Feb 12, 2020

You Are Here: Home / 12 Feb 2020

അക്ഷരങ്ങളുടെ തീക്കനൽ
-മോഹൻലാൽ

Categories:

‘മഞ്ഞിൽ വിരിഞ്ഞ പൂക്കളി’ലെ വില്ലനായി സിനിമയിലെത്തിയ എനിക്ക് ആദ്യമായി ഒരു മൾട്ടിസ്റ്റാർ ചിത്രത്തിൽ അഭിനയിക്കാനവസരം ലഭിക്കുന്നത് അഹിംസയിലാണ്. ശശിയേട്ടനും ദാമോദരൻ മാഷും നൽകിയ ആ സിനിമയിലെ വില്ലൻവേഷം ഇന്നും എനിക്കു മറക്കാനാവാത്ത ഒരു അനുഭവമാണ്. ഐ.വി. ശശി-ടി. ദാമോദരൻ കൂട്ടുകെട്ടിൽ പിറക്കുന്ന ഒരു സിനിമയിൽ അഭിനയിക്കുക എന്നത് ഏതൊരു നടനും ആഗ്രഹിച്ചുപോകുന്നതാണ്, പുതുമുഖമായ ഒരാളെ സംബന്ധിച്ചിടത്തോളം അങ്ങനെയൊരവസരം ലഭിക്കുന്നത് മഹാഭാഗ്യം തന്നെ. അത്തരമൊരു ഭാഗ്യമാണ് അഹിംസ എനിക്കു മുന്നിൽ തുറന്നത്. അത് വലിയൊരനുഭവം കൂടിയായിരുന്നു. ടി. ദാമോദരൻ എന്ന പകരക്കാരനില്ലാത്ത എഴുത്തുകാരനെ ആദ്യമായി അറിഞ്ഞ അനുഭവം. ദാമോദരൻ മാഷെ ഓർക്കുമ്പോഴൊക്കെ കൗതുകവും സന്തോഷവും സങ്കടവുമെല്ലാം എന്റെ ഉള്ളിൽ നിറയുന്നുണ്ട്. മദ്രാസിലെ ശശിയേട്ടന്റെ വീട്ടിലേക്ക് അന്നാദ്യമായി ഞാൻ കടന്നുചെന്നത് ഒരു അവസരത്തിന് വേണ്ടിയായിരുന്നില്ല. അദ്ദേഹത്തെ ഒന്നു പരിചയപ്പെടുക- അത് മാത്രമായിരുന്നു ആഗ്രഹം. അവിടെവെച്ച് ഞാൻ പരിചയപ്പെട്ടത് രണ്ടു പേരെയായിരുന്നു. ശശിയേട്ടനെയും ദാമോദരൻ മാഷെയും. ചില സൗഹൃദങ്ങൾ അങ്ങനെയാണ്. ഒരാളെ പരിചയപ്പെടാൻ ആഗ്രഹിച്ചു ചെല്ലുമ്പോൾ ചുറ്റുമുള്ള ഒരുപാടുപേർ നമുക്കുമേൽ സൗഹൃദത്തിന്റെ സ്‌നേഹം വർഷിക്കും. ദാമോദരൻ മാഷ് ചുറ്റുമുള്ള ഒരാളായിരുന്നില്ല. ശശിയേട്ടന്റെ ഹൃദയത്തിന്റെ ഭാഗംതന്നെയായിരുന്നു. ആദ്യചിത്രത്തിലൂടെതന്നെ ആ വലിയ മനുഷ്യൻ എന്റെ മനസിന്റെയും ഭാഗമായതു യാദൃച്ഛികമല്ല.

ദാമോദരൻമാഷിന്റെ രചനയിൽ എത്ര ചിത്രങ്ങളിൽ ഞാൻ അഭിനയിച്ചു എന്നതു കൃത്യമായി ഞാൻ കുറിച്ചുവച്ചിട്ടില്ല. പക്ഷേ, എല്ലാം എന്റെ ഓർമയിലുണ്ട്. ഒരു ചിത്രം പോലെ മറ്റൊന്നില്ല. എല്ലാം വ്യത്യസ്തമായിരുന്നു. ആ വ്യത്യസ്തതകളിലൂടെ എന്നിലെ നടനും സഞ്ചരിച്ചു. അത് മോഹൻലാൽ എന്ന നടനെ ഉഴുതുമറിക്കുന്ന അനുഭവം തന്നെയായി. അദ്ദേഹത്തിന്റെ തിരക്കഥകൾ മലയാള സിനിമയുടെ ചരിത്രം തന്നെ മാറ്റിയെഴുതി. ആ ചരിത്രത്തിനൊപ്പം നിൽക്കാൻ കഴിഞ്ഞതിൽ എനിക്ക് ഏറെ അഭിമാനവുമുണ്ട്.

പരിചയപ്പെട്ട കാലം മുതൽ വല്ലാത്തൊരു സ്‌നേഹം, മാഷ് എനിക്കുമേൽ ചൊരിഞ്ഞിരുന്നു. ഏറ്റവുമടുത്ത സുഹൃത്തിനെപ്പോലെ, മൂത്ത ജ്യേഷ്ഠനെപ്പോലെ, ഒരു ഗുരുനാഥനെപ്പോലെ… അങ്ങനെ പലരീതിയിലും ആ സ്‌നേഹം എന്നെ തേടിയെത്തി. തീക്കനൽപോലുള്ള തിരക്കഥകൾകൊണ്ട് വെള്ളിത്തിരയിൽ വിപ്ലവങ്ങൾ വിരിയിക്കാൻ അസാധ്യമായ ഒരു കഴിവ് മാഷിനുണ്ടായിരുന്നു. അതു നടനെന്ന നിലയിൽ ഞാനടക്കമുള്ള എത്രയോപേർക്ക് മുന്നേറാനുള്ള അവസരമൊരുക്കി. അഹിംസ മുതൽ നിരവധി ചിത്രങ്ങൾ… തെരുവിലേക്കും കടലിലേക്കും അതു ഞങ്ങളെ കൂട്ടിക്കൊണ്ടുപോയി. ഒരുപാടു ജീവിതങ്ങൾ പറഞ്ഞു തന്നു. പഠിപ്പിച്ചു. പിന്നെ പകർന്നാടാൻ പറഞ്ഞു. അങ്ങനെ ടി. ദാമോദരൻ എന്ന എഴുത്തുകാരനെയും മനുഷ്യനെയും ഞാൻ അടുത്തറിഞ്ഞുകൊണ്ടേയിരുന്നു.

