Jul 11, 2019

You Are Here: Home / 11 Jul 2019

ഗോരുവാങ്ക വാലകനെ…
-മോഹൻലാൽ

Categories:

കോപ്പൻ ഹേഗനിൽ വച്ച് വളരെ യാദൃശ്ചികമായാണ് എ.എൻ.ആർ. എന്ന ചുരുക്കപ്പേരുള്ള അക്കിനേനി നാഗേശ്വര റാവുവിനെ ഞാൻ പരിചയപ്പെടുന്നത്. പ്രിയദർശന്റെ ‘ഗാണ്ഡീവം’ എന്ന തെലുങ്ക് സിനിമയുടെ ചിത്രീകരണം നടക്കുമ്പോഴാണത്. ഒരു പക്ഷേ, കാലം എനിക്കായി നീക്കിവച്ച സൗഭാഗ്യങ്ങളിലൊന്നായിരിക്കാം കോപ്പൻഹേഗനിലേക്കുള്ള എന്റെ ആ യാത്ര. നാഗേശ്വരറാവു സാറിനൊപ്പം ബാലകൃഷ്ണയും, നാഗേഷും റോജയുമെല്ലാം ‘ഗാണ്ഡീവ’ ത്തിൽ അഭിനയിച്ചിരുന്നു.

എസ്.പി. ബാലസുബ്രഹ്മണ്യവും എം.ജി. ശ്രീകുമാറും അനുരാധാശ്രീറാമും ചേർന്നാലപിച്ച ‘ഗോരുവാങ്കവാലകനെ…’എന്നാരംഭിക്കുന്ന ഗാനരംഗത്ത് നാഗേശ്വരറാവു സാറിനൊപ്പം ഞാനും അഭിനയിക്കണമെന്ന് പ്രിയൻ പറഞ്ഞപ്പോൾ, സിനിമ എനിക്ക് നൽകിയ മഹാഭാഗ്യങ്ങളിലൊന്നായി ഞാനതിനെകണ്ടു. കാരണം ഇന്ത്യൻ സിനിമയിലെ അത്ഭുതപ്രതിഭാസമായ സാറിനൊപ്പം അഭിനയിക്കാൻ ഏതൊരാർട്ടിസ്റ്റും ആഗ്രഹിക്കാതിരിക്കില്ല. ശരിക്കും ഒരു ഹോളിഡെ ആഘോഷം പോലെയായിരുന്നു സാറിനൊപ്പം ചെലവഴിച്ച ദിവസങ്ങൾ. എം.എം. കീരവാണി സംഗീതം നൽകിയ ആ ഗാനരംഗത്തിന്റെ ചിത്രീകരണം പോലും വളരെ രസകരമായിരുന്നു. എഴുപതു പിന്നിട്ട സാർ ഇരുപതുകാരന്റെ ചുറുചുറുക്കോടെ ആടിപ്പാടി അഭിനയിക്കുന്നത് കണ്ട് ഞാനും വിസ്മയിച്ചു. പെരുവിരൽ മുതൽ ശിരസ് വരെ നടനം മാത്രം നിറഞ്ഞുനിന്ന അദ്ദേഹത്തിന്റെ ശരീരഭാഷ പലപ്പോഴും എന്നെ അത്ഭുതപ്പെടുത്തി.

ഗാണ്ഡീവത്തിന്റെ ചിത്രീകരണകാലത്ത് (1994) നാഗേശ്വരറാവു സാറിനെക്കുറിച്ച് എനിക്ക് തോന്നിയ പ്രധാനപ്പെട്ട ഒരു കാര്യം സെറ്റിലുള്ളവരെല്ലാം അദ്ദേഹത്തോട് വളരെയധികം ആദരവു കലർന്ന ഒരകലം സൂക്ഷിച്ചിരുന്നുവെന്നതാണ്. അത് മറ്റൊന്നും കൊണ്ടല്ല, കലാരംഗത്ത് ഏറ്റവും ഉന്നതനായ ഒരു വ്യക്തിയോട് നമ്മൾ കാണിക്കുന്ന സ്‌നേഹവും ബഹുമാനവും തന്നെയാണത്. എല്ലാവരും അദ്ദേഹത്തെ ഒരുപാടൊരുപാട് ഇഷ്ടപ്പെട്ടിരുന്നുവെങ്കിലും, അടുത്ത് ചെന്ന് സംസാരിക്കാൻ പലർക്കും നേരിയ ഭയമായിരുന്നു.

കോപ്പൻഹേഗനിൽ സാറ് താമസിച്ച ഹോട്ടലിൽ ആയിരുന്നു ഞാനും താമസിച്ചത്. രാവിലെ മിക്കവാറും ഞങ്ങൾ കാണുന്നത് ഡൈനിങ്ഹാളിൽ വച്ചായിരുക്കും. മറ്റെല്ലാവർക്കും ആവശ്യമുള്ള ഭക്ഷണം സപ്ലെയർമാർ തീൻമേശയിലെത്തിക്കുമ്പോൾ, സാറ് മാത്രം തനിക്കാവശ്യമുള്ള ഭക്ഷണം സ്വയം എടുത്ത് കഴിക്കുമായിരുന്നു. പഞ്ചസാരയും കാപ്പിപ്പൊടിയും, ചൂടുവെള്ളവും കൊണ്ട് വന്ന് തന്റെ ടേസ്റ്റിനനുസരിച്ച് സാറ് തന്നെ കാപ്പി ഉണ്ടാക്കും. ഇതുകണ്ടപ്പോൾ ഞാൻ പറഞ്ഞു, ‘സാർ ഇരിക്കൂ, കാപ്പി ഞാനെടുത്തുതരാം’. തുടർന്നുള്ള ദിവസങ്ങളിൽ സാറിനുള്ള ബ്രേക്ക് ഫാസ്റ്റ് ഞാനെടുത്തു കൊടുക്കുകയായിരുന്നു. അതദ്ദേഹത്തിന് വലിയ സന്തോഷമുണ്ടാക്കി എന്നാണ് തോന്നുന്നത്. വളരെ സീനിയറായ ഒരാർട്ടിസ്റ്റിനോട് കാണിക്കേണ്ട മര്യാദ മാത്രമേ ഞാൻ കാണിച്ചിട്ടുള്ളൂ.

