങ്ങൾ ചുമരിൽ കാണമായിരുന്നു. കമലിന്റെ അഭിനയചക്രത്തിലൂടെയുള്ള ഒരു സ്വപ്നസഞ്ചാരം പോലെ നീണ്ടുപോകുന്ന ചിത്രവഴിത്താരകൾ! രാജ് കമൽ ഫിംലിസിന്റെ സ്വീകരണമുറിയിലെത്തിയപ്പോൾ അവിടെ ഒരു ആറു വയസുകാരന്റെ വലിയ ബ്ലാക്ക് ആന്റ് വൈറ്റ് ഫോട്ടോ. ആദ്യ സിനിമയായ ‘കളത്തൂർ കണ്ണമ്മ’യിലെ കുഞ്ഞു കമൽ. ‘കടന്നുവന്ന വഴികളൊന്നും ഞാൻ മറന്നിട്ടില്ല’ എന്ന് കമലിന്റെ ശബ്ദത്തിൽ ആ ചിത്രം മന്ത്രിക്കുന്നുവോ? മുകളിലെ മുറിയുടെ കനമുള്ള വാതിൽ തുറന്ന് നിറഞ്ഞ പുഞ്ചിരിയോടെ ഇന്ത്യൻ സിനിമയിലെ ആ മഹാത്ഭുതം മുന്നിലെത്തി. കൈകൂപ്പി, ഹസ്തദാനത്തോടെ ഒരു സ്വാഗതം!

അതായിരുന്നു ആദ്യ കൂടികാഴ്ച. പുതിയ ചിത്രത്തിന്റെ ചർച്ചയ്‌ക്കെത്തിയ വിദേശികളോട് ഒഴിവു ചോദിച്ച് ഇരുപത് മിനിറ്റ് സമയം കമൽ അനുവദിച്ചു. സമയക്കുറവു മൂലം ഇന്റർവ്യൂ പൂർത്തിയാക്കാനാകാതെ മടങ്ങുമ്പോൾ സ്‌നേഹത്തിന്റെ ഭാഷയിൽ കമൽ പറഞ്ഞു: ”വിഷമിക്കേണ്ട, തീർച്ചയായും ഒരഭിമുഖത്തിനുള്ള സമയം ഞാൻ നിങ്ങൾക്കു തരും.”
കാത്തിരിപ്പ് അത്ര നീണ്ടതായി തോന്നിയില്ല. കുറച്ചുവർഷങ്ങൾക്കുള്ളിൽ കൊച്ചിയിലെ ലേ മെറിഡിയനിൽ വച്ച് തികച്ചും യാദൃച്ഛികമായി കമൽ സമയം അനുവദിച്ചു. മണിക്കൂറുകൾ നീണ്ട സംഭാഷണം സിനിമേതരവിഷയങ്ങളിലൂടെ കടന്നുപോയി. കവി, നോവലിസ്റ്റ്, കഥാകൃത്ത്, തിരക്കഥാകൃത്ത്, പത്രപ്രവർത്തകൻ. കമലിലെ എഴുത്തുകാരനെ പരിചയപ്പെടുത്തിയ അഭിമുഖമായിരുന്നു അത്. തുടർന്ന് പരിചയം പുതുക്കാൻ രണ്ടവസരംകൂടി സാധ്യമായി. കോഴിക്കോട്ട് ഐ.വി. ശശിയെ ആദരിച്ച ‘ഉത്സവ’വും ചെന്നൈയിൽ നടന്ന ഇന്ത്യൻ സിനിമയുടെ നൂറാം പിറന്നാൾ ആഘോഷവും. അന്നും കമൽ പറഞ്ഞു: ”വൈകാതെ നമുക്കു കാണാം.”

ഒരു സന്ധ്യയിൽ അപ്രതീക്ഷിതമായി എത്തിയ കമലിന്റെ കോൾ, അടുത്തദിവസം ഉച്ചയ്ക്ക് പന്ത്രണ്ടുമണിക്ക് ആൾവാർപേട്ടിലെ ഓഫിസിലെത്താനായിരുന്നു നിർദ്ദേശം. കാറിന്റെ വേഗതയിൽ ഒരു രാത്രിമുഴുവൻ കമലിന്റെ വേഷപ്പകർച്ചകൾ മനസിലൂടെ കടന്നുപോയ യാത്ര. നേരത്തേയെത്തി ഓഫിസിൽ കമലിനുവേണ്ടിയുള്ള കാത്തിരിപ്പ്. കൃത്യം പന്ത്രണ്ടുമണിക്ക് കമൽ മുന്നിൽ. പത്തുവർഷത്തിനു ശേഷവും അതേ ചിരി, കൈകൂപ്പൽ, ഊഷ്മളമായ അതേ ഹസ്തദാനം. ഒരു പക്ഷേ, ഇനിയും കണ്ടിട്ടില്ലാത്ത കമലിന്റെ പുതുഭാവങ്ങൾ! ഫോട്ടോഗ്രാഫർ അജീബ് കൊമാച്ചി തന്റെ ക്യാമറയിൽ അതെല്ലാം മനോഹര ദൃശ്യങ്ങളാക്കി മാറ്റി. ആ കൂടിക്കാഴ്ചയും മറക്കാത്ത അനുഭവമായിരുന്നു.

അറുപത്തിയഞ്ചാം പിറന്നാളിലേക്കു നടന്നടുക്കുന്ന കമലുമായി വീണ്ടും ഒരു സംഭാഷണത്തിനായി ചെന്നൈയിലെത്തുമ്പോൾ തിമിർത്തു പെയ്യുന്ന ആടിമാസമഴയാണ് സ്വാഗതമേകിയത്. ആൾവാർപേട്ടിലെ വീട്ടിൽ വച്ച് ഞങ്ങൾ വീണ്ടും കണ്ടുമുട്ടി. ചന്ദന നിറത്തിലുള്ള പാന്റും ഷർട്ടും ധരിച്ച് ക്ലീൻഷേവിൽ പുഞ്ചിരി തൂകിയ കമൽ. അറുപത്തിയഞ്ചിലും ഒരു യുവാവിന്റെ കരുത്തും പ്രസരിപ്പും ഞങ്ങൾക്കു മുന്നിൽ തെളിഞ്ഞു. പുറത്ത് തിമിർക്കുന്ന മഴയേക്കാളും ശക്തി കമലിന്റെ വാക്കുകൾക്കുണ്ടായിരുന്നു. അക്ഷരങ്ങൾ വാക്കുകളായ് പെയ്തിറങ്ങിയത് സിനിമ മാത്രം സ്വപ്നം കണ്ട് നട്ടുച്ച നേരത്തും മദിരാശി നഗരത്തിലൂടെ സൈക്കിൾ ചവിട്ടി ലൊക്കേഷനിലേക്കു പോകുന്ന കമൽഹാസനിൽ നിന്നാണ്.

”അതൊന്നും മറക്കാനാവില്ല അനിയാ. ഷൂട്ടിങ്ങുമായി ബന്ധപ്പെട്ട് ഈ നഗരത്തിലെ ഹോട്ടലുകളിൽ താമസിക്കേണ്ടി വരുമ്പോൾ പലപ്പോഴും ഞാൻ വെറുതെ ജനലിലൂടെ പുറത്തേക്കു നോക്കും. നാൽപ്പതു വർഷങ്ങൾക്കു മുമ്പുള്ള ഓർമയാണ് അത്. ഹോട്ടൽ മുറിയിലിരുന്ന് തിരക്കഥാകൃത്ത് എഴുതി തരുന്ന സ്‌ക്രിപ്റ്റ് ലൊക്കേഷനിലെത്തിക്കണം. അതെത്തിച്ചശേഷം വീണ്ടും ഹോട്ടലിലെത്തണം. അപ്പോഴേക്കും അടുത്ത സീൻ എഴുതി വച്ചിട്ടുണ്ടാകും. ഇത് കാറിൽ വന്നൊന്നുമല്ല ഞാൻ വാങ്ങിക്കൊണ്ടുപോകുന്നത്. സൈക്കിൾ ചവിട്ടിയാണ് വരുന്നതും പോകുന്നതുമെല്ലാം. എന്റെ വിയർപ്പ് ഈ നഗരത്തിന്റെ മുക്കിലും മൂലയിലുമൊക്കെ വീണിട്ടുണ്ടാകും. ശരിക്കും കഠിനാദ്ധ്വാനമായിരുന്നെങ്കിലും എനിക്ക് ഒരു സ്വപ്നമുണ്ടായിരുന്നു. സിനിമയെന്ന സ്വപ്നം. അതുകൊണ്ട് പുലർച്ച അഞ്ചുമണിവരെ തുടർച്ചയായി ജോലി ചെയ്താലും അതൊരു അദ്ധ്വാനമായി തോന്നിയില്ല. ആഹ്ലാദം മാത്രമായിരുന്നു എനിക്ക്. ഇഷ്ടപ്പെട്ട മേഖലയിൽ ജോലി ചെയ്യുന്നതിന്റെ ആഹ്‌ളാദം.”

സ്വപ്നങ്ങളിലൂടെയുള്ള യാത്ര
……………………………………….

ഞാൻ ധാരാളം സ്വപ്നം കാണുന്നവനാണ്. ഉറങ്ങുമ്പോഴല്ല, യഥാർത്ഥജീവിതത്തിൽ വലിയ സ്വപ്നങ്ങൾ കണ്ട് പ്രവർത്തക്കുമ്പോഴെ, എന്തെങ്കിലുമൊക്കെ ആയിത്തീരാൻ കഴിയൂ. ഒന്നുമില്ലായ്മയിൽ നിന്ന് എന്നെ ഇവിടെവരെയെത്തിച്ചത് ഞാൻ കണ്ട സ്വപ്നങ്ങളാണ്. ജീവിതം ഒരു വലിയ സ്വപ്നമാണെന്ന് മുമ്പൊരിക്കൽ ഞാൻ പറഞ്ഞിട്ടുണ്ട്. വലിയ വലിയ സ്വപ്നങ്ങൾ കാണുന്ന എന്റെ ജീവിതത്തിലെ ഏറ്റവും വലിയ സ്വപ്നം നിങ്ങൾക്കു മുന്നിലിരിക്കുന്ന മജ്ജയും മാംസവുമുള്ള ഈ കമൽഹാസൻ തന്നെയാണ്. സ്വപ്നങ്ങൾ കാണാത്തവരായി ആരുണ്ട്? കുഷ്ഠരോഗിക്കും, കള്ളനും വരെ സ്വപ്നങ്ങളുണ്ട്. സ്വപ്നങ്ങൾക്കൊത്ത് നമ്മളും ഉയർന്ന് പ്രവർത്തിച്ചെങ്കിൽ മാത്രമേ നമ്മൾക്കും ഒരു സ്വപ്നമായി മാറാൻ കഴിയുകയുള്ളൂ. കാലത്തിനൊപ്പം നമ്മുടെ ജീവിതവും കടന്നുപോകുന്നുണ്ട്. പ്രായം ശരീരത്തിനേ ആകാവൂ. മനസിനെ എപ്പോഴും ചെറുപ്പത്തിലേക്കു പിടിച്ചുവയ്ക്കാൻ നമ്മൾ പഠിക്കണം. അല്ലെങ്കിൽ നമ്മളുടെ പ്രവൃത്തിക്കും വാർധക്യം സംഭവിക്കും. പക്ഷേ, ഒരു കലാകാരന്റെ സർഗാത്മക പ്രവർത്തനങ്ങൾക്ക് പ്രായം തടസമാണെന്ന് ഞാൻ വിശ്വസിക്കുന്നില്ല. ആറാം വയസിൽ തുടങ്ങിയ സിനിമാ ജീവിതം അറുപതാം വയസിലും ഞാൻ തുടരുന്നു. അഹങ്കാരത്തിന്റെ പുറത്താണ് ഇത് പറയുന്നതെന്ന് കരുതരുത്. നല്ല ആത്മവിശ്വാസത്തിന്റെ പിൻബലത്തിലാണ്. അന്നും ഇന്നും എന്റെ കൈമുതൽ ഈ ആത്മവിശ്വാസം തന്നെയാണ്. കമൽഹാസൻ എന്ന എന്റെ പേരിനുപോലും പ്രത്യേകതയുണ്ട്. ഹിന്ദുവിന്റെയും മുസ്ലീമിന്റെയും നാമങ്ങൾ ചേർന്നതാണ് കമൽഹാസൻ. എന്റെ അച്ഛനിട്ട പേരാണത്. എന്തുകൊണ്ട് ഇങ്ങനെയൊരു പേര് എനിക്കു നൽകി എന്നൊരിക്കലും ഞാൻ അച്ഛനോടു ചോദിച്ചിട്ടില്ല. സ്വാതന്ത്ര്യസമരകാലത്ത് അച്ഛനൊപ്പം ജയിലിൽ കിടന്നിരുന്ന ഒരു സുഹൃത്തിന്റെ പേരാണ് കമൽഹാസൻ എന്നൊരു കഥ ഞാൻ കേട്ടിട്ടുണ്ട്. അതിനപ്പുറം ഒന്നും അറിയില്ല. ജ്യേഷ്ഠന്മാർക്ക് ചന്ദ്രഹാസൻ, ചാരുഹാസൻ എന്നീ പേരുകളാണ് നൽകിയത്. എന്റെ കാഴ്ചപ്പാടുകൾ, വിശ്വാസം, രാഷ്ട്രീയം ഇതൊക്കെ രൂപപ്പെടുംമുമ്പ്, എനിക്ക് ഓർമവയ്ക്കും മുമ്പ് അച്ഛൻ നൽകിയ ഈ പേരിൽ എനിക്കഭിമാനം മാത്രമേയുള്ളൂ.

