March 2020

You Are Here: Home / March 2020

സിനിമയിലെ ആദ്യ അച്ഛൻ
മോഹൻലാൽ

Categories:

ഓർക്കുമ്പോൾ കൗതുകവും സന്തോഷവുമാണ് ജി.കെ. പിള്ള എന്ന വലിയ നടൻ. 36 വർഷങ്ങൾക്കു മുമ്പ് ഉദയായുടെ ‘സഞ്ചാരി’ എന്ന ചിത്രത്തിൽ ഒന്നിച്ചഭിനയിച്ച അനുഭവം മാത്രമേ അദ്ദേഹവുമായി എനിക്കുള്ളൂ. എങ്കിലും ചില അനുഭവങ്ങൾ എത്രകാലം ജീവിച്ചാലും വളരെ ആഴത്തിൽ നമ്മളെ സ്പർശിച്ചുകൊണ്ടേയിരിക്കും. അങ്ങനെയൊന്നാണ് ജി.കെ. പിള്ള എന്ന അനുഭവം. ‘മഞ്ഞിൽ വിരിഞ്ഞ പൂക്കൾ’ കഴിഞ്ഞ് എന്റെ രണ്ടാമത്തെ ചിത്രമായ സഞ്ചാരിയുടെ ലൊക്കേഷനിൽ എത്തുമ്പോൾ അനുഭവങ്ങളുടെ മഹാപ്രപഞ്ചമാണ് എന്നെ സ്വീകരിച്ചത്. അവിടെ ഒരു പുതുമുഖ നടനെന്ന നിലയിലല്ല ആരും എന്നോടു പെരുമാറിയത്. നാടകത്തിന്റെയും സിനിമയുടെയും അഭിനയചക്രവാളത്തിലൂടെ മുന്നേറിയ മഹാരഥന്മാർക്കു മുമ്പിൽ ഞാൻ വെറുമൊരു ശിശുവായിരുന്നു. പക്ഷേ, അവരെല്ലാം എനിക്കു നൽകിയ സ്‌നേഹം ഒരു മകനോടോ, കൊച്ചനുജനോടോ കാണിക്കുന്നതുപോലെയായിരുന്നു. അക്കാലത്തെ ടോപ്പ് ഹീറോ ആയ ജയന്റെയും പ്രേംനസീറിന്റെയും വില്ലനായിട്ടാണ് സഞ്ചാരിയിൽ ഞാൻ വേഷമിട്ടത്. ഡോ. ശേഖർ എന്ന കഥാപാത്രം. എന്റെ അച്ഛനായി ജി.കെ. പിള്ളസാറും അമ്മയായി സുകുമാരിച്ചേച്ചിയുമാണ് വേഷമിട്ടത്. ഞങ്ങൾ മൂന്നുപേരും വില്ലൻ കഥാപാത്രങ്ങൾതന്നെ. വില്ലനും വില്ലത്തിയുമായ അച്ഛനമ്മമാരുടെ ക്രൂരനായ മകൻ.

നേരിൽ കാണും മുമ്പേ ജി.കെ. പിള്ളസാറിനെകുറിച്ച് ഒരുപാട് അറിഞ്ഞിരുന്നു. വലിയ ജീവിതാനുഭവമുള്ള മനുഷ്യൻ. പട്ടാളത്തിലും സിനിമയിലും പിന്നീട് നാടകത്തിലുമൊക്കെ നിറഞ്ഞ ജീവിതയാത്ര. ആലപ്പുഴയിലെ ഉദയാ സ്റ്റുഡിയോയിൽ, ദൂരെ മാറി ഇരിക്കുകയായിരുന്ന അദ്ദേഹത്തിന്റെ അടുക്കൽ ഞാൻ ചെന്നു. ”സാർ, ഞാൻ മോഹൻലാൽ.” ”അറിയാം.” – മുഴങ്ങുന്ന ശബ്ദത്തിൽ മറുപടി ഉടൻ വന്നു. കസേരയിലേക്കു വിരൽ ചൂണ്ടി അദ്ദേഹം പറഞ്ഞു:”ഇരിക്കൂ.”
സംസാരിച്ചതത്രയും സഞ്ചാരിയിലെ കഥാപാത്രത്തെക്കുറിച്ചായിരുന്നു. അച്ഛനും മകനുമായി വേഷമിടുന്ന രണ്ടു നടന്മാർ തമ്മിലുള്ള ഒരു ചർച്ച. ആദ്യ ഷോട്ട് കഴിഞ്ഞപ്പോൾ അഭിനന്ദിച്ചുകൊണ്ടദ്ദേഹം പറഞ്ഞു: ”മോഹൻ… നന്നായിട്ടുണ്ട്. നന്നായി വരും.” പിള്ളസാർ എന്നെ വിളിച്ചിരുന്നത് മോഹൻ എന്നായിരുന്നു. ബ്രേയ്ക്ക് ആയപ്പോൾ വീണ്ടും ഞങ്ങൾ ആ കസേരകളിൽതന്നെ വന്നിരുന്നു. അപ്പോഴേക്കും സുകുമാരിച്ചേച്ചിയും എത്തി. പിന്നീട് അച്ഛനും അമ്മയും മകനും തമ്മിലുള്ള കോംപിനേഷൻ സീനുകളെക്കുറിച്ചായി ചർച്ച. ഏഴോ എട്ടോ ദിവസം സഞ്ചാരിയുടെ ഷൂട്ടിങ് ഉണ്ടായിട്ടും വ്യക്തിപരമായ ഒരു കാര്യത്തെക്കുറിച്ചും ഞങ്ങൾ സംസാരിച്ചില്ല. സിനിമയെക്കുറിച്ചും കഥാപാത്രങ്ങളെക്കുറിച്ചുമായിരുന്നു സംസാരിച്ചതത്രയും.

ഇതിനിടയിൽ ജയനും ഞാനും തമ്മിലുള്ള രണ്ടു ഫൈറ്റ് സീനുകളും ചിത്രീകരിച്ചിരുന്നു. ഡ്യൂപ്പില്ലാതെയുള്ള സംഘട്ടനത്തിൽ ജി.കെ. പിള്ളസാർ പലപ്പോഴും ഒരച്ഛന്റെ സ്‌നേഹവാത്സല്യങ്ങളോടെ പറഞ്ഞു: ”സൂക്ഷിക്കണം, ശ്രദ്ധിച്ച് ചെയ്യണം.” ഉദയായുടെയും നവോദയായുടെയും വടക്കൻപാട്ട് ചിത്രങ്ങളിലെ നിറസാന്നിധ്യമായിരുന്നു പിള്ളസാർ. വാൾപ്പയറ്റിലും ഉശിരൻ സംഘട്ടനങ്ങളിലുമൊക്കെ പലപ്പോഴും പരിക്കുകൾ പറ്റിയ അനുഭവങ്ങൾ ഉണ്ടായിട്ടുണ്ടെന്ന് അദ്ദേഹം പറഞ്ഞു.

subscribe

Manju Warrier – Queen of Grace
മഞ്ജു വാര്യർ / രോഹിണി ആർ

Categories:

മലയാളികളുടെ മനസിലെ നായികാസങ്കൽപ്പത്തിന്റെ പൂർണതയാണ് മഞ്ജു വാര്യർ. കഥാപാത്രങ്ങളായി പകർന്നാടുമ്പോൾ അഭ്രപാളിയിൽ അന്നോളം കണ്ട സ്ത്രീസങ്കൽപ്പങ്ങളെ മാറ്റിയെഴുതുന്നു ആ അഭിനേത്രി. നൃത്തത്തിലും അഭിനയത്തിലും തന്റെ കയ്യൊപ്പു പതിപ്പിച്ച മഞ്ജു വാര്യരുടെ വിശേഷങ്ങൾ.

  • കഥാപാത്രങ്ങളുടെ കാര്യത്തിൽ സെലക്ടീവ്

ഞാൻ അഭിനയിക്കുന്ന സിനിമകളിൽ എന്റെ കഥാപാത്രങ്ങൾക്കു മാത്രമേ പ്രാധാന്യം ലഭിക്കാവൂ എന്ന രീതിയിലുള്ള നിബന്ധനകളൊന്നും ഇന്നേവരെ വച്ചുപുലർത്തിയിട്ടില്ല. അങ്ങനെയുള്ള കഥാപാത്രങ്ങളെ അന്വേഷിച്ചു പോയിട്ടുമില്ല. എന്നാൽ, അത്തരം കഥാപാത്രങ്ങൾ എന്നെ തേടിയെത്തിയതു യാദൃശ്ചികമായിട്ടാണ്. അതിന് ഞാൻ കടപ്പെട്ടിരിക്കുന്നത് അത്തരം കഥകൾ എഴുതിയവരോടും സംവിധായകരോടുമാണ്.
അഭിനയിക്കുന്ന സിനിമകൾ എല്ലാം നല്ലതായിരിക്കണം എന്നത് എന്റെ ആഗ്രഹമാണ്. അതേസമയം, ഞാൻ ഭാഗമാകുന്ന സിനിമകൾ മോശമായാൽ അതിൽ പ്രയാസപ്പെടുന്നതും ഞാൻ തന്നെയാണ്. ഞാൻ ജീവൻ പകർന്നിട്ടുള്ള കഥാപാത്രങ്ങൾ ഉൾക്കൊണ്ട ചെറുതും വലുതുമായ സിനിമകൾ വിജയിക്കുന്നതു മുൻജന്മസുകൃതമാകാം. ഒരുപാടു കഥകൾ എനിക്കു മുമ്പിൽ വരുന്നുണ്ടെങ്കിലും മനസിനു തൃപ്തി നൽകുന്നതു മാത്രമേ ഞാൻ ഇക്കാലം വരെ തെരഞ്ഞെടുത്തിട്ടുള്ളൂ. തുടർന്നും അങ്ങനെയൊക്കെ ആകണമെന്നാണ് എന്റെ ആഗ്രഹവും.

  • കഥാപാത്രങ്ങളും തയാറെടുപ്പുകളും

പൂർണമായും ഞാൻ സംവിധായകന്റൈ നടിയാണ്. സംവിധായകൻ പറയുന്നത് എന്താണോ, അതു ശ്രദ്ധിച്ചു കേട്ട്, അതിനുവേണ്ട പാകപ്പെടത്തലുകൾ മനസിൽ നടത്തും. എല്ലാ നടീനടന്മാരും അങ്ങനെയൊക്കെ ചെയ്യുന്നവരാണ്. എങ്കിൽ മാത്രമേ കഥാപാത്രവും സിനിമയും നന്നാകൂ. എന്നാൽ, കഥാപാത്രങ്ങൾക്കും കൃത്രിമമായ തയാറെടുപ്പുകളൊന്നും നടത്താറില്ല. അത്തരം മാനറിസങ്ങളൊക്കെ പഠിച്ചു ചെയ്യുന്നവരെക്കുറിച്ചു ധാരാളമായി കേട്ടിട്ടുണ്ട്. പക്ഷേ, അങ്ങനെയൊന്നും ഞാനിതു വരെ ചെയ്തിട്ടില്ല. ഇനി ചെയ്യാനും ആഗ്രഹമില്ല. ചെയ്താൽ ശരിയാകില്ല അല്ലെങ്കിൽ കൈയിലൊതുങ്ങില്ല എന്നുതോന്നുന്ന കഥാപാത്രങ്ങൾ എന്നെത്തേടി എത്തിയപ്പോൾ ഞാനതു വേണ്ടെന്നു വച്ചിട്ടുമുണ്ട്. ഇങ്ങനെയൊക്കെയാണ് എന്റെ രീതികൾ.

  • ഇംപ്രൂവ്‌മെന്റ് ആഗ്രഹിക്കാറുണ്ട്

ഇംപ്രവൈസേഷൻ ആണ് കഥാപാത്രങ്ങളുടെ വിജയം. സ്‌ക്രിപ്റ്റ് വായിക്കുമ്പോൾ തന്നെ കഥാപത്രം മനസിലേക്കെത്തും. അല്ലെങ്കിൽ ആ കഥാപാത്രമായി മാറാൻ കഴിയും. ചെയ്തു കഴിയുമ്പോൾ തോന്നും കുറച്ചുകൂടി നന്നാക്കാമായിരുന്നുവെന്ന്. സത്യം പറഞ്ഞാൽ, തുടക്കം മുതൽ ഞാനിതുവരെ ചെയ്ത കഥാപാത്രങ്ങളെല്ലാം ഇംപ്രൂവ് ചെയ്യണമെന്നു തോന്നിയിട്ടുണ്ട്. ഞാൻ ചെയ്തിട്ടുള്ള കഥാപാത്രങ്ങളെല്ലാം കണ്ടു വിലയിരുത്താൻ എപ്പോഴും കഴിയണമെന്നില്ല. സമയക്കുറവും ഷൂട്ടിങ് തിരക്കുകളെല്ലാം അതിനു കാരണമാകുന്നു. ലോഹിസാർ (ലോഹിതദാസ്) സ്‌ക്രിപ്റ്റ് എഴുതി സുന്ദർദാസ് സംവിധാനം ചെയ്ത സല്ലാപം, സത്യൻ അന്തിക്കാട് സംവിധാനം നിർവഹിച്ച തൂവൽകൊട്ടാരം, ലോഹിസാർ തന്നെ രചനയും സംവിധാനവും നിർവഹിച്ച കന്മദം എന്നീ സിനിമകളിലെ കഥാപാത്രങ്ങൾ ഇപ്പോഴും എന്നെ അലട്ടാറുണ്ട്. അതെല്ലാം എന്റെ കരിയറിലെ മികച്ച കഥാപാത്രങ്ങളാണ്. അഭിനേത്രി എന്ന നിലയിൽ വലിയ അനുഭവങ്ങളാണ് ആ സിനിമകൾ എനിക്കു നൽകിയത്.

subscribe

ഹാസ്യ വേഷങ്ങൾ
മധു

Categories:

ഹാസ്യം ഗൗരവതരമായി അവതരിപ്പിക്കാമെന്നതിന്റെ മികച്ച ഉദാഹരണമാണ് ജി. കുമാരപിള്ളയുടെ ‘മാതൃകാമനുഷ്യൻ’ എന്ന നാടകം. ‘മാന്യശ്രീ വിശ്വാമിത്രൻ’ എന്ന പേരിൽ ഈ നാടകം ഞാൻ ചലച്ചിത്രമാക്കി. ജീവിതത്തിൽ അനാവശ്യമായ ചില ചിട്ടകൾ വയ്ക്കുകയും അതിനനുസരിച്ച് ഭാര്യയും കുടുംബാംഗങ്ങളും ജീവിക്കുകയും വേണമെന്നു ശഠിക്കുന്ന കഥാപാത്രമായിരുന്നു ഈ ചിത്രത്തിൽ എന്റേത്.