പിന്നീട് എന്റെ ഭാര്യയുടെ അച്ഛൻ (ബാലാജി) ചോദിച്ചു: ‘ലാലിന്റെ പി.ആർ.ഒ. ആണോ നാഗേശ്വരറാവു?’ എനിക്ക് കാര്യം മനസിലായില്ല. ‘നാഗേശ്വരറാവു പോകുന്നിടത്തൊക്കെ ലാലിനെക്കുറിച്ച് വളരെ മതിപ്പോടെയാണ് സംസാരിക്കുന്നത്. സീനിയറായ ആർട്ടിസ്റ്റുകളെ എങ്ങനെ ബഹുമാനിക്കണമെന്ന് ലാലിനെകണ്ട് പഠിക്കണമെന്നാണ് അദ്ദേഹം പറയുന്നത്’. അച്ഛൻ ഇതുപറഞ്ഞപ്പോൾ വളരെ സന്തോഷം തോന്നി.

നാഗേശ്വരറാവു സാറിന്റെ സംഭവബഹുലമായ ജീവിതത്തിനു മുന്നിൽ പലപ്പോഴും ഒരു പ്രേക്ഷകനെപ്പോലെ ഞാൻ വിസ്മയിച്ചുനിന്നിട്ടുണ്ട്. നമ്മൾക്കൊന്നും ഊഹിക്കാൻപോലും കഴിയാത്ത അനുഭവങ്ങളിലൂടെയാണ് ഇന്ത്യൻ സിനിമയിലെ അത്ഭുതങ്ങളിലൊന്നായി അദ്ദേഹം മാറിയത്. ദുരിതങ്ങളുടെയും, കണ്ണീരിന്റെയും ഒരുപാട് ഫ്രെയിമുകളുള്ള ജീവിതമാണത്. വളരെ ദരിദ്രമായ ഒരു കർഷകകുടുംബത്തിൽ ജനിച്ച് തെരുവുനാടകങ്ങളിൽ നിന്നു തുടങ്ങി ഇന്ത്യൻ സിനിമയിലെ പരമോന്നതബഹുമതിയായ ദാദാസാഹേബ് ഫാൽക്കേവരെയുള്ള അംഗീകാരങ്ങൾ നേടിയ ആ ജീവിതം ഫലഭാരത്താൽ നമ്രമാകുന്ന വൃക്ഷത്തെപ്പോലെയാണ്. പരിചയപ്പെട്ട കാലം മുതൽ പിന്നീടുണ്ടായ സമാഗമങ്ങളിലെല്ലാം സ്‌നേഹത്തിന്റെ വലിയൊരു കടലായാണ് അദ്ദേഹം എന്നിൽ നിറഞ്ഞത്.

‘ഗാണ്ഡീവ’ത്തിൽ ഒരുമിച്ചഭിനയിക്കുന്നതിനു മുൻപ് ദേവദാസ്, കാളിദാസ, മായാബസാർ, ഡോ. ചക്രവർത്തി, പ്രേമാഭിഷേകം, പ്രേംനഗർ, തെന്നാലി രാമകൃഷ്ണ തുടങ്ങിയ ചിത്രങ്ങളിലൂടെ സിൽവർ സ്‌ക്രീനിൽ അഭിനയത്തിന്റെ മാജിക് വിരിയിച്ച നാഗേശ്വര റാവു എന്ന അഭിനയപ്രതിഭയെക്കുറിച്ച് മാത്രമേ എനിക്ക് അറിവുണ്ടായിരുന്നുള്ളൂ. പിന്നീടാണ് ആ മഹാനടന്റെ ജീവിതം അദ്ദേഹം ആടിയ മുന്നൂറോളം വേഷങ്ങൾക്കും ഉയരത്തിലാണെന്ന് മനസിലാവുന്നത്. സാറിന്റെ ജീവിതവഴികളിലെ കഠിനതകളെക്കുറിച്ച് പലപ്പോഴും എനിക്ക് പറഞ്ഞുതന്നത് സുചിയുടെ അച്ഛനാണ്. തെന്നിന്ത്യൻ സിനിമ മദ്രാസിനെ മാത്രം ആശ്രയിച്ചിരുന്ന കാലത്ത് തുടങ്ങിയ സൗഹൃദമാണ് അച്ഛനും സാറും തമ്മിലുള്ളത്. മരണംവരെ ആ സ്‌നേഹം അച്ഛൻ മനസിൽ സൂക്ഷിച്ചു. ബാലാജിയുടെ മരുമകൻ എന്ന നിലയിലും നാഗേശ്വരറാവു സാർ എന്നോട് പ്രത്യേക സ്‌നേഹം വച്ചുപുലർത്തിയിരുന്നു.

തെലുങ്ക് സിനിമകൾക്ക് സ്വന്തമായി ഒരടിത്തറ സൃഷ്ടിക്കാൻ പ്രയത്‌നിച്ചവരിൽ പ്രമുഖനാണ് നാഗേശ്വരറാവു സാർ. തെലുങ്ക് സിനിമയ്ക്ക് തനതായ വ്യക്തിത്വമുണ്ടാകണമെങ്കിൽ അതിന്റെ ആസ്ഥാനം ഹൈദരാബാദ് തന്നെയാകണമെന്ന വിവിധ നേതാക്കളുടെ തീരുമാനം നാഗേശ്വര റാവുവിലൂടെയാണ് സാക്ഷാത്ക്കരിക്കപ്പെട്ടതെന്നതും ഏറെ അഭിമാനിക്കാവുന്ന കാര്യം തന്നെയാണ്. അദ്ദേഹം രൂപം കൊടുത്ത ‘അന്നപൂർണ സ്റ്റുഡിയോ’യിൽ ചിത്രീകരിച്ച പല ചിത്രങ്ങളും പിൽക്കാലത്ത് ഇന്ത്യൻ സിനിമയ്ക്ക് തന്നെ അഭിമാനിക്കാവുന്ന ഒട്ടേറെ നേട്ടങ്ങളുണ്ടാക്കിയിട്ടുണ്ട്. ഞാനഭിനയിച്ച ‘കടത്തനാടൻ അമ്പാടി’ അന്നപൂർണയിലാണ് ഷൂട്ട് ചെയ്തത്. പിന്നീട് രണ്ടു മൂന്നു ചിത്രങ്ങളുമായി ബന്ധപ്പെട്ട ഞാൻ അന്നപൂർണയിൽ പോയിട്ടുണ്ട്. ഹൈദരാബാദിൽ റാമോജി ഫിലിം സിറ്റി വരും മുമ്പേ, വിവിധ ഭാഷാചിത്രങ്ങൾ ആശ്രയിച്ചിരുന്നത് സാറിന്റെ സ്റ്റുഡിയോയെയാണ്.