പരമക്കുടി എന്ന ഗ്രാമം
………………………………………….

പരമക്കുടി ഗ്രാമത്തിലാണ് ഞാൻ ജനിച്ചത്. പക്ഷേ, ഞാൻ വളർന്നത് ചെന്നൈയിലാണ്. ചെറിയ കുട്ടിയായിരിക്കുമ്പോഴെ ഞങ്ങളുടെ കുടുംബം ചെന്നൈയിലേക്കു താമസം മാറിയിരുന്നു. എന്റെ ബാല്യകാല ഓർമകളിൽ പരമക്കുടിക്കു വലിയ സ്ഥാനമൊന്നുമില്ല. അച്ഛൻ പറഞ്ഞുതന്ന കാര്യങ്ങളിൽ നിന്നാണ് പരമക്കുടി എന്റെ മനസിലേക്ക് കടന്നുവന്നത്. വല്ലപ്പോഴും ഞാൻ പരമക്കുടിയിൽ പോകാറുണ്ട്. ആ യാത്ര ആരുമറിയാറില്ല. അതൊരു പഴയ ഓർമയെ വീണ്ടെടുക്കലാണ്. എന്റെ അച്ഛനും അമ്മയും ജീവിച്ച മണ്ണിനെ തൊട്ടുവന്ദിക്കുന്നപോലുള്ള ഒരനുഭവം.

ഇപ്പോൾ നമ്മൾ ഇരിക്കുന്ന ഈ വീട് എന്റെ ജീവിതസ്പന്ദനങ്ങളോരോന്നും പകർത്തിവച്ചിട്ടുണ്ട്. ഇതെന്റെ പഴയവീടാണ്. എന്റെ അച്ഛനും അമ്മയും സഹോദരങ്ങളുമൊക്കെ ഒന്നിച്ചു താമസിച്ച വീട്. ശരിക്കും എന്റെ ഓർമകൾ ആരംഭിക്കുന്നത് ഇവിടെ നിന്നാണ്. പരമക്കുടിയിൽ നിന്ന് അച്ഛൻ ഞങ്ങളെയുംകൊണ്ട് ഈ വീട്ടിലേക്കാണു വന്നത്. കുറെക്കാലം ഇവിടെ വാടകയ്ക്കു താമസിച്ച ശേഷമാണ് ഈ വീടു വാങ്ങിയത്. ഇവിടെയെത്തുന്ന ഓരോ നിമിഷവും ഞാനൊരു കുട്ടിയായി മാറും. ഓർമകൾ എന്നെ വന്നു പൊതിയും. ആ ഓർമ സുഖമുള്ളതും ചിലപ്പോൾ നീറുന്നതുമാകും. ഈ മുറ്റത്തും വരാന്തകളിലും പടികളിലും ആ കൊച്ചുകമൽ ഇപ്പോഴും ഓടിക്കളിക്കുന്നുണ്ട്. അവന്റെ കുസൃതികൾക്കുള്ള അമ്മയുടെ ശകാരം ഇപ്പോഴും എന്റെ ചെവിയിൽ മുഴങ്ങുന്നുണ്ട്. കളത്തൂർ കണ്ണമ്മയിൽനിന്നും വിശ്വരൂപത്തിലേക്കുള്ള ദൂരം കമൽഹാസൻ സഞ്ചരിക്കാൻ തുടങ്ങിയത് ഈ വീട്ടിൽ നിന്നാണ്. ഒരുപാടൊരുപാട് ഓർമയാണ് അനുജാ എനിക്കീ വീട്. എന്റെ മരണംവരെ ഇതെനിക്ക് കൊട്ടാരം തന്നെയാണ്. അച്ഛനും അമ്മയുമാണ് എന്റെ ജീവിതത്തിലെ ഹീറോകൾ. അച്ഛൻ കോൺഗ്രസുകാരനായിരുന്നു. ഞാൻ ജനിക്കും മുമ്പേ അദ്ദേഹം സജീവ രാഷ്ട്രീയപ്രവർത്തകനായിരുന്നു. സ്വാതന്ത്ര്യസമരപ്രസ്ഥാനത്തിന്റെ ഭാഗമായി നിന്നതുകൊണ്ട് ജയിലിലൊക്കെ കിടക്കേണ്ടി വന്നിട്ടുണ്ട്. തൊഴിൽ കൊണ്ട് വക്കീലായിരുന്നെങ്കിലും അച്ഛൻ ഒരിക്കലും സ്ഥാനമാനങ്ങൾ മോഹിച്ചിരുന്നില്ല. അദ്ദേഹം ശ്രമിച്ചിരുന്നെങ്കിൽ ഒരു എം.എൽ.എയോ, എം.പിയോ ഒക്കെ ആകാമായിരുന്നു. പക്ഷേ, അതിനൊന്നും ഒട്ടും മോഹമുണ്ടായിരുന്നില്ല.

വീട്ടിലെ ചെറിയ കുട്ടിയായതുകൊണ്ട് എല്ലാവർക്കും ഒരു പ്രത്യേക വാത്സല്യം എന്നോടുണ്ടായിരുന്നു. അച്ഛൻ ഒരുപാട് തമാശകൾ പറയുന്ന ആളായിരുന്നെങ്കിലും അൽപ്പം ഭയം കലർന്ന ബഹുമാനമായിരുന്നു എനിക്ക് അദ്ദേഹത്തോടുണ്ടായിരുന്നത്. എന്നാൽ അമ്മ അങ്ങനെയല്ല. നല്ല ഒരു കൂട്ടുകാരനെപ്പോലെയായിരുന്നു. എന്റെ സ്വഭാവരീതികൾ പലതും അമ്മയിൽ നിന്നു കിട്ടിയതാണ്. ജീവിതത്തിൽ എന്നെ ഏറെ സ്വാധീനിച്ചതും അമ്മയാണ്. കാരണം അമ്മ വളരെ ബോൾഡായിരുന്നു. അച്ഛനേക്കാൾ ബോൾഡ്. എന്തിലും തന്റേതായ അഭിപ്രായങ്ങൾ വെട്ടി തുറന്നു പറയാൻ അമ്മയ്ക്കു മടിയുണ്ടായിരുന്നില്ല. ഒരിക്കലും ഒന്നും എന്റെ അച്ഛനും അമ്മയും എന്നിൽ അടിച്ചേൽപ്പിച്ചിട്ടില്ല. സ്‌കൂളിൽ പോയി പഠിക്കാൻ കഴിയാതെ വന്നതിൽ ഒരിക്കലും നിരാശയുണ്ടായിട്ടില്ല. ഏത് അക്കാഡമിക് സ്ഥാപനങ്ങൾ തരുന്നതിനേക്കാളും വലിയ പാഠമാണ് ഞാനെന്റെ ജീവിതം കൊണ്ടു പഠിച്ചത്.

ആറാം വയസിൽ ആദ്യചിത്രം
……………………………………………..

മികച്ച ബാലതാരത്തിനുള്ള ദേശീയ പുരസ്‌കാരവും ആ സനിമ നേടിത്തന്നു. തിരിച്ചറിവ് നേടിത്തുടങ്ങുന്നതിനു മുമ്പുള്ള കാലത്ത് ലഭിച്ച ആ ബഹുമതിക്ക് ഒരുപാട് മധുരമുണ്ട്. ആ പുരസ്‌കാരത്തിന്റെ വലുപ്പം ഒരുപക്ഷേ അന്നു മനസിലാക്കാൻ എനിക്ക് കഴിഞ്ഞിട്ടുണ്ടാകില്ല. അച്ഛനും അമ്മയും സഹോദരങ്ങളുമാണ് ആ അംഗീകാരത്തിൽ ഏന്നേക്കാൾ സന്തോഷിച്ചിട്ടുണ്ടാകുക. ‘കളത്തൂർ കണ്ണമ്മയിലെ കൊച്ചുകമൽ ഇപ്പോഴും എന്നിലുണ്ട്. ഒരു കുട്ടിയാകാൻ എനിക്കിപ്പോഴും കഴിയും. മനസിനെ ഒന്നു പിറകിലോട്ടു പായിച്ചാൽ മതി.

ജെമിനി ഗണേശൻ, എം.ജി.ആർ, ശിവാജി ഗണേശൻ തുടങ്ങിയ മാസ്റ്റേഴ്‌സിനൊപ്പം ബാല്യത്തിലേ അഭിനയിക്കാൻ കഴിഞ്ഞത് ഒരു മഹാഭാഗ്യമാണ്. ജെമിനി മാമയ്‌ക്കൊപ്പമായിരുന്നു സിനിമയിലെ എന്റെ തുടക്കം. സംസ്‌കൃതത്തിൽ അഗാധമായ പാണ്ഡിത്യമുണ്ടയിരുന്നു അദ്ദേഹത്തിന്. ഒരുപാടു കഴിവുകൾ ഉണ്ടായിട്ടും അതൊക്കെ വേണ്ടപോലെ അദ്ദേഹം പ്രകടിപ്പിച്ചോ എന്ന കാര്യത്തിൽ സംശയമാണ്. ഏതു കാര്യത്തിലും കൂടെ നിൽക്കാൻ തയാറാകുന്ന ഒരാൾ അതായിരുന്നു ജെമിനി മാമ. ശിവാജി ഗേണേശൻ സാറിനൊപ്പം അഭിനയിക്കാനായി എന്നെ കൂട്ടിക്കൊണ്ടു പോയത് എന്റെ ജ്യേഷ്ഠൻ ചന്ദ്രദാസനാണ്. ‘പാർത്താൽ പശിക്കിറ്താ’യിരുന്നു ശിവാജി സാറിനൊപ്പം വേഷമിട്ട ആദ്യചിത്രം. സ്വന്തം മകനോട് കാണിക്കുന്ന സ്‌നേഹമായിരുന്നു സാറിന് എന്നോട്. അദ്ദേഹത്തിന്റെ പ്രശസ്ത സിനിമകളിലെ ഡയലോഗെല്ലാം അന്നേ എനിക്ക് കാണാപാഠമായിരുന്നു. ലൊക്കേഷനിൽ വച്ച് അത് ഞാൻ പറയുമ്പോൾ സാറിനു വലിയ സന്തോഷമാണ്. എന്റെ ജീവിതത്തിലെ സന്തോഷങ്ങളിലും, പ്രതിസന്ധിഘട്ടങ്ങളിലും തണലായി നിന്ന വലിയ മനുഷ്യൻ, അതാണ് എനിക്ക് ശിവാജി സാർ. ‘ആനന്ദജ്യോതി’യുടെ ലൊക്കേഷനിൽ വച്ച് എം.ജി.ആർ സാറിനെ ആദ്യമായി കണ്ടപ്പോൾ അദ്ദേഹം എന്നോട് ചോദിച്ചു ”നിനക്ക് ആരാകണം?’ വലിയ നടനാകണം എന്നല്ല ഞാൻ മറുപടി പറഞ്ഞത്, സയന്റിസ്റ്റാകണം, അതല്ല സർ ഡോക്ടറാകണം. കൃത്യമായി ഒരുത്തരം നൽകാൻ എനിക്കു കഴിഞ്ഞില്ല. എം.ജി.ആർ സാറാണ് എന്നെ നീന്തൽ പഠിപ്പിച്ചത്. എത്രയോവട്ടം അദ്ദേഹം എനിക്കു ഭക്ഷണം വാരിത്തന്നിട്ടുണ്ട്. മഹാനടന്മാർക്കൊപ്പം അഭിനയിക്കാൻ കഴിഞ്ഞു എന്നത് വലിയ ഭാഗ്യമാണെങ്കിലും അതിനപ്പുറമുള്ള സ്‌നേഹമാണ് അവർ എനിക്കു നൽകിയത്.