‘വിക്‌ടോറിയ നമ്പർ 203’ എന്ന പേരിൽ ഹിന്ദിയിലും ‘വൈരം’ എന്ന പേരിൽ തമിഴിലും പ്രദർശനത്തിനെത്തിയ സിനിമ മലയാളത്തിൽ ബേബി ‘സംരംഭം’ എന്ന പേരിൽ അവതരിപ്പിച്ചു. ഹിന്ദിയിൽ അശോക് കുമാറും തമിഴിൽ അശോകനും അവതരിപ്പിച്ച കഥാപാത്രത്തിന് മലയാളത്തിൽ അഭിനയിക്കാൻ അവസരം ലഭിച്ചത് എനിക്കായിരുന്നു. വാർധക്യത്തിന്റെ പടിമുറ്റത്തു എത്തിനിൽക്കുന്ന അവിവാഹിതനും മദ്യപാനിയുമായ ഒരു കള്ളന്റെ വേഷമായിരുന്നു എനിക്കതിൽ. ‘ഐ ആം എ ബാച്ചിലർ, ചില ആലോചനകളൊക്കെ വരുന്നുണ്ട്’ എന്നു പറഞ്ഞു സ്വയം പരിചയപ്പെടുത്തുന്ന ഈ കഥാപാത്രം ശുദ്ധമായ ഹാസ്യത്തിന്റെ നറുനിലാവാണ് പ്രേക്ഷകർക്ക് സമ്മാനിച്ചത്. ചിത്രം പുറത്തിറങ്ങി ആദ്യവാരം പിന്നിടുമ്പോൾ ‘എന്റെ അഭിനയത്തിലെ വ്യത്യസ്തത കാണാൻ’ ഈ ചിത്രം കാണുക എന്നതായി മാറി ഈ ചിത്രത്തിന്റെ പരസ്യവാചകം പോലും.

ബാലചന്ദ്രമേനോൻ സംവിധാനം ചെയ്ത ‘വൈകിവന്ന വസന്ത’ത്തിൽ ഒരു വിഭാര്യന്റെ വേഷമായിരുന്നു എന്റെത്. ശ്രീവിദ്യക്കായിരുന്നു ടീച്ചറുടെ വേഷം. കൂടെക്കൂടെ ഒരു ചെറിയ ചിരിയോടെ ‘എന്താ അതല്ലേ അതിന്റെ ഒരു ശരി’ എന്നു പറയുന്ന ഈ കഥാപാത്രം എന്റെ അക്കാലത്തു ലഭിച്ചുവന്നിരുന്ന വേഷങ്ങളിൽ നിന്നു തികച്ചും ഭിന്നമായിരുന്നു. യുവത്വം തോന്നിപ്പിക്കാൻ ‘ഡൈ’ ആശ്രയിക്കുന്നതും വണ്ണം കുറയ്ക്കാൻ വ്യായാമം നടത്തി ടീച്ചറുടെ മുമ്പിൽ മിടുക്കനാകാൻ ശ്രമിക്കുന്നതുമായ രംഗങ്ങളിലൂടെ കോമാളിത്തമില്ലാതെ പ്രേക്ഷകരെ ചിരിപ്പിക്കാനാകുമെന്നു എനിക്കു ബോധ്യപ്പെട്ടു.

കെ.എസ്. സേതുമാധവൻ സംവിധാനം ചെയ്ത ‘ആരോരുമറിയാതെ’ എന്ന ചിത്രത്തിൽ ഒരു റിട്ട. പ്രൊഫസറുടെ വേഷത്തിലായിരുന്നു ഞാൻ അഭിനയിച്ചത്. സുഹൃത്തുക്കളോടൊപ്പം നടത്തിയ യാത്രയിൽ തോന്നിയ ഒരു ചെറിയ കുസൃതി വരുത്തിവയ്ക്കുന്ന പൊല്ലാപ്പുകളായിരുന്നു ചിത്രത്തിന്റെ പ്രമേയം. ഭരത് ഗോപി, കരമന ജനാർദ്ദനൻ നായർ, നെടുമുടി വേണു തുടങ്ങിയവരോടൊപ്പം പ്രേക്ഷകരുടെ കൈയടി നേടിയെടുക്കാൻ എനിക്ക് ഒരു ബുദ്ധിമുട്ടുമുണ്ടായില്ല സ്വതവേ ഗൗരവക്കാരനായ ഈ കഥാപാത്രം സ്വന്തം കാർ ഡ്രൈവറുടെ മുമ്പിൽപോലും ഓച്ഛാനിച്ചുനിൽക്കുന്ന രംഗവും പഴയ ശിഷ്യനായ പോലീസുകാരന്റെ മുമ്പിൽ ചൂളിപ്പോകുന്നതുമായ രംഗവും തന്മയത്വമായി അവതരിപ്പിക്കാൻ സാധിച്ചു.

ശ്രീകുമാരൻ തമ്പി സംവിധാനം ചെയ്ത ‘ജീവിതം ഒരു ഗാനം’ എന്ന ചിത്രത്തിൽ ശുദ്ധഹൃദയനായ ഒരു പോലീസ് കോൺസ്റ്റബിളിന്റെ വേഷമായിരുന്നു. ക്രിസ്തുവചനത്തിൽ വിശ്വസിച്ച് ജീവിക്കാൻ ശ്രമിക്കുന്ന സാധു. ആശ്വസിപ്പിക്കാൻ വേണ്ടി ത്രേസ്യാമ്മയോടു പറഞ്ഞ ഒരു വാചകത്തിന്റെ പേരിൽ അവരെ വിവാഹം കഴിക്കേണ്ടിവരുന്ന ഈ സാത്വികന്റെ വേഷത്തിൽ പ്രേക്ഷകരെ കുടുകുടെ ചിരിപ്പിക്കാൻ കഴിഞ്ഞു. ‘മരച്ചീനി വിളയുന്ന മലയോരം’ എന്ന പാട്ടും പാടി ത്രേസ്യാമ്മയ്ക്കുചുറ്റും നടക്കുന്ന ഈ കഥാപാത്രമായി ഞാൻ എറേ ആഹ്ലാദിച്ചു. വിലസി രണ്ടാംപകുതിയിൽ ഗൗരവക്കാരനാകുന്ന ഈ കഥാപാത്രമെങ്കിലും ആദ്യപുകുതിയിലെ അഭിനയം പ്രേക്ഷകർക്കു മറക്കാനാകാത്ത അനുഭൂതിയാണു നൽകിയതെന്നു പലരും പറഞ്ഞു.

വിജി തമ്പി സംവിധാനം ചെയ്ത ‘സിംഹവാലൻ മേനോൻ’ എന്ന ചിത്രത്തിൽ പാരമ്പര്യവാദിയായ ഒരു ഗാന്ധിഭക്തനെയാണ് ഞാൻ അവതരപ്പിച്ചത്. ഇംഗ്ലീഷുകാരോടുള്ള രോഷം അവരെ നാടുകടത്തിയിട്ടും തീരാതെ ആ ഭാഷ പോലും സംസാരിക്കില്ലെന്ന ഉറപ്പ തീരുമാനവുമായി നടക്കുന്ന മേനോൻ പ്രേക്ഷകരെ ആദ്യന്തം ചിരിപ്പിക്കുന്ന കഥാപാത്രമായിരുന്നു. വേഷത്തിലും ഭാഷയിലും പെരുമാറ്റത്തിലും ഗാന്ധിസം പുലർത്തുന്ന കഥാപാത്രമായി മാറി. ആരെങ്കിലും ‘ഗുഡ് മോണിങ്’ പറയുമ്പോൾ എന്റെ കഥാപാത്രത്തിന്റെ മുഖത്തു വിടരുന്ന പുച്ഛവും തിരിച്ച് വന്ദനം പറഞ്ഞ് ജയിക്കുമ്പോഴുണ്ടാകുന്ന ഭാവവും വലിയോരനുഭവമായിരുന്നു. ഹിന്ദിയിൽ ഗോൾമാൽ എന്ന പേരിലും തമിഴിൽ ‘തില്ലുമുള്ള്’ എന്ന പേരിലും ഇറങ്ങിയ ചിത്രത്തിന്റെ റീമേക്ക് ആയിരുന്നു ഈ സിനിമ. എന്റെ മലയാളത്തിൽ അവതരിപ്പിച്ച കഥാപാത്രത്തിനു മേൽപ്പറഞ്ഞ രണ്ടു ചിത്രങ്ങളിലെ അതേ കഥാപാത്രങ്ങളെക്കാൾ പ്രാധാന്യം കൂടുതൽ ലഭിച്ചു. അതുകൊണ്ടാണല്ലോ അതു ടൈറ്റിൽ വേഷമായി മാറിയത്.

ഞാൻ തിരക്കഥ എഴുതി സംവിധാനം ചെയ്ത സിനിമയായിരുന്നു ഒരു ‘യുഗസന്ധ്യ’. ജി. വിവേകാനന്ദന്റെ ഇല കൊഴിഞ്ഞ മരം എന്ന നോവലായിരുന്നു ഇതിന്റെ മൂലകഥ. പക്ഷേ മൂലകഥയിൽനിന്നു വ്യത്യസ്തമായിരുന്നു ചിത്രത്തിന്റെ അവതരണം. നോവലിൽ മുഖ്യകഥാപാത്രമായ കുടുംബകാരണവർ ദുരന്തത്തിന് ഇരയാകുകയായിരുന്നുവെങ്കിൽ സിനിമയിൽ ഈ കഥാപാത്രം പ്രേക്ഷകരെ പൊട്ടിച്ചിരിപ്പിക്കുകയായിരുന്നു. ഗൗരവക്കാരനെങ്കിലും ആർദ്രഹൃദയനായിരുന്നു ഇതിലെ കാരണവർ. മക്കളുടെ ഇഷ്ടങ്ങളെ കണ്ണടച്ച് എതിർക്കുകയും പക്ഷേ അവർ പോലും അറിയാതെ അവരുടെ ഇഷ്ടങ്ങൾക്കു വേണ്ട ഒത്താശയും ചെയ്യുന്ന ഈ കഥാപാത്രം ചിത്രം കണ്ട ആരുടേയും മനസിൽനിന്നു വേഗത്തിൽ മായില്ല. മക്കളുടെയും ഭാര്യയുടെയും മുൻപിൽ കാമ്പില്ലാത്ത ദേഷ്യത്തിന്റെ മുഖം മൂടി അഴിഞ്ഞുവീണുന്നിടത്ത് അതു മറയ്ക്കാൻ വിഫലശ്രമം നടത്തുന്ന കാരണവരായിരുന്നു ചിത്രത്തിന്റെ പ്രധാന ആകർഷണവും.

subscribe

‘ ഞാൻ ഹാപ്പിയാണ്’
ചിപ്പി / രോഹിണി ആർ

Categories:

കൗമാരത്തിൽ സിനിമയിലെത്തി ചുരുക്കം നാളുകൾക്കൊണ്ട് പ്രേക്ഷകരുടെ പ്രിയങ്കരിയായി മാറിയ താരമാണ് ചിപ്പി. കേരളം കടന്ന് കന്നഡയുടെയും നായികയായി ഈ സുന്ദരി. നായിക എന്നതിലുപരി കുഞ്ഞനുജത്തിയായി സിനിമയിൽ സജീവമായി നിൽക്കുന്ന സമയത്തായിരുന്നു നിർമാതാവ് രഞ്ജിത്തുമായുള്ള പ്രണയവും വിവാഹവും. പിന്നീട് ഇടവേള. കുടുംബിനിയായ ചിപ്പിയുടെ തിരക്കുകൾ. രഞ്ജിത്തിനൊപ്പം സന്തുഷ്ട കുടുംബ ജീവിതം. ചിപ്പിയുടെ വിശേഷങ്ങൾ.

  • ഇടവേള

ഇടവേള എനിക്ക് ഫീൽ ചെയ്തിട്ടില്ല. ഞാൻ എവിടെയും പോയിട്ടില്ല. ഇവിടെത്തന്നെ ഉണ്ടായിരുന്നു. എന്നെ സംബന്ധിച്ചിടത്തോളം ഒരു സീരിയൽ ചെയ്തുകഴിഞ്ഞാൽ ഉടനെ മറ്റൊന്ന് കമ്മിറ്റ് ചെയ്യില്ല. അങ്ങനെ ചെയ്യുന്നവർ ഉണ്ടാകും. സീരിയലുകൾ എത്ര ചെയ്യുന്നുവെന്നല്ല. അഭിനയിക്കുന്നത് ഒരെണ്ണമായാൽപ്പോലും അതിന്റെ ഗുണമാണ് ഞാൻ നോക്കുന്നത്. പക്ഷേ, അങ്ങനെ ചെയ്താൽ കുടുംബകാര്യങ്ങൾ അവതാളത്തിലാകും. തിരുവനന്തപുരത്ത് ഷൂട്ടുള്ളതുകൊണ്ടാണ് ചില സീരിയലുകളിൽ അഭിനയിച്ചത്. എന്നെ സ്‌നേഹിക്കുന്ന പ്രേക്ഷകരുടെ മനസിൽ ഞാൻ ചെയ്യുന്ന കഥാപാത്രങ്ങൾ എപ്പോഴും തങ്ങിനിൽക്കണം.