പ്രായം കൊണ്ടും അനുഭവംകൊണ്ടും എന്നേക്കാൾ എത്രയോ സീനിയറായിരുന്നു ആ മനുഷ്യൻ. മാഷിനോടൊത്തുള്ള സംഭാഷണം പലപ്പോഴും മണിക്കൂറുകളോളം നീളുമായിരുന്നു. സിനിമയുടെ കാര്യത്തിൽ തുടങ്ങുന്ന സംസാരം ലോകമഹായുദ്ധങ്ങളും കടന്ന് ബൊളീവിയൻ കാടും ചെഗുവേരയും പിന്നിട്ട് ഫുട്‌ബോളിന്റെ ആരവങ്ങളിലായിരിക്കും മിക്കപ്പോഴും അവസാനിക്കുക. പ്രശസ്തനാകണമെന്ന ചിന്തയില്ലാതെയാണ് ഓരോ പ്രവൃത്തിയും അദ്ദേഹം ചെയ്തു തീർത്തത്. ഇതു പല പ്രതിഭകളുടെയും പ്രത്യേകതകൂടിയാണ്. മാഷിന്റെ ഒരു സ്‌ക്രിപ്റ്റിനു പിറകിൽ നീണ്ട നാളത്തെ പഠനവും ഗവേഷണവും ഉണ്ടാകും. അതിനപ്പുറം സമൂഹത്തെ നിരീക്ഷിച്ചറിഞ്ഞ അനുഭവവും പരന്ന വായനയും, ഒപ്പം സ്വന്തം അനുഭവങ്ങളും. ജീവിത യാഥാർഥ്യങ്ങളുടെ പരുക്കൻ പ്രതലങ്ങൾ തന്നെയായിരുന്നു പലപ്പോഴും അദ്ദേഹം സിനിമയ്ക്കായി വരച്ചിട്ടത്. അത് ഹിറ്റുകളുടെ പരമ്പരതന്നെ തീർത്തു.

subscribe

Midhun Jith Champion of Martial Arts
-മിഥുൻ ജിത്ത് / പി. ടി. ബിനു

Categories:
  • എൻജിനീയർ പക്ഷേ, ആയോധന കലകളിൽ മാസ്റ്റർ

കുട്ടിക്കാലം മുതൽ ആയോധനകലകൾ പഠിക്കാൻ ആരംഭിച്ചിരുന്നു. ഏഴു വയസു മുതൽ കരാട്ടേ പഠനം ആരംഭിച്ചു. എൻജിനീയറാകാൻ എനിക്കു താത്പര്യം ഉണ്ടായിരുന്നില്ല. ഷിപ്പിൽ ജോലി ചെയ്യാനായിരുന്നു ഇഷ്ടം. മറൈൻ എൻജിനീയറിങ്ങിൽ ആണ് ബിരുദമുള്ളത്. നോട്ടിക്കൽ സയൻസിനാണ് അപേക്ഷിച്ചത്, പക്ഷേ കിട്ടിയില്ല. ഷിപ്പിൽ പോകാൻ വേണ്ടി മാത്രമാണ് മറൈൻ എൻജിനീയറിങ് പഠിച്ചത്. പഠിക്കുന്ന സമയത്താണ് ഗിന്നസ് റെക്കോർഡ് (2012) ബ്രേക്ക് ചെയ്യുന്നത്. തൊട്ടടുത്ത വർഷം വേൾഡ് ചാംപ്യൻഷിപ്പ് കരസ്ഥമാക്കി.
കോഴ്‌സ് കഴിഞ്ഞ ഉടനെതന്നെ ഷിപ്പിൽ ജോലിക്കു കയറി. ധാരാളം രാജ്യങ്ങൾ സന്ദർശിച്ചു. പക്ഷേ, ഞാൻ സന്തോഷവാനായിരുന്നില്ല. എന്റെ മനസു നിറയെ കരാട്ടെയും കിക്ക് ബോക്‌സിങ്ങുമായിരുന്നു. അവധിക്കു നാട്ടിൽ തിരിച്ചെത്തിയപ്പോൾ ഷിപ്പിലെ ജോലി ഉപേക്ഷിക്കാം എന്ന തീരുമാനത്തിലെത്തി. ചില ബിസിനസ് ആരംഭിച്ചു. നാട്ടിൽ നിൽക്കാനും മാർഷ്യർ ആർട്‌സിൽ തുടരാനും വേണ്ടിയാണ് അതെല്ലാം ആരംഭിച്ചത്.

  • ലോകം ചുറ്റിക്കാണാൻ മോഹം

ലോകം ചുറ്റിക്കാണാനും വിവിധ സംസ്‌കാരങ്ങളും പാരമ്പര്യങ്ങളും അടുത്തറിയാനും പഠിക്കാനും വേണ്ടിയാണ് ഷിപ്പിൽ ജോലിക്കു കയറിയത്. എന്നാൽ, ഈ ജോലിക്കു പരിമിതികളുമുണ്ട്. വീടും നാടുമായി ബന്ധപ്പെട്ട ആവശ്യങ്ങളുമായി സഹകരിക്കാനോ, പങ്കെടുക്കാനോ കഴിഞ്ഞെന്നു വരില്ല. വ്യക്തിപരമായി അത്തരം ചില നഷ്ടങ്ങളും ഉണ്ടാകും.
50-ാളം രാജ്യങ്ങൾ സന്ദർശിച്ചിട്ടുണ്ട്. യൂറോപ്പ്, ഗൾഫ് രാജ്യങ്ങൾ, ആഫ്രിക്ക, ലാറ്റിനമേരിക്ക തുടങ്ങിയ രാജ്യങ്ങൾ സന്ദർശിക്കാൻ കഴിഞ്ഞിട്ടുണ്ട്.
സന്ദർശിച്ചതിൽ ഏറ്റവും ഇഷ്ടം ക്യൂബയാണ്. ക്യുബ ഭംഗിയുള്ള രാജ്യമാണ്. അവരുടെ നഗരങ്ങൾ, അവിടത്തെ കെട്ടിടങ്ങൾ.. അതിന്റെ പഴമ, പാരമ്പര്യം എല്ലാം എടുത്തുപറയേണ്ടതാണ്. അർജന്റീന സന്ദർശിച്ച വേളയിൽ മെസിയുടെ ജന്മനാടായ റൊസാരിയോ സന്ദർശിച്ചു. അതൊരു വലിയ അനുഭവമായിരുന്നു. ഒരു വർഷത്തിലേറെ തുടർച്ചയായി ട്രാവൽ ചെയ്തിട്ടുണ്ട്.

  • ഓൾ എലൈറ്റ് കരാട്ടെ ലീഗ്

കരാട്ടെയുമായി ബന്ധപ്പെട്ട വലിയൊരു ചാംപ്യൻഷിപ്പ് ആണ് സംഘടിപ്പിക്കുന്നത്. ഓൾ എലൈറ്റ് കരാട്ടെ ലീഗ് എന്നാണ് ടൂർണമെന്റിനു പേരിട്ടിരിക്കുന്നത്.
വിവിധ അസോസിയേഷനുകൾ ഇവിടെ കരാട്ടെ ടൂർണമെന്റുകൾ സംഘടിപ്പിക്കാറുണ്ട്. വിജയികൾക്ക് കൊടുക്കുന്നത് സർട്ടിഫിക്കെറ്റുകളും ട്രോഫികളും മാത്രമാണ്. വലിയ പണച്ചെലവില്ലാത്ത കാര്യങ്ങളാണിതെല്ലാം.
എന്നാൽ, ഓൾ എലൈറ്റ് കരാട്ടെ ലീഗ് നിലവിൽ നടക്കുന്ന കരാട്ടെ ടൂർണമെന്റകളിൽ നിന്നു വളരെ വ്യത്യസ്തമാണ്. ഓരോ മൂന്നു മാസം കൂടുമ്പോഴും കരാട്ടെ ലീഗ് സംഘടിപ്പിക്കും. വിജയികളാകുന്നവർക്ക് ആകർഷകമായ ക്യാഷ് പ്രൈസ് ലീഗ് കൊടുക്കും. കരാട്ടെ ടൂർണമെന്റുകളിൽ ക്യാഷ് പ്രൈസ് കൊടുക്കുന്നതു വളരെ കുറവാണ്. വേൾഡ് കരാട്ടെ ഫെഡറേഷൻ, ഏഷ്യൻ കരാട്ടെ ഫെഡറേഷൻ തുടങ്ങി മറ്റേതു സംഘടനകൾ കൊടുക്കുന്നതിനേക്കാളും ഉയർന്ന ക്യാഷ് പ്രൈസ് ആണു കൊടുക്കാൻ നിശ്ചയിച്ചിരിക്കുന്നത്. അതുമാത്രല്ല, വിജയികൾക്കു മികച്ച പ്രമോഷനും കൊടുക്കും.
ഒരു കരാട്ടെ ലീഗ് സംഘടിപ്പിക്കണമെന്നത് വർഷങ്ങളായുള്ള ആഗ്രഹമാണ്. 17 പ്രാവശ്യം ഞാൻ നാഷണൽ ചാംപ്യൻ ആണ്. 21 പ്രാവശ്യം സ്റ്റേറ്റ് ചാംപ്യൻഷിപ്പും നേടിയിട്ടുണ്ട്. നിരവധി ടൂർണമെന്റുകളിൽ പങ്കെടുക്കാൻ കഴിഞ്ഞിട്ടുണ്ട്. വിവിധ ടൂർണമെന്റുകളിൽ സ്റ്റുഡന്റ്‌സിനെയും കൂട്ടി പോയിട്ടുണ്ട്.