subscribe

SHEELA Evergreen Heroine
-ഷീല / പി. ടി. ബിനു

Categories:

മലയാള സിനിമയുടെ നിത്യഹരിത നായികയാണ് ഷീല. ഓരോ മലയാളിയുടെയും മനസിലെ സ്വപ്‌ന നായികയും ഷീല തന്നെ. 1963-ൽ ആരംഭിച്ച വെള്ളിത്തിരയിലെ ജീവിതം 56 വർഷം പിന്നിടുമ്പോഴും ഷീല സജീവമാണ്. 1980-ൽ സ്‌ഫോടനം എന്ന ചിത്രത്തോടെ താത്ക്കാലികമായി ചലച്ചിത്രജീവിതത്തിൽ നിന്നു മാറിനിന്ന ഷീല 2003-ൽ സത്യൻ അന്തിക്കാട് സംവിധാനം ചെയ്ത് മഹാസുബൈർ വർണചിത്ര നിർമിച്ച മനസിനക്കരെ എന്ന സിനിമയിലൂടെ ശക്തമായ തിരിച്ചുവരവാണ് നടത്തിയത്. സംവിധായകയായും ഷീല തിളങ്ങിയിട്ടുണ്ട്. യക്ഷഗാനം, ശിഖരങ്ങൾ എന്നീ ചിത്രങ്ങൾ സംവിധാനം ചെയ്തു. മമ്മൂട്ടി നായകനായ ഒന്നു ചിരിക്കൂ എന്ന ചിത്രത്തിന്റെ കഥ ഷീലയുടേതാണ്. കുയിലിന്റെ കൂട് എന്ന പുസ്തകവും ഷീല രചിച്ചിട്ടുണ്ട്. ഇപ്പോൾ, കേരള സർക്കാരിന്റെ പരമോന്നത ചലച്ചിത്ര ബഹുമതിയായ ജെ.സി. ഡാനിയൽ അവാർഡിന് ഷീല അർഹയായിരിക്കുന്നു. ഷീലയുടെ വിശേഷങ്ങൾ.

  • ജെ.സി. ഡാനിയൽ അവാർഡ്, കേരള സർക്കാരിന്റെ പരമോന്നത ചലച്ചിത്ര ബഹുമതി

ജെ.സി. ഡാനിയൽ പുരസ്‌കാരം, അഭിനേത്രി എന്ന നിലയിൽ ജീവിതത്തിൽ എനിക്കു കിട്ടിയ വലിയ ബഹുമതിയാണ്. ഞാൻ അതിയായി സന്തോഷിക്കുന്നു. പ്രത്യേകിച്ചും മലയാള സിനിമയുടെ പിതാവ് എന്നറിയപ്പെടുന്ന ജെ.സി. ഡാനിയൽ എന്ന ചരിത്ര പുരുഷന്റെ പേരിലുള്ള അവാർഡാകുമ്പോൾ അതിന് ഇരട്ടി മധുരം ഉണ്ടാകുമല്ലോ. ഈ പുരസ്‌കാരം ഞാൻ സ്‌നേഹത്തോടെ ഹൃദയത്തോടു ചേർത്തുപിടിക്കുന്നു. അവാർഡ് കിട്ടിയതിനു ശേഷം നിരവധി സഹപ്രവർത്തകർ വിളിച്ച് ആശംസകൾ അറിയിച്ചു.

  • മകൾ, കാമുകി, സഹോദരി, ഭാര്യ, അമ്മ, മുത്തശ്ശി… അങ്ങനെ നിരവധി കഥാപാത്രങ്ങൾ അഭിനയ സ്മരണകളിലേക്കു തിരിഞ്ഞു നോക്കുമ്പോൾ

ശരിയാണ്, ക്യാമറയ്ക്കു മുന്നിൽ അണിയാത്ത വേഷങ്ങളില്ല. എത്രയോ വ്യത്യസ്തമായ കഥാപാത്രങ്ങൾ ചെയ്തു. ആവർത്തനങ്ങൾ വരാതെ ശ്രദ്ധിക്കേണ്ടത് നടിയുടെ കഴിവാണ്. അണിഞ്ഞ വേഷങ്ങളെല്ലാം ഒരു സ്ത്രീ തന്റെ ജീവിതത്തിലൂടെ കടന്നുപോകുന്നവയാണ്. അഭിനയിച്ച കഥാപാത്രങ്ങളെല്ലാം ഇഷ്ടപ്പെട്ടു ചെയ്തവയാണ്. കഥാപാത്രങ്ങളുടെ തെരഞ്ഞെടുപ്പിലും അവയുമായി താദാത്മ്യം പ്രാപിക്കലിലും ഞാൻ എന്നും ശ്രദ്ധാലുവായിരുന്നു. ഒരു കഥ കേട്ടു കഴിഞ്ഞാൽ, ആ കഥയിലെ തന്റെ കഥാപാത്രത്തെപ്പറ്റി കൂടുതൽ ചിന്തിച്ച് അതുമായി ഇഴുകിച്ചേർന്നു മാത്രമേ ഞാൻ ക്യാമറയ്ക്കു മുന്നിൽ നിൽക്കാറുള്ളൂ.