  • അമ്മയുടെ അഭിനയവും മകളും

മകൾ നല്ല സപ്പോർട്ടാണ്. ഇഷ്ടമില്ലാത്തതു കണ്ടാൽ അവൾ തുറന്നുപറയും. ‘കല്യാണസൗഗന്ധികം’, ‘ദേവരാഗം’ തുടങ്ങി ഞാനഭിനയിച്ച സിനിമകൾ കണ്ടിട്ട് അവൾ എന്നെ ഒരുപാട് കളിയാക്കി. എന്റെ വേഷം, മേക്കപ്പ് തുടങ്ങി എല്ലാകാര്യങ്ങളും പറഞ്ഞവൾ കളിയാക്കും. പക്ഷേ ഇപ്പോൾ അങ്ങനെയൊന്നും പറയാറില്ല. ഒരുപക്ഷേ സീരിയലിലെ എന്റെ കഥാപാത്രം അവളെ ഒരുപാടുമാറ്റി. അതുകൊണ്ടല്ലേ. എന്റെ കഥാപാത്രത്തിന്റെ മരണം അവൾക്കു സഹിക്കാൻ പറ്റാതെ പോയത്. എങ്കിലും ചില സീനുകൾ കാണുമ്പോൾ അഭിനയം കുറച്ചുകൂടി നന്നാക്കാമായിരുന്നു, ഫീലിങ് കുറഞ്ഞുപോയി എന്നൊക്കെ അവൾ കമന്റ് പറഞ്ഞിട്ടുണ്ട്.

  • അവന്തികയെ ബിഗ്‌സ്‌ക്രീനിൽ പ്രതീക്ഷിക്കാമോ

മോൾക്ക് ഇപ്പോൾ താത്പര്യമില്ല. അവൾ ഇപ്പോൾ പഠിച്ചുകൊണ്ടിരിക്കുന്നതല്ലേയുള്ളൂ. ആദ്യം പഠനം. അതിനു ശേഷം അവൾക്കു താത്പര്യമാണെങ്കിൽ സിനിമയിൽ വന്നോട്ടെ. കാരണം ഞങ്ങൾ രണ്ടുപേരും സിനിമയുമായി ബന്ധമുള്ളതുകൊണ്ട് മകളെ വിലക്കേണ്ട ആവശ്യമില്ലല്ലോ.

  • തിരിച്ചു വരവും സീരിയലും

എനിക്കു കുഞ്ഞുണ്ടായ ശേഷമാണ് സീരിയലിലേക്കു ക്ഷണമുണ്ടായത്. കഥ ഇഷ്ടപ്പെട്ടപ്പോൾ അഭിനയിച്ചു. പോരാത്തതിനു മിക്ക സീരിയലുകളുടെയും ഷൂട്ടിങ് തിരുവനന്തപുരത്താകും. ഞാൻ താമസിക്കുന്നതും തിരുവനന്തപുരത്താണ്. ആ സമയത്തൊക്കെ എന്തെങ്കിലും ആവശ്യം വന്നാൽ വീട്ടിലേക്കു പോകാം. ഇപ്പോൾ വീട്ടിൽ ഗസ്റ്റ് വന്നുവെന്നിരിക്കട്ടെ, എന്റെ ഷോട്ട് ആദ്യം തീർത്ത് എനിക്കു പോകാം. പക്ഷേ, സിനിമയെ സംബന്ധിച്ചിടത്തോളം ഇത്തരം എസ്‌ക്യുസുകൾ പറയാൻ പറ്റില്ല. പിന്നെ സീരിയലിൽ അഭിനയിച്ച് അതിന്റെ സുഖം പിടിച്ചപ്പോൾ ഞാനും സീരിയൽ മതിയെന്നുവച്ചു (ചിരിക്കുന്നു). പിന്നെ സിനിമയിൽ വന്നത് അപ്രതീക്ഷിതമായിട്ടായിരുന്നല്ലോ. ചെറുപ്പം തൊട്ടേ എന്റെ മുഖത്തെ ചിലനേരത്തെ ഭാവങ്ങൾ കാണുമ്പോൾ നീ സിനിമാ നടിയാകുമെന്നു പറഞ്ഞു കളിയാക്കുമായിരുന്ന എന്റെ ഒരാന്റി കെ.പി.എ.സി. ലളിതാന്റിയുടെ സുഹൃത്താണ്. ഭരതൻ അങ്കിളിന്റെ ‘പാഥേയം’ എന്ന സിനിമയിൽ ഒരു പെൺകുട്ടിയെ ആവശ്യമുണ്ടെന്ന് ലളിതാന്റി പറഞ്ഞപ്പോൾ എനിക്കാണ് നറുക്കുവീണത്. എന്റെ ഫോട്ടോ അയച്ചുകൊടുക്കാൻ പറഞ്ഞതനുസരിച്ച് ഫോട്ടോയും അയച്ചുകൊടുത്തു. അപ്പോഴും സിനിമയിൽ വരുമെന്ന പ്രതീക്ഷയൊന്നും എനിക്കുണ്ടായിരുന്നില്ല.

കുറച്ചു ദിവസം കഴിഞ്ഞപ്പോൾ വീട്ടിലേക്കൊരു ഫോൺകോൾ. ഫോണെടുത്തത് അമ്മയാണ്. മറുവശത്ത് ആൺസ്വരമാണ്. ‘നാളെ ഞങ്ങൾ ചിപ്പിയുടെ വീട്ടിൽ വരും, കുറച്ച് സീനുകൾ ഷൂട്ടു ചെയ്യണം.’കേട്ടപാതി അമ്മ പറഞ്ഞ മറുപടി; ‘ഇവിടെയാരും അഭിനയിക്കുന്നില്ല, നിങ്ങൾക്ക് നമ്പർ മാറിയതാകും.’ മറുവശത്ത് മൗനം. കുറച്ചു കഴിഞ്ഞപ്പോൾ വീണ്ടുമൊരു ഫോൺ. ഇത്തവണ വിളിച്ചത് ലളിതാന്റിയാണ്. ആന്റി പറഞ്ഞിട്ടാണ് അവർ വിളിച്ചത്. നാളെ റെഡിയായിരിക്കണമെന്ന് ആന്റി പറഞ്ഞു. പിറ്റേന്നു രാവിലെ പത്തുമണിയായപ്പോൾ ക്യാമറയുമായി അവരെത്തി. അങ്ങോട്ടുമിങ്ങോട്ടും നടക്കാൻ അവർ പറഞ്ഞതനുസരിച്ച് ഞാൻ ചെയ്തു. ഇന്ന് അതിനെ സ്‌ക്രീൻ ടെസ്റ്റ് എന്നുവിളിക്കാം. കൊടൈക്കനാലിലായിരുന്നു ‘പാഥേയ’ത്തിന്റെ ഷൂട്ട്. ആദ്യത്തെ രണ്ടുമൂന്നു ദിവസം എനിക്ക് ഷൂട്ടുണ്ടായിരുന്നില്ലയെങ്കിലും എന്നും ലൊക്കേഷനിൽ പോകും. നിരന്തരമായ പോക്കുവരവിനിടയിൽ ലൊക്കേഷനിലുള്ള എല്ലാവരുമായി നല്ല കമ്പനിയായി. സത്യം പറഞ്ഞാൽ ഞാനഭിനയിച്ച ഓരോ സീനുകൾ കാണുമ്പോൾ എനിക്ക് തന്നെ അത്ഭുതമാണ്. അതായത്. ഒരു മുറിയിൽ നിന്നും മറ്റൊരു റൂമിലേക്കു വരാൻ പറയും. അപ്പോൾ ഞാനങ്ങനെ ചെയ്യും. അത് ഒരു സീനാണെന്ന് പിന്നെയാണു മനസിലായത്. അഭിനയിക്കുകയാണെന്ന് എനിക്കു തോന്നിയതേയില്ല. അദ്യ ചിത്രത്തിന്റെ ഷൂട്ടിങ് തീരുന്നനിനു മുമ്പ് രണ്ടാമത്തെ ചിത്രത്തിന്റെ ഷൂട്ടിങ് തുടങ്ങിയിരുന്നു. അന്നു മുതൽ തുടർച്ചയായി അഭിനയിച്ചുകൊണ്ടിരുന്നു.1993 മുതൽ 2001 വരെ അഭിനയിച്ചു. ഇതിനിടയിലാണ് രഞ്ജിത്തേട്ടനെ കാണുന്നതും പരിചയപ്പെടുന്നതും. പരിചയം പിന്നീടു പ്രണയത്തിലേക്കു വഴിമാറുന്നതും വിവാഹം കഴിക്കുന്നതും.

  • സിനിമാരംഗത്തെ മങ്ങലേൽക്കാത്ത ദാമ്പത്യം

എല്ലാവരുടെയും ജീവിതത്തിലുണ്ടാകുന്നതു പോലെ ഞങ്ങളുടെ ജീവിതത്തിലും ഇണക്കങ്ങളും പിണക്കങ്ങളും ഉണ്ടാകാറുണ്ട്. ചെറിയ കാര്യങ്ങൾക്കുപോലും പൊട്ടിത്തെറിക്കുന്ന സ്വഭാവമാണ് എന്റേത്. ചിട്ടയായ ജീവിതശൈലിയാണ് രഞ്ജിത്തേട്ടന്റേത്. എന്റേതു നേരെ തിരിച്ചും. ഞങ്ങൾ തമ്മിലുള്ള വഴക്കു കേൾക്കുന്നവർ വിചാരിക്കുന്നത് അൽപ്പസമയത്തിനകം രണ്ടുപേരും അടിച്ചുപിരിയും എന്നാണ്. പക്ഷേ, ഞങ്ങൾക്കിടയിലെ വഴക്ക് താഴെ ഡൈനിങ് റൂമിൽ തീരും. ചില കാര്യങ്ങളിൽ ചേട്ടൻ സൈലന്റാകുമ്പോൾ ഞാൻ വയലന്റാകും. പാവം ഏട്ടൻ ഒന്നും മിണ്ടില്ല. ക്ഷമയാണ് ഏട്ടനിൽ ഞാനിഷ്ടപ്പെടുന്ന ഗുണം. പിന്നെ എന്ത് ടെൻഷൻ ഉണ്ടെങ്കിലും പുറത്തു കാട്ടില്ല. ചേട്ടൻ അത്യാവശ്യത്തിനു പുറത്തുപോകാൻ നിൽക്കുമ്പോഴാകും ആരെങ്കിലും കാണാൻ വരിക. തിരക്കുകൾ പറഞ്ഞു മടക്കി അയയ്ക്കില്ല. പകരം കാണാൻ വരുന്നവരുടെ ആവശ്യങ്ങളെല്ലാം ശ്രദ്ധയോടിരുന്നു കേൾക്കും. ഇതിനിടയിൽ ധാരാളം ഫോൺകോളുകൾ വരുമെങ്കിലും ഒന്നും അറ്റൻഡ് ചെയ്യില്ല. എനിക്കൊന്നും ഏട്ടനെപോലെ പെരുമാറാൻ സാധിക്കില്ല.

എല്ലാവരുടെയും വിഷമങ്ങൾ മനസിലാക്കാൻ അദ്ദേഹത്തിനു കഴിയും. ഉള്ളിൽ നിറയെ സ്‌നേഹമുണ്ടെങ്കിലും പുറത്തു പ്രകടിപ്പിക്കാത്ത സ്വഭാവക്കാരനാണ് ഏട്ടൻ. പുറത്തുനിന്ന് ഫുഡ് കഴിക്കില്ല. പുറത്തുപോയിട്ട് വരുമ്പോൾ എനിക്കും മോൾക്കും ഫുഡ് പാഴ്‌സലായി വാങ്ങും. പക്ഷേ ഏട്ടൻ എത്ര മണി രാത്രിയായാലും വീട്ടിൽ വന്നേ ഭക്ഷണം കഴിക്കൂ. വിവാഹം കഴിഞ്ഞ സമയത്ത് പാചകം എനിക്കത്ര വശമില്ലായിരുന്നു. പിന്നെപ്പിന്നെ പാചകപുസ്തകങ്ങൾ നോക്കിയാണ് എല്ലാം ഉണ്ടാക്കാൻ പഠിച്ചത്. ഏട്ടൻ ഡൈനിങ് റൂമിൽ വരുമ്പോൾ തന്നെ ഞാനുണ്ടാക്കുന്ന കറിയേതാണെന്നു നേത്തെ പറയും. അപ്പോൾ പിന്നെ ഏട്ടനു കഴിക്കാതെ പറ്റില്ലല്ലോ? ഭാര്യ കഷ്ടപ്പെട്ടുണ്ടാക്കിയതല്ലേ?. അഥവാ ഏട്ടനതു കഴിച്ചു നല്ലതാണെന്നു പറഞ്ഞാൽ അതു മാത്രമാകും തുടർന്നുള്ള ദിവസങ്ങളിൽ ഞാനുണ്ടാക്കി കൊടുക്കുക. മൂന്നാലു ദിവസം ഏട്ടൻ ഒന്നും മിണ്ടാതെ കഴിക്കും. ഒടുവിൽ ‘ഈ വീട്ടിലിത് മാത്രമേയുള്ളോ?’ എന്നുള്ള ഏട്ടന്റെ ചോദ്യം കേൾക്കുമ്പോൾ ഒരാഴ്ചത്തേക്ക് അടുക്കളയിൽ കയറില്ല. ഏട്ടനോടുള്ള പ്രതിഷേധം. രണ്ടു കാര്യങ്ങളിൽ ഞങ്ങൾക്ക് ഒരേ മനസാണ്. എന്താണെന്നല്ലേ..? പരസ്പരം സർപ്രൈസ് ഗിഫ്റ്റുകൾ കൊടുക്കുക എന്നതിനോട് ഞങ്ങൾക്കു യോജിപ്പില്ല. രണ്ടുപേരുടെയും ബർത്ത്‌ഡേ, വാലന്റൈൻസ് ഡേ, വിവാഹ വാൾഷികം തുടങ്ങി എല്ലാ കാര്യങ്ങൾക്കും പരസ്പരം ഗിഫ്റ്റുകൾ കൈമാറുന്നതിൽ ഞങ്ങൾക്കു താത്പര്യമില്ല. ഒരുപക്ഷേ ഇങ്ങനെ മുടങ്ങാതെ ഗിഫ്റ്റുകൾ കൈമാറുന്നവരിൽ ഒരാൾക്ക് ജോലിയുടെ ടെൻഷനാണെന്നു വയ്ക്കുക. അയാൾക്കന്ന് ഗിഫ്റ്റ് വാങ്ങാൻ സാധിച്ചില്ല. അവിടെ തുടങ്ങും പ്രശ്‌നം. എന്തിനാ വെറുതെ പ്രശ്‌നങ്ങൾ നമ്മളായിട്ടു തുടങ്ങുന്നത്.