subscribe

മധുവസന്തം
-മധു

Categories:

ചിൽഡ്രൻസ് ഫിലിം സൊസൈറ്റി പ്രസിഡന്റ് ആകുന്നതിനു മുമ്പും എനിക്കു കുട്ടികളുടെ ചലച്ചിത്രങ്ങളോട താത്പര്യമുണ്ടായിരുന്നു. ഈ താത്പര്യം തന്നെയാണ് രണ്ടു കുസൃതികളുടെ കഥ പറഞ്ഞ ‘ബോബനും മോളിയും’ എന്ന ചലച്ചിത്രത്തിലും ‘വിടരുന്ന മൊട്ടുകൾ’ എന്ന കുട്ടികളുടെ ചലച്ചിത്രത്തിലും അഭിനയിക്കാൻ എനിക്ക് കരുത്തും ആഹ്ലാദവും തന്നത്.

ബോബനും മോളിയും അക്കാലത്ത് മലയാള മനോരമ ആഴ്ചപ്പതിപ്പിലൂടെ ലക്ഷക്കണക്കിന് വായനക്കാരുടെ ഹരമായി ടോംസിന്റെ കാർട്ടൂൺ കഥാപാത്രങ്ങളായിരുന്നു. അത് അടിസ്ഥാനമാക്കി ഒരു സിനിമ എടുക്കുമ്പോൾ സ്വാഭാവികമായും ചിത്രത്തിൽ പ്രാധാന്യം ആ കുട്ടികൾക്കായിരിക്കുമെന്ന് ആർക്കും ഊഹിക്കാവുന്നതേയുള്ളൂ. മറ്റു കഥാപാത്രങ്ങളൊക്കെത്തന്നെ അപ്രധാനമാകാനാണ് സാധ്യത. എന്നാൽ ഈ ചിന്തകളൊന്നും തന്നെ ഈ വേഷം സ്വീകരിക്കുന്നതിനോട് എനിക്ക് വിലങ്ങുതടിയായില്ല എന്നുമാത്രമല്ല കുട്ടികൾക്കായുള്ള ചിത്രമാണ് ഇതെന്ന ഒരൊറ്റ കാര്യമാണ് ഈ ചിത്രത്തിൽ അഭിനയിക്കാൻ എനിക്കു കരുത്തു നൽകിയത്. ആ ചിത്രത്തിൽ എന്റെ നായികയായത് വിജയശ്രീ ആയിരുന്നു. സാക്ഷാത്കരിക്കപ്പെടാതെ പോകുന്ന സ്‌നേഹത്തിന്റെ നൊമ്പരവുമായി വന്നിറങ്ങിയ കഥാപാത്രത്തിന് അക്കാലത്ത് ഒരുപാട് അഭിനന്ദനപൂച്ചെണ്ടുകൾ എനിക്കു സമ്മാനിച്ചു. പൊട്ടിച്ചിരിക്കു മുൻതൂക്കം നൽകിയ സിനിമയിലെ വേദന പ്രേക്ഷകർ ഏറ്റെടുത്തു എന്നുവേണം കരുതാൻ.

പി. സുബ്രഹ്മണ്യം സംവിധാനം ചെയ്ത ‘വിടരുന്ന മൊട്ടുകൾ’ എന്ന ചിത്രം പൂർണമായും കുട്ടികൾക്കു വേണ്ടി നിർമിച്ചതായിരുന്നു. അഭിനയിക്കാൻ താത്പര്യമുള്ള കുട്ടികളെ കണ്ടെത്തി കഥാപാത്രങ്ങളാക്കുകയായിരുന്നു ചിത്രത്തിൽ. ഇതിലെ അധ്യാപകന്റെ വേഷം അഭിനയിക്കുന്നതിന് എനിക്കു പൂർണമനസായിരുന്നു. വലിയ വെല്ലുവിളിയൊന്നുമില്ലാത്ത ആ കഥാപാത്രം സ്വീകരിക്കാൻ എന്നെ പ്രതിബദ്ധനാക്കിയത് കുട്ടികൾക്കായുള്ള ചലച്ചിത്രമായതുകൊണ്ട് മാത്രമാണ്.

subscribe

ഗന്ധർവസ്മരണയിൽ
-സനിത അനൂപ്

Categories:

കഥകളിലൂടെയും ചലച്ചിത്രകാവ്യങ്ങളിലൂടെയും പ്രണയത്തിന്റെയും മഴയുടെയും ഗന്ധർവസ്പർശം മലയാളികളുടെ മനസിനെ അനുഭവിപ്പിച്ച പത്മരാജൻ നമ്മെ വിട്ടുപിരിഞ്ഞിട്ട് 29 വർഷം പിന്നിടുന്നു. കഥാകാരനായ അദ്ദേഹം അഭ്രപാളിയിലും കഥകൾ പറഞ്ഞു പ്രേക്ഷകരെ വിസ്മയിപ്പിച്ചു. ഓരോ സിനിമയും ഓരോ അനുഭവമാണ്. തിയേറ്റർ വിട്ടിറങ്ങിയാലും അദ്ദേഹത്തിന്റെ കഥാപാത്രങ്ങൾ നമ്മോടൊപ്പം സഞ്ചരിക്കും. ചെറിയ ബജറ്റിൽ സൂപ്പർ ഹിറ്റ് സിനിമകൾ ഒരുക്കുകയും താരങ്ങളെ വാർത്തെടുക്കാനും കഴിഞ്ഞുവെന്നത് പത്മരാജൻ സിനിമകളുടെ മറ്റൊരു പ്രത്യേകതയും കൂടിയാണ്.