  • ആദ്യ സിനിമ കാണലും അച്ഛന്റെ വഴക്കും

സിനിമയുമായോ മറ്റു കലാരൂപങ്ങളുമായോ ബന്ധമുള്ള കുടുംബമായിരുന്നില്ല ഞങ്ങളുടേത്. എന്റെ അച്ഛൻ ഇത്തരം കാര്യങ്ങളിൽ വലിയ താത്പര്യം പ്രകടിപ്പിച്ചിരുന്നില്ല. റെയിൽവേയിൽ ഉദ്യോഗസ്ഥനായിരുന്നു അച്ഛൻ. കുട്ടിക്കാലത്ത് അയലത്തെ സ്ത്രീ സുഹൃത്തുക്കളുമായി അമ്മയോടൊപ്പം സിനിമ കാണാൻ പോയതിന് അച്ഛൻ എന്നെയും അമ്മയെയും വഴക്കു പറഞ്ഞത് ഞാൻ ഇപ്പോഴും ഓർക്കുന്നു. ഞങ്ങളുടെ വീട്ടിൽ റേഡിയോ പോലും ഉണ്ടായിരുന്നില്ല.
ആദ്യം അഭിനയിച്ചതു നാടകത്തിലായിരുന്നു. അതിനും അച്ഛന്റെ കൈയിൽ നിന്ന് ധാരാളം വഴക്കു കേട്ടു. റെയിൽവേയിലെ ജീവനക്കാരുടെ നാടകത്തിൽ അപ്രതീക്ഷിതമായാണ് എനിക്ക് നായികയുടെ വേഷം എടുത്തണിയേണ്ടി വന്നത്. നാടകത്തിന്റെ റിഹേഴ്‌സൽ ഞാൻ ഒളിച്ചിരുന്നു കാണുമായിരുന്നു. അങ്ങനെ നായികയുടെ ഡയലോഗുകൾ ഞാൻ കാണാപ്പാഠം പഠിച്ചിരുന്നു. നാടകം രംഗത്ത് അവതരിപ്പിക്കേണ്ട സമയത്ത് നായികയായി അഭിനയിക്കുന്ന കുട്ടി വന്നില്ല. പകരം ഞാൻ സ്റ്റേജിൽ കയറുകയായിരുന്നു.
അക്കാലത്താണ് അച്ഛന്റെ മരണം. അന്ന് ഞങ്ങൾ ട്രിച്ചിയിലായിരുന്നു താമസം. പത്ത് മക്കളുള്ള കുടുംബമായിരുന്നു ഞങ്ങളുടേത്. ഞങ്ങൾ വല്ലാതെ കഷ്ടപ്പെട്ട കാലമായിരുന്നു. അമ്മയുടെ സഹോദരിമാർ ഞങ്ങളെ അവരുടെ വീടുകളിലേക്ക് കൊണ്ടുപോയി.
എസ്.എസ്. രാജേന്ദ്രനുമായുള്ള പരിചയം അഭിനയരംഗത്തെത്തിച്ചു. ചെന്നൈയിലേക്ക് താമസം മാറ്റി. രാജേന്ദ്രന്റെ തെൻപാണ്ടി വീരൻ എന്ന നാടകത്തിൽ അഭിനയിച്ചു. തമിഴ് എനിക്ക് ശരിക്കും വഴങ്ങുന്നുണ്ടായിരുന്നില്ല. അത് അഭിനയത്തിന്റെ സ്വാഭാവികമായ ഒഴുക്കിനെ ബാധിച്ചതായി എനിക്കു തോന്നിയിരുന്നു.
എന്റെ ഭാഗ്യത്തിന് എം.ജി.ആറും തമിഴ് ഡയറക്ടറുമായ രാമണ്ണയും നാടകം കാണാൻ എത്തിയിരുന്നു. അവർക്കെന്റെ അഭിനയം ഇഷ്ടപ്പെട്ടു.
പാസം എന്ന സിനിമയുടെ പ്രാരംഭ പ്രവർത്തനങ്ങൾ നടക്കുന്ന സമയമായിരുന്നു. ആ ചിത്രത്തിൽ ഒരു പെൺകുട്ടിയുടെ വേഷമുണ്ടായിരുന്നു. ആ വേഷം അവർ എനിക്കു തന്നു.
ആ സമയത്ത് ഭാഗ്യജാതകം എന്ന സിനിമയുടെ ഷൂട്ടിങ് ചെന്നൈയിൽ നടക്കുന്നുണ്ടായിരുന്നു. പാസത്തിന്റെ സെറ്റിൽ വന്ന പി. ഭാസ്‌കരനും സത്യൻ മാഷും എന്നെ ഭാഗ്യജാതകത്തിൽ നായികയായി സെലക്ട് ചെയ്യുകയായിരുന്നു. പിന്നെ ഇങ്ങോട്ടുള്ളതു ചരിത്രം.

  • കറുത്തമ്മ, കള്ളിച്ചെല്ലമ്മ, വെളുത്ത കത്രീന, വത്സല അങ്ങനെ കരുത്തുള്ള കഥാപാത്രങ്ങൾ

അങ്ങനെ ചില ഭാഗ്യങ്ങളുണ്ടായി. ചെമ്മീൻ എന്ന അനശ്വര നോവലിലെ കറുത്തമ്മയാകാൻ അവസരം ലഭിച്ചു. മലയാളക്കര കഥകളിലൂടെ ഏറ്റെടുത്ത പല കഥാപാത്രങ്ങളെയും എനിക്ക് വെള്ളിത്തിരയിൽ എത്തിക്കാൻ കഴിഞ്ഞു. കഥാപാത്രങ്ങളുടെ തെരഞ്ഞെടുപ്പും തയാറെടുപ്പകളുമൊക്കെ നടത്താറുണ്ട്. പിന്നെ, ഒരു ദിവസം നാലും അഞ്ചും സിനിമകളിൽ അഭിനയിക്കുന്ന കാലമാണ്. ഒരു വർഷം 26 സിനിമ വരെ റിലീസ് ചെയ്തിട്ടുണ്ട്. സെറ്റിലെത്തിക്കഴിഞ്ഞാൽ ഞാൻ പൂർണമായും ഡയറക്ടറുടെ നിർദേശങ്ങൾ പാലിക്കുന്ന നടിയാണ്. അതൊക്കെയായിരിക്കാം കഥാപാത്രങ്ങളുടെ ജനപ്രീതിയും അനശ്വരതയും.