subscribe

മാത്തുക്കുട്ടിയും കുഞ്ഞെൽദോയും
മാത്തുക്കുട്ടി / രാജ്കുമാർ ആർ

Categories:

ആർജെ മാത്തുക്കുട്ടി ഫേസ്ബുക്കിൽ കുറിച്ചു: ഇതാണ് പലരും ഞാനാണെന്നു വിചാരിച്ചിരിക്കുന്ന മാത്തുക്കുട്ടി സേവ്യർ. ഡയറക്ടർ ഒഫ് ഹെലൻ! കൺഗ്രാജുലേഷൻസ് ബ്രദർ… നീ പൊളിക്കും എന്ന് എനിക്കുറപ്പായിരുന്നു. ഒന്നൂല്ലേൽ ഇത് എന്റെ പേരല്ലേ…!
അന്ന ബെന്നും ലാലും പ്രധാന വേഷത്തിൽ എത്തിയ ചിത്രം ഹെലന്റെ സംവിധായകൻ മാത്തുക്കുട്ടിയാണ്. വെറും മാത്തുക്കുട്ടിയല്ല, മാത്തുക്കുട്ടി സേവ്യർ. ഈ മാത്തുക്കുട്ടിയെ ആർജെ മാത്തുക്കുട്ടിയായി പലരും തെറ്റിദ്ധരിച്ചു! അതോടെയാണു വിശദീകരണവുമായി ആർജെ മാത്തുക്കുട്ടി എത്തിയത്. അതും മാത്തുക്കുട്ടി സ്‌റ്റൈലിൽ തന്നെ!
മാത്തുക്കുട്ടിക്ക്, മാത്തുക്കുട്ടിത്തം എന്നൊരു ബ്ലോഗുണ്ട്. വളരെ രസകരമായ കുറിപ്പുകളാണ് ബ്ലോഗിലുള്ളത്. ബ്ലോഗിൾ മാത്തുക്കുട്ടി സ്വയം പരിചയപ്പെടുത്തുന്നത് ഇങ്ങനെയാണ്:
പേര് മാത്തുക്കുട്ടി. കൊച്ചിയിൽ ഒരു സ്വകാര്യ റേഡിയോയിൽ ആണ് പണി. അത് പോരാഞ്ഞിട്ട് ഇപ്പോൾ ബ്ലോഗ് വഴിയും നാട്ടുകാരുടെ മെക്കിട്ടുകേറുന്നു. നീ വീണ്ടും എഴുതണം എന്നു പറഞ്ഞ പഴയ കൂട്ടുകാരുടെ വിധി. അവർ ഇത്രയും പ്രതീക്ഷിച്ചുകാണില്ല!’
പെരുമ്പാവൂർ, വെങ്ങോലയിലാണ് മാത്തുക്കുട്ടിയുടെ സ്വദേശം. അരുൺ മാത്യു എന്നാണ് മാത്തുക്കുട്ടിയുടെ ശരിക്കുള്ള പേര്. കോളേജിൽ പഠിക്കുമ്പോൾ കൂട്ടുകാരിട്ട വട്ടപ്പേരിനെ അരുൺ മാത്യു സ്വന്തം പേരാക്കി. സംഗതി പൊളിയല്ലേ! അങ്ങനെ അരുൺ മാത്യു, മാത്തുക്കുട്ടിയായി, പിന്നെ ആർജെ മാത്തുക്കുട്ടിയും. ഒടുവിൽ ആർജെ മാത്തുക്കുട്ടിയെയും സിനിമയിലെടുത്തു. ആസിഫ് അലി നായകനായ കുഞ്ഞെൽദോ മാത്തുക്കുട്ടിത്തം നിറഞ്ഞ രസകരമായ സിനിമയാണ്. സിനിമാവിശേഷങ്ങളുമായി മാത്തുക്കുട്ടി.

  • വിനീതേട്ടൻ തന്ന ധൈര്യം

ഞാൻ ആദ്യമായിട്ട് വിനീതേട്ടന്റെ അടുത്താണ് ഈ കഥ പറയുന്നത്. മാത്തൂ, നീ ഇതെഴുത് രസമുണ്ട്, ബാക്കി നമുക്ക് നോക്കാം എന്നുപറഞ്ഞ് വിനീതേട്ടൻ തന്ന ധൈര്യമാണ് ശരിക്കും ഈ സിനിമ പിറക്കാൻ കാരണം. പിന്നീട് വിനീതേട്ടൻ പറഞ്ഞു, ഇതു നീ തന്നെ ഡയറക്ട് ചെയ്യ്.’ ഞാൻ പറഞ്ഞു, ‘വിനീതേട്ടാ എനിക്കങ്ങനെ എക്‌സ്പീരിയൻസൊന്നും ഇല്ല.’
‘അതൊന്നും നീ നോക്കണ്ട, സിനിമ ചെയ്യാൻ പറ്റുമോ എന്നൊരു പേടി എല്ലാവർക്കും ഉണ്ടാവും. നീ അങ്ങനെ പേടിക്കണ്ട കാര്യമില്ല.’

  • കുഞ്ഞെൽദോ സുഹൃത്ത്

കുഞ്ഞെൽദോയുടെ കഥയുണ്ടാക്കിയത്, എന്റെ ഒരു സുഹൃത്തിന്റെ ജീവിതത്തിൽ നിന്നാണ്. കുഞ്ഞെൽദോ എന്നാണ് അവന്റെ പേരും. അവൻ എന്റെ കസിനും സുഹൃത്തുമാണ്. ഞങ്ങളൊരുമിച്ചു പഠിച്ചതുമാണ്. ഞങ്ങളുടെ പഠനകാലത്തുണ്ടായ കുറച്ചു സംഭവങ്ങളും അതിനൊപ്പം കോളേജിൽ പഠിക്കുമ്പോൾ, കൂട്ടുകാർ ഒപ്പിച്ച കുരുത്തക്കേടുകളുണ്ടല്ലോ, ഇതെല്ലാം ചേർത്തുവച്ചിട്ടാണ് കുഞ്ഞെൽദോ പ്ലാൻ ചെയ്തത്. കുഞ്ഞെൽദോയിൽ എഴുപതു ശതമാനത്തോളം ക്യാംപസാണു വരുന്നത്. പിന്നെ ആദ്യ സിനിമയാകുമ്പോൾ കുറേ സംഭവങ്ങൾ എഴുതാനുണ്ടാവുമല്ലോ! കോമൺ നെയിമാണ് കുഞ്ഞെൽദോ. ഒരുപാട് എൽദോമാർ ഇവിടെയുണ്ട്. എന്റെ ഫോണിലെ കോൺടാക്ട് ലിസ്റ്റിൽ ഏറ്റവും കൂടുതലുള്ള പേര് എൽദോയാണ്. എൽദോ, എൽദോസ്, കുഞ്ഞെൽദോ…. ഇങ്ങനെ ഓരോരുത്തരെയും പല രീതിയിൽ വിളിക്കും.

  • ആസിഫ് ഞെട്ടി

രണ്ടര മണിക്കൂറെടുത്ത്, ആസിഫിന്റെ ഫ്‌ളാറ്റിലിരുന്നാണ് കുഞ്ഞെൽദോയുടെ കഥ മൊത്തം പറയുന്നത്. കഥ മുഴുവൻ കേട്ട്, ‘അളിയാ നമുക്ക് ചെയ്യാം’ എന്നു പറഞ്ഞ ശേഷം അവൻ എന്നോട് ചോദിച്ചത്, ‘എടാ, എന്റെ ലൈഫിൽ നടന്ന സംഭവങ്ങൾ, നീ എങ്ങനെയാണ് എന്റെ മുന്നിലിരുന്നു പറഞ്ഞത്’ എന്നാണ്. കോളജിൽ വച്ചുണ്ടായ ഒരു സംഭവം അവൻ എന്നോടു പറഞ്ഞു. അത് സിനിമയിലും ഉണ്ട്. ആസി പറഞ്ഞു, ‘എടാ, എന്റെ ജീവിതത്തിൽ ഇത് ഇങ്ങനെ തന്നെ സംഭവിച്ചിട്ടുണ്ട്! എനിക്കതിനു പണിയും കിട്ടിയിട്ടുണ്ട്. നീ പറയുമ്പോൾ ഞാൻ ഭയങ്കരമായിട്ട് അത്ഭുതപ്പെട്ടു.’
അതെന്നെ ഏറെ കംഫർട്ടബിളാക്കിയ കാര്യമായിരുന്നു. ഈ കഥാപാത്രത്തിലൂടെ ശരിക്കും എന്താണോ ഉദ്ദേശിക്കുന്നത്, ആ കഥാപാത്രത്തിന്റെ എനർജി എന്താണ്, കുഞ്ഞെൽദോ എങ്ങനെയായിരിക്കും. ഇതെല്ലാം ആസിക്ക് ഒറ്റ നരേഷനിൽ തന്നെ കിട്ടിയിട്ടുണ്ട്. ന്യൂഇയറിന്റെ അന്ന് ആസി വിളിച്ചിട്ടുപറഞ്ഞു, ‘എടാ, താങ്ക്‌സ് ഫോർ കുഞ്ഞെൽദോ. ഭയങ്കര സന്തോഷമുണ്ടെടാ.’ ആസിയുടെ ന്യൂഇയർ വിഷ് ഇങ്ങനെയായിരുന്നു.

  • ഗൂഗിൾ നോക്കി ഉറപ്പിച്ചു

ഞാൻ ഏറ്റവും കുറച്ച് നിർദ്ദേശങ്ങൾ നൽകിയത് ആസിക്കാണ്. കാരണം ഞങ്ങൾക്കൊന്നും പറയേണ്ടി പോലും വന്നില്ല. ആസി ആ കഥാപാത്രത്തിനു കറക്ടായിരുന്നു. തുള്ളിച്ചാടി നടപ്പും… അങ്ങനെ എല്ലാം. റിലീസിനു മുമ്പ് ഗ്ലിംസ് ഒഫ് കുഞ്ഞെൽദോ എന്ന വീഡിയോ പ്ലാൻ ചെയ്യാൻ ഒരു കാരണമുണ്ട്. തൊട്ടുമുമ്പു വന്ന ആസിഫിന്റെ ഹിറ്റായ സിനിമയാണ് കെട്ട്യോളാണെന്റെ മാലാഖ. അതിലെ സ്ലീവാച്ചൻ എന്ന കഥാപാത്രമാണ് എല്ലാവരുടെയും മനസിൽ. സ്ലീവാച്ചന്റെ കുടവയറും കൊമ്പൻ മീശയും പറ്റെ വെട്ടിയ മുടിയും ഉൾപ്പെടെ ആൾക്കാരുടെ മനസിലുണ്ട്. ആളുകളെ ഈ സിനിമ കാണാൻ റെഡിയാക്കുക എന്നതായിരുന്നു ഗ്ലിംസ് ഒഫ് കുഞ്ഞെൽദോയുടെ ഉദ്ദേശ്യം. അതെന്തായാലും ആളുകൾക്ക് ഇഷ്ടപ്പെട്ടു. ആസി ഭയങ്കരമായി കഷ്ടപ്പെട്ടിട്ടുണ്ട്, ആ ക്യാരക്ടറിൽ നിന്ന്, ഈ ക്യാരക്ടറിലേക്കുവരാൻ. ഒറ്റ ഫോട്ടോയിലൂടെ കഥാപാത്രത്തെ പരിചയപ്പെടുത്തുന്നത് ശരിയായ രീതിയല്ലെന്നു ഞങ്ങൾക്കു തോന്നി. അങ്ങനെയാണ് വീഡിയോയിലേക്കുമാറിയത്.