മലയാളത്തിലെ തുടക്കം ‘കണ്ണും കരളും’മായിരുന്നു. തമിഴ് സിനിമകളിലെ എന്റെ അഭിനയം കണ്ടിട്ടാണ് സേതുമാധവൻ സാർ കണ്ണും കരളിലുമഭിനയിക്കാൻ വിളിക്കുന്നത്. സേതുസാറിന് ഞാനിന്നും ഒരു കുട്ടിയാണ്. അദ്ദേഹം പലപ്പോഴും പറയാറുണ്ട് കമൽ ഇന്നും എനിക്ക് കുട്ടിയാണ്. കണ്ണും കരളിൽ അഭിനയിക്കാൻ വന്ന അതേ കുട്ടി. അതങ്ങനെയാവാതെ വഴിയില്ലല്ലോ. അച്ഛനമ്മമാർക്ക് കുട്ടികൾ എത്ര വളർന്നു വലുതായാലും അവരുടെ മനസിൽ കുട്ടി തന്നെയായിരിക്കും. ഒരുപക്ഷേ, സത്യൻമാഷും ശിവാജിസാറും എം.ജി.ആർ സാറും, ജെമിനി മാമയുമൊക്കെ ഇന്ന് ജീവിച്ചിരിപ്പുണ്ടെങ്കിൽ അവർക്കും ഞാൻ ഒരു കുട്ടി തന്നെയായിരിക്കും. ആറാമത്തെ വയസിൽ ഞാൻ ആദ്യമായി ക്യാമറയെ അഭിമുഖീകരിക്കുമ്പോൾ സത്യൻമാസ്റ്റർ വലിയ നടനാണ്. അന്ന് മദ്രാസിലെ സ്റ്റുഡിയോകളിൽ മലയാള പടങ്ങൾ രാത്രിയിലാണ് ഷൂട്ട് ചെയ്യുന്നത്. രാത്രിയിലാകുമ്പോൾ പകുതി വാടകമതി. കുറഞ്ഞ ബഡ്ജറ്റിലുള്ള പടങ്ങളായിരിക്കും മിക്കതും. ഷൂട്ടിങ് കഴിയുമ്പോൾ രണ്ടുമണിയോ മൂന്നുമണിയോ ആകും. അപ്പോൾ ഞാൻ നല്ല ഉറക്കമായിരിക്കും. എന്നെയും തോളിലിട്ട് എല്ലാ ദിവസവും സത്യൻ മാസ്റ്റർ വീട്ടിലെത്തും. എന്നെ ഒരു സോഫയിൽ കിടത്തി ‘മോനെ ഉണർത്തേണ്ട, അവനുറങ്ങിക്കോട്ടെ’ എന്ന് അമ്മയോട് പറഞ്ഞാണ് സത്യൻ മാഷ് മടങ്ങുന്നത്. അമ്മ ആദ്യമൊക്കെ കരുതിയത് ഈ മനുഷ്യൻ പ്രൊഡക്ഷനിലെ ജോലിക്കാരനാണെന്നാണ്. പിന്നീടാണ് സിനിമയിലെ നായകനാണ് ഇദ്ദേഹമെന്ന് അമ്മ അറിയുന്നത്. ആ വല്യ നടൻ വീട്ടിൽ വന്നിട്ട് ഒന്നിരിക്കാൻ പറയാനോ, ഒരു കപ്പ് ചായ നൽകാനോ കഴിയാത്തതിൽ അമ്മയ്ക്ക് വലിയ വിഷമമുണ്ടായിരുന്നു. വലിയ മനസ്സിന്റെ ഉടമയായിരുന്നു സത്യൻ മാസ്റ്റർ.

ചെന്നൈ നഗരത്തിലൂടെ പലപ്പോഴും സത്യൻമാഷ് കാറോടിച്ചു പോകുന്നത് കണ്ടിട്ടുണ്ട്. ഒരിക്കൽ, ഞാൻ റോഡിലൂടെ നടന്നു വരികയായിരുന്നു. കാറിൽ വരികയായിരുന്ന മാഷ് എന്നെ കണ്ടു. ഉടനെ കാർ നിർത്തി. അദ്ദേഹത്തിന് എന്നെ മനസ്സിലായി. ‘നീ ആ പഴയ കുട്ടിയല്ലേ, കമൽ?’ ഒരുപാട് വിശേഷങ്ങൾ ചോദിച്ചശേഷം എവിടെയാണ് താമസിക്കുന്നതെന്ന് ചോദിച്ചു. ആ പഴയ വീട്ടിൽതന്നെ. ഞാൻ പറഞ്ഞു. ‘ശരി കയറ്.’ അദ്ദേഹമെന്നെ വീട്ടിലെത്തിച്ചു. ഒന്ന് കയറി ഇരിക്കാൻ പോലും അദ്ദേഹത്തിന് സമയമില്ലായിരുന്നു. പെട്ടെന്ന് തന്നെ കാറോടിച്ചു പോകുകയും ചെയ്തു. ചിലപ്പോൾ അദ്ദേഹം പോയത് ഹോസ്പിറ്റലിലേക്കായിരിക്കാം. രക്തം മാറ്റി വയ്ക്കാൻ സ്വയം കാറോടിച്ചായിരുന്നു സത്യൻമാഷ് പോയത്. ഓരോ നിമിഷവും മരിച്ചുകൊണ്ടിരിക്കുമ്പോഴും, അത് ആരെയും അറിയിക്കാതെ ക്യാമറക്കു മുന്നിലെത്തിയ ഒരേ ഒരു നടൻ സത്യൻ മാഷായിരിക്കും. മാഷിനൊപ്പമുള്ള ഒരു ഫോട്ടോ പോലും എന്റെ കൈവശമില്ല. പക്ഷേ, എന്റെ മനസിൽ അദ്ദേഹത്തിന്റെ ചിത്രം ഞാൻ ചില്ലിട്ട് സൂക്ഷിച്ചിട്ടുണ്ട്. എത്ര വർഷങ്ങൾ കഴിഞ്ഞാലും മരിക്കാത്തൊരോർമയാണത്.

subscribe

Lal Jose @ 25
-ലാൽ ജോസ് / പി. ടി. ബിനു

Categories:

ലാൽ ജോസ് ജനപ്രിയ സംവിധായകനാണ്. വ്യത്യസ്തമായ ശൈലിയിലൂടെ, വിഷയവൈവിധ്യങ്ങളിലൂടെ മലയാളികളുടെ മനസിൽ ഇടം നേടിയ ചലച്ചിത്രകാരൻ. മഹാവിജയങ്ങളും പരാജയങ്ങളുമൊക്കെ ചേർന്നതാണ് ലാൽ ജോസ് എന്ന സംവിധായകന്റെ ജീവിതം. മീശമാധവൻ, ചാന്തുപൊട്ട്, അച്ഛനുറങ്ങാത്ത വീട്, ക്ലാസ്‌മേറ്റ്‌സ് തുടങ്ങി വ്യത്യസ്തങ്ങളായ 25 ചിത്രങ്ങൾ. ലാൽ ജോസ് ഞാൻ മലയാളിക്ക് അനുവദിച്ച പ്രത്യേക അഭിമുഖം.

  • ഒരു മറവത്തൂർ കനവ് മുതൽ ’41’ വരെ, ഇരുപത്തഞ്ച് സിനിമകൾ

25 സിനിമകൾ, 21 വർഷങ്ങൾ… 1998-ൽ ആണ് ‘ഒരു മറവത്തൂർ കനവ്’ എന്ന എന്റെ ആദ്യ സിനിമ സംഭവിക്കുന്നത്. സ്വതന്ത്ര സംവിധായകനാകുന്നതിനു മുമ്പ് ഒമ്പതു വർഷത്തോളം അസിസ്റ്റന്റ് ഡയറക്ടർ, അസോസിയേറ്റ് ഡയറക്ടർ എന്നീ നിലകളിൽ പ്രവർത്തിച്ചു. സിനിമയിലെ മുപ്പതു വർഷങ്ങൾ… അതൊരു വലിയ യാത്രയാണ്, വേറിട്ട ഒരു യാത്ര എന്നും പറയാം.

ഒറ്റപ്പാലത്തെ ഗ്രാമപ്രദേശത്ത് ജനിച്ചു വളർന്ന ഞാൻ ഒരിക്കലും സിനിമയിൽ വരുമെന്നു കരുതിയിരുന്നില്ല. പഠനകാലത്ത് സിനിമ കാണുന്നത് ഇഷ്ടമാണ് എന്നതിലുപരി സിനിമ മനസിൽ കൊണ്ടു നടന്നിട്ടില്ല. സിനിമയുമായി ബന്ധമൊന്നുമില്ലാത്ത കുടുംബത്തിലാണ് ഞാൻ ജനിച്ചത്. അച്ഛനും അമ്മയും അധ്യാപകരായിരുന്നു. പ്രത്യേകിച്ച് ലക്ഷ്യബോധമൊന്നുമില്ലാത്ത ഒരു കാലഘട്ടം ആയിരുന്നു അത്. സിനിമയിൽ വരണമെന്നോ, സംവിധായകനാകണമെന്നോ അങ്ങനെ ആഗ്രഹങ്ങളൊന്നും മനസിൽ പോലും ഉണ്ടായിട്ടില്ല.

ഡിഗ്രി പഠനം കഴിഞ്ഞപ്പോൾ ദുബായിൽ ഒരു ജോലി ശരിയായി. ജോലിയുമായി ബന്ധപ്പെട്ടാണ് മാനുവൽ കളർ പ്രോസസിങ് പഠിക്കാൻ ചെന്നൈയിലേക്ക് വണ്ടികയറുന്നത്. ബ്ലാക്ക് ആൻഡ് വൈറ്റ് പ്രിന്റിങ് എനിക്ക് അറിയാമായിരുന്നു. പഠിക്കുന്ന കാലത്ത് കേരള കൗമുദി ദിനപ്പത്രത്തിന്റെ റിപ്പോർട്ടറും ഫോട്ടോഗ്രഫറും ഒറ്റപ്പാലം ഏജന്റുമായിരുന്നു ഞാൻ. പത്രത്തിലെ ജോലിയുടെ ആവശ്യത്തിന് അവിടെയുള്ള ഒരു സ്റ്റുഡിയോയിൽ നിന്ന് ബ്ലാക്ക് ആൻഡ് വൈറ്റ് പ്രോസസിങ് പഠിച്ചിരുന്നു. അക്കാലത്ത് മുംബൈയിലും ചെന്നൈയിലുമായിരുന്നു ഈ കോഴ്‌സ് ഉണ്ടായിരുന്നത്. മുംബൈയ്ക്കാണ് ഞാൻ വണ്ടി കയറിയിരുന്നതെങ്കിൽ എന്റെ ജീവിതം മാറിപ്പോകുമായിരുന്നു. ചെന്നൈയിലേക്ക് വണ്ടി കയറാൻ മറ്റൊരു കാരണം കൂടിയുണ്ട്. എന്റെ സുഹൃത്തും സഹപാഠിയും ഗായകനുമായ ദിനേശ് ചെന്നൈയിലുണ്ട്. അക്കാരണത്താൽ എനിക്കു വീട്ടിൽ നിന്ന് ചെന്നൈയിലേക്കുള്ള യാത്രയ്ക്ക് അനുമതി ലഭിച്ചു.

  • പ്രാദേശിക വാർത്തകൾ

ചെന്നൈയിൽ, സിനിമയിൽ ജോലി ചെയ്യുന്നവർ താമസിക്കുന്ന സ്ഥലത്താണ് എനിക്ക് താമസം ശരിയായത്. അസിസ്റ്റന്റ് ഡയറക്ടർ, മേക്കപ്പ് ആർട്ടിസ്റ്റ് തുടങ്ങിയവർ താമസിക്കുന്ന സ്ഥലമായിരുന്നു അത്. അവിചാരിതമായാണ് എനിക്ക് ഡയറക്ടർ കമൽ സാറിനെ പരിചയപ്പെടാൻ അവസരം ലഭിച്ചത്. അതായിരുന്നു എന്റെ ജീവിതത്തിലെ വഴിത്തിരിവ്. സിനിമ എന്താണ്, എങ്ങനെയാണ് ഒരു സിനിമ ഉണ്ടാകുന്നത് എന്നറിയാനും പഠിക്കാനും ആഗ്രഹമുണ്ടായി. അങ്ങനെയാണ് കമൽ സാറിന്റെ കൂടെ പ്രാദേശികവാർത്തകൾ എന്ന സിനിമയിൽ അസിസ്റ്റന്റ് ഡയറക്ടറായി വർക്ക് ചെയ്തത്. കോഴിക്കോടായിരുന്നു സിനിമയുടെ ചിത്രീകരണം. സിനിമയിൽ അസിസ്റ്റന്റ് ഡയറക്ടറാകുന്ന കാര്യം വീട്ടിൽ പറഞ്ഞിരുന്നില്ല. ഷൂട്ടിങ് കഴിഞ്ഞതിനു ശേഷമാണ് ഇക്കാര്യം ഞാൻ വീട്ടിൽ പറയുന്നത്.
പിന്നീട്, കമൽ സാറിന്റെ കൂടെ ഒമ്പതു വർഷത്തോളം പ്രവർത്തിച്ചു. അസിസ്റ്റന്റ് ഡയറക്ടറുടെ ജോലി വലിയ പ്രതിഫലമൊന്നും കിട്ടുന്നതായിരുന്നില്ല. വർഷത്തിൽ രണ്ട് സിനിമയാണ് കമൽ സാർ ചെയ്തിരുന്നത്. ഇതിനിടയിൽ വിവാഹം കഴിഞ്ഞു. കോടമ്പാക്കമെന്നാൽ എടുത്തുപറയേണ്ട കാര്യമില്ല, സിനിമാക്കാരുടെ താവളമാണ്. ഒരുപാടു പേരുടെ ഉയർച്ചയും താഴ്ചയും ഞാൻ നേരിട്ടു കണ്ടിട്ടുണ്ട്.