ഹരിപ്പാടിനടുത്ത് മുതുകുളം എന്ന സ്ഥലത്ത് 1945 മേയ് 23-നാണ്് പത്മരാജന്റെ ജനനം. മുതുകുളം സ്‌കൂളിൽ നിന്നു പ്രാഥമിക വിദ്യാഭ്യാസം പൂർത്തിയാക്കിയ ശേഷം ബിരുദപഠനം വരെ തിരുവനന്തപുരത്തായിരുന്നു. തിരുവനന്തപുരത്തെ ജീവിതവും പഠനവും അദ്ദേഹത്തിന്റെ ജീവിതത്തിൽ വലിയ മാറ്റങ്ങളുണ്ടാക്കി. 1965- ൽ ആൾ ഇന്ത്യ റേഡിയോയിൽ ഉദ്യോഗസ്ഥനായി. പിന്നീടാണ്, പത്മരാജൻ സിനിമയുടെ വലിയ ലോകത്തേക്കു പ്രവേശിക്കുന്നത്. തൂവാനത്തുമ്പികൾ, മൂന്നാം പക്കം, ഞാൻ ഗന്ധർവൻ, പെരുവഴിയമ്പലം, നമുക്കു പാർക്കാൻ മുന്തിരിത്തോപ്പുകൾ, ഒരിടത്തൊരു ഫയൽവാൻ, അരപ്പട്ട കെട്ടിയ ഗ്രാമത്തിൽ എന്നീ സിനിമകൾ മലയാളസിനിമയുടെ ചരിത്രത്തിന്റെ ഭാഗമാണ്.

കോളേജ് പഠനകാലത്തുതന്നെ സാഹിത്യലോകത്തേക്കു ചുവടുവയ്പ്പു നടത്തിയ പത്മരാജന്റെ കഥകൾ മൗലികത കൊണ്ടും ക്രാഫ്റ്റ് കൊണ്ടും വിമർശകരുടെ പോലും പ്രശംസ പിടിച്ചുപറ്റി. ചെറുകഥയിൽ മാത്രമായി ഒതുങ്ങിയില്ല, പത്മരാജന്റെ എഴുത്ത്. നക്ഷത്രങ്ങളേ കാവൽ പുതുമയാർന്ന അവതരണരീതി കൊണ്ടും അനുഭവലോകം കൊണ്ടും ഭാഷാസങ്കേതങ്ങൾ കൊണ്ടും വ്യത്യസ്തമാണ്. 1971-ൽ കേരള സാഹിത്യ അക്കാദമി അവാർഡ് ഈ നോവലിനു ലഭിച്ചു. വാടകയ്‌ക്കൊരു ഹൃദയം, ശവവാഹനങ്ങളും തേടി, ഇതാ ഇവിടെ വരെ, മഞ്ഞു കാലം നോറ്റ കുതിര, ഉദകപ്പോള, പ്രതിമയും രാജകുമാരിയും, പെരുവഴിയമ്പലം, രതിനിർവേദം തുടങ്ങിയ കൃതികൾ വായനക്കാരുടെയും നിരൂപകരുടെയും ഇഷ്ടം നേടി. 36 സിനിമകൾക്കാണ് തിരക്കഥയൊരുക്കിയത്. 18 സിനിമകൾ സംവിധാനം ചെ്തു. പ്രയാണം (1975) ആണ് പത്മരാജന്റെ ആദ്യ തിരക്കഥ. ഭരതന്റെ സംവിധാനത്തിൽ ഒരുങ്ങിയ പ്രയാണം ദേശീയതലത്തിൽ വരെ പ്രശംസ പിടിച്ചുപറ്റി.

subscribe

ടി.വി. ചന്ദ്രൻ എന്ന സ്‌നേഹം
-ഷാജി പട്ടിക്കര

Categories:

ഇന്ത്യൻ സിനിമയിലെ മികച്ച സംവിധായകരിൽ ഒരാളാണ് ടി.വി. ചന്ദ്രൻ. പ്രൊഡക്ഷൻ കൺട്രോളർ ആയി ആദ്യം വർക്ക് ചെയ്യുന്നത് അദ്ദേഹത്തിന്റെ പാഠം ഒന്ന് ഒരു വിലാപം എന്ന ചിത്രത്തിലാണ്. ഇത്രയും വലിയ ഒരു സംവിധായകനൊപ്പം തന്നെ ആദ്യ ചിത്രം. അത് എന്റെ ഭാഗ്യമാണ്. വലിയ സ്‌നേഹവും കരുതലും തരുന്ന ഒരു മനുഷ്യനാണ് അദ്ദേഹം. യാതൊരു ടെൻഷനുമില്ലാത്ത – അത് ചിത്രീകരണ സമയത്തായാലും അല്ലെങ്കിലും വളരെ കൂൾ ആയ, ചില സമയങ്ങളിൽ ഗൗരവക്കാരന്റെ വേഷമണിയുന്ന, ചില സമയങ്ങളിൽ ഒരു കൊച്ചു കുട്ടിയുടെ നിഷ്‌ക്കളങ്കതയുള്ള, ചില സമയങ്ങളിൽ ചെറിയ പിടിവാശി കാണിക്കുന്ന; എല്ലാത്തിനുമുപരി ഉള്ളിൽ നിറയെ സ്‌നേഹമുള്ള ഒരു വലിയ മനുഷ്യൻ.

താരങ്ങൾക്കും സാങ്കേതിക പ്രവർത്തകർക്കും നിർമാതാവിനുമൊം ഒരു പോലെ സ്വീകാര്യനായ മനുഷ്യൻ! യാതൊരു കൺഫ്യൂഷനും ഇല്ലാത്ത മികച്ച ടെക്‌നീഷ്യൻ. അതുകൊണ്ടു തന്നെ അദ്ദേഹത്തോടൊപ്പം വർക്ക് ചെയ്യാൻ വളരെ സുഖവുമാണ്. ‘പാഠം ഒന്ന് ഒരു വിലാപ’ത്തിൽ തുടങ്ങി അവസാനം റിലീസ് ചെയ്ത ‘പെങ്ങളില’ വരെ ഏഴ് ചിത്രങ്ങളിൽ ആണ് ഞാൻ പ്രൊഡക്ഷൻ കൺട്രോളർ ആയി വർക്ക് ചെയ്തത്. ആ തുടർച്ചയിൽ ‘കഥാവശേഷൻ’ മാത്രമാണ് ഞാൻ ഒപ്പമില്ലാതിരുന്നത്. തുടർച്ചയായി ഒരുമിച്ച് ഏറ്റവും കൂടുതൽ ചിത്രങ്ങളിൽ ചന്ദ്രൻ സാറിനൊപ്പം വർക്ക് ചെയ്ത ഏക പ്രൊഡക്ഷൻ കൺട്രോളറും ഞാൻ തന്നെയാണ്, രണ്ടാം സ്ഥാനത്ത് പട്ടണം റഷീദും.