വീഡിയോ കണ്ട് കുറേ ആളുകൾ യൂട്യൂബിൽ കമന്റും ചെയ്തു, ഋതുവിലെ ലുക്ക് പോലെ എന്നൊക്കെ. ഈ സിനിമ ആസിയെ വച്ച് പ്ലാൻ ചെയ്യുമ്പോൾ, ഋതുവിൽ ആസി വരുന്ന സമയത്ത് എങ്ങനെയിരുന്നു എന്നാണ് ഞാൻ ആദ്യം നോക്കിയത്. ഗൂഗിളിൽ ഋതുവിലെ ഫോട്ടോ കണ്ടപ്പോൾ, സത്യത്തിൽ ഇവനു വലിയ മാറ്റമൊന്നും ഇല്ലല്ലോ എന്നുവിചാരിക്കുകയും ചെയ്തു. സ്‌കിൻ ടോണൊക്കെ ഇപ്പോഴും അങ്ങനെ തന്നെയാണ്.

subscribe

ഷംസു ടൂറിസ്റ്റ് ഹോം
Shaji Pattikkara

Categories:

ഏതു സിനിമാക്കാർക്കും പറയാനുണ്ടാകും ഒരു കോടമ്പാക്കം കഥ. അതു പോലെ മദ്രാസിലെ ഉമാ ലോഡ്ജിനെപ്പറ്റിയുള്ള ഓർമകളും. ഒട്ടുമിക്ക സിനിമക്കാർക്കും ഒരനുഭവം അവിടെയുണ്ടാകും. ചിലർക്കു കയ്പ്പു നിറഞ്ഞതെങ്കിൽ ചിലർക്കു മധുരിക്കുന്നത്. അങ്ങനെ എനിക്കും പറയാനുണ്ട് ഒരു ലോഡ്ജ് കഥ! മദ്രാസിലല്ല, ഇങ്ങ് എറണാകുളത്ത്, ലിസി ഹോസ്പ്പിറ്റൽ ജങ്ഷനിൽ ഷംസു ടൂറിസ്റ്റ് ഹോം! എന്റെ കോടമ്പക്കവും എന്റെ ഉമാ ലോഡ്ജും എല്ലാം ആ ടൂറിസ്റ്റ് ഹോം ആയിരുന്നു.

കൃത്യമായി പറഞ്ഞാൽ 1999 മേയ് അഞ്ച്, അന്നാണ് ഞാൻ ഷംസു ടൂറിസ്റ്റ് ഹോമിൽ ഒരു മുറിയെടുക്കുന്നത്. ഒരു ഒറ്റമുറി. നമ്പർ 108. ലിസി ഹോസ്പിറ്റലിനു തൊട്ടടുത്ത്, ഒതുങ്ങിയ ശാന്തമായ ഒരിടം. അന്നു മുറിയെടുക്കുമ്പോൾ നാൽപ്പത് രൂപയാണ് മാസവാടക. ആ താമസം സ്ഥിരമായി. എനിക്ക് ആ സ്ഥലത്തോടും ആ കെട്ടിടത്തോടും ആ മുറിയോടും വല്ലാത്തൊരു ആത്മബന്ധമായി. അതിന്റെ ഉടമസ്ഥനായ ഷംസുദ്ദീൻ ഇക്കയോടും. വളരെ സൗമ്യനായ ഒരു മനുഷ്യൻ.

പിന്നീട് സിനിമയുടെ തിരക്ക് കൂടിയപ്പോൾ അതുമായി ബന്ധപ്പെട്ടു പലയിടങ്ങളിലായി താമസം. പക്ഷേ എന്റെ 108 ഞാൻ ഒഴിഞ്ഞില്ല. ജോലിത്തിരക്കിനിടയിൽ കിട്ടുന്ന സമയത്തു വീട്ടിലെത്താൻ കൊതിക്കുന്ന ഒരു ഗൃഹനാഥനെപ്പോലെ, കിട്ടുന്ന സമയങ്ങളിൽ ഞാൻ ഷംസുവിലെത്തി, എന്റെ 108-ൽ മനസ് നിറഞ്ഞ് ഉറങ്ങി. സിനിമ വാരികകളുടെയും അനുബന്ധ പ്രസിദ്ധീകരണങ്ങളുടെയും നല്ലൊരു ശേഖരമുണ്ട് എനിക്ക്. കാലം കഴിയുന്തോറും അവയുടെ എണ്ണം കൂടി, ആ ചെറിയ മുറി നിറഞ്ഞു.

പക്ഷേ, അതെന്നെ ശ്വാസം മുട്ടിക്കുകയല്ല, നവോന്മേഷം നൽകുകയാണു ചെയ്തത്. അതുകൊണ്ടു തന്നെ, ഞാൻ വർക്ക് ചെയ്യുന്ന സിനിമകൾ, ചിത്രീകരണം എറണാകുളത്താണു നടക്കുന്നതെങ്കിൽ കഴിവതും ഞാൻ ഷംസുവിൽ തന്നെ കഴിയാൻ ശ്രമിച്ചു. മുൻപ് നല്ല പാർക്കിങ് സൗകര്യം ഉണ്ടായിരുന്നു അവിടെ, അതുകൊണ്ടു തന്നെ എറണാകുളത്തെ ചിത്രീകരണ സംഘങ്ങൾ അവിടെ മുറിയെടുത്തിരുന്നു.
ഇന്നും ഏതു സമയത്ത് അവിടെ ചെന്നാലും കുറച്ച് മുറികളിൽ ഏതെങ്കിലും ചിത്രീകരണ സംഘങ്ങൾ ഉണ്ടാവും. മറ്റു താമസ സ്ഥലങ്ങളിൽ സാധാരണ കാണാത്തതു പോലെ, സിനിമയുടെ മെസ് പ്രവർത്തിക്കുന്നതിനുള്ള സൗകര്യം ഇന്നും ഷംസുവിനു സ്വന്തം. അതുകൊണ്ടാണ് ഇവിടം ചിത്രീകരണ സംഘങ്ങൾക്കു പ്രിയപ്പെട്ടതായത്.

മറ്റൊരു വിശേഷണം കൂടിയുണ്ട് ഷംസുവിന്. എറണാകുളത്ത് എത്തിപ്പെടുന്ന സിനിമാമോഹികൾക്ക് അവിടെ എത്ര സിനിമ, എവിടെയൊക്കെ ചിത്രീകരണം നടക്കുന്നു എന്നറിയാൻ ഷംസുവിൽ എത്തിയാൽ മതി. കാരണം, താരങ്ങൾക്കും സാങ്കേതിക പ്രവർത്തകർക്കുമുള്ള ഭക്ഷണങ്ങളുമായി വണ്ടികൾ പുറപ്പെടുന്നത് ഷംസുവിന്റെ മുറ്റത്തു നിന്നാണ്. എറണാകുളത്ത് ഷൂട്ടിങ് ഉണ്ടോ, മെസ് ഷംസുവിലായിരിക്കും. പഴമയുടെ പ്രതീകമാണ് ഷംസു. ഈ കാലയളവിൽ നിരവധി ആളുകൾ ചിത്രീകരണത്തിന് അനുമതി തേടി ഷംസുക്കയുടെ അടുത്തെത്തിയിട്ടുണ്ട്. പക്ഷേ, എന്തെങ്കിലും ഒഴിവു കഴിവുകൾ പറഞ്ഞ് ഷംസുക്ക അവരെ മടക്കി അയക്കും. പക്ഷേ, അവിടെയും എനിക്കു മാത്രം അവകാശപ്പെട്ട ഒന്നുണ്ട്. അന്നും ഇന്നും ലിസി ഹോസ്പിറ്റൽ ജങ്ഷനിൽ തലയുയർത്തി നിൽക്കുന്ന ഈ കെട്ടിടം ഏതെങ്കിലും ഒരു സിനിമയിൽ ഭാഗമായിട്ടുണ്ടെങ്കിൽ അത് ഞാൻ വർക്ക് ചെയ്ത, പ്രദീപ് നായർ സംവിധാനം ചെയ്ത ‘ഒരിടം’ എന്ന ചിത്രത്തിലാണ്. അതിൽ ഗീതു മോഹൻദാസ് ലോഡ്ജിൽ മുറിയെടുക്കാൻ വരുന്ന ഒരു രംഗമുണ്ട്. അത് ചിത്രീകരിച്ചിരിക്കുന്നത് ഷംസുവിലാണ്.

subscribe

ചിരിക്കാൻ എനിക്കും ഇഷ്ടം
Shalu Kurian

Categories:
  • പുതിയ പ്രതീക്ഷകൾ

പ്രതീക്ഷകളുടെ വർഷമാണിത്. പുതിയ പ്രോജക്ടുകളുണ്ട്, നല്ല കഥാപാത്രങ്ങളും. കിട്ടുന്ന കഥാപാത്രങ്ങൾ വലിതോ ചെറുതോ എന്നു തരം തിരിക്കാറില്ല. സംവിധായകൻ ഏൽപ്പിച്ച ജോലി ഭംഗിയായി നിറവേറ്റാൻ കഴിയുക എന്നതാണ് ഒരു ആർട്ടിസ്റ്റിന്റെ കടമ. മുമ്പു ചെയ്തതിൽ നിന്നു വ്യത്യസ്തമായ കഥാപാത്രങ്ങളാണ് ചെയ്യാൻ പോകുന്നത്.
പിന്നെ, വ്യക്തിപരമായി പറഞ്ഞാൽ നല്ല ഭാര്യയായി, നല്ല മകളായി, നല്ല മരുമകളായി തുടരാൻ കഴിയുക തുടങ്ങിയ പ്രാർത്ഥനകളും മാത്രം.

  • പ്രോജക്ടകൾ

പുതിയ പ്രോജക്ടുകളുണ്ട്. റോസ് പെറ്റൽസിന്റെ ഒരു സീരിയൽ ചെയ്യുന്നുണ്ട്. മഴവിൽ മനോരമയ്ക്കു വേണ്ടിയാണ് സീരിയൽ. എന്നാൽ, സീരിയലിന്റെ പേര് തീർച്ചപ്പെടുത്തിയിട്ടില്ല.

  • ശ്രീകുമാരൻ തമ്പിയും ചട്ടമ്പിക്കല്ല്യാണിയും

നായികയാകുന്ന ആദ്യ സീരിയൽ ആയിരുന്നു ശ്രീകുമാരൻ തമ്പി സാറിന്റെ ചട്ടമ്പിക്കല്ല്യാണി. ടൈറ്റിൽ വേഷമായിരുന്നു അതിലെനിക്ക്. തുടക്കക്കാലത്തു തന്നെ ലെജൻഡ് എന്നു വിശേഷിപ്പിക്കപ്പെടുന്ന ശ്രീകുമാരൻ തമ്പി സാറിന്റെ കൂടെ വർക്ക് ചെയ്യാൻ കഴിഞ്ഞത് വലിയ ഭാഗ്യമായി കരുതുന്നു. ചട്ടമ്പിക്കല്ല്യാണി എന്ന സിനിമ റീമേക്ക് ചെയ്തതായിരുന്നു സീരിയിൽ. തന്റെ കൂടെ വർക്ക് ചെയ്യുന്ന എല്ലാവരുടെയും കാര്യങ്ങൾ കൃത്യമായി ശ്രദ്ധിക്കുന്ന വ്യക്തിയാണ് അദ്ദേഹം. പ്രൊഡക്ഷനിൽ തയാറാക്കുന്ന ഭക്ഷണം അദ്ദേഹം രുചിച്ചു നോക്കിയ ശേഷം മാത്രമാണു വിളമ്പുക. അഭിനയത്തെക്കുറിച്ചുള്ള അദ്ദേഹത്തിന്റെ കാഴ്ചപ്പാടുകൾ, നൽകുന്ന വിവരണങ്ങൾ, ഉപദേശങ്ങളെല്ലാം എന്റെ കരിയറിൽ ഗുണം ചെയ്തിട്ടുണ്ട്. തമ്പി സാർ പിന്നീട് ചെയ്ത് സിനിമയിലെ ഒരു പാട്ട് സീനിൽ ഞാൻ ഉണ്ടായിരുന്നു. ലെങ്ത് കൂടിപ്പോയതിനാൽ പാട്ട് കട്ട് ചെയ്യുകയായിരുന്നു.

  • പ്രിയപ്പെട്ട അഭിനേതാക്കളും കമൽഹാസനും

നിരവധി ആർട്ടിസ്റ്റുകൾ എന്നെ സ്വാധീനിച്ചിട്ടുണ്ട്. ലാലേട്ടൻ, മമ്മൂക്ക, മുരളി സാർ തുടങ്ങിയവരൊക്കെ എന്നെ സ്വാധീനിച്ചവരാണ്, ഏറെ പ്രിയപ്പെട്ടവരാണ്. ഞാൻ കമൽഹാസൻ സാറിന്റെ കടുത്ത ഫാനാണ്. ആ മഹാനടന്റെ എല്ലാ സിനിമകളും ഞാൻ കണ്ടിട്ടുണ്ട്. അദ്ദേഹത്തിന്റെ പല സിനിമകളും വീണ്ടും വീണ്ടും കാണാൻ തോന്നുന്നവയാണ്. അദ്ദേഹത്തോടൊപ്പം ഒരു സീനിലെങ്കിലും അഭിനയിക്കമെന്നാണ് എന്റെ ഏറ്റവും വലിയ ആഗ്രഹം.