  • സിനിമയിലെ മാറ്റങ്ങൾക്കൊപ്പം സഞ്ചരിച്ചു

ശരിയാണ്, സിനിമയിലെ മാറ്റങ്ങൾക്കൊപ്പം സഞ്ചരിക്കാൻ കഴിഞ്ഞ വ്യക്തിയാണ് ഞാൻ. പണ്ട് ഒരു സിനിമയുടെ വർക്ക് എല്ലാ ജോലികളും ഉൾപ്പെടെ നാലു മുതൽ അഞ്ചു മാസം വരെ എടുക്കുമായിരുന്നു. സിനിമ അനലോഗിൽ നിന്ന് ഡിജിറ്റലിലേക്ക് മാറി. ഡിജിറ്റലിൽ തന്നെ നിരവധി സാങ്കേതികതകളുണ്ടായി. ഓഡിയോ സൈഡിലും വലിയ മാറ്റങ്ങൾക്ക് സാക്ഷ്യം വഹിച്ച കാലഘട്ടമാണ് നമ്മളുടേത്. എനിക്കു കിട്ടിയ ഭാഗ്യം സിനിമയുടെ ആദ്യകാല സാങ്കേതികവിദ്യയോടൊപ്പം ആരംഭിച്ച യാത്ര ഇപ്പോഴും തുടരുന്നു എന്നതാണ്. ഓഡിയോ സൈഡിലാണെങ്കിൽ ലൂബ് സിസ്റ്റത്തിൽ വർക്ക് ചെയ്തിട്ടുണ്ട്. പിന്നീട് ടേപ്പ് വന്നു, അതിൽ വർക്ക് ചെയ്തു. 2സി ക്യാമറ ഉപയോഗിക്കുന്ന കാലം മുതൽ ആരി 3 ഡിജിറ്റൽ ക്യാമറ ഉപയോഗിക്കുന്ന ഇക്കാലം വരെ എത്തിനിൽക്കുന്ന ചലച്ചിത്രയാത്രകൾ.
സിനിയുടെ ടോട്ടൽ സ്വഭാവത്തിനു തന്നെ മാറ്റം വന്നു. പ്രമേയം, ടെക്‌നോളജി, ടെക്‌നീഷൻസ് എല്ലാം മാറി. വലിയ ക്യാൻവാസിലായിരുന്നു നമ്മുടെ സിനിമകൾ ചെയ്തിരുന്നത്. എന്നാൽ, ഇപ്പോൾ ചെറിയ സിനിമകളും അതിന്റേതായ വിജയം കണ്ടെത്തുന്നുണ്ട്.

  • താരങ്ങളെ മാത്രം ആഘോഷിക്കാതെ ‘ഒരു ലാൽ ജോസ് ചിത്രം’ എന്ന പേരിൽ പ്രേക്ഷകർ താങ്കളുടെ സിനിമയെ ഉത്സവമാക്കി. എന്താണ് ആ ‘ ലാൽ ജോസ് മാജിക്’

അങ്ങനൊയൊരു ‘മാജിക്’ ഇല്ല. മാജിക് ഉണ്ടായിരുന്നെങ്കിൽ എന്റെ എല്ലാ സിനിമകളും വിജയിക്കണമല്ലോ. പരാജയപ്പെട്ട സിനിമകളും എന്റെ കരിയറിൽ ഉണ്ടായിട്ടുണ്ട്. എന്നാൽ, എന്റെ സിനിമകളുടെ ചിത്രീകരണം ആരംഭിക്കുന്ന വാർത്തകൾ പുറത്തുവരുന്ന സമയം മുതൽ പ്രേക്ഷകർ എന്റെ സിനിമയെ ശ്രദ്ധിക്കാറുണ്ട്. 21 വർഷത്തെ സംവിധാന ജീവിതത്തിനിടയിൽ അക്കാര്യം ഞാൻ മനസിലാക്കിയിട്ടുണ്ട്. ചിലപ്പോൾ, എന്റെ പരാജയചിത്രത്തിനു ശേഷം വരുന്ന സിനിമയാകാം എന്നാലും എന്താണ് ലാൽ ജോസിന്റെ പുതിയ സിനിമ എന്ന് പ്രേക്ഷകർ നോക്കുന്നുണ്ട്.
തുടക്കം മുതൽ വ്യത്യസ്തയ്ക്കു വേണ്ടി ഞാൻ ശ്രമിക്കാറുണ്ട്. വ്യത്യസ്തമായ, പൂർവഭാരമില്ലാത്ത കഥകൾ, കാസ്റ്റിങ്, ടെക്‌നീഷ്യൻസ് തുടങ്ങിയ പുതുമയുള്ളതാകാൻ ശ്രമം നടത്താറുണ്ട്. പഴയ കാലമല്ല. പ്രേക്ഷകരുടെ അഭിരുചിയിലൊക്കെ മാറ്റം വന്നുകൊണ്ടിരിക്കുന്നു. മാറ്റം എല്ലാക്കാലത്തും ഉണ്ടായിട്ടുണ്ട്. പുതിയ മാറ്റങ്ങൾക്കും വിഷയവൈവിധ്യങ്ങൾക്കും വേണ്ടി ശ്രമങ്ങൾ തുടരുന്നു.

subscribe

Rejisha Vijayan സിനിമയും ഇഷ്ടങ്ങളും
-രജിഷ വിജയൻ / പ്രശോഭ് രവി

Categories:

കോടമ്പാക്കം വിജയലക്ഷ്മിമാരുടെ ശവപ്പറമ്പായിരുന്നു. ജോർജ് സാർ ലേഖയുടെ മരണത്തിൽ അതു വരച്ചിട്ടിട്ടുണ്ട്. ഞാനീ പറയുന്നതിനേക്കാൾ ഹൃദയസ്പൃക്കായി. സിൽക്ക് സ്മിതയും ആ സിനിമയുമൊക്കെ… ഹോ വല്ലാത്ത ഓർമകൾ തന്നെ…

രജിഷ വിജയൻ ആദ്യ സിനിമയിലെ അഭിനയത്തിലൂടെ മികച്ച നടിക്കുള്ള അവാർഡ് സ്വന്തമാക്കിയ അപൂർവം താരങ്ങളിൽ ഒരാൾ. ചെയ്യുന്ന കഥാപാത്രങ്ങളെല്ലാം ഒന്നിനൊന്നു വ്യത്യസ്തമാകണമെന്ന് ആഗ്രഹിക്കുന്ന, അത്തരത്തിൽ കഥാപാത്രങ്ങളെ അവതരിപ്പിക്കുവാൻ പരീക്ഷണങ്ങൾ ഇഷ്ടപ്പെടുന്ന താരം തന്റെ ഏറ്റവും പുതിയ ചിത്രത്തെക്കുറിച്ചും സിനിമാ കാഴ്ചപാടുകളെക്കുറിച്ചും സംസാരിക്കുന്നു.

  • മാറ്റമോ, എനിക്കോ!

എടുത്തു പറയാൻ ഒരുപാടു മാറ്റങ്ങൾ സിനിമ എന്റെ ജീവിതത്തിൽ ഉണ്ടാക്കിയിട്ടില്ല. നമ്മൾ ഒരു സ്ഥലത്തു പോകുമ്പോൾ ആളുകൾ തിരിച്ചറിയുന്നു എന്നതാണ് ഏറ്റവും വലിയ മാറ്റമായിട്ട് എനിക്കു തോന്നിയിട്ടുള്ളത്. പ്രത്യേകിച്ചും മലയാളികളുടെ ഇടയിൽ. മാത്രമല്ല അതുകൊണ്ടു തന്നെ നമ്മൾ പറയുന്ന കാര്യങ്ങളുടെ ഉത്തരവാദിത്തം കൂടി എന്നതുകൂടിയാണ്.

  • വ്യത്യസ്ത കഥാപാത്രങ്ങൾ വേണം

എനിക്കു തോന്നുന്നു, സിനിമ തെരഞ്ഞെടുക്കുന്നതിൽ ഏതൊരു ആർട്ടിസ്റ്റും മാനദണ്ഡങ്ങൾ വയ്ക്കും എന്ന്. ഓരോരുത്തരുടെയും മാനദണ്ഡങ്ങൾ അവരവരുടെ ടേയിസ്റ്റിന് അനുസരിച്ച് മാറുന്നു എന്നു മാത്രം. ചുമ്മാ വരുന്ന എല്ലാ റോൾസും എല്ലാവരും സ്വീകരിക്കുമെന്ന് എനിക്കു തോന്നുന്നില്ല. പിന്നെ ഞാൻ സിനിമ തെരഞ്ഞെടുക്കുന്നതിനു മുമ്പേ ആലോചിക്കുന്നത്, അതിൽ ആദ്യത്തെ പോയിന്റ് എന്റെ കഥാപാത്രത്തെ മാറ്റി നിർത്തിയാൽ, അതായത് സ്‌ക്രീൻ ടൈം എത്ര കൂടുതലാണെങ്കിലും എത്ര കുറവാണെങ്കിലും എന്റെ കഥാപാത്രത്തെ മാറ്റി നിർത്തിയാൽ ആ സിനിമ വർക്കാവുമോ എന്നുള്ളതാണ്. അപ്പോ നമുക്ക് അറിയാം നമ്മുടെ കഥാപാത്രത്തിന് എത്രത്തോളം പ്രാധാന്യം ഉണ്ട് ആ സിനിമയിൽ എന്ന്. പിന്നെ രണ്ടാമത്തെക്കാര്യം വ്യത്യസ്തമായ കാര്യങ്ങൾ ചെയ്യുക എന്നുള്ളതാണ്. അതായത് ചെയ്ത കഥാപാത്രങ്ങളെ വീണ്ടും ചെയ്യാൻ വളരെ എളുപ്പമായിരിക്കും. അത്തരത്തിൽ ഒരുപാടൊന്നും ചെയ്യണമെന്ന് ആഗ്രഹവുമില്ല, ലൈഫിൽ. ചെയ്തതിൽ നിന്ന് വ്യത്യസ്തമായി, നേരത്തെ അവതരിപ്പിച്ച കഥാപാത്രങ്ങളുമായി ഫീൽ ചെയ്യാതെ എന്നെ ചലഞ്ച് ചെയ്യുന്ന കഥാപാത്രങ്ങൾ. ഇതു രണ്ടുമാണ് സിനിമ തെരഞ്ഞെടുക്കുമ്പോൾ പ്രധാനമായും ഞാൻ നോക്കുന്നത്.

  • ആങ്കറായി, പിന്നെ നടിയും

ഞാൻ കോളേജിൽ പഠിക്കുമ്പോൾ തന്നെ സിനിമ പഠിച്ചിട്ടുണ്ട്. കാരണം ജേണലിസം ആൻഡ് മാസ് കമ്യൂണിക്കേഷനിൽ ഫിലിം സ്റ്റഡീസും ആങ്കറിങ്ങുമുണ്ട്. അന്നുമുതൽ അഭിനയത്തോട് താത്പര്യം ഉണ്ടായിരുന്നെങ്കിലും അഭിനേത്രി ആകാൻ പറ്റുമെന്ന ആത്മവിശ്വാസവും ഇല്ലായിരുന്നു എന്നതാണ് സത്യം. പിന്നെ ആങ്കറിങ്ങാണ് ഇഷ്ടം അങ്ങനെ ആങ്കറായി. സിനിമ ആഗ്രഹിച്ചിരുന്നെങ്കിലും ഒരുപാട് ട്രൈ ചെയ്യിതിട്ടില്ല. സിനിമ എന്റെ വഴിയെ വന്നതാണ്. പക്ഷേ, സിനിമയാണ് എന്റെ വഴിയെന്ന് തിരിച്ചറിഞ്ഞത് ആദ്യ സിനിമയിൽ ഫസ്റ്റ് ഷോട്ട് കഴിഞ്ഞപ്പോഴാണ്. അതായത് ആദ്യത്തെ സിനിമയിൽ അഭിനയിച്ച ഓരോ മുഹൂർത്തം കഴിയും തോറും ഇത് എന്നെക്കൊണ്ട് പറ്റും അല്ലെങ്കിൽ ഇതാണ് എനിക്ക് ഏറ്റവും കൂടുതൽ സന്തോഷവും സംതൃപ്തിയും തരുന്നത് എന്നുള്ള തിരിച്ചറിവ് ആദ്യത്തെ വർക്ക് ചെയ്യുമ്പോഴാണല്ലോ നമുക്കു കിട്ടുക. അത് ഏതാണെങ്കിലും. അനുരാഗകരിക്കിൻ വെള്ളം ചെയ്യാൻ പോകുമ്പോൾ കോൺഫിഡൻസ് ഒട്ടുമില്ലായിരുന്നു എനിക്ക്. കാരണം അതിലെ കഥാപാത്രം അത്രയ്ക്ക് ചലഞ്ചിങ്ങായിരുന്നു. കാണുമ്പോൾ സിമ്പിൾ ആയി തോന്നുമെങ്കിലും ഇത്തിരി ഒന്ന് ഓവറായിപ്പോയാൽ പാളിപ്പോകാൻ ഏറെ സാധ്യതയുള്ള കഥാപാത്രമായിരുന്നു അത്. ആ പേടി ഉണ്ടായിരുന്നു എനിക്ക്. പിന്നെ സിനിമ ഇറങ്ങിയതിന് ശേഷം കണ്ടവർ എല്ലാവരും നന്നായി കഥാപാത്രത്തെ അവതരിപ്പിച്ചു എന്നു പറയുമ്പോഴാണ് എന്നെക്കൊണ്ടു പറ്റും എന്നുള്ള തിരിച്ചറിവുണ്ടാകുന്നത്. അതിനുശേഷമാണ് അഭിനയത്തിൽ ആത്മവിശ്വാസം ഉണ്ടാകുന്നത്.