  • സ്വപ്‌ന നായിക / നിത്യഹരിത നായിക

അങ്ങനെയൊക്കെ ആളുകൾ വിളിക്കാറുണ്ട്. പ്രേക്ഷകർ ആഗ്രഹിച്ച കഥാപാത്രങ്ങളെ വെള്ളിത്തിരയിൽ അനശ്വരമാക്കിയതിനാലാകാം അവർ അത്തരം കൽപ്പനകളൊക്കെ തരുന്നത്. എന്തെല്ലാം അവാർഡുകൾ കിട്ടിയാലും ജനങ്ങളുടെ മനസിലെ അംഗീകാരമല്ലേ ഏറ്റവും വലിയ അവാർഡ്. അക്കാര്യത്തിൽ ഞാൻ ഭാഗ്യവതിയാണെന്നാണ് എന്റെ വിശ്വാസം.

  • നസീർ, സത്യൻ, മധു, കമൽഹാസൻ, ജയൻ തുടങ്ങിയ നായകന്മാർ. നസീർ സാറിനൊപ്പം ഗിന്നസ് റെക്കോർഡ്. ഈ നായകന്മാരെ എങ്ങനെ വിലയിരുത്തുന്നു

എല്ലാവരും ഒന്നിനൊന്ന് മികച്ച അഭിനേതാക്കൾ. മലയാള സിനിമയിൽ എക്കാലത്തെയും മികച്ച, ചരിത്രത്തിൽ ഇടം നേടിയ നടന്മാർ. സത്യൻ മാഷിന്റെയൊപ്പം ചെയ്തിരുന്നതെല്ലാം കനമുള്ള കഥാപാത്രങ്ങളായിരുന്നു. നസീർ സാറിന്റെയൊപ്പം ചെയ്തവയെല്ലാം ജനപ്രിയ വേഷങ്ങളായിരുന്നു. പാട്ടും ഡാൻസും പ്രണയവുമെല്ലാം അടങ്ങിയവ. മധു സാറിനൊപ്പം രണ്ടു ടൈപ്പ് വേഷങ്ങളും ചെയ്തിട്ടുണ്ട്. അഭിനയ മുഹൂർത്തങ്ങൾ കൊണ്ട് എന്നെ വിസ്മയിപ്പിച്ച നടനാണ് കമലഹാസനും. ഓരോരുത്തർക്കും അവരുടേതായ പ്രത്യകതകളും സവിശേഷമായ ശൈലികളുമുണ്ട്.

  • മോഹൻലാൽ, മമ്മൂട്ടി, ജയറാം, സുരേഷ് ഗോപി, ദിലീപ്

എല്ലാവരും വ്യത്യസ്തരായ ആളുകളാണ്. ഏതു വേഷവും തന്മയത്വത്തോടെ ഫലിപ്പിക്കാൻ കഴിവുള്ളവരാണ് ഇവർ. മറ്റു ഭാഷാചിത്രങ്ങൾ പോലെയല്ല മലയാളം. എത്രയോ വലിയ നടീനടന്മാർ നമുക്കുണ്ട്. പിന്നെ, നല്ല വേഷങ്ങൾ കിട്ടുക എന്നത് ഓരോരുത്തരുടെയും ഭാഗ്യം പോലെയിരിക്കും. നീണ്ട ഇടവേളയ്ക്കു ശേഷം തിരിച്ചെത്തിയ സത്യൻ അന്തിക്കാട് ചിത്രമായ മനസിനക്കരെയിൽ ജയറാം ആയിരുന്നു കേന്ദ്ര കഥാപാത്രത്തെ അവതരിപ്പിച്ചത്. കുടുംബപ്രേക്ഷകരുടെ പ്രിയ നടന്മാരിലൊരാളായ ജയറാമിന്റെ മികച്ച ചിത്രങ്ങളിലൊന്നാണ് മനസിനക്കരെ. സുബൈർ വർണചിത്രയായിരുന്നു ചിത്രത്തിന്റെ നിർമാതാവ്. തെന്നിന്ത്യൻ താരമായി ഉയർന്ന നയൻതാരയുടെ ആദ്യ ചിത്രമായിരുന്നു മനസിനക്കരെ. വീണ്ടും സ്‌നേഹവീട് എന്ന സത്യൻ അന്തിക്കാട് ചിത്രത്തിൽ അഭിനയിച്ചു. മോഹൻലാലിന്റെ അമ്മ വേഷമായിരുന്നു. അമ്മയുടെയും മകന്റെയും സ്‌നേഹനിർഭരമായ കഥയാണത്. മമ്മൂട്ടിയൊടൊപ്പം തസ്‌കരവീരൻ, സുരേഷ് ഗോപിയോടൊപ്പം പതാക, ദിലീപിനൊപ്പം മിസ്റ്റർ മരുമകൻ, അതെല്ലാം മികച്ച സൗഹൃദങ്ങളുടെയും ഹിറ്റ് സിനിമകളുടെയും കൂട്ടുകെട്ടാണ്.

subscribe

Shane Nigam The Young Superstar
-ഷെയിൻ നിഗം / ബി. ഹൃദയനന്ദ

Categories:

തിളക്കമാർന്ന വിജയമാണ് ഷെയിൻ നിഗം എന്ന യുവതാരം സ്വന്തമാക്കിയത്. കിസ്മത്ത് എന്ന ചെറിയ ചിത്രത്തിലൂടെ നായകനായി, കുമ്പളങ്ങി നൈറ്റ്‌സിലൂടെ താരമായ ഷെയിനിന്റെ പുതിയ ചിത്രം ഇഷ്‌കും വിജയമായി. അബിയുടെ മകൻ എന്ന ഇഷ്ടവും മലയാളിക്ക് ഷെയിനിനോടുണ്ട്. താരപരിവേഷമില്ലാതെ മോളിവുഡിന്റെ യങ് സെൻസേഷൻ സംസാരിക്കുന്നു.