  • തട്ടീം മുട്ടീം

ആളുകളെ ചിരിപ്പിക്കുക എന്നത് നിസാരകാര്യമല്ല. ചിരിപ്പിക്കുന്നവരെ ആർക്കാണ് ഇഷ്ടമല്ലാത്തത്. സമ്മർദ്ദങ്ങളേറിയ ഫാസ്റ്റ് ലൈഫിൽ കോമഡി പ്രോഗ്രാമുകൾക്ക് ജനപ്രീതിയേറുന്നുണ്ട്. തട്ടീം മുട്ടീം എന്ന കോമഡി സീരിയലിനു മുമ്പ് കുടുംബ പോലീസ് എന്നൊരു കോമഡി സീരിയൽ ചെയ്തിട്ടുണ്ട്. അതേസമയം ചന്ദനമഴയിലെ നെഗറ്റീവ് വേഷവും ചെയ്തു. ക്യാരക്ടർ നെഗറ്റീവ് ആണോ പോസിറ്റീവ് ആണോ എന്നു നോക്കാറില്ല.
തട്ടീം മുട്ടീം പ്രേക്ഷകപ്രീതി പിടിച്ചുപറ്റിയതിൽ സന്തോഷമുണ്ട്. കോമഡി ചെയ്യുന്നതിൽ പ്രയാസങ്ങളൊന്നുമില്ല. ഒപ്പമുള്ള ആർട്ടിസ്റ്റുകൾ നന്നായി സപ്പോർട്ട് ചെയ്യുന്നുണ്ട്. അത്തരത്തിലുള്ള കോംപിനേഷനുകൾ സീനിനു ഗുണം ചെയ്യും. ഒരു സീനിൽ ഒരാൾ മാത്രം വിചാരിച്ചാൽ ചിലപ്പോൾ കോമഡി വർക്കൗട്ട് ആകണമെന്നില്ലല്ലോ. എന്ന സംബന്ധിച്ച് കോമഡി മാത്രമല്ല, എല്ലാ കഥാപാത്രങ്ങളും ഇഷ്ടപ്പെട്ടു ചെയ്തതാണ്. കഥാപാത്രങ്ങളെ ഉൾക്കൊണ്ട് അവതരിപ്പിച്ചില്ലെങ്കിൽ പരാജയപ്പെടുമെന്നാണ് എന്റെ വിശ്വാസം.

  • മിനിസ്‌ക്രീനിൽ സന്തുഷ്ടയാണോ

തീർച്ചയായും സന്തുഷ്ടയാണ്. സിനിമ ചെയ്യാൻ ആഗ്രഹമുണ്ട്. നല്ല കഥാപാത്രങ്ങൾ സിനിമയിൽ ലഭിച്ചാൽ സ്വീകരിക്കും. സിനിമയിലൂടെയാണ് അഭിനയലോകത്തേക്കു പ്രവേശിക്കുന്നത്. പിന്നീടാണ് മിനിസ്‌ക്രീനിലേക്ക് എത്തുന്നത്. ഇപ്പോൾ സീരിയലുകളിൽ നല്ല കഥാപാത്രങ്ങൾ കിട്ടുന്നുണ്ട്.

  • സീരിയലുകൾക്കെതിരേയുള്ള വിമർശനങ്ങൾ

വിമർശനങ്ങളെ സംയമനത്തോടെ നോക്കിക്കാണുകയാണ് എന്റെ രീതി. ജനങ്ങൾക്ക് എന്തിനേയും വിമർശിക്കാം. അവർക്കതിനുള്ള അവകാശമുണ്ട്. വിമർശനങ്ങളിലെ നല്ല വശങ്ങളെ ഉൾക്കൊള്ളാൻ ശ്രമിക്കാറുണ്ട്. സീരിയലുകളെക്കുറിച്ചു വിമർശനങ്ങൾ ഉണ്ടാകാറുണ്ട്. സ്ഥിരം ഒരേ സബ്ജക്ട് തന്നെ കാണിക്കുന്നു. അമ്മായിയമ്മ, രണ്ടാനച്ഛൻ, ദുർമാർഗിയായ ഭർത്താവ് അങ്ങനെ പോകുന്ന ക്ലീഷേ സംഭവങ്ങൾ. എന്നാലും സീരിയലുകളിലെ പോസിറ്റിവ് വശങ്ങൾ നാം കാണാതെ പോകരുത്. ഇതൊക്കെ നമ്മുടെ സമൂഹത്തിൽ സാധാരണ നടക്കുന്നതാണ്. സീരിയൽ ഇൻഡസ്ട്രി സിനിമ പോലെ തന്നെ വലിയൊരു മേഖലയാണ്. നൂറുകണക്കിന് ആർട്ടിസ്റ്റുകളും ടെക്‌നീഷ്യൻമാരുമാണ് ഇതുമായി ബന്ധപ്പെട്ടു പ്രവർത്തിക്കുന്നത്.

  • യാത്രകൾ

കുട്ടിക്കാലം തൊട്ടേ യാത്രകൾ എനിക്കിഷ്ടമാണ്. അച്ഛന്റെ ബൈക്കിന്റെ പെട്രോൾ ടാങ്കിന്റെ മുകളിലിരുന്നുള്ള കുട്ടിക്കാലത്തെ യാത്രകളുടെ ഓർമകൾ എന്നും മധുരിക്കുന്നതാണ്. ബൈക്കിൽ അച്ഛന്റെയും അമ്മയുടെയും കൂടെ ബന്ധു വീടുകളിലൊക്കെ പോകും. ഞായറാഴ്ചകളിലായിരിക്കും അധികവും യാത്രകൾ.
പുതിയ സ്ഥലങ്ങൾ കാണുക, പുതിയ ആളുകളെ കാണുക, അവരുടെ സംസ്‌കാരം, പാരമ്പര്യം തുടങ്ങിയവ അടുത്തറിയുക ഇതെല്ലാം ഇഷ്ടമാണ്. കുട്ടിക്കാലം തൊട്ടു യാത്രയോടുള്ള ഇഷ്ടം വലിതായപ്പോൾ കൂടി എന്നു മാത്രം. സ്വന്തമായി വരുമാനമായപ്പോൾ യാത്രകൾ വിവിധ രാജ്യങ്ങൾ വരെ എത്തി. ഹിൽ സ്റ്റേഷനുകൾ സന്ദർശിക്കാനാണു കൂടുതൽ ഇഷ്ടം.
അടുത്തിടെ നടത്തിയത് റഷ്യൻ യാത്രയാണ്. എന്റെ ഭർത്താവ് മെൽവിൻ ഫിലിപ്പും കൂടെയുണ്ടായിരുന്നു. അദ്ദേഹവും എന്നെപ്പോലെയാണ്. യാത്രകളിൽ താത്പര്യമുള്ള ആളാണ്.

  • റഷ്യ

റഷ്യയിലെ പ്രധാനപ്പെട്ട സ്ഥലങ്ങൾ ചുറ്റിക്കറങ്ങി എന്നു പറയാം. ഞങ്ങൾ തിരിച്ചുവരാൻ തുടങ്ങിയപ്പോൾ ശക്തമായി മഞ്ഞുവീഴാൻ തുടങ്ങിയിരുന്നു. മഞ്ഞ് ഇഷ്ടമായതുകൊണ്ട് കുറച്ചു ദിവസങ്ങൾ കൂടി അവിടെ തങ്ങാൻ ആഗ്രഹിച്ചു. പക്ഷേ കഴിഞ്ഞില്ല. ഡോസ്‌റ്റോയേവ്‌സ്‌കി, ചെക്കോവ്, ടോൾസ്‌റ്റോയി തുടങ്ങിയവരുടെ രചനകളിലൂടെ പരിചിതമായ റഷ്യൻ നഗരങ്ങളും അവിടത്തെ തെരുവുകളും വായന തുടങ്ങിയ കാലം തൊട്ടേ ഉള്ളിലുള്ളതാണ്.
റഷ്യയിലെ സ്ട്രീറ്റ് ഫുഡ് കഴിക്കാൻ ആഗ്രഹമുണ്ടായിരുന്നു. കഴിച്ചപ്പോൾ നമ്മുടെ ടേയ്‌സറ്റിന് ഇഷ്ടട്ടപ്പെട്ടില്ല. തീരെ പരിചിതമല്ലാത്തെ പാചകക്കൂട്ടുകൾ. കൂടുതൽ വെറൈറ്റികൾ ടേയ്സ്റ്റ് ചെയ്ത് നോക്കിയില്ല.
സെന്റ് പീറ്റേഴ്‌സ് ബെർഗ്, പുഷ്‌കിൻ, മോസ്‌കോ തുടങ്ങിയ നഗരങ്ങളാണ് പ്രധാനമായും സന്ദർശിച്ചത്.
വിവാഹശേഷമാണ് വിദേശരാജ്യങ്ങളിലേക്കുള്ള യാത്രകൾ ആരംഭിച്ചത്. റഷ്യൻ സന്ദർശനത്തിനു മുമ്പ് മെൽവിനും ഞാനും തായ്‌ലൻഡ് പോയിരുന്നു. മനസിൽ പോകാൻ ആഗ്രഹിക്കുന്ന രാജ്യങ്ങളും നഗരങ്ങളും ഇനിയുമുണ്ട്. യൂറോപ്പ്, അമേരിക്ക, ആഫ്രിക്ക തുടങ്ങിയ രാജ്യങ്ങൾ സന്ദർശിക്കാൻ പദ്ധതിയുണ്ട്.

  • സീരിയലുകളിൽ മാറ്റം

സിനിമ പോലെ തന്നെ സീരിയലുകളിലും മാറ്റങ്ങളും പരീക്ഷണങ്ങളും നടക്കുന്നുണ്ട്. ചിത്രീകരണത്തിലും മറ്റ് ടെക്‌നിക്കൽ മേഖലകളിലും വലിയ മാറ്റങ്ങൾ ഇക്കാലത്ത് ഉണ്ടാകുന്നുണ്ട്. ഇപ്പോൾ ഞാൻ ചെയ്യന്ന തട്ടീം മുട്ടീം എന്ന സീരിയൽ പതിവു രീതികളിൽ നിന്നൊക്ക വ്യത്യസ്തമാണ്. ഇതുപോലെ വ്യത്യസ്തമായ സീരിയലുകളാണ്, മറിമായം, ഉപ്പും മുളകും തുടങ്ങിയവ. ഇതിന്റെ പ്രത്യേകത ഒരു എപ്പിസോഡിൽ ഒരു കഥ തീരുന്നു എന്നതാണ്. പ്രേക്ഷകർ ഇടയ്ക്ക് കാണാൻ വിട്ടു പോയാലും പ്രശ്‌നമൊന്നുമില്ല. സീരിയലുകളിൽ നിന്നു വ്യത്യസ്തമായി വലിയ കാഴ്ചക്കാരും ഇത്തരം പരിപാടികൾക്കുണ്ട്.
സിനികളെല്ലാം കാണാറുണ്ട്. തമിഴ് മാസ് സിനിമകൾ മിസ് ചെയ്യാറില്ല. സമയം കണ്ടെത്തി കാണും.

subscribe

ഒരു ചെക്കും പുലിവാലുകളും
എ.എസ്. ദിനേശ്

Categories:

സിനിമയിലെത്തി കാലം കുറെ കഴിഞ്ഞിട്ടും ഒരു പുരോഗതിയും ഉണ്ടാകാത്ത നേരത്ത് നാനയിലെ പരസ്യ മാനേജർ കൃഷ്ണൻ സാർ പറഞ്ഞു, സിനിമയുടെ പരസ്യം സംഘടിപ്പിച്ചു തന്നാൽ കമ്മിഷൻ തരാമെന്ന്. അന്ന് മൂന്നാല് സിനിമയിൽ നിന്ന് എനിക്കു കിട്ടുന്ന കാശ് ഒരു ബാക്ക് പേജ് പരസ്യം കൊടുത്താൽ കമ്മിഷനായി ലഭിക്കുമെന്നായപ്പോൾ ശ്രമിച്ചു നോക്കാമെന്നു കരുതി.

അന്ന് ഓഡിയോ കാസറ്റ് രംഗത്താണു കൂടതൽ സജീവം. തുടർന്ന് ഓഡിയോ കാസറ്റുകളുടെയും പുതിയ കമ്പനികളുടെ സിനിമാപ്പരസ്യങ്ങളും നാനയ്ക്കു മാത്രമല്ല മറ്റു ചലച്ചിത്ര പ്രസിദ്ധീകരണങ്ങൾക്കും വാങ്ങി കൊടുത്തു തുടങ്ങി. സിനിമ കമ്പനിയിൽ നിന്നു കാശ് കിട്ടിയിട്ടു മാത്രമെ ഞാൻ പരസ്യത്തിന്റെ ചെക്കു കൊടുക്കാറുള്ളു. അങ്ങനെ രണ്ടു മൂന്നു വർഷം പോയി. ഇതിൽ വളരെ സ്‌നേഹത്തോടെ ചിരിച്ച് സ്വാധീനിച്ച് എന്നിൽ നിന്നു പരസ്യം മേടിക്കാൻ മിടുക്കുള്ള ഒരു സുഹൃത്ത് ഉണ്ടായിരുന്നു. അയാളുടെ കൈയിൽ മുൻകൂറായി ഞാൻ ഒപ്പിട്ട ഒരു ചെക്ക് എപ്പോഴുമുണ്ടായിരുന്നു. കാശ് കിട്ടുന്ന മുറക്ക് ഞാൻ പറയും. അപ്പോൾ ചെക്ക് ബാങ്കിൽ കൊടുക്കും.

ഞാൻ പറയാതെ ചെക്ക് കൊടുക്കില്ലെന്ന വിശ്വാസത്തിലാണ് അങ്ങനെ ചെയ്തത്. ബാക്കി ആർക്കും മുൻകൂറായി ചെക്ക് കൊടുത്തിരുന്നില്ല.
സിനിമ കമ്പനിയിൽ നിന്നു പണം കിട്ടാത്തതു കൊണ്ട് പരസ്യം മേടിച്ചു കൊടുക്കലും അവസാനിപ്പിച്ചു. അതിന്റെ പേരിൽ കുറച്ചു പേർക്ക് ഞാൻ ഇപ്പോഴും പണം കൊടുക്കാനുമുണ്ട്. പക്ഷേ, ഒരു കാര്യം അതിന്റെ പേരിൽ ഒരു രൂപ പോലും ഞാൻ കമ്മിഷൻ എടുത്തിട്ടില്ല. ഒരു കൊല്ലം കഴിഞ്ഞപ്പോൾ എന്നെ തേടി പോലീസ് വന്നു. എനിക്ക് അറസ്റ്റ് വാറന്റ്. ഓഫിസിൽ സമൻസ് വന്നപ്പോൾ ഞാൻ ഇല്ലാത്തതിനാൻ മടക്കി അയച്ചു.
അന്വേഷിച്ചപ്പോൾ ചെക്ക് കേസ് ആണ്. അപ്പോഴാണ്, പഴയ പരസ്യത്തിന്റെ കാര്യം ഓർത്തത്. ആ സുഹൃത്തിനെ വിളിച്ചു. ആയാൾ ആ കമ്പനിയിൽ നിന്നു മാറി കഴിഞ്ഞിരുന്നു.