ക്ലിയർ ഇമേജിന്റെ ബാനറിൽ ആര്യാടൻ ഷൗക്കത്ത് കഥയെഴുതി നിർമിച്ച ചിത്രമായിരുന്നു ‘പാഠം ഒന്ന് ഒരു വിലാപം’. തിരക്കഥയും സംഭാഷണവും സംവിധാനവും ചന്ദ്രൻ സാർ. മീരാ ജാസ്മിൻ, ഇർഷാദ്, പി. ശ്രീകുമാർ തുടങ്ങിയവരായിരുന്നു അഭിനേതാക്കൾ. ആ ചിത്രത്തിലൂടെ മീരാ ജാസ്മിനു മികച്ച നടിക്കുള്ള ദേശീയ അവാർഡും സംസ്ഥാന അവാർഡും ലഭിച്ചു. മികച്ച രണ്ടാമത്തെ നടനായി പി. ശ്രീകുമാറും മികച്ച രണ്ടാമത്തെ നടിയായി റോസ്‌ലിനും തെരഞ്ഞെടുക്കപ്പെട്ടു. മികച്ച കഥയ്ക്ക് നിർമാതാവായ ആര്യാടൻ ഷൗക്കത്തിനും മീരാ ജാസ്മിന്റെ ഉമ്മയായി അഭിനയിച്ച പല്ലവി കൃഷ്ണന് ശബ്ദം നൽകിയ നടി സീനത്തിന്റെ സഹോദരി കൂടിയായ അഫ്‌സത്തിന് മികച്ച ഡബ്ബിങ്ങിനും അവാർഡ് കിട്ടി. അങ്ങനെ പ്രൊഡക്ഷൻ കൺട്രോളറായുള്ള എന്റെ ആദ്യ അനുഭവം തന്നെ മധുരം നിറഞ്ഞതായി.

subscribe

കാനായി കുഞ്ഞിരാമൻ കലയും ജീവിതവും
-കാനായി കുഞ്ഞിരാമൻ / മിനി ഗോപിനാഥ്

Categories:

കാനായി കുഞ്ഞിരാമൻ, കല കൊണ്ടു മനഃപരിവർത്തനം എന്ന തന്റെ ലക്ഷ്യം സഫലമായതിന്റെ സന്തോഷത്തിലാണ്. ആരാധകരേറെയുള്ള ‘മലമ്പുഴ യക്ഷി’ യുടെ അൻപതാം പിറന്നാൾ ആഘോഷങ്ങളാണ് ഇതിനേറ്റവും വലിയ തെളിവെന്നും അദ്ദേഹം. സ്ത്രീയുടെ ആകർഷണീയത പുരുഷനില്ല. ഒരു സുന്ദരിയെ കാണുമ്പോൾ തന്നിലെ കലാകാരനുണരുകയും എത്ര മനോഹരമായി അതു നിർമിക്കാനാകും എന്ന ചിന്ത അനുനിമിഷം വളർന്നു തുടങ്ങുകയും ചെയ്യും. പ്രകൃതി നിയമമായ ലൈംഗീകത കുറ്റമല്ല, സന്താനോത്പാദനത്തിനു വേണ്ടിയുള്ളതാണ്. ഭൂമി മാതാവിന്റെ യോനിയിലൂടെ കടന്നുവന്നവയാണു കാണുന്നതൊക്കെയും. സ്‌ത്രൈണത വികാരമുളവാക്കും. നഗ്‌നതയുടെ പരസ്യമായ ആസ്വാദനത്തിലൂടെ യഥാർത്ഥത്തിൽ നടക്കുന്നതു ബോധവത്ക്കരണമാണ്. ഗുരുത്വാകർഷണകേന്ദ്രത്തിലേക്കു സകലതും പിടിച്ചെടുക്കുന്ന ഭൂമിയുടെ എല്ലാ വക്രതകളുമുള്ള സ്ത്രീയെ അതിജീവിച്ച ആദ്യത്തെ ആദമാകണം പുരുഷൻ, എന്നാണ് കനായിയുടെ അഭിപ്രായം. കാനായിയുമായുള്ള പ്രത്യേക അഭിമുഖം.

  • ബാല്യവും മണ്ണിൽ കുഴച്ചുണ്ടാക്കിയ ശിൽപ്പങ്ങളും

എൺപതുവയസു കഴിഞ്ഞിട്ടും കുഞ്ഞുങ്ങളുടെ നിഷ്‌കളങ്കതയോടെയും യുവാവിന്റെ ചുറുചുറുക്കോടെയും ശിൽപ്പത്തൊഴിലാളിയായി ജീവിക്കുന്നതിനു പിന്നിലെ കാരണം കാലം പകർന്നുതന്ന കരുത്താണ്. കാസർഗോഡുള്ള ചെറുവത്തൂർ ഗ്രാമത്തിലെ കുട്ടമത്ത് രാമന്റെയും മാധവിയുടെയും മൂത്ത പുത്രനായി ജനനം. കുട്ടിക്കാലത്തു ചുവരിലെഴുതിയ ചിത്രങ്ങൾ അച്ഛന്റെ കോപവും അമ്മയുടെ വാത്സല്യവും ഒരേ സമയം ഏറ്റ് വാങ്ങി. അച്ഛൻ തന്നെ സ്‌നേഹിക്കാതെ ഏകപക്ഷീയമായി നന്നാക്കാൻ ശ്രമിച്ചു. അച്ഛനോടു പൊരുത്തപ്പെടാനാവാതെ അമ്മ തറവാട്ടിലേക്കു മടങ്ങി. മകനെ കാണാനുള്ള അവകാശവും നിഷേധിക്കപ്പെട്ടു. അച്ഛന്റെ രണ്ടാം വിവാഹത്തോടെ ബാല്യം ദുരിത പൂർണമായിത്തീർന്നു. പാടത്തും പറമ്പിലും കൂലിക്കാരനായി പണിയെടുത്തു. അക്കാലത്തെ തൊഴിലാളികളായ മാറു മറയ്ക്കാത്ത സ്ത്രീകളുടെ അർദ്ധനഗ്‌നശിൽപ്പങ്ങളുൾപ്പെടെ പല രൂപങ്ങളും ചെളിമണ്ണിൽ കുഴച്ചുണ്ടാക്കി. അവരതാസ്വദിക്കുകയും അഭിനന്ദിക്കുകയും ചെയ്തു.

നീലേശ്വരം രാജാസ്‌കൂളിലെ പഠനകാലത്തു ചിത്രകലാധ്യാപകനായ കൃഷ്ണക്കുട്ടൻമാഷാണ് എന്നിലെ കലാകാരനെ പ്രോത്സാഹിപ്പിച്ചത്. അമ്മാവനായ കുഞ്ഞപ്പുമാഷും പിന്തുണയേകി. സംഗീതം, ചിത്രകല തുടങ്ങിയവയുടെ മത്സരങ്ങളിൽ നിരവധി സമ്മാനങ്ങളും നേടി. ലക്ഷ്യബോധം കലയും വായന ഇഷ്ട തോഴനുമായി. സംശയ നിവാരണങ്ങൾക്കു് പുസ്തകങ്ങളെ ആശ്രയിക്കുക എന്നത് എക്കാലത്തെയും ശീലമായി.

  • നെഹ്‌റുവിന്റെ ചിത്രം

1956-ൽ നെഹ്‌റുവിന്റെ പൂർണകായ ചിത്രം ടെയ്‌ലേഴ്‌സ് യൂണിയന്റെ കണ്ണൂരിൽ നടന്ന ജില്ലാ സമ്മേളനത്തിനു വേണ്ടി വരച്ചു. ആവശ്യം കഴിഞ്ഞു ജൗളിക്കടയുടെ മുന്നിൽ ഇതു പ്രദർശിപ്പിച്ചു. പ്രധാനമന്ത്രി ജവഹർലാൽ നെഹ്‌റു എറണാകുളത്തു നടന്ന കോൺഗ്രസ് സമ്മേളനത്തിൽ പങ്കെടുത്ത ശേഷം മറ്റൊരു യോഗത്തിനു വേണ്ടി മംഗലാപുരത്തേക്കു പോകുന്ന വേളയിൽ കൽക്കരി വണ്ടി വെള്ളമെടുക്കാൻ ചെറുവത്തൂരിൽ നിർത്തി. തന്റെ ചിത്രം കണ്ടതും നെഹ്‌റു അതിനരുകിലെത്തി ആസ്വദിച്ചു. പത്രങ്ങളിലെല്ലാം ഇതു വലിയ വാർത്തയായി. പക്ഷേ, തല തിരിഞ്ഞവൻ കലാകാരൻ എന്ന അച്ഛന്റെ കാഴ്ചപ്പാടിനു യാതൊരു ചലനവും സൃഷ്ടിക്കാനായില്ല.