  • സ്വാധീനിച്ച സിനിമ, പുസ്തകം

സിനിമകൾ കണ്ട് വണ്ടർ അടിച്ചിട്ടുണ്ട്, പുസ്തകങ്ങൾ വായിച്ചു ഞെട്ടിയിട്ടുണ്ട്. എങ്ങനെ ഒരാളുടെ മനസിലൂടെ ഇങ്ങനെ ഒരു ചിന്ത പോയി. ഇങ്ങനെ ഒരു ലോകം ഒരാൾക്ക് എങ്ങനെ ക്രീയേറ്റ് ചെയ്യാൻ പറ്റി അങ്ങനെയൊക്കെ ചിന്തിച്ചു ഞെട്ടി കോരിത്തരിച്ചു നിന്നിട്ടുണ്ട്. അവരുടെ കൂടെയൊക്കെ എന്നെങ്കിലും വർക്ക് ചെയ്യാൻ പറ്റിയിരുന്നെങ്കിൽ എന്നു ചിന്തിച്ചിട്ടുണ്ട്. പക്ഷേ, സിനിമയും പുസ്തകങ്ങളും എന്റെ ജീവിതത്തെയോ എന്റെ ആഗ്രഹങ്ങളെയോ പ്രവർത്തികളെയോ ഇതുവരെ സ്വാധീനിച്ചിട്ടില്ല. ഞാൻ എന്താണോ അത് പ്യൂവർല്ലി ഞാനും, എന്റെ ജീവിതത്തിലൂടെ വന്നു പോയ, കണ്ടു പരിചയപ്പെട്ടു സംസാരിച്ച ആൾക്കാരും മാത്രമാണ്. കാരണം ഞാൻ പഠിച്ചത് കേരളത്തിനു പുറത്തായിരുന്നു. അച്ഛൻ പട്ടാളത്തിലായിരുന്നതുകൊണ്ടു ചെറുപ്പം മുതൽ ഒരുപാടു സ്ഥലങ്ങളിൽ നിന്നിട്ടുണ്ട്. ഏഴ് സ്‌കൂളുകളിലായാണ് പഠിച്ചത്. പല പല ആൾക്കാരെ കണ്ടിട്ടുണ്ട്. പല കൾച്ചറുകളിലൂടെ പോയതുകൊണ്ട് ഓരോ കൾച്ചറുകളിലുമുള്ള വ്യത്യാസം അവരുടെ പോയന്റ് ഓഫ് വ്യു എന്നിവ എന്നെ സ്വാധീനിച്ചിട്ടുണ്ട്.

Adithyan Master of mini screen
-ആദിത്യൻ / ആർ. അശോക്

Categories:

‘മിനി സ്‌ക്രീനിലെ സൂപ്പർ സംവിധായകനാണ് താങ്കൾ.’ സൂപ്പർ ഹിറ്റ് മെഗാ സീരിയൽ വാനമ്പാടിയുടെ സംവിധായകൻ ആദിത്യനോടാണ് ചോദ്യം. ‘ആണോ, എനിക്കറിയില്ല.’ ചിരിയോടെ മറുപടി. മികച്ച സീരിയൽ സംവിധായകനുള്ള ഏഷ്യാനെറ്റിന്റെ പുരസ്‌കാരം വാനമ്പാടിയിലൂടെ ആദിത്യൻ നേടി. വാനമ്പാടി മികച്ച സീരിയലുമായി. കുടുംബ പ്രേക്ഷകരുടെ പൾസറിഞ്ഞ സംവിധാന മികവാണ് ആദിത്യന്റെ പ്രത്യേകത. സീരിയലിനു വേണ്ട ചേരുവകൾക്കൊപ്പം ക്വാളിറ്റിയിൽ ഒരു കോംപ്രമൈസിനും തയാറല്ല അദ്ദേഹം. ആദിത്യന്റെ വിശേഷങ്ങൾ.

തുടക്കം ആകാശദൂതിൽ

ആകാശദൂത് എന്ന സിനിമയുടെ രണ്ടാം ഭാഗം സീരിയലാക്കിയാണ് തുടക്കം. രജപുത്ര രഞ്ജിത്തേട്ടനാണ് നിർമിച്ചത്. സൂര്യ ടിവിക്കു വേണ്ടിയാണ് ചെയ്തത്. ഈ സീരിയൽ വലിയ ഹിറ്റായി. പിന്നീട് ഏഷ്യാനെറ്റിൽ അമ്മ സീരിയലിന്റെ കുറച്ചുഭാഗം ചെയ്തു. നിർമാണം മെറിലാൻഡായിരുന്നു. ശ്രീമൂവിസിന്റെ അനാമിക നൂറ് എപ്പിസോഡ് ചെയ്തു. അമൃത ടിവിയിലാണ് അനാമിക സംപ്രേക്ഷണം ചെയ്തത്. അതിനുശേഷമാണ് വാനമ്പാടി സംവിധാനം ചെയ്തത്. രജപുത്ര രഞ്ജിത്തേട്ടനാണ് നിർമാണം. വാനമ്പാടി തുടങ്ങിയിട്ട് മൂന്നു വർഷമായി. ഇപ്പോഴും സൂപ്പർ ഹിറ്റായി തുടരുന്നു.

മനസിൽ സിനിമ മാത്രം

കൊല്ലം ജില്ലയിൽ അഞ്ചലിനടുത്ത് അറയ്ക്കൽ എന്ന ഗ്രാമത്തിലാണ് ഞാൻ ജനിച്ചതും വളർന്നതും. തനി നാട്ടിൻപുറം. തടിക്കാട് എൽ.പി.എസിൽ പ്രാഥമിക വിദ്യാഭ്യാസം. പുല്ലങ്കോട് യു.പി.എസ്, വാളകം ആർ.വി.എച്ച്.എസ് എന്നിവിടങ്ങളിലായി സ്‌കൂൾ വിദ്യാഭ്യാസം പൂർത്തിയാക്കി. ഹൈസ്‌കൂളിൽ എത്തിയപ്പോൾ സിനിമ മനസിൽ കയറി. പഠനത്തിൽ നന്നായി ഉഴപ്പി. പത്താം ക്ലാസിൽ കഷ്ടിച്ചു ജയിച്ചു. പിന്നീട് രണ്ടു വർഷം ഐ.ടി.സി പഠനം. ഐ.ടി.സി പഠനവും നന്നായി മുന്നോട്ടുപോയില്ല. സിനിമയിലാണ് എനിക്കു താത്പര്യം എന്നു മനസിലാക്കിയ എന്റെ അച്ഛൻ തിരുവനന്തപുരത്തെ സത്യജിത്ത് റെ ഫിലിം ഇൻസ്റ്റിറ്റ്യൂട്ടിൽ ചേർത്തു. ഇപ്പോഴും ഈ ഇൻസ്റ്റിറ്റ്യൂട്ട് ഉണ്ട്. ഒരു വർഷമായിരുന്നു കോഴ്‌സ്. ഡോ. ഡി. ബിജുകുമാർ ഒരു ഷോർട്ട് ഫിലിം പ്ലാൻ ചെയ്തു. അദ്ദേഹത്തിന്റെ ആദ്യ ഷോർട്ട് ഫിലിമാണ്. അദ്ദേഹത്തിന്റെ ഒരു സുഹൃത്തു വഴി ഞാൻ ഷോർട്ട് ഫിലിമിൽ അസിസ്റ്റന്റായി. ബ്ലാക് സിഗ്‌നേച്ചർ എന്നായിരുന്നു ഷോർട്ട് ഫിലിമിന്റെ പേര്. ഷോർട്ട് ഫിലിം ഏഷ്യാനെറ്റ് സംപേക്ഷണം ചെയ്തു. അതിനുശേഷമാണ് ഡിഗ്രി പഠിക്കണം എന്നുതോന്നിയത്. അങ്ങനെ കോളജിൽ ഡിഗ്രിക്ക് ചേർന്നു. അതിനിടയിൽ ടെലിഫിലിമുകളിലും വർക്ക് ചെയ്യുമായിരുന്നു. ആ സമയത്ത് ദൂരദർശനിൽ സുരേഷ് ഉണ്ണിത്താൻ സാർ അമ്മ എന്ന സീരിയിൽ സംവിധാനം ചെയ്യുന്നുണ്ടായിരുന്നു. അമ്മയുടെ എപ്പിസോഡ് ഡയറക്ടർ ഉദയകുമാറാണ്. അദ്ദേഹത്തിനൊപ്പം ഞാൻ സംവിധാന സഹായിയായി. ഞാൻ പ്രവർത്തിക്കുന്ന ആദ്യ മെഗാ സീരിയലാണ് അമ്മ. 1999-ലാണിത്. ഉദയകുമാർ കല്യാണക്കുറിമാനം എന്ന സിനിമ സംവിധാനം ചെയ്തപ്പോൾ ഞാൻ അദ്ദേഹത്തിന്റെ അസോസിയേറ്റായി. ഞാനും ജയകുമാർ എന്ന എഴുത്തുകാരനും ചേർന്നാണ് സിനിമയുടെ സംഭാഷണം എഴുതിയത്. അതിനുശേഷം ഒരു തമിഴ് സിനിമയിൽ അവസരം ലഭിച്ചു. ഈ സിനിമയുടെ പ്രവർത്തനവുമായി ബന്ധപ്പെട്ട് കുറച്ചുനാൾ കുറ്റാലത്ത് താമസിച്ചു. എന്നാൽ, ഈ സിനിമ നടന്നില്ല.

പ്രതിസന്ധിയിലായ ആദ്യ സീരിയൽ

തമിഴ് സിനിമ മുടങ്ങിയതോടെ ഇനി സ്വതന്ത്രമായി സിനിമ ചെയ്താൽ മതിയെന്ന് തീരുമാനിച്ചു. ഈ സമയത്താണ് ഒരു സീരിയൽ സംവിധാനം ചെയ്യാനായി ഒരു നിർമാതാവ് സമീപിച്ചത്. ആകാശദൂതിന്റെ രണ്ടാം ഭാഗം എടുത്താൽ നന്നായിരിക്കും എന്നത് ഹസൻ എന്ന സുഹൃത്തിന്റെ ആശയമായിരുന്നു. ആകാശദൂതിന്റെ നിർമാതാവിൽ നിന്ന് സീരിയൽ ചെയ്യാനുള്ള അവകാശം വാങ്ങി. അപ്പോഴാണ് സംവിധായകനും നിർമാതാവും തുടക്കക്കാരാണെന്ന പ്രതിസന്ധി ഉണ്ടായത്. ഒരു ചാനലും സീരിയൽ സ്വീകരിക്കാൻ തയാറായില്ല. എന്റെ വാക്ക് വിശ്വസിച്ച് നിർമാതാവ് പത്തു ലക്ഷത്തോളം മുടക്കി പൈലറ്റ് എപ്പിസോഡുകൾ എടുത്തിരുന്നു. ചാനലുകൾ പറഞ്ഞത്, പുതിയ സംവിധായകനാണെങ്കിൽ നിർമാതാവ് പരിചയ സമ്പന്നനാവണം. നിർമാതാവ് പുതിയ ആളാണെങ്കിൽ സംവിധായകൻ പരിചയസമ്പന്നനാവണം. ഇക്കാര്യം എനിക്ക് അറിയില്ലായിരുന്നു. മുടക്കിയ പത്തു ലക്ഷം ബാധ്യതയായി. അതിനാൽ, എങ്ങനെയെങ്കിലും സീരിയൽ സംപ്രേക്ഷണം ചെയ്യണം. അതിനായി പിന്നീടുള്ള ശ്രമം. അങ്ങനെയാണ് ഞാൻ രജപുത്ര രഞ്ജിത്തേട്ടനെ സമീപിച്ചത്. ആ സമയത്ത് എനിക്ക് രഞ്ജിത്തേട്ടനെ പരിചയമില്ല. സൂര്യ ടിവിയിൽ എനിക്കുവേണ്ടി ശുപാർശ ചെയ്യണം എന്ന ആവശ്യവുമായാണ് ഞാൻ അദ്ദേഹത്തെ സമീപിച്ചത്. അദ്ദേഹത്തിന് സൂര്യ ടിവിയിൽ നല്ല ബന്ധമാണ്. അദ്ദേഹം സിഡി കണ്ടു. വർക്ക് ഇഷ്ടപ്പെട്ടു. ഇതിനായി ഒരു വർഷത്തോളം ഞാൻ അദ്ദേഹത്തെ നിരന്തരം സമീപിച്ചുകൊണ്ടേയിരുന്നു.

subscribe

വിവേകിന്റെ വിശേഷങ്ങൾ
-വിവേക് / രാജ്കുമാർ

Categories:

ഫഹദ് ഫാസിലും സായി പല്ലവിയും മത്സരിച്ച് അഭിനയിച്ച അതിരൻ വ്യത്യസ്ത ജോണറിലുള്ള ചിത്രമാണ്. പരസ്യചിത്രങ്ങളിലൂടെ ശ്രദ്ധേയനായ വിവേകിന്റെ ആദ്യ ചിത്രം. കന്നി ചിത്രത്തിലൂടെ തന്നെ സംവിധായകൻ എന്ന നിലയിൽ കൈയൊപ്പു പതിപ്പിക്കാൻ വിവേകിനായി. പുതിയ ചിത്രത്തിന്റെ പണിപ്പുരയിലാണ് വിവേക് ഇപ്പോൾ. പുതിയ പ്രോജക്ടുകളെയും സ്വപ്‌ന സിനിമകളെയും കുറിച്ച് വിവേക് സംസാരിക്കുന്നു.