കോടതി, കേസ്, പോലീസ് ഇത്തരം കാര്യങ്ങളെക്കുറിച്ച് ഒന്നും അറിയില്ലായിരുന്നു. കേസ് കൊടുത്ത കമ്പനിയിൽ പുതിയ മാനേജ്‌മെന്റ് ആയതിനാൽ ആർക്കും എന്നെ സഹായിക്കാൻ കഴിയുമായിരുന്നില്ല. ചെക്ക് കേസായതിനാൽ സിനിമാക്കാരോടു പറയാനും തോന്നിയില്ല. പരസ്യത്തിന്റെ പണം തരേണ്ട സിനിമ കമ്പനി പൂട്ടി പോകുകയും ചെയ്തു. രണ്ടാഴ്ച ഭയത്തിന്റെ നിഴലിലായിരുന്നു. ഉറക്കം നഷ്ടപ്പെട്ടു. ടെൻഷൻ കൊണ്ടു വീർപ്പുമുട്ടി. ജാമ്യത്തിലെടുക്കാൻ ഭാര്യ കരം അടച്ചു രസീത് വാങ്ങി. അപ്പോഴേക്കും എന്നെ സഹായിക്കാൻ ദൈവദൂതനെ പോലെ ഒരാൾ വന്നു. ഒപ്പം നാട്ടുകാരും കൂട്ടുകാരും മുന്നിലെത്തി. വക്കീലിനെ വച്ചു. ജാമ്യമെടുത്തു. എത്രയും വേഗം കൊടുക്കാനുള്ള പണം കൊടുത്ത് കേസ് തീർക്കാൻ ഞാൻ പറഞ്ഞെങ്കിലും വക്കീൽ അതിനെതിരേ വാദിച്ചു. ഒടുവിൽ എനിക്കെതിരേ വിധി വന്നു. വീണ്ടും ജാമ്യത്തിലെടുക്കാൻ സുഹൃത്തുക്കൾ ഉണ്ടായിരുന്നതു കൊണ്ടു രക്ഷപ്പെട്ടു.
തുടർന്ന് ഹൈക്കോടതിയിലൂടെ പരസ്പര ധാരണയിൽ പണം അടച്ച് കേസ് അവസാനിപ്പിച്ചു.

subscribe

ഒരു ഫോട്ടോഗ്രഫറുടെ സഞ്ചാരങ്ങൾ
Girish Ambadi

Categories:

തലയെടുപ്പുള്ള കൊമ്പന്റെ തുമ്പിക്കൈയിൽ ചേർന്നുനിന്ന്, കൊമ്പുകളിൽ പിടിച്ച് ഒരു സുന്ദരി! സോഷ്യൽ മീഡിയയിൽ വൈറലായ ഒരു ഫോട്ടോ ഷൂട്ടിനെക്കുറിച്ചാണു പറയുന്നത്. നടി അപ്‌സരയാണ് ആനക്കൊരുമ്മ എന്നുപേരിട്ട ഫോട്ടോ ഷൂട്ടിലെ സുന്ദരി. ദൂരെ നിന്നുപോലും ഭയത്തോടെ കാണുന്ന ആനയ്‌ക്കൊപ്പം ഫോട്ടോക്ക് പോസ് ചെയ്ത അപ്‌സരയെയും ഫോട്ടോഗ്രാഫറെയും തേടി അഭിനന്ദന പ്രവാഹമാണ് എത്തിയത്. അൽപ്പം കൈവിട്ട കളിയായിപ്പോയി എന്നു പറഞ്ഞവരും കുറവല്ല. എന്തായാലും സംഗതി ക്ലിക്കായി!
സാഹസികമായ ഫോട്ടോ ഷൂട്ടിന്റെ വിശേഷങ്ങൾ പങ്കുവയ്ക്കുകയാണ് ഫാഷൻ ഫോട്ടോഗ്രാഫർ ഗിരിഷ് അമ്പാടി. തിരുവനന്തപുരം, കാട്ടാക്കട സ്വദേശിയായ ഗിരിഷ് വ്യത്യസ്തമായ ഫോട്ടോ ഷൂട്ടുകളിലൂടെ ശ്രദ്ധേയനാണ്.

  • ആനയും മോഡലും ഒരു ഫ്രെയിമിൽ!

മനുഷ്യരെയും മൃഗങ്ങളെയും വെവ്വേറെ ക്യാമറയിൽ പകർത്തുന്നത് എളുപ്പമാണ്. എന്നാൽ, മനുഷ്യരെയും മൃഗങ്ങളെയും ഒരേ ഫ്രെയിമിൽ കൊണ്ടുവരിക നിസാരമല്ല. അതും ആനയെ മോഡലാക്കി ഇത്രയും ക്ലോസ് ആയി ചിത്രീകരിക്കുക! മുമ്പും ആനകളെ ഉൾപ്പെടുത്തി ഫോട്ടോഷൂട്ടുകൾ ഉണ്ടായിട്ടുണ്ട്. അതിൽ നിന്ന് എങ്ങനെ വ്യത്യസ്തമായി ചിത്രീകരിക്കാം എന്നു ചിന്തിച്ചു. അപ്‌സരയുമായി സംസാരിച്ച് പ്രോജക്ട് പ്ലാൻ ചെയ്തു. എങ്കിലും ആശങ്കയുണ്ടായിരുന്നു; പേടിയും. എന്നാൽ, ദൈവത്തിന്റെ അനുഗ്രഹത്താൽ എല്ലാം നന്നായി വന്നു.

മണിക്കൂറുകളോളം ആനയോടൊപ്പം വ്യത്യസ്ത വേഷങ്ങളിൽ, വിവിധ ഭാവങ്ങളിൽ ഫോട്ടോ എടുക്കുക ശ്രമകരവും ഒപ്പം റിസ്‌കുമാണ്. കളിക്കൂട്ടുകാരനെ പോലെ ആനയോടൊപ്പം ഇത്രയും ചേർന്നിടപഴകി ഫോട്ടോയെടുക്കുക ഏറെ സാഹസികമാണ്. എങ്കിലും റിസ്‌ക് ഏറ്റെടുക്കാൻ തന്നെ തീരുമാനിച്ചു. അപ്‌സരയോട് പറഞ്ഞപ്പോൾ ആദ്യം അമ്പരപ്പും പേടിയും ഒക്കെ തോന്നിയെങ്കിലും അപ്‌സര ഷൂട്ടിനു സമ്മതം മൂളി.

കൊല്ലം കാവേരി ആനത്താവളത്തിലെ ഏറ്റവും ഇണക്കമുള്ള അനന്തപദ്മനാഭനെയാണ് മോഡലായി തെരഞ്ഞെടുത്തത്. ലൊക്കേഷനിൽ എത്തി ക്യാമറ സെറ്റ് ചെയ്തു. ആനയുമായി ചങ്ങാത്തം കൂടാൻ ഇഷ്ട ഭക്ഷണമൊക്കെ നൽകി. ശാന്തനായാണ് അനന്തപദ്മനാഭൻ നിന്നതെങ്കിലും പേടിയുണ്ടായിരുന്നു. പ്രത്യേകിച്ചും വെള്ളത്തിൽ നിന്നാൽ ആന ചിലപ്പോൾ കൂടുതൽ കുസൃതികൾ കാട്ടാനുള്ള സാധ്യതയും ഏറെയാണ്. ചങ്കിടിപ്പോടെയാണ് ഓരോ ഫോട്ടോയും എടുത്തത്. പക്ഷേ, തുടക്കത്തിലെ പേടിയൊക്കെ മാറി അപ്‌സര കൂളായി. അനന്തപദ്മനാഭനും വികൃതിയൊന്നും കാട്ടാതെ നിന്നു. അതുകൊണ്ടാണ് ഫോട്ടോഷൂട്ട് സ്മൂത്തായി നടന്നത്. ആനത്താവളത്തിലെ ഷാജിയേട്ടനും പാപ്പാന്മാരും ഞങ്ങളോട് പൂർണമായും സഹകരിച്ചു.
ഫോട്ടോഷൂട്ടിനുശേഷം ഫോട്ടോ കണ്ടപ്പോൾ അത്ഭുതം തോന്നി. ഫോട്ടോകൾ വിചാരിച്ചതിലും ഗംഭീരമായി. എത്ര കൂളായിട്ടാണ് അപ്‌സര ഫോട്ടോക്ക് പോസ് ചെയ്തത്. അപ്‌സരയെപ്പോലെ ഒരു മോഡലിനെ കിട്ടിയില്ലായിരുന്നെങ്കിൽ, ഇത്തരം ഒരു ഫോട്ടോഷൂട്ട് ഒരിക്കലും സാധ്യമാകുമായിരുന്നില്ല. ഫോട്ടോ വൈറലായതോടെ ഞങ്ങളുടെ എഫർട്ടിനു ഫലമുണ്ടായി. എല്ലാം ദൈവാനുഗ്രഹം!

  • റസൂലിന്റെ കമന്റ്

ഓസ്‌കാർ ജേതാവ് റസൂൽ പൂക്കുട്ടിയുടെ ചിത്രം പകർത്തിയത് മറക്കാനാവില്ല. ഒരു പ്രസിദ്ധീകരണത്തിനായി കുറച്ച് ഫോട്ടോ എടുക്കാനാണ് എത്തിയത്. എന്നാൽ, എടുത്ത ഫോട്ടോകൾ കണ്ടതോടെ റസൂൽ സാറിനു ആവേശമായി. റസൂൽ സാർ സൗണ്ട് ഡിസൈൻ ചെയ്ത ചിത്രം താക്കോലിന്റെ സംവിധായകനും സുഹൃത്തുമായ കിരൺ പ്രഭാകരനും ഒപ്പമുണ്ടായിരുന്നു. സ്വന്തം ഫോട്ടോ കാമറയുടെ മോണിറ്ററിൽ കണ്ട് ഗംഭീരമായിട്ടുന്നെന്നും കിരൺ സാറിനോട് എന്നെ നായകനാക്കി സിനിമയെടുക്കൂ എന്നൊരു കമന്റും അദ്ദേഹം നടത്തി. ഫോട്ടോ ഷൂട്ടിലുടനീളം തമാശകളും സ്വന്തം ഫോട്ടോകളെപ്പറ്റിയുള്ള അഭിപ്രായങ്ങളുമായി അദ്ദേഹം നിറഞ്ഞുനിന്നു. സെലിബ്രിറ്റി സ്റ്റാറ്റസൊന്നും പ്രകടിപ്പിക്കാതെയുള്ള അദ്ദേഹത്തിന്റെ പെരുമാറ്റം ശരിക്കും അത്ഭുതപ്പെടുത്തി. വൈകുന്നേരം മുംബയിലേക്കു മടങ്ങേണ്ടിയിരുന്നെങ്കിലും മണിക്കൂറുകളോളം അദ്ദേഹം ഫോട്ടോ ഷൂട്ടിനായി സമയം മാറ്റിവച്ചു. മറക്കാനാവാത്ത അനുഭവമാണിത്.

  • കരിയറിലെ വഴിത്തിരിവ്

വളരെ അവിചാരിതമായാണ് ഞാൻ നടിയും നർത്തകിയുമായ ആശാ ശരത്തിനെ പരിചയപ്പെട്ടത്. ഞാൻ എടുത്ത ഫോട്ടോകൾ ആശച്ചേച്ചിക്ക് ഇഷ്ടപ്പെട്ടു. അങ്ങനെയാണ് ഫോട്ടോ ഷൂട്ട് പ്ലാൻ ചെയ്തത്. അതിനായി മാത്രം ആശച്ചേച്ചി ഗൾഫിൽ നിന്നു നാട്ടിലെത്തി. ആശചേച്ചിക്ക് ഫോട്ടോഗ്രഫിയോട് ഏറെ താത്പര്യമുണ്ട്. ഫോട്ടോ ഷൂട്ടിനായി എത്ര നേരം ചെലവഴിക്കാനും മടിയില്ല. ആശച്ചേച്ചിയുടെ ഫോട്ടോ ഷൂട്ടാണ് എന്റെ കരിയറിലെ വഴിത്തിരിവുകളിലൊന്ന്. ഏറെ അഭിനന്ദനങ്ങൾ ലഭിച്ചെന്നു മാത്രമല്ല, ഞാൻ ശ്രദ്ധിക്കപ്പെടുകയും ചെയ്തു. ഇന്നും ഞാൻ മനസിൽ സൂക്ഷിക്കുന്ന ഫോട്ടോ ഷൂട്ടുകളിലൊന്നാണിത്. നമ്മളെ ഏറെ കംഫർട്ടബിളാക്കി നിർത്തും എന്നതാണ് ആശച്ചേച്ചിക്കൊപ്പം വർക്ക് ചെയ്യുമ്പോഴുള്ള പ്രത്യേകത.

subscribe

സ്‌നേഹ സ്വാന്തനമായി ‘ചിതൽ’
സിഫിയ ഫനീഫ് / അഞ്ജു വിശാഖ്

Categories:

സാഹചര്യങ്ങൾ ഒറ്റപ്പെടുത്തിയ പെൺകുട്ടിയുടെ അതിജീവനത്തിന്റെ പേരാണ് ‘ചിതൽ.’ പാലക്കാട് സ്വദേശിനി സിഫിയ ഹനീഫിന്റെ ജീവിതം മറ്റുളളവർ മാതൃക ആക്കേണ്ടതാണ്. ഇരുപതാം വയസിൽ വിധവയായപ്പോൾ സമൂഹം അവളെ ഒറ്റപ്പെടുത്തി. മുലകുടിമാറാത്ത കുഞ്ഞിനെ മാറോടണച്ച് സിഫിയ സ്വന്തമായി വരുമാനം കണ്ടെത്തി. അവൾ അധ്വാനിക്കുന്നത് സ്വന്തം ജീവിതം സുന്ദരമാക്കാനല്ല. മറിച്ച് സഹജീവികളുടെ വേദന ഇല്ലാതാക്കാനാണ്. തന്റെ വേദനകൾ ഉളളിലൊതുക്കി അവൾ വിധവകൾക്കും അവരുടെ മക്കൾക്കുമായി പ്രവർത്തിക്കാൻ തീരുമാനിച്ചു. കിട്ടിയ തുച്ഛമായ വരുമാനം കൊണ്ട് സിഫിയ ‘ചിതൽ’ എന്ന കുട്ടായ്മയിലൂടെ പ്രവർത്തനം ആരംഭിച്ചു.