  • ഉപരിപഠനവും

പത്താം ക്ലാസ് ജയിച്ചതും അമ്മാവന്റെ സുഹൃത്തിനൊപ്പം ശാന്തിനികേതനിൽ പഠിക്കണം എന്ന ആഗ്രഹത്താൽ നാടു വിടാൻ തീരുമാനിച്ചു. അച്ഛൻ ചില്ലിക്കാശു പോലും നൽകിയില്ല. അമ്മയോടു യാത്ര ചോദിച്ചപ്പോൾ കെട്ടിപ്പിടിച്ചു കണ്ണീരോടെ പറഞ്ഞത്, എവിടെയായാലും ആരോഗ്യം സൂക്ഷിക്കണമെന്നും ചീത്തപ്പേരുണ്ടാക്കരുതെന്നുമായിരുന്നു. തന്റെ ദൗർബല്യമായ അമ്മയുടെ വാക്കുകൾ പാലിക്കുന്നതിലൂടെ ധീരനായ കലാകാരൻ എന്ന വിശേഷണം നിലനിർത്തുന്നു.
മദ്രാസിലെ സ്‌കൂൾ ഓഫ് ആർട്‌സിൽ, ശിൽപ്പകല ഐശ്ചിക വിഷയമായെടുത്തു പഠനം തുടങ്ങി. ചിത്രകാരനായ റോയി ചൗധരിയായിരുന്നു പ്രിൻസിപ്പൽ. കെ.സി.എസ്. പണിക്കർ കരുത്തും തണലും പകർന്നു. പ്രൊഫ എസ്. ധനപാൽ ശിൽപ്പകലയിലെ ഗുരുവായിരുന്നു. സാമ്പത്തിക ബുദ്ധിമുട്ടുകൾ പരിഹരിക്കാൻ കോളേജ് ക്യാന്റീനിൽ പണിയെടുക്കുകയും അവിടെ താമസിക്കുകയും ചെയ്തു. വലിയ മുടിത്തെയ്യവും തിറയുമാണു പഠന കാലത്തു വലിയ ശിൽപ്പങ്ങൾ നിർമിക്കാനുള്ള പ്രചോദനമായത്. തകര ശിൽപ്പനിർമാണരംഗത്തു തുടക്കക്കാരനാകാൻ കഴിഞ്ഞു. വിദ്യാർത്ഥിയായിരിക്കെ സ്വന്തമായ ശൈലിയിലൂടെ വ്യത്യസ്തനാകാൻ ശ്രമം നടത്തിയിരുന്നു.

subscribe

ജോഷിക്കവിതാസൂര്യൻ ഉറങ്ങുന്നില്ല
-കുരീപ്പുഴ ശ്രീകുമാർ

Categories:

ഏതു ഭാഷയിലെയും പോലെ മറാത്തിയിലും കവിതയുണ്ടായത് കൃഷിയിടങ്ങളിലാണ്. ഇന്ത്യയിൽ അത് കീഴാളരുടെ സ്വന്തമാണ്. അതിനൊരു പ്രത്യേക കാരണമുള്ളത് ഇന്ത്യയിലെ ജാതി വ്യവസ്ഥയാണ്. കുലത്തൊഴിൽ എന്ന പേരിൽ അടിമപ്പണി അടിച്ചേൽപ്പിച്ചപ്പോൾ അക്ഷരം പഠിക്കാനുള്ള സന്ദർഭം ഇല്ലാതായി. ചേറിൽ പണിയെടുക്കുന്നവന് എന്തിനാണ് എഴുത്തും വായനയും! അതിനാൽ തോന്നിയ കവിതകൾ അവർ ഉച്ചത്തിൽ പാടി. അതിൽ ദു:ഖവും സ്വപ്‌നവും എല്ലാം ഉണ്ടായിരുന്നു.

നവോത്ഥാന പരിശ്രമങ്ങൾക്കുശേഷം എല്ലാർക്കും പഠിക്കാമെന്നായി. ചൊൽക്കവിതകൾ അക്ഷരലാവണ്യത്തിൽ ജ്വാലകളായി. മലയാളത്തെക്കാൾ മറാത്തിയിലാണ് കീഴാളജീവിതം രേഖപ്പെടുത്തപ്പെട്ടത്. ഒ.ടി.ജെ മേനോൻ അടക്കമുള്ള ആദരണീയരായ കേരളീയർ മറാത്തിക്കവിതയിലെ കറുത്തലിപികളെ ലോകത്തിനു മുന്നിലെത്തിച്ചു.

രണ്ടു ധാരകളും മറാത്തിയിൽ സജീവമായി. ഒപ്പം അമിതകാൽപ്പനികതയുടെ പൂവൻപഴഭംഗികളെ മറാത്തിക്കവികൾ വലിച്ചെറിഞ്ഞു. ജാഗ്രതയുടെ പരുക്കൻ ഭാഷ അവർ രൂപപ്പെടുത്തിയെടുത്തു. നിതാന്തജാഗ്രത മറാത്തിക്കവിതയുടെ കൊടിയടയാളമായി. ഡോ. ശ്രീപാദ് ബാലചന്ദ്ര ജോഷിയുടെ കവിതകൾ ഉണർന്നിരിക്കുന്നവയാണ്. അതീവശ്രദ്ധയോടെ, സമൂഹത്തിലെ ഓരോ ചലനവും ആ കവിതകൾ സ്വാംശീകരിച്ചിരിക്കുന്നു. സൂര്യപ്രകാശം ചാന്ദ്രപ്രകാശമായി രാവിലും ഉണർന്നിരിക്കുന്നതുപോലെ ആ സൗന്ദര്യമണ്ഡലം തെളിഞ്ഞുനിൽക്കുന്നു. നക്ഷത്രക്കണ്ണുകളോടെ രാപകലില്ലാതെ കണ്ടിരിക്കുന്നു.
വിയോജിപ്പുകളുടെ കലയാണല്ലോ കവിത. ജോഷിക്കവിതകൾ വിയോജിപ്പുകളുടെ സേനാവ്യൂഹമാണ്. ചോദ്യംചെയ്യലും ഭേദ്യംചെയ്യലും നെടുവീർപ്പുകളും പരിഹാസബുള്ളറ്റുകളും ഈ കവിതകളിലുണ്ട്.