  • താരമായ ബോബി

കുമ്പങ്ങി നൈറ്റ്‌സിലെ ബോബി ഇഷ്ടപ്പെട്ട കഥാപാത്രങ്ങളിലൊന്നാണ്. കിസ്മത്തിന്റെ ട്രെയിലർ ഇറങ്ങിയ സമയത്താണ് കുമ്പളങ്ങി നൈറ്റ്‌സിന്റെ കഥ പറയുന്നത്. വാപ്പച്ചിയുള്ള സമയമാണ്. ആദ്യം വൺ ലൈൻ പറഞ്ഞു. പിന്നീട് വീട്ടിൽ വന്ന് വിശദമായി സംസാരിച്ചു. പിന്നെയും കുറേ നാളുകൾക്കുശേഷമാണ് സിനിമയുടെ ഷൂട്ടിങ് തുടങ്ങിയത്. കുമ്പങ്ങി നൈറ്റ്‌സിന്റെ ഷൂട്ടിങ് നടക്കുമ്പോഴും ഒരു സിനിമ ചെയ്യുന്നു എന്നുള്ളതു മാത്രമേ ചിന്തിച്ചിട്ടുള്ളൂ. മനസിൽ അതിനപ്പുറം വലിയ കാര്യങ്ങളൊന്നുമില്ല. ഒരു നിയോഗം പോലെ എല്ലാം ശരിയായി വന്നതാണ്. ഈ ടീമിനൊപ്പം വർക്ക് ചെയ്യുക എന്നുള്ളത് നല്ല അനുഭവമാണ്. ഇപ്പോൾ മലയാള സിനിമയിൽ സ്വന്തമായൊരു ഐഡന്റിറ്റിയിൽ സിനിമ ചെയ്യുന്ന ടീമാണ്. വളരെ മനോഹരമായാണ് അവർ സിനിമ ഓർഗനൈസ് ചെയ്യുന്നത്. അവർക്കൊപ്പം പ്രവർത്തിക്കുമ്പോഴും വളരെ കംഫർട്ടബിളാണ്.

  • ഇർഫാൻ ഫേവറിറ്റ്

കിസ്മത്തിലെ ഇർഫാനോട് ഇഷ്ടക്കൂടുതൽ ഉണ്ട്. വലിയ പ്രതീക്ഷകളൊന്നും ഇല്ലാതെ ഇറങ്ങിയ സിനിമയാണ്. എന്നാൽ, ആ സിനിമ ഏറെ ശ്രദ്ധിക്കപ്പെട്ടു. ഒരുപാടുപേരുടെ സത്യസന്ധമായ പരിശ്രമത്തിന്റെ ഫലമാണ് ആ ചിത്രം. മറ്റൊരു കഥാപാത്രത്തിനു വേണ്ടിയും ഞാൻ ഇത്രയും വർക്ക് ചെയ്തിട്ടില്ല. പിന്നെ എന്റെ ആദ്യത്തെ പ്രധാന വേഷമാണ് ഇർഫാൻ. അതുകൊണ്ടുകൂടിയാവാം ആ കഥാപാത്രം ഏറെ പ്രിയപ്പെട്ടതാകുന്നത്. സിനിമ ഹിറ്റാവണം, സാറ്റലൈറ്റ് കിട്ടണം, അത്തരം ചിന്തകളൊന്നും ഇല്ലാതെയാണ് കിസ്മത്തിൽ അഭിനയിച്ചത്. ആ സിനിമ ഇറങ്ങി ശ്രദ്ധിക്കപ്പെട്ടപ്പോഴാണ് ഞാൻ അക്കാര്യങ്ങളെല്ലാം ചിന്തിക്കുന്നത്.

  • മറ്റൊരാളാകുന്നത് രസമല്ലേ

കഥ കേൾക്കുമ്പോൾ കഥാപാത്രത്തിനെ മനസിലാക്കാൻ ശ്രമിക്കും. തിരക്കഥ വായിക്കുമ്പോൾ കാര്യങ്ങൾ മനസിലാവും. സംശയങ്ങളുണ്ടെങ്കിൽ ചർച്ച ചെയ്യും. കഥാപാത്രത്തെ സിനിമാറ്റിക്കായി ഉൾക്കൊള്ളാൻ എനിക്കു പലപ്പോഴും സാധിക്കാറില്ല. ഞാൻ വളരെ റിയലിസ്റ്റിക്കായി ചിന്തിക്കും. അതാണ് പ്രശ്‌നം. പിന്നെ അത്തരം കാര്യങ്ങളൊക്കെ പഠിച്ചുവരുന്നതേയുള്ളൂ. പിന്നെ മറ്റൊരാളാകുന്നത് ഒരു രസമല്ലേ?

  • ലേബലിങ്ങിൽ വിശ്വാസമില്ല

പ്രണയനായകനായി ഞാൻ എന്നെ ലേബൽ ചെയ്തിട്ടില്ല. മറ്റുള്ളവരാണല്ലോ ലേബൽ ചെയ്യുന്നത്. അതുകൊണ്ട്, ലേബലിങ്ങിൽ എനിക്കു പ്രശ്‌നങ്ങളൊന്നുമില്ല. പിന്നെ ചെയ്യുന്ന പടങ്ങൾക്ക് അനുസരിച്ചാണല്ലോ ലേബലിങ്. ഒരു ചിത്രം ഞാൻ തെരഞ്ഞെടുക്കുന്നതിനു പിന്നിൽ വ്യക്തമായ കാരണങ്ങളുണ്ട്. അത് റിസൾട്ട് മാത്രം പ്രതീക്ഷിച്ചല്ല. കുറെ കാര്യങ്ങൾ ചേർന്നുവരുമ്പോഴാണ് ഒരു സിനിമ ഉണ്ടാകുന്നത്. ഒന്നിനെയും കാറ്റഗറൈസ് ചെയ്യരുതെന്നാണ് എന്റെ അഭിപ്രായം. ആളുകൾ എല്ലാവർക്കും ഓരോ ഐഡന്റിറ്റി നൽകും. എപ്പോഴും ഒരു ഫോം വേണം. ഞാൻ ഒന്നിനും ഫോം കൊടുത്തിട്ടില്ല. എനിക്ക് എല്ലാ അവസ്ഥയും എല്ലാ മനുഷ്യരും ഒന്നുപോലെയാണ്.