  • ബാല്യകൗമാരങ്ങൾ

ഓർമയിൽ സൂക്ഷിക്കാവുന്ന നല്ലൊരു ബാല്യം തന്നെയായിരുന്നു എന്റേത്. അച്ഛനും അമ്മയും ചേച്ചിയും അടങ്ങുന്ന സന്തുഷ്ട കുടുംബം. പിതാവ് വിദേശത്തായിരുന്നു ജോലി ചെയ്തിരുന്നത്. അതുകൊണ്ടുതന്നെ സാമ്പത്തികബുദ്ധിമുട്ട് എന്തെന്ന് അറിയാതെയാണ് വളർന്നത്. ഇഷ്ടങ്ങൾ പറയും മുൻപേ സാധിച്ചു തരുന്ന മാതാപിതാക്കൾ.
അവധിക്ക് നാട്ടിൽ വരുമ്പോൾ പിതാവിനെക്കൂട്ടാൻ എയർപോർട്ടിൽ പോകുമെന്നല്ലാതെ പുറംലോകവുമായി യാതൊരു പരിചയവുമില്ലാത്ത ഒരുകാലം ഉണ്ടായിരുന്നു. വീടിന് പുറത്ത് ഇങ്ങനൊരു ലേകമുണ്ടെന്ന് പോലും ഞാൻ തിരിച്ചറിഞ്ഞത് ഈ അടുത്തകാലത്താണ്.

  • സിഫിയിൽ നിന്ന് ചിതലിലേക്കുളള യാത്ര

കളിക്കൂട്ടുകാരിയായ ചേച്ചി വിവാഹം കഴിഞ്ഞ് ഭർതൃഗൃഹത്തിലേക്ക് പോയി. അതോടെ ഞാൻ ഒറ്റയ്ക്കായി. ഇടയ്ക്ക് വീട്ടിൽ വരുമ്പോൾ പണ്ടത്തെപ്പോലെ ചേച്ചിക്കു കളിയും ചിരിയും ഒന്നുമില്ലായിരുന്നു. ചേച്ചിയൊരു ഭാര്യയാണെന്നും കുടുംബിനിയാണെന്നും കുട്ടിയായതുകൊണ്ട് അന്നെനിക്കു മനസിലായില്ല. പ്ലസ്‌വണ്ണിന് പഠിക്കുമ്പോൾ രാവിലെ സ്‌കൂളിലേക്ക് പോകാനുളള ഒരുക്കത്തിനിടെ അമ്മ വന്നു പറഞ്ഞു:
”മോള് ഇന്ന് സ്‌കൂളിൽ പോകണ്ട. നിന്നെക്കാണാൻ ഒരു പയ്യൻ വരുന്നുണ്ട്.”
അമ്മ കൊണ്ടുത്തന്ന വസ്ത്രം ധരിച്ച് ചെറുക്കന്റെ വീട്ടുകാരുടെ മുന്നിൽ നിന്നപ്പോൾ കുടുംബജീവിതം എന്താണെന്ന് എനിക്കറിയില്ലായിരുന്നു. പതിനാറാം വയസിൽ വിവാഹം കഴിഞ്ഞ് ഭാർത്താവിനൊപ്പം ബംഗളൂരു നഗരത്തിലേക്കു പോയി. എന്നെ സംബന്ധിച്ചിടത്തോളം പുതിയ സ്ഥലം, ഭാഷ എല്ലാം ആദ്യമൊക്കെ പ്രശ്‌നമായിരുന്നു. അവിടുത്തെ ജീവിതവുമായി പൊരുത്തപ്പെടാൻ കുറച്ചുസമയം വേണ്ടിവന്നു. പതിനേഴാം വയസിൽ ഞാനൊരു അമ്മയായി. മകന്റെ ജനനത്തോടെ സിഫിയയെന്ന പെൺകുട്ടിയിൽ നിന്ന് പക്വതയുളള ഒരമ്മയായി മാറി.

രണ്ടുവർഷത്തിനുശേഷം ഞങ്ങൾക്ക് രണ്ടാമതൊരു മകൻ കൂടി ഉണ്ടായി. കുഞ്ഞുങ്ങൾക്കൊപ്പം ജീവിച്ചു തുടങ്ങും മുൻപേ വിധി എന്നിൽ നിന്ന് ഭർത്താവിനെ തട്ടിയെടുത്തു. ഒരു വേനലവധിക്കു കുട്ടികളുമായി ഞാൻ നാട്ടിലേക്കു വന്നു. ആ സമയം കൂട്ടുകാരുമൊത്ത് ഭാർത്താവ് വിനോദയാത്രയ്ക്കു പോയതാണ്. യാത്രക്കിടെ കുളിക്കാൻ ഇറങ്ങിയ അദ്ദേഹം ചുഴിയിൽപ്പെട്ട് വെള്ളത്തിനടിയിലേക്ക് പോയി. ആ സമയമെല്ലാം ഞാൻ ഫോണിൽ വിളിക്കുന്നുണ്ടായിരുന്നു. റിങ് ചെയ്‌തെങ്കിലും കോൾ എടുത്തില്ല. തിരക്കുമൂലം ഞാൻ വിളിച്ചത് കണ്ടില്ലെന്ന് കരുതി സമാധാനിച്ചു. പിന്നീടാണ് അറിഞ്ഞത് എന്റെ കോളുകൾ കാണും മുമ്പേ അദ്ദേഹം ഈ ലോകത്തു നിന്നു യാത്രയായെന്ന്. മൂന്നു ദിവസങ്ങൾക്കുശേഷമാണ് ബോഡി കിട്ടിയത്. സന്തോഷത്തോടെ യാത്ര പറഞ്ഞുപോയ ഭർത്താവിന്റെ തണുത്തുമരവിച്ച ശരീരമാണു പിന്നീട് കിട്ടിയത്. അവസാനമായി ഒരുനോക്കു കാണാൻപോലും സാധിച്ചില്ല. അതെനിക്കൊരു ഷോക്കായിരുന്നു. ഇന്ന് കാണുന്നൊരു ജീവിതത്തിലേക്കു തിരിച്ചുവരാൻ സാധിക്കുമെന്നു കരുതിയതല്ല.

പിന്നീടങ്ങോട്ട് കാലത്തിന് ഒപ്പമെത്താനുളള ഓട്ടത്തിലായിരുന്നു. ജീവിതം എന്തെന്ന് അറിഞ്ഞു തുടങ്ങും മുമ്പേ ഇരുപതാം വയസിൽ ഒറ്റപ്പെട്ടുപോയ ഞാൻ കുട്ടികളുമായി നാട്ടിലേക്കു മടങ്ങി. അത്രയും നാളും ഓടി കളിച്ചുനടന്ന വീടായിരുന്നില്ല വിധവയായി തിരിച്ചു വന്നപ്പോൾ. വീട്ടുകാരും നാട്ടുകാരും എന്നെ മറ്റൊരു കണ്ണോടെയാണു നോക്കുന്നതെന്ന് എനിക്കു തോന്നി. പക്ഷേ എന്റെ മാതാപിതാക്കൾ അവരുടെ സങ്കടം പുറമെ കാണിക്കാതെ എനിക്കൊപ്പം നിന്നു. അധികം വൈകാതെ മറ്റൊരു വിവാഹത്തിന് അവരെന്നെ നിർബന്ധിച്ചെങ്കിലും ഞാൻ സമ്മതിച്ചില്ല.

  • പഠനം പുനരാരംഭിച്ചു

എങ്ങനെയും ജോലി സമ്പാദിക്കണം എന്ന ചിന്തയായി. പാതി വഴിയിൽ ഉപേക്ഷിച്ച പഠനം പുനരാരംഭിക്കാൻ തീരുമാനിച്ചു. അതിനായി പരിശ്രമിച്ചു. കുറച്ചു നാളുകൾക്കു ശേഷം അടുത്തുള്ള കോളേജിൽ കറസ്‌പോണ്ടൻസായി ഡിഗ്രിക്ക് ചേർന്നു. പകൽ സമയങ്ങളിൽ ജോലിക്കു പോയും വൈകുന്നേരങ്ങളിൽ അടുത്തുള്ള കുട്ടികൾക്ക് ട്യൂഷൻ എടുത്തും സ്വന്തമായി വരുമാനം കണ്ടെത്തി. കിട്ടുന്ന തുച്ഛമായ വരുമാനം കൊണ്ട് ഒന്നുമാകില്ലെന്ന് ബോധ്യമായതോടെ മൂത്ത മകനെ അമ്മയെ ഏൽപ്പിച്ച്, മുലകുടി മാറാത്ത ഇളയ മകനുമായി ബംഗളൂരുവിലേക്കു വീണ്ടും വണ്ടി കയറി. എനിക്കവിടെ കുറച്ചു നല്ല സുഹൃത്തുക്കൾ ഉണ്ടെന്ന വിശ്വാസത്തോടെ. അവർ വിചാരിച്ചാൽ ഒരു ജോലി തരപ്പെടുത്തി തരുമെന്ന് കരുതി. പക്ഷേ ഭർത്താവില്ലാതെ കൈ കുഞ്ഞുമായി കയറിച്ചെന്ന എന്നെ സഹായിക്കാൻ അവർക്കായില്ല. ഒരുപക്ഷേ ഞാനവർക്കു ബാധ്യതയാകുമെന്നു ഭയന്നിട്ടാവാം.

തലചായ്ക്കാൻ ഒരിടമില്ലാതെ ശിവാജിനഗറിലെ ബസ്‌സ്‌റ്റോപ്പിൽ കുഞ്ഞിനെ മാറോടടക്കി പിടിച്ച് ഒരുരാത്രി കഴിച്ചുകൂട്ടി. പിറ്റേദിവസം ജോലി അന്വേഷിച്ചു ഓഫിസുകൾ കയറിയിറങ്ങിയെങ്കിലും ഫലമുണ്ടായില്ല. വാവിട്ടു കരയുന്ന കുഞ്ഞുമായി വീണ്ടും ബസ് സ്‌റ്റോപ്പിൽ ചെന്നിരുന്നു. മോന്റെ കരച്ചിൽ കേട്ട് പ്രായമായൊരു സ്ത്രീ അരികിൽ വന്നു. കുഞ്ഞിന വിശക്കുന്നുണ്ടെങ്കിൽ എന്തെങ്കിലും വാങ്ങിക്കൊടുക്കാൻ അവർ പറഞ്ഞു. എന്റെ നിസഹായാവസ്ഥ കണ്ട് അവർ കാര്യം അന്വേഷിച്ചു. കഥകൾ കേട്ട് കഴിഞ്ഞപ്പോൾ അവർക്കൊപ്പം ഞങ്ങളെയും കൂട്ടി. വയറു നിറയെ ഭക്ഷണവും കിടക്കാൻ ഒരിടവും തന്നു. ആ സ്ത്രീ വന്നില്ലായിരുന്നുവെങ്കിൽ ഒരുപക്ഷേ ഇന്ന് ഞാൻ ഉണ്ടാകുമായിരുന്നില്ല. അന്നുമുതൽ ഞാനവരെ സ്‌നേഹത്തോടെ ‘പാട്ടി’ എന്നു വിളിച്ചു. പിറ്റേദിവസം കന്യാസ്ത്രീകൾ താമസിക്കുന്ന ഹോസ്റ്റലിൽ റൂം ശരിയാക്കി തന്നു. അവിടെ നിന്നുകൊണ്ട് ഒരു കോൾ സെന്ററിൽ ജോലി കണ്ടെത്തി. ഏഴുമാസത്തോളം അവിടെ ജോലിചെയ്തു. കുഞ്ഞിനു സുഖമില്ലാതെ വന്നപ്പോൾ നാട്ടിലേക്കുമടങ്ങി. ഇടയ്ക്കു പാട്ടിയെ കാണാൻ ബംഗളൂരുവിലേക്കു പോകാറുണ്ട്. നാട്ടിലെത്തിയ ഞാൻ ബിഎഡിനു ചേർന്നു. പരീക്ഷ കഴിഞ്ഞ ഉടൻ തന്നെ ട്രെയിനിങ്ങിനു കയറിയ സ്‌കൂളിൽ ദിവസ വേതനത്തിനു ജോലി ലഭിച്ചു.

subscribe