മഴയെ കാത്തുകാത്തു വിണ്ടുകീറിയ മണ്ണും നഗ്‌നരെ പരിശോധിക്കാൻ എത്തിയവർ സ്വയം നഗ്‌നരായി തിരിച്ചുപോകുന്നതും വയലുകളിൽ മുളച്ചുപൊന്തുന്ന തോക്കുകളും നനഞ്ഞു കുതിർന്നുപോയ സന്ദേശവും വഴിതെറ്റിപ്പോയ കുതിരകളും ഗ്രൂപ്പ് കൊടികളും സംസാരിക്കുന്ന വിടവുകളും ഈ കാവ്യവഴിയിലുണ്ട്. ജാതിയില്ലാത്ത മഴയും അപ്പുപ്പൻതാടിപോലെ പറക്കുന്ന മനസും തുറന്ന സ്ഥലത്തുപോലും ലഭിക്കാത്ത ശുദ്ധവായുവും ഉള്ളിലെ കൊടുങ്കാറ്റും ഒരിക്കലും എത്തിപ്പെടാത്ത ഇടവും മെല്ലെ മെല്ലെ വിടർന്നുവരുന്ന ചിറകുകളും സത്യത്തിന്റെ പൂക്കളും മഴയോടുള്ള വെറുപ്പുകലർന്ന സമീപനവും സ്വന്തം കണ്ണീർ തുടയ്ക്കുന്ന മണ്ണും വെയിലും തണലും തമ്മിലുള്ള കണ്ണുപൊത്തിക്കളിയും കൊടുങ്കാറ്റു ബാധിക്കാത്ത സൂര്യനും ബാധിക്കുന്ന സൂര്യഭക്തരും ഭ്രാന്തൻമാരുടെ ആശുപത്രിക്കായി നീക്കിവയ്ക്കപ്പെട്ട സ്ഥലത്തു വിതയ്ക്കപ്പെട്ട വിത്തും വെള്ളത്തിനടിയിൽ ഒരുങ്ങുന്ന വീടും ഈ കാവ്യഭൂമിയിലുണ്ട്.

subscribe

ക്ഷേത്രനഗരികളിലേക്കുള്ള യാത്രകൾ
-ഷാഹിന ഇ. കെ

Categories:

ബംഗളൂരുവിൽ നിന്ന് ഏതാണ്ട് 60 കിലോമീറ്റർ യാത്രചെയ്താൽ നന്ദി ഗ്രാമത്തിൽ (ചികബല്ലാപ്പൂർ ജില്ല) നന്ദി കുന്നുകളുടെ അടിവാരത്തിൽ ഒൻപതാം നൂറ്റാണ്ടിൽ പണിത ഈ ക്ഷേത്രസമുച്ചയത്തിൽ എത്താം. നന്ദിക്കുന്നുകളിൽ പുലരി വരുന്നതും കോട നീങ്ങുന്നതും കാണാൻ വെളുപ്പിനെ ഇറങ്ങിയതാണ് ഞാനും സ്‌നേഹിത ജിതയും. അവിടെ നിന്നാണു കുറച്ചുകൂടി യാത്ര ചെയ്ത് ഭോഗനന്ദീശ്വരക്ഷേത്രത്തിലെത്തിയത്. ശിവന് സമർപ്പിതമായ ക്ഷേത്രമാണ് ഭോഗനന്ദീശ്വര. ഇത് കർണാടകയിലെ ഏറ്റവും പഴക്കമുള്ള ക്ഷേത്രങ്ങളിലൊന്നായി കരുതപ്പെടുന്നു. ഒൻപതാം നൂറ്റാണ്ടിലാണ് ഇതു പണിതിട്ടുള്ളത്. ഗംഗാ, ചോളാ, ഹൊയ്‌സാല, വിജയനഗര സാമ്രാജ്യങ്ങളുടെ പരിരക്ഷണയിൽ വന്നിട്ടുള്ള, ദ്രവീഡിയൻ വാസ്തുരീതിയിലുള്ള ഈ ക്ഷേത്രസമുച്ചയ പരിസരം ശാന്ത ഗംഭീരമാണ്. മധ്യകാലത്തിനു ശേഷം ചിക്ബല്ലാപുരയിലെ പ്രാദേശിക ഭരണാധികാരികളും മൈസൂർ രാജാക്കന്മാരായ ഹൈദരാലിയും ടിപ്പു സുൽത്താനും ഈ പ്രദേശം നിയന്ത്രണത്തിൽ കൊണ്ടു വന്നതായി പറയുന്നു. ടിപ്പുവിനു ശേഷം അവ ബ്രിട്ടീഷ് നിയന്ത്രണത്തിൽ വന്നു. പച്ചപ്പും നിശ്ശബ്ദതയും നിറഞ്ഞ പരിസരങ്ങൾ കൊണ്ടാണ് ഈ ഇടത്തോട് ഏറെ ഇഷ്ടംതോന്നിയത്. ക്ഷേത്ര സമുച്ചയം പണിതിട്ടുള്ള ഭൂമിയിലെ നേർത്ത നനവുള്ള പുല്ലിൽ നിറയെ ഓറഞ്ചു നിറമുള്ള വലിയ പൂക്കൾ വീണുകിടക്കുന്നു. ഏതോ പേരറിയാ പൂവ്. ഓരോ കാറ്റിലും അതിന്റെ എണ്ണം കൂടുന്നതും നോക്കി എത്ര നേരമിരുന്നാലും മടുപ്പുണ്ടാവില്ല.

കൽത്തൂണുകളും കൊത്തിവയ്പ്പുകളും നിറഞ്ഞ ക്ഷേത്രത്തിൽ രണ്ടു പ്രധാന പ്രതിഷ്ഠകളാണ് ഉള്ളത്. അരുണാചലേശ്വരനും ഭോഗനന്ദീശ്വരനും. രണ്ടും ശിവനെ പ്രതിനിധീകരിക്കുന്നു. ശിവന്റെ കുട്ടിക്കാലവും യൗവനവുമാണത്രെ ഇവ രണ്ടും. അവിടെ കാണാവുന്ന മറ്റൊരു ചെറിയ പ്രതിഷ്ഠ ഉമാമഹേശ്വരന്റേതാണ്. ശിവ പാർവതി വിവാഹത്തെ സൂചിപ്പിക്കുന്നു ഇത് എന്നാണു കരുതപ്പെടുന്നത്. അതു കൊണ്ട് കൂടിയാവാം വിവാഹച്ചടങ്ങുകൾക്കും നവ വിവാഹിതരുടെ സന്ദർശനങ്ങൾക്കും ഇവിടെ ഏറെ തിരക്കുമുണ്ട്. ശൈത്യം നിറഞ്ഞ കൽത്തറകളിലൂടെ ക്ഷേത്രത്തിനുള്ളിലൂടെ കടന്നുപോകുമ്പോൾ ചെറിയ കൽമണ്ഡപത്തിൽ രണ്ടു വിവാഹങ്ങളുടെ നിറഭംഗികൾ കൂടി കാണാനായി. പ്രധാന ചടങ്ങുകൾ കാണാൻ കുറച്ചു നേരം അവർക്കൊപ്പം ചേരുകയും ചെയ്തു.

subscribe

TATA Altroz
-പി.കെ.ബി

Categories:

ഗ്ലോബൽ എൻസിഎപി ക്രാഷ് ടെസ്റ്റിൽ ഫൈവ് സ്റ്റാർ റേറ്റിങ് കരസ്ഥമാക്കിയ ടാറ്റയുടെ പുതിയ ഹാച്ച്ബാക്ക് അൾട്രോസ് നിരത്തിലിറങ്ങി. വൻ ബുക്കിങ് ആണ് വാഹനത്തിനു ലഭിക്കുന്നത്. ആകർഷങ്ങളായ ഓഫറുകളും കമ്പനി നൽകുന്നു. നിരത്തിലിറങ്ങുന്നതിനു മുമ്പുതന്നെ ടാറ്റയുടെ ആൾട്രോസ് നിരവധി അംഗീകാരങ്ങൾ നേടിയിട്ടുണ്ട്. ക്രാഷ് ടെസ്റ്റിൽ ഫൈവ് സ്റ്റാർ റേറ്റിങ് കരസ്ഥമാക്കുന്ന ഇന്ത്യയിലെ രണ്ടാമത്തെ വാഹനമെന്ന ഖ്യാതിയും അൾട്രോസിനാണ്. ടാറ്റയുടെ നെക്‌സോൺ കോംപാക്ട് എസ്.യു.വി ആയിരുന്നു ഫൈവ് സ്റ്റാർ റേറ്റിങ് കരസ്ഥമാക്കിയ ഇന്ത്യയിലെ ആദ്യ വാഹനവും. മുൻവശം, വശങ്ങൾ ഉൾപ്പെടെ ഗ്ലോബൽ എൻ-ക്യാപ് ക്രാഷ് ടെസ്റ്റുകളിലൂടെ അൾട്രോസിന്റെ ഘടനയും സുരക്ഷയും വിലയിരുത്തി. കുട്ടികളുടെ സുരക്ഷയിൽ ഈ വാഹനത്തിന് ത്രീ സ്റ്റാർ റേറ്റിങ് ഉണ്ട്.