  • താരമായാൽ മതി

നടൻ, താരം ഇതിൽ ഞാൻ താരത്തിനെ തെരഞ്ഞെടുക്കും. കാരണം ഇപ്പോൾ നല്ല സിനിമ ചെയ്യാനും അത് ആളുകളിലേക്ക് പരമാവധി എത്താനും നല്ല ബജറ്റ് വേണം. താരമല്ലെങ്കിൽ ബജറ്റിന്റെ പരിമിതിയുണ്ടാവും. ഉദ്ദേശിക്കുന്ന രീതിയിൽ സിനിമ എടുക്കാൻ പറ്റില്ല. താരമാണെങ്കിൽ ബജറ്റിന്റെ പ്രശ്‌നം വരില്ല. പിന്നെ താരമാകാൻ നല്ല നടൻ കൂടിയാകണം. താരമാകാൻ ആളുകളുടെ ഇഷ്ടം വേണം. അഭിനയത്തിലൂടെയാണ് ആ ഇഷ്ടം കിട്ടുന്നത്. താരപദവി നല്ല രീതിയിൽ ഉപയോഗിക്കാനും കഴിയണം. താരമാകുക വലിയൊരു ഉത്തരവാദിത്തവും കൂടിയാണ്.

  • ശ്രദ്ധിക്കുന്നത് പ്രകടനമല്ല, പെരുമാറ്റം

എന്നോടൊപ്പം അഭിനയിക്കുന്നവരുടെ പ്രകടനം നിരീക്ഷിക്കുന്നതിലുപരി അവരുടെ പെരുമാറ്റമാണ് ശ്രദ്ധിക്കാറുള്ളത്. മറ്റുള്ളവരോട് എങ്ങനെയാണ് അവരുടെ സമീപനം, അവർ ഒരാളെ എങ്ങനെ ഹാൻഡിൽ ചെയ്യുന്നു. എങ്ങനെയാണ് അവർ മറ്റുള്ളവരോട് സംസാരിക്കുന്നത്. ഇത്തരം കാര്യങ്ങളാണ് ഞാൻ പൊതുവെ ശ്രദ്ധിക്കുന്നത്. സിനിമയിൽ മറ്റുള്ളവരെ ഹാൻഡിൽ ചെയ്യാനുള്ള കഴിവാണ് വേണ്ടത്. അവരെ വേദനിപ്പിക്കാതെ ഹാൻഡിൽ ചെയ്യണം. ഒരാളിൽ നിന്നും അല്ലെങ്കിൽ സീനിയർ നടന്മാരിൽ നിന്നും നമ്മൾ എങ്ങനെ പഠിക്കുന്നു എന്ന ചോദ്യത്തിന്റെ മറുപടി. പിന്നെ അച്ചടക്കം. ഇങ്ങനെ ബേസിക്കായ കാര്യങ്ങളാണ് മറ്റുള്ളവരിൽ ഞാൻ ശ്രദ്ധിക്കുന്നത്.

  • വിലയിരുത്തൽ കുറവാ

സിനിമകൾ കാര്യമായൊന്നും ശ്രദ്ധിക്കാറില്ല. എന്റെ മുന്നിലുള്ളതെല്ലാം ഞാൻ കാണുന്നു. എന്നാൽ, പ്രത്യേകമായി ഒന്നും വിലയിരുത്താറില്ല. എനിക്ക് അത് അറിയില്ല എന്നുപറയുന്നതാവും ശരി. ഒരു സിനിമ കാണുമ്പോൾ, ചിലത് നല്ല പടമായിരിക്കും. പക്ഷേ, എനിക്ക് ഇഷ്ടപ്പെടില്ല. പക്ഷേ, ചില സിനിമകളിൽ എന്തൊക്കെയോ ചില പോരായ്മകൾ ഉണ്ടാവും. എന്നാൽ, എനിക്ക് ഇഷ്ടപ്പെടും. അത് എന്തുകൊണ്ടാണെന്ന് എനിക്ക് അറിയില്ല. വിലയിരുത്തൽ തികച്ചും വ്യക്തിപരമാണ്.

  • എല്ലാം സെറ്റായി വരണം

ചില കഥകൾ കേൾക്കുമ്പോൾ ഇഷ്ടം തോന്നില്ല. നല്ല കഥയായിരിക്കും. പക്ഷേ, എനിക്ക് ഒരു കഥാപാത്രം അല്ലെങ്കിൽ കഥ എക്‌സൈറ്റിങ് ആവണം. എങ്കിൽ മാത്രമേ അഭിനയിക്കുമ്പോൾ ഒരു ഫീലിൽ ഉണ്ടാവൂ. ആ ഫീൽ ഉണ്ടെങ്കിലേ നന്നായി പെർഫോം ചെയ്യാനാവൂ. പിന്നെ ഹൃദയത്തിൽ തൊടുന്ന കഥയാണെങ്കിലേ അതിനൊരു ഡെപ്തുള്ളൂ. അതെത്രത്തോളം ചെയ്തുവരും എന്നുള്ളത് എല്ലാം കൂടി കൂടിയിട്ടുള്ളൊരു കാര്യമാണ്. അതു കറക്ടായി വരണം, സംഭവിക്കണം. പിന്നെ അടിപൊളി കഥയാണെന്നു പറഞ്ഞിട്ടൊന്നും കാര്യമില്ല, അതു ചെയ്തു വരുമ്പോൾ ചിലപ്പോൾ നന്നാവില്ല. ഈ എല്ലാ ഘടകങ്ങളും നന്നായി വരണം. അങ്ങനെ എല്ലാം കൂടി സെറ്റായി വന്ന പടമാണ് കുമ്പളങ്ങി നൈറ്റ്‌സ്. എനിക്ക് കൂടുതൽ ഇഷ്ടപ്പെട്ടൊരു പടമാണ്.