  • ക്രെഡിറ്റ് ഫഹദിന്

അതിരൻ യാഥാർത്ഥ്യമായതിന്റെ ഫുൾ ക്രെഡിറ്റും ഫഹദിനാണ്. ഞാൻ ചെയ്ത പരസ്യങ്ങളും സിനിമയോടുള്ള എന്റെ പാഷനും മനസിലാക്കി ഫഹദ് എന്നെ സിനിമയിലേക്കു കൈപിടിച്ചുകയറ്റി. നല്ലൊരു കെമിസ്ട്രി ഞങ്ങൾ തമ്മിലുണ്ടായിരുന്നു. ആണെങ്കിലും അല്ലെങ്കിലും എന്ന പേരിൽ ഒരു കോമഡി പ്രോജക്ടാണ് ഞങ്ങൾ ആദ്യം പ്ലാൻ ചെയ്തത്. എന്നാൽ, ആ പ്രോജക്ട് ഉപേക്ഷിച്ചത് ഞങ്ങൾ തമ്മിലുള്ള അഭിപ്രായ വ്യത്യാസത്തെ തുടർന്നാണ് എന്നാണ് പലരും കരുതുന്നത്. എന്നാൽ, ഞങ്ങളുടെ പരസ്പര വിശ്വാസമാണ് അതിരൻ എന്ന ചിത്രം യാഥാർത്ഥ്യമാക്കിയത്.
പലരും അതിരന്റെ നിർമാണച്ചുമതല ഏറ്റെടുക്കാൻ മുന്നോട്ടുവന്നെങ്കിലും ഫഹദിന്റെ നിർദ്ദേശപ്രകാരമാണ് ചിത്രം സെഞ്ച്വറി ഏറ്റെടുക്കുന്നത്. അദ്ദേഹം ഞങ്ങൾക്കു നൽകിയ സപ്പോർട്ട് എത്ര പറഞ്ഞാലും മതിയാവില്ല. അതിനാൽ, ഫഹദിനായി നല്ലൊരു ചിത്രം ഒരുക്കുക ഞങ്ങളുടെ ഉത്തരവാദിത്തമായി മാറി. ഫഹദിന്റെ വരത്തൻ, ഞാൻ പ്രകാശൻ, കുമ്പളങ്ങി നൈറ്റ്‌സ് തുടങ്ങിയ ചിത്രങ്ങൾക്കൊപ്പം അതിരനും വൻ വിജയമായതിൽ വലിയ സന്തോഷമുണ്ട്.
ഫഹദ് ഫാസിൽ എന്ന നടനെ മനസിൽ കണ്ടെഴുതിയ കഥയും തിരക്കഥയുമാണ് അതിരന്റേത്. വരത്തൻ റിലീസ് ആകുന്നതിനു മുമ്പാണ് ഫഹദിനോട് കഥ പറഞ്ഞത്. ഷൂട്ടിങ് തുടങ്ങിയത് കുമ്പളങ്ങി നൈറ്റ്‌സിനു ശേഷവും. എന്നാൽ, ഈ ചിത്രങ്ങളിലെ കഥാപാത്രങ്ങളിൽ നിന്നു തികച്ചും വ്യത്യസ്തമാണ് അതിരനിലെ സൈക്യാട്രിസ്റ്റ്.

  • സായി പല്ലവി

അന്യഭാഷാചിത്രങ്ങളിൽ തിരക്കുള്ള താരമാണ് സായി പല്ലവി. പ്രേമവും കലിയുമാണ് സായി പല്ലവിയുടെ മലയാള ചിത്രങ്ങൾ. സായി പല്ലവി ഇടവേളയ്ക്കു ശേഷം മലയാളത്തിൽ തിരിച്ചെത്തിയ ചിത്രമാണ് അതിരൻ. പൂർണമായും തിരക്കഥയാകും മുമ്പാണ് സായി പല്ലവിയെ കാണുന്നത്. കഥ പറഞ്ഞു, ഇഷ്ടമായി. അങ്ങനെയാണ് ഫഹദിന്റെ നായികയായി സായി പല്ലവി വന്നത്. നിത്യ എന്ന നാട്ടിൻപുറത്തുകാരിയായി സായി പല്ലവി അഭിനയിച്ച ചിത്രം എന്ന പ്രത്യേകതയുമുണ്ട്.
36 ദിവസം ഫഹദും 28 ദിവസം സായി പല്ലവിയും ചിത്രത്തിൽ അഭിനയിച്ചു. 55 ദിവസം കൊണ്ട് ചിത്രീകണവും പൂർത്തിയായി. ഫഹദ്-സായി കൂട്ടുകെട്ടിൽ നിന്നു പ്രേക്ഷകർ പ്രതീക്ഷിക്കുന്നത് നൽകാനാണ് ഞങ്ങൾ ശ്രമിച്ചത്. നല്ല കഥ, മികച്ച കഥാപാത്രങ്ങൾ, പിന്നെ പ്രേക്ഷകനെ എന്റർടെയിൻ ചെയ്യിപ്പിക്കുന്ന ഘടകങ്ങൾ. ഇവ പൂർണമായും നിലനിർത്തിയാണ് ചിത്രം ഒരുക്കിയത്. ഷൂട്ടിങ് പൂർത്തിയായപ്പോൾ തന്നെ നല്ലൊരു ചിത്രം ചെയ്തതിന്റെ സന്തോഷമുണ്ടായിരുന്നു. നല്ല കഥാപാത്രങ്ങൾ കിട്ടിയതിന്റെ ആഹ്ലാദത്തിലായിരുന്നു ഫഹദും സായിയും.
ചിത്രത്തിലെ ഹൈലൈറ്റായി പട്ടികളുമായി ഫഹദ് ഫാസിലിന്റെ സംഘട്ടനം ആക്ഷൻ ഡയറക്ടർ രാജശേഖറും റിങ് മാസ്റ്റർ രാജീവും ചേർന്നാണ് ഒരുക്കിയത്. സായി പല്ലവി ആക്ഷൻ സീക്വൻസ് ചെയ്ത ചിത്രം എന്ന പ്രത്യേകതയും അതിരനുണ്ട്. ഇതിനായി രൺജി പണിക്കറും സായി പല്ലവിയും കളരി പഠിച്ചു.
ഫഹദിനൊപ്പം സിനിമ ചെയ്യാനായി സീനിയർ സംവിധായകർ പോലും സമീപിച്ചിട്ടുണ്ടെന്നും എന്നാൽ, അതിരന്റെ കഥയും കഥാപാത്രവുമാണ് ചിത്രത്തിന്റെ ഭാഗമാകാൻ പ്രേരിപ്പിച്ചതെന്ന് സായി പല്ലവി തന്നെ പറഞ്ഞിട്ടുണ്ട്. അതിരനുശേഷം മലയാളത്തിൽ നിന്ന് നിരവധി ഓഫറുകളാണ് സായി പല്ലവിയെയും ബാക്ക് ഗ്രൗണ്ട് സ്‌കോർ ഒരുക്കിയ ജിബ്രാനെയും തേടിയെത്തിയത്. അതിരൻ പോലെ ഒരു ചിത്രത്തിനായി ഇരുവരും കാത്തിരിക്കുകയാണ്.

  • വിജയത്തിനു പിന്നിൽ സെഞ്ച്വറി

നിരവധി വമ്പൻ ചിത്രങ്ങൾ ഒരുക്കിയ ബാനറാണ് സെഞ്ച്വറി. നാൽപ്പതു വർഷമായി തെന്നിന്ത്യൻ സിനിമയിലെ സജീവസാന്നിധ്യം. സെഞ്ച്വറിയുടെ 125-ാമത്തെ ചിത്രമാണ് അതിരൻ. മലയാളത്തിലെ മെഗാതാരങ്ങളെയും സംവിധായകരെയും അണിനിരത്തി ചിത്രങ്ങൾ ഒരുക്കാൻ കഴിയുന്ന പ്രൊഡക്ഷൻ ഹൗസാണ് സെഞ്ചറി. എന്നിട്ടും അണിയറയിൽ ഇത്രയധികം നവാഗതരെ അണിനിരത്തി ചിത്രം ഒരുക്കാൻ സെഞ്ച്വറി തയാറായി. ഞാൻ ഉൾപ്പെടെ, ക്യാമറാമാൻ അനു മൂത്തേടത്ത്, സംഗീതസംവിധായകൻ പി.എസ്. ജയഹരി എന്നിവരുടെയെല്ലാം ആദ്യ സംരംഭമാണ് അതിരൻ. കലാസംവിധായകൻ വിനോദ് രവീന്ദ്രനും മലയാളത്തിൽ തുടക്കക്കാരൻ. സെഞ്ച്വറിയുടെ അമരക്കാരായ രാജു മാത്യുവിന്റെയും കൊച്ചുമോന്റെയും ആത്മവിശ്വാസമാണ് അതിരൻ എന്ന ചിത്രത്തിന്റെ വിജയത്തിനു പിന്നിൽ.

ലൂസിഫർ, മധുരാജ 2 എന്നീ ചിത്രങ്ങൾക്കൊപ്പമാണ് അതിരനും പ്രദർശനത്തിനെത്തിയത്. ചിത്രം തിയേറ്ററുകളിൽ 100 ദിവസം പിന്നിട്ടു. അതിരന്റെ വിജയത്തിലൂടെ സെഞ്ച്വറി വീണ്ടും മലയാള സിനിമയിൽ സജീവമാകുകയും ചെയ്തു.

  • തിരക്കഥയാണ് താരം

അതിരന്റെ കരുത്ത് തിരക്കഥ തന്നെ. കഥയുടെ ഹൃദയം ഉൾക്കൊള്ളുന്ന തിരക്കഥയാണ് പി.എഫ്. മാത്യൂസ് സാറിന്റെ തൂലികയിൽ പിറന്നത്. മലയാള സിനിമ മാത്രമല്ല, ലോകസിനിമയെ പോലും സൂക്ഷ്മമായി നിരീക്ഷിക്കുന്നയാളാണ് മാത്യൂസ് സാർ. എക്‌സലന്റ് തിരക്കഥാകൃത്താണ് അദ്ദേഹം. അദ്ദേഹം ഇതുവരെ എഴുതിയ ചിത്രങ്ങൾ പോലെയല്ല, വേറിട്ടൊരു തിരക്കഥാകൃത്തിനെ അതിരനിൽ കാണാം. നവാഗത സംവിധായകനായ എനിക്ക് അദ്ദേഹത്തിന്റെ സപ്പോർട്ട് വളരെ വലുതായിരുന്നു. എന്റെ നിർദ്ദേശങ്ങൾ പരിഗണിച്ചതിനൊപ്പം വ്യത്യസ്തമായി ചിത്രം ഒരുക്കാൻ അദ്ദേഹത്തിന്റെ സാന്നിധ്യം എന്നെ സഹായിച്ചു.

subscribe

നിരഞ്ജ് യുവനിരയിലെ താരം
-നിരഞ്ജ് / രാജ്കുമാർ

Categories:

മലയാള സിനിമയിലെ ആദ്യ സൂപ്പർ സ്റ്റാറായ തിക്കുറിശ്ശിയാണ് നടനും നിർമാതാവുമായ മണിയൻപിള്ള രാജുവിന്റെ മകന് നിരഞ്ജ് എന്ന് പേരിട്ടത്. കുട്ടി ഭാവിയിൽ വലിയ നടനാകുമെന്നും തിക്കുറിശ്ശി പ്രവചിച്ചു. ബ്ലാക് ബട്ടർഫ്‌ളൈ എന്ന ചിത്രത്തിലൂടെ വില്ലൻ വേഷത്തിലാണ് നിരഞ്ജ് സിനിമയിൽ എത്തിയത്. ബോബി എന്ന ചിത്രത്തിലൂടെ നായകനായി. ഓണക്കാലത്ത് പ്രദർശനത്തിനെത്തിയ ഫൈനൽസ് നടനെന്ന നിലയിൽ നിരഞ്ജിനെ അടയാളപ്പെടുത്തുന്ന ചിത്രമാണ്. ഫൈനൽസിലെ മാനുവലായി നിരഞ്ജ് ഗംഭീര പ്രകടനമാണ് നടത്തിയത്. നിരഞ്ജ് വിശേഷങ്ങൾ പങ്കുവയ്ക്കുന്നു.