ഡ്യുവൽ എയർബാഗ്, സ്പീഡ് സെൻസിങ് ഓട്ടോ ഡോർ ലോക്ക്, എബിഎസ്, സീറ്റ് ബെൽറ്റ് റിമൈൻഡർ, ഇബിഡി, ചൈൽഡ് ലോക്ക്, സെൻട്രൽ ലോക്ക്, കോർണർ ലൈറ്റ്, ഇമ്മോബിലൈസർ, റിയർ ഡിഫോഗർ, പെരിമെട്രിക് അലാറം സിസ്റ്റം എന്നിവ ടാറ്റയുടെ അൾട്രോസിന് സുരക്ഷയൊരുക്കുന്നു.

subscribe

ചിത്രകലയും ആത്മാന്വേഷണങ്ങളും
-ഡോ. സുനിൽ ജോസ്

Categories:

അത്ഭുതങ്ങളുടെ ആകാശവും അനുഭൂതികളുടെ ഭൂഖണ്ഡങ്ങളും ആത്മവിസ്മൃതിയുടെ കടലും ഒരേ ക്യാൻവാസിൽ വിരിയുന്ന വിസ്മയമാണ് ഫാ. റോയി തോട്ടം എസ്.ജെയുടെ ചിത്രങ്ങൾ. ക്യാൻവാസിനെ തന്റെ വേദപുസ്തകമാക്കി അതിൽ സമത്വത്തിന്റെയും സൗന്ദര്യത്തിന്റെയും സമാധാനത്തിന്റെയും പുതിയലോകങ്ങൾ വരച്ചുചേർക്കുന്ന ഈ പുരോഹിതൻ ക്രൈസ്തവ ഭാരതീയ തത്വദർശനങ്ങളെ ചിത്രങ്ങളിൽ സമന്വയിക്കുന്നു. പീഡിതർക്കും നിന്ദിതർക്കും സമത്വത്തിന്റെ വാതിലുകൾ തുറക്കുവാൻ പ്രാർത്ഥിക്കുന്നതോടൊപ്പം ഈ പുരോഹിതൻ വർണങ്ങളിൽ മുക്കിയ ബ്രഷും കൈയിലെടുക്കുന്നു. ക്യാൻവാസിൽ മനുഷ്യമനസിലേക്കുള്ള പോരാട്ടങ്ങളെ തനിമയോടെ ആവിഷ്‌ക്കരിക്കുന്നു.

മരംകയറിയും മലകളിലും പാറക്കെട്ടുകളിലും പ്രകൃതിയോടിണങ്ങി സമയം ചെലവിടുകയും ചെയ്ത ഒരുകുട്ടിക്കാലം മരങ്ങാട്ടുപിള്ളി തോട്ടത്തിൽ കുടുംബാംഗമായ റോയിയച്ചനിലെ ചിത്രകാരനെ ഉണർത്തിയെടുത്തത്. ജസൂട്ട് സൊസൈറ്റിയിൽ ചേർന്നപ്പോഴാണ് ആറു വയസ് മുതൽ താൻ ചെയ്യുന്ന കലാപ്രവർത്തനത്തിനു പുതിയ മാനങ്ങളും പ്രോത്സാഹനങ്ങളും ലഭിച്ചുതുടങ്ങിയത്. പുരോഹിതനായശേഷം ഇംഗ്ലണ്ടിൽ കലാപഠനത്തിനായി പോയത് പാശ്ചാത്യകലാസങ്കേതങ്ങളെക്കുറിച്ചു കൂടുതൽ അറിയാൻ ഇടയാക്കി. അതു ചിത്രകലയെ ഒരു ഹോബിയായല്ല മറിച്ച് മനുഷ്യനു വേണ്ടിയുള്ള വലിയ കലാപ്രവർത്തനമായി തിരിച്ചറിയാൻ സഹായിച്ചു. അതോടെ കല റോയിയച്ചന് പ്രേഷിതവൃത്തിയും ജീവിതനിയോഗവുമായിമാറി.

”എന്റെ ചിത്രങ്ങൾ ആന്തരികലോകത്തെയാണ് അടയാളപ്പെടുത്തുന്നത്. എന്നെ സംബന്ധിച്ച് കലാജീവിതം ഒരു ആന്തരികയാത്രയാണ്. ഓരോ കലാപ്രക്രിയയും പുറപ്പാടും പീഡാസഹനവും ഉയിർത്തെഴുന്നേൽപ്പുമാണ്” എന്നാണ് റോയിച്ചൻ തന്റെ കലാജീവിതത്തെ വിലയിരുത്തുന്നത്. ‘ഈശാവാസ്യമിദം സർവം യത്കിഞ്ചിത് ജഗത്വം ജഗത്’- ഉപനിഷത്തുകളിൽ പ്രഥമസ്ഥാനം നൽകി ആദരിക്കുന്ന ഈശാവാസ്യോപനിഷത്തിന്റെയും പ്രപഞ്ചം മുഴുവൻ ഈശ്വരസാന്നിധ്യം തിരിച്ചറിഞ്ഞ ഇഗ്‌നേഷ്യൻ ആധ്യാത്മികതയുടെയും വേറിട്ട വഴികളെ റോയിയച്ചൻ ചിത്രഭാഷയിൽ അവതരിപ്പിച്ചിട്ടുണ്ട്. കേവലമതത്തിന്റെ വിചാരധാരകൾക്കപ്പുറത്ത് ഈശ്വരസങ്കൽപ്പത്തെക്കുറിച്ചുള്ള വിശാലവീക്ഷണവും മാനുഷികമായ വിചാരധാരകളും അദ്ദേഹത്തിന്റെ രചനകൾ പങ്കുവയ്ക്കുന്നു.

ആത്മാന്വേഷണങ്ങളുടെ-നീതിയും സമാധാനവും നിഷേധിക്കപ്പെടുന്നവരുടെ നീതിക്കു വേണ്ടി സ്വപ്നം കാണുന്നവരുടെ സ്ത്രീയുടെ സ്വാതന്ത്ര്യത്തെ ആഘോഷിക്കുന്നവരുടെ പക്ഷം ചേരുന്ന-ചിത്രങ്ങളാണ് രചനകളിൽ ഏറെയും. ക്രിസ്തുദർശനത്തോടും സഹനജീവിതത്തോടും ചേർന്നു നിൽക്കുന്നവയാണ് അവയുടെ അകപ്പൊരുൾ.

subscribe