  • പരാജയത്തിൽ നിരാശ തോന്നിയില്ല

ഫൈനൽസ് ഇറങ്ങിയപ്പോൾ ഒരുപാട് നല്ല അഭിപ്രായം വന്നു. മികച്ച നടനാവാൻ പഠിച്ചുകൊണ്ടേയിരിക്കണം. ഓരോ സിനിമ കഴിയുമ്പോഴും മെച്ചപ്പെടുന്നു എന്ന തോന്നലാണ്. ഇനിയും മെച്ചപ്പെടാനുണ്ട്. അതിനായി ഞാൻ പരമാവധി ശ്രമിക്കും. സിനിമയിൽ നായകനായി തുടങ്ങണം എന്ന ചിന്ത അച്ഛനും എനിക്കും ഉണ്ടായിരുന്നില്ല. സിനിമയുടെ ഭാഗമാകണമെന്നേ ഉണ്ടായിരുന്നുള്ളൂ. അതുകൊണ്ടാണ് വില്ലനായി തുടങ്ങിയത്. ബോബി എന്ന സിനിമയിലാണ് നായകനായത്. ആദ്യമായി നായകനാകുന്നതിന്റെ സന്തോഷം ഉണ്ടായിരുന്നു. ആദ്യ ചിത്രം ബ്ലാക് ബട്ടർഫ്‌ളൈസ് വിജയിച്ചില്ല. എന്നാൽ, പരാജയത്തിൽ നിരാശ തോന്നിയതേയില്ല. മറ്റുള്ളവർ നമ്മളെപ്പറ്റി നെഗറ്റീവായി ചിന്തിക്കുമ്പോൾ, അതിനെ ലക്ഷ്യത്തിൽ എത്താനുള്ള മോട്ടിവേഷനായി എടുക്കുകയാണ് വേണ്ടത്. എല്ലാവരും എപ്പോഴും പ്രശംസിച്ചുകൊണ്ടിരുന്നാൽ മുന്നോട്ടുള്ള യാത്രയുണ്ടാവില്ല. എന്റെ ആദ്യ സിനിമയുടെ പരാജയത്തിനുശേഷം ഫഹദിക്ക അച്ഛനോട് പറഞ്ഞു, ആത്മവിശ്വാസം കൈവിടേണ്ട, തിരിച്ചുവരാൻ കഴിയും. അതു ശരിയാണെന്നാണ് എനിക്കും തോന്നുന്നത്. ആദ്യം കുറച്ചു വീഴ്ചകൾ വരും. കഷ്ടപ്പെടുന്നതിന് അനുസരിച്ചുള്ള പ്രതിഫലം ലഭിക്കും എന്നുതന്നെയാണ് വിശ്വാസം.

ആദ്യ ചിത്രം പരാജയമായപ്പോൾ, എന്നിൽ വലിയ പ്രതീക്ഷയൊന്നും വേണ്ടെന്നു ചിന്തിച്ചവരുണ്ട്. എന്നാൽ, ഞാനതിനെ വെല്ലുവിളിയായി സ്വീകരിച്ചു. എത്ര കഷ്ടപ്പെട്ടിട്ടാണെങ്കിലും എന്നെങ്കിലും തിരിച്ചുവരാനാവും എന്ന ആത്മവിശ്വാസം എനിക്കുണ്ടായിരുന്നു. ഇംഗ്ലണ്ടിലെ മാസ്‌റ്റേഴ്‌സ് പഠനകാലത്ത് സിനിമയെ കൂടുതൽ മനസിലാക്കാൻ ശ്രമിച്ചു. അവിടെ എനിക്ക് ഒരുപാട് ഫ്രീ ടൈം കിട്ടി. വിവിധ സംസ്‌കാരത്തിൽ നിന്നുള്ളവരുമായി ഇടപഴകാൻ സാധിച്ചു. ഇൻഹിബിഷൻസ് മാറുമ്പോഴാണ് കൂടുതൽ സ്വാഭാവികമായി അഭിനയിക്കാൻ കഴിയുക. ഇതിനായി പാഠ്യേതര പ്രവർത്തനങ്ങളിൽ സജീവമായി. അതെല്ലാം അഭിനയത്തിലും സഹായിച്ചു.

  • ഫൈനൽസിലെ മാനുവൽ

ഫൈനൽസിന്റെ സംവിധായകൻ അരുൺ ചേട്ടന് മാനുവൽ എന്ന കഥാപാത്രത്തെപ്പറ്റി വ്യക്തമായ ധാരണയുണ്ടായിരുന്നു. മാനുവലിനെക്കുറിച്ച് കൃത്യമായി അദ്ദേഹം പറഞ്ഞുതന്നു. കട്ടപ്പനയിലായിരുന്നു ഫൈനൽസിന്റെ ഷൂട്ടിങ്. ഷൂട്ടിങ്ങിനിടയിൽ പ്രദേശവാസികളുമായി ഇടപഴകാനും അവരെപ്പറ്റി കൂടുതൽ അറിയാനും സാധിച്ചു. അവരിലൊരാളായി ഞാൻ എന്നെ സങ്കൽപ്പിച്ചപ്പോൾ കാര്യങ്ങൾ എളുപ്പമായി. അച്ഛൻ മുഴുവൻ സമയവും ലൊക്കേഷനിൽ ഉണ്ടായിരുന്നു. എന്നാൽ, അഭിനയത്തിനായി നിർദ്ദേശങ്ങളൊന്നും നൽകിയില്ല. ചിത്രം പൂർത്തിയായ ശേഷമാണ് അച്ഛൻ കണ്ടത്. അച്ഛനു വലിയ സന്തോഷമായി. നന്നായി ചെയ്തിട്ടുണ്ടെന്നും പറഞ്ഞു.

  • അച്ഛൻ സഹായിക്കില്ല

ഒരുപാട് കഷ്ടപ്പെട്ടിട്ടാണ് ഈ നിലയിൽ എത്തിയതെന്ന് അച്ഛൻ പറഞ്ഞിട്ടുണ്ട്. ജൂനിയർ ആർട്ടിസ്റ്റായ കാലം മുതലുള്ള കാര്യങ്ങൾ. ഞങ്ങൾ അതൊന്നും മറക്കാറില്ല, എന്നാലും ഇടയ്‌ക്കൊക്കെ അച്ഛൻ അക്കാലം ഓർമിപ്പിക്കും. സിനിമയിൽ അച്ഛൻ എന്ന സഹായിക്കുകയോ എനിക്കു വേണ്ടി ശുപാർശ ചെയ്യുകയോ ചെയ്തിട്ടില്ല. ഫൈനൽസിൽ പോലും കഥാപാത്രത്തിന് അനുയോജ്യമായതിനാലാണ് എന്നെ തെരഞ്ഞെടുത്തത്. ചിത്രത്തിൽ ഞാൻ അവതരിപ്പിച്ച കഥാപാത്രത്തിന് അധിക പ്രാധാന്യമൊന്നും നൽകിയിട്ടില്ല. രജിഷയുടെയോ സുരാജേട്ടന്റെയോ എന്റെയോ കഥാപാത്രത്തെ ഫോക്കസ് ചെയ്യുന്ന ചിത്രമല്ല ഫൈനൽസ്. കഥയ്ക്കാണ് പ്രധാന്യം. അങ്ങനെയൊരു കഥയിൽ കഥാപാത്രം എനിക്ക് അനുയോജ്യമാണെന്നും കഥാപാത്രത്തിന്റെ വിജയത്തിനായി ഞാൻ ശ്രമിക്കും എന്ന ബോധ്യം ഉള്ളതിനാലുമാണ് ഞാൻ ചിത്രത്തിന്റെ ഭാഗമായത്. അഭിനയത്തിനായി കഷ്ടപ്പെടാൻ ഞാൻ തയാറാണെന്ന് അച്ഛനറിയാം. അച്ഛൻ നടനായതിനാൽ സിനിമ പ്രവേശം എളുപ്പമാണ്. എന്നാൽ, സിനിമയിൽ തുടരാൻ ഞാൻ നന്നായി കഷ്ടപ്പെടണം.
നല്ല സിനിമകൾ മാത്രം മതിയെന്നാണ് തീരുമാനം. ഫൈനൽസിലെ പ്രകടനത്തെപ്പറ്റി നല്ല അഭിപ്രായമാണ് ലഭിച്ചത്. ഇനിയൊരു സിനിമ ചെയ്യുമ്പോൾ അത് മോശമായാൽ ഫൈനൽസിലെ പ്രകടനം പ്രേക്ഷകർ മറക്കും. പകരം പുതിയ സിനിമയിലൂടെയാവും അവർ ജഡ്ജ് ചെയ്യുക. അപ്പോൾ അടുത്ത സിനിമയുടെ വിജയം തെരഞ്ഞെടുക്കലിനും കഥാപാത്രത്തോടുള്ള സമീപനത്തിനും അനുസരിച്ചിരിക്കും.

subscribe

Anaswara rajan Little Princess of Mollywood
-അനശ്വര രാജൻ / രാജ്കുമാർ ആർ

Categories:

സ്‌കൂളിൽ നിന്നു പരീക്ഷ കഴിഞ്ഞുള്ള വരവാണ്. കുട്ടിത്തം വിട്ടുമാറാത്ത മുഖത്ത് അതിന്റെ ക്ഷീണമുണ്ട്. തണ്ണീർമത്തൻ ദിനങ്ങളിലെ കീർത്തിയെപ്പോലെ യൂണിഫോമൊക്കെയിട്ട്, സ്‌കൂൾ കുട്ടിയായി. 50 കോടി ക്ലബിൽ കയറിയ സിനിമയിലെ നായികയാണ്. അതിന്റെ മട്ടും ഭാവവുമൊന്നുമില്ലാത്ത തനി നാട്ടിൻപുറത്തുകാരി. സംസാരിച്ചുതുടങ്ങിയപ്പോൾ അനശ്വര രാജന്റെ ക്ഷീണമെല്ലാം മാറി. കൗമാരത്തിന്റെ ചുറുചുറുക്കും കുസൃതിയും നിറച്ച് താരം പക്കാ ‘കണ്ണൂരുകാരി’യായി വിശേഷങ്ങൾ പങ്കുവച്ചു. അനശ്വരയ്ക്ക് ഇപ്പോഴും സിനിമ കൗതുകലോകമാണ്. ആദ്യ ചിത്രം ഉദാഹരണം സുജാതയിൽ മഞ്ജു വാര്യരുടെ മകളായി അഭിനയിക്കാൻ എത്തുമ്പോൾ അനശ്വരക്ക് സിനിമയെക്കുറിച്ച് അറിയാവുന്നത് ‘ആക്ഷനും കട്ടും’ മാത്രം! ലൊക്കേഷനിൽ ക്യാമറ കണ്ട് അന്തംവിട്ടു നിന്നതു പറയുമ്പോൾ അനശ്വരയുടെ മുഖത്ത് ചമ്മലിൽ പൊതിഞ്ഞ ചിരി. ഇഷ്ടതാരം ദുൽഖർ സൽമാനെ കണ്ടതും ഫോട്ടോ എടുത്തതും വിവരിക്കുമ്പോൾ അനശ്വര ഡിക്യുവിന്റെ ‘ഫാൻ ഗേളാ’യി.

  • കണ്ണൂരുകാർ സ്‌നേഹവും നന്മയുമുള്ളവരാണ്

അതെയതെ, ഒരുപാട് സ്‌നേഹമുള്ളവരാ. നാട്ടിലെല്ലാവർക്കും എന്നോട് വലിയ ഇഷ്ടമാണ്. ഇവിടുന്നൊരു കുട്ടി സിനിമയിൽ എത്തിയതിലുള്ള സന്തോഷം അവർക്കുണ്ട്. കുട്ടികൾക്ക് എന്നോട് ബഹുമാനമാണ്. കണ്ണൂർക്കാരി എന്നുപറയുന്നത് തന്നെ അഭിമാനമാണ്. കണ്ണൂരാണെന്നു പറയുമ്പോൾ ബോംബുണ്ടോ കൈയിൽ എന്നൊക്കെയാണ് ചോദിക്കുന്നത്. ഞാൻ പറയും, ചേട്ടാ അങ്ങനൊന്നുമല്ല ഇവിടെ. ഇവിടെ എല്ലാവരും സ്‌നേഹമുള്ളവരാണ്.

  • താരമായ അനശ്വരയെ അമ്മ പഴയ പോലെ വഴക്കുപറയുമോ

ഏയ് അങ്ങനൊന്നും ഇല്ല. എന്നോടിപ്പോഴും പഴയ പോലെ തന്നെയാ. ദേഷ്യം വരുമ്പോൾ അമ്മ ഇപ്പോഴും ചൂലെടുത്ത് എന്നെ അടിക്കും. ഒരുമാറ്റവും ഇല്ല. താരമൊക്കെ പുറത്ത്. വീട്ടിൽ ഞാൻ വെറും അനശ്വരയാ.

  • ബാല്യകാല ഓർമകൾ

കണ്ണൂർ ആലക്കാട് കോറത്താണ് ജനിച്ചതും വളർന്നതും. പക്കാ നാട്ടിൻപുറം. കുട്ടിക്കാലത്തെ ഓർമകൾ ഒരുപാടുണ്ട്. കുളത്തിൽ കുളിക്കാൻ പോകും. സന്ധ്യയായാലും ഞങ്ങൾ തിരിച്ചുകയറില്ല. അപ്പോൾ അമ്മ വടിയെടുത്തുവരും. മഴയത്തും മണ്ണിലും കളിച്ചിട്ടുണ്ട്. ഊഞ്ഞാലാടും. എത്രയോ തവണ ഊഞ്ഞാലിൽ നിന്ന് വീണിട്ടുണ്ട്. നാട്ടിൽ കുറെ കൂട്ടുകാരുണ്ടായിരുന്നു. ഞാൻ കോൺമെന്റ് സ്‌കൂളിലാണ് പഠിച്ചത്. അതുകൊണ്ട് സ്‌കൂളിൽ വലിയ ഓർമകളൊന്നുമില്ല. നല്ല ഓർമകൾ എന്റെ നാട്ടിൽത്തന്നെയാണ്.

  • അന്നത്തെ ഓണം

കുട്ടിക്കാലത്ത് ഓണത്തിന് പൂക്കൾ പറിച്ചിട്ടാണ് അത്തപ്പൂക്കളമിടുക. പൂപറിക്കാൻ ഞങ്ങൾ ഒരു വലിയ ഗ്രൂപ്പുതന്നെയുണ്ടാവും. ആൺകുട്ടികൾ മരത്തിനു മുകളിലൊക്കെ കയറി പൂപറിക്കും. പെൺകുട്ടികൾ വയലിൽ പോയി പറിക്കും. സ്‌കൂളിൽ ഓണപ്പൂക്കള മത്സരമുണ്ടാകും. ചേച്ചിമാരാണ് മത്സരിക്കുക. ഞങ്ങൾ ചെറിയ കുട്ടികളല്ലേ. ഞങ്ങൾ ചേച്ചിമാരെ പൂപറിക്കാൻ സഹായിക്കും. നാട്ടിൽ അമ്മമ്മയുടെ സ്‌പെഷ്യൽ പായസം ഉണ്ടാവും. ഓണദിവസം കുടുംബത്തിലെ എല്ലാവരും ഒത്തുകൂടും. രാവിലെ അമ്പലത്തിൽ പോകും. നാട്ടിലെ ഓണാഘോഷവും രസകരമാണല്ലോ.

  • സ്‌കൂളിലെ കലാമത്സരങ്ങൾ

ആറാം ക്ലാസ് മുതൽ ഞാൻ മോണോ ആക്ടിൽ പങ്കെടുക്കുമായിരുന്നു. ആദ്യ മത്സരത്തിൽ എനിക്ക് മൂന്നാം സമ്മാനം കിട്ടി. കാരണം മറ്റു കുട്ടികളൊക്കെ നന്നായി പ്രാക്ടീസ് ചെയ്തിട്ടാണ് മത്സരിച്ചത്. എനിക്കാണെങ്കിൽ നാട്ടിലെ ഒരു മാഷിന്റെ സഹായം മാത്രമാണ് ഉണ്ടായിരുന്നത്. ഞാൻ തനിയെ പഠിച്ചതാണ്. സമ്മാനം കിട്ടിയപ്പോൾ എനിക്കു സന്തോഷം തോന്നി. എട്ടാം ക്ലാസ് വരെ മോണോ ആക്ട് ചെയ്തു. പത്തിൽ ഇംഗ്ലീഷ് സ്‌കിറ്റിൽ പങ്കെടുത്തു.

  • കുട്ടിക്കാലത്ത് കണ്ട സിനിമകൾ

കുട്ടിക്കാലത്ത് വല്ലപ്പോഴും മാത്രമാണ് തിയേറ്ററിൽ പോയി സിനിമ കണ്ടിരുന്നത്. വർഷത്തിലൊരിക്കലോ മറ്റോ. പക്ഷേ ടിവിയിൽ കാണും. ഞാൻ കുഞ്ഞായിരിക്കുമ്പോൾ കണ്ട സിനിമ നേരറിയാൻ സിബിഐ ആണ്. എനിക്ക് ഓർമയില്ല കേട്ടോ. ഞാൻ കൈക്കുഞ്ഞായിരുന്നു. അമ്മ പറഞ്ഞിട്ടുള്ളതാണ്. എന്റെ ഓർമയിലുള്ള സിനിമ എൽസമ്മ എന്ന ആൺകുട്ടിയാണ്.

  • അന്ന് സിനിമാമോഹം ഉണ്ടായിരുന്നോ

ഇല്ലില്ല. അഭിനയിക്കണമെന്ന തോന്നൽ ഉണ്ടാകാനുള്ള ഒരു സിറ്റുവേഷൻ ഉണ്ടായിട്ടില്ല. കാരണം നാട്ടിൻപുറത്തെ ഒരു മിഡിൽ ക്ലാസ് ഫാമിലിയാണ്. സിനിമ എന്നെ സംബന്ധിച്ചിടത്തോളം മറ്റൊരു ലോകമാണ്. അപ്പോൾ സിനിമയിൽ വരണം എന്ന ചിന്തയൊന്നും ഉണ്ടായിരുന്നില്ല.
ഗ്ലോബ് എന്ന ഒരു ഷോർട്ട് ഫിലിമിൽ അഭിനയിച്ച ശേഷമാണ് സിനിമയെപ്പറ്റി ചിന്തിക്കുന്നത് തന്നെ. സിനിമയിൽ എത്തിയാൽ എങ്ങനെയിരിക്കും എന്നു ചിന്തിച്ചു, അത്ര മാത്രം. പക്ഷേ, അഭിനയിക്കണം എന്ന ആഗ്രഹമൊന്നും ഉണ്ടായിരുന്നില്ല. ഷോർട്ട് ഫിലിമിൽ നന്നായിട്ടുണ്ടെന്നു പറഞ്ഞതുകൊണ്ട് ചിന്തിച്ചെന്നേയുള്ളൂ.

  • ഉദാഹരണം സുജാതയിൽ എത്തിയത്

എട്ട് കഴിഞ്ഞ് വെക്കേഷൻ സമയത്താണ് ഉദാഹരണം സുജാതയിൽ അഭിനയിക്കുന്നത്. ഓഡിഷൻ വഴിയാണ് എത്തിയത്. എറണാകുളത്തായിരുന്നു ഓഡിഷൻ. മഞ്ജു ചേച്ചിയുടെ സിനിമയിൽ കുട്ടികളെ വേണം എന്ന പരസ്യം കണ്ടിട്ടാണ് അയച്ചത്. സത്യത്തിൽ പേടിയുണ്ടായിരുന്നു. കാരണം സിനിമ എന്തെന്നറിയില്ല. കവി ഉദ്ദേശിച്ചത് എന്ന സിനിമയുടെ ഡയറക്ടർ ലിജുവേട്ടൻ ഞങ്ങളുടെ ഫാമിലി ഫ്രെണ്ടാണ്. ലിജുവേട്ടനാണ് പറഞ്ഞത്, നല്ല ടീമാണ്, ചാർളി സിനിമയുടെ ടീമാണ്, മഞ്ജു ചേച്ചിയുടെ സിനിമയാണ്, പേടിക്കുകയൊന്നും വേണ്ട എന്നൊക്കെ. അങ്ങനെയാണ് ഫോട്ടോ അയച്ചത്. ഓഡിഷനു വിളിച്ചു. അവിടെ പോയി. ആറായിരം പേരാണ് ഫോട്ടോ അയച്ചത്. അതിൽ നിന്ന് അറുപത് പേരെ ഷോർട്ട് ലിസ്റ്റ് ചെയ്തു. ഓഡിഷനു ശേഷമാണ് എന്നെ സെലക്ട് ചെയ്തത്.

  • മഞ്ജു വാര്യർക്കൊപ്പം അഭിനയിക്കാൻ അവസരം. എന്തായിരുന്നു മനസിൽ

ഓഡിഷൻ കഴിഞ്ഞ് വിളിക്കാമെന്നു പറഞ്ഞിരുന്നു. അതിനുശേഷം രണ്ടാഴ്ച കഴിഞ്ഞാണ് വിളിക്കുന്നത്. ബാക്കിയുള്ള കുട്ടികളോട് വിളിക്കാം എന്നു പറഞ്ഞുവിട്ടപ്പോൾ എന്നെ അധികമായി കുറെ സീനുകൾ ചെയ്യിപ്പിച്ചിരുന്നു. രണ്ടാഴ്ചയോളം വിളിക്കാതിരുന്നപ്പോൾ എനിക്ക് പ്രതീക്ഷ ഉണ്ടായിരുന്നില്ല. ഒരുദിവസം വീട്ടിൽ ഞാൻ വെറുതെ ഇരിക്കുമ്പോഴാണ് അമ്മ വിളിച്ചിട്ടുപറയുന്നത്, സിനിമയിൽ നിന്നു വിളിച്ചിരുന്നു, നിന്നോട് സംസാരിക്കണം എന്നു പറഞ്ഞു എന്ന്. ശരിക്കും ഞാൻ തന്നെ ഞെട്ടിപ്പോയി. ഞാൻ വിളിച്ചു. അസിസ്റ്റന്റ് ഡയറക്ടറാണ് സംസാരിച്ചത്. അനശ്വര സെലക്ടായി, സന്തോഷമായോ എന്നുചോദിച്ചു. സന്തോഷമായെന്നു ഞാൻ പറഞ്ഞു. പിന്നെ സിനിമയുടെ ഡയറക്ടറും സംസാരിച്ചു.

  • ആദ്യമായി തിരുവന്തപുരത്ത് എത്തിപ്പോൾ. വടക്ക് ഇവിടുത്തെപ്പറ്റി നല്ല ഇമേജല്ല

അത് ശരിയാണ്. പക്ഷേ, അവിടെ എത്തിയപ്പോൾ അങ്ങനെ തോന്നിയില്ല. നഗരത്തിലെ കോട്ടൺ ഹിൽ സ്‌കൂളിലും അട്ടക്കുളങ്ങര സ്‌കൂളിലുമായിരുന്നു അധികവും ഷൂട്ടിങ്ങുണ്ടായിരുന്നത്. പിന്നെ ചെങ്കൽച്ചൂളയിൽ വച്ച്. പക്ഷേ, എല്ലാവരും നല്ല സപ്പോർട്ടാണ് തന്നത്. ഷൂട്ടിങ് നടക്കുമ്പോൾ എല്ലാവരും അതിനുള്ള സിറ്റുവേഷൻ ഒരുക്കിത്തന്നു. അവിടെ ഷൂട്ട് ചെയ്യാൻ പ്രോബ്ലംസ് ഒന്നും ഉണ്ടായിരുന്നില്ല. തിരുവനന്തപുരം ഭാഷ പഠിക്കാൻ കുറച്ചു പണിയുണ്ടായിരുന്നു. അവിടെയുള്ള കുട്ടികളോട് വർത്തമാനം പറഞ്ഞപ്പോൾ അതു പിടികിട്ടി.

  • തിരുവനന്തപുരം ഭാഷ ആദ്യമായി നേരിട്ടു കേൾക്കുകയല്ലേ

എന്നോട് പറഞ്ഞിരുന്നു പക്ക തിരുവനന്തപുരം ഭാഷയാണ് സിനിമയിൽ. അതു പഠിക്കണം. തുടക്കത്തിൽ ഞാൻ പെട്ടുപോയിട്ടുണ്ട്. ഒരിക്കൽ ഞാൻ ഒരാളോട് ചോദിച്ചു, ചായ കുടിച്ചോ… മറുപടി ഓ… ഞാൻ ചോദിച്ചു, അല്ല ചായ കുടിച്ചോ… വീണ്ടും അതു തന്നെ മറുപടി. ഓ… എന്നു പറയുമ്പോൾ കേൾക്കാത്തതു കൊണ്ടു പറയുന്ന ഓ… ആയിരിക്കും എന്നാണ് ഞാൻ വിചാരിച്ചത്. അതെ, കുടിച്ചു എന്നുള്ളതിനാണ് അവർ ഓ… എന്നു പറയുന്നത്. അപ്പോൾ ഞാൻ അതൊക്കെ കുറച്ചുപഠിച്ചു. പിന്നെ അവരുടെ എന്തര്… തുടങ്ങിയ ശൈലിയൊക്കെ ഞാൻ കുട്ട്യോളോട് സംസാരിച്ചു പഠിച്ചു. അതിനായി ഞാൻ ചെങ്കൽച്ചൂളയിലെ കുട്ടികളോടൊക്കെ സംസാരിച്ചു. ഡബ്ബിങ്ങിന് എന്നെ സഹായിക്കാൻ ഒരു ആർട്ടിസ്റ്റ് ഉണ്ടായിരുന്നു. അങ്ങനെ കുഴപ്പമില്ലാത്ത രീതിയിൽ ഡബ്ബ് ചെയ്യാൻ പറ്റി.

subscribe