  • സംവിധായകനാവുമോ

തത്ക്കാലം സംവിധാനം ചെയ്യാൻ പ്ലാനൊന്നുമില്ല. പക്ഷേ, ചെയ്യണമെന്നൊക്കെയുണ്ട്. അത്ര നല്ലത് ആണെങ്കിൽ മാത്രമേ ചെയ്യൂ. പണ്ട് സിനിമ ചെയ്യാൻ കുറെ കഥകൾ ആലോചിച്ചിരുന്നു. എന്നാൽ, ആ കഥകളൊന്നും ഇപ്പോൾ ചെയ്യാൻ പറ്റില്ല. ഇപ്പോൾ ചിന്തിക്കുമ്പോൾ മനസിലാവുന്നുണ്ട്, അതൊക്കെ കുട്ടിക്കഥകളാണെന്ന്. ഇപ്പോൾ എന്താണ് ചെയ്യേണ്ടതെന്നറിയില്ല. സംവിധാനം ചെയ്യുന്നത് നല്ലൊരു ചിത്രമാവണം എന്നാണ് ആഗ്രഹം.

subscribe

Shine Tom Chacko ക്യാമറയ്ക്ക് മുന്നിലും പിന്നിലും
-ഷൈൻ ടോം ചാക്കോ / ബി. ഹൃദയനന്ദ

Categories:

കമൽ സംവിധാനം ചെയ്ത ഗദ്ദാമയിലെ ബഷീർ. മെലിഞ്ഞുണങ്ങി, സ്പ്രിംഗ് പോലെ മുടിയുള്ള ഒരു ആടുജീവിതം. ഷൈൻ ടോം ചാക്കോയുടെ ആദ്യ കഥാപാത്രം. അതിനുമുമ്പ് ക്യാമറയ്ക്കു പിന്നിലായിരുന്നു ഷൈൻ. വിവിധ സംവിധായകർക്കൊപ്പം പതിനൊന്നു വർഷത്തോളം സംവിധാന സഹായിയായി. ഷൈനിന്റെ അഭിനയക്കളരിയായിരുന്നു സഹസംവിധാന വേഷം. വർഷങ്ങൾക്കിപ്പുറം ഷൈൻ സ്‌ക്രീനിൽ വിവിധ വേഷങ്ങളിൽ നിറയുന്നു. ഇതിഹാസയിലെ കഥാപാത്രമാണ് ഷൈനിന്റെ അഭിനയജീവിതത്തിലെ വഴിത്തിരിവ്. ഒടുവിൽ പുറത്തുവന്ന ഇഷ്‌കിലെ ആൽവിനും ഉണ്ടയിലെ ജോജോയുമെല്ലാം ഷൈൻ എന്ന നടന്റെ കൈയൊപ്പുള്ള കഥാപാത്രങ്ങളാണ്.

  • കുട്ടിക്കാലവും കലാപ്രവർത്തനങ്ങളും

കുട്ടിക്കാലത്ത് സ്‌കൂളിലെ എല്ലാ പരിപാടികളിലും പങ്കെടുത്തിരുന്നു. അതാണ് സ്‌കൂൾ കാലഘട്ടത്തെ മുന്നോട്ടുനയിച്ചത്. മമ്മിയും ഡാഡിയും പ്രോത്സാഹനം നൽകിയിരുന്നു. പഠനത്തേക്കാൾ കൂടുതൽ താത്പര്യം കലാപ്രവർത്തനങ്ങളിൽ ആയിരുന്നു. വർഷങ്ങൾക്കുമുമ്പു തന്നെ എന്റെ ഇഷ്ടങ്ങൾ ഡാഡിയും മമ്മിയും മനസിലാക്കിയിരുന്നു. സ്വന്തം ഇഷ്ടങ്ങൾ വേണ്ടെന്നുവച്ചു ജീവിക്കുന്ന എത്രയോ ചെറുപ്പക്കാരുണ്ട്. എന്നെ സംബന്ധിച്ച് അത്തരം പ്രശ്‌നങ്ങളൊന്നും ഉണ്ടായിരുന്നില്ല. എന്റെ ജീവിതം തെരഞ്ഞെടുക്കാനുള്ള സ്വാതന്ത്ര്യം എനിക്കു ലഭിച്ചു.

  • ക്യാമറയ്ക്കു പിന്നിൽ പതിനൊന്നുവർഷം

കമൽ സാർ, ആഷിക് അബു, രാജേഷ് പിള്ള, അക്കു അക്ബർ എന്നിവർക്കൊപ്പം പതിനൊന്നു വർഷത്തോളം സംവിധാന സഹായിയായി പ്രവർത്തിച്ചു. പ്ലസ് ടു കഴിഞ്ഞപ്പോഴാണ് കമൽ സാറിനൊപ്പം സംവിധാന സഹായിയായത്. കുട്ടിക്കാലത്ത് കമൽ സാർ ഞങ്ങളുടെ അയൽവാസിയായിരുന്നു. അന്ന് അദ്ദേഹം മിഴിനീർപൂക്കൾ, ഉണ്ണികളെ ഒരു കഥപറയാം തുടങ്ങിയ സിനിമകൾ ചെയ്ത സമയം. രണ്ടു വീടുകളും ഒരു കോമ്പൗണ്ടിനുള്ളിലാണ്. അന്ന് സാറിന്റെ ഭാര്യ പൊന്നാനി എംഇഎസിൽ അധ്യാപികയാണ്. എന്റെ ഡാഡിക്ക് പൊന്നാനിയിൽ ബിസിനസ് ആയിരുന്നു. മമ്മി അധ്യാപികയും. പിന്നീട് സാറും കുടുംബവും കൊടുങ്ങല്ലൂരിലേക്കു പോയി. ഞങ്ങളും വേറെ സ്ഥലത്തേക്കുമാറി. ഞങ്ങൾ അതിനുശേഷം ഏകദേശം ഏഴു വർഷത്തോളം ഓരോ സ്ഥലങ്ങളിലായി മാറിമാറി താമസിച്ചു.
അഭിനയിക്കാനുള്ള ആഗ്രഹം വളരെ കുട്ടിക്കാലം മുതൽ തുടങ്ങിയതാണ്. അന്നൊക്കെ കാണുന്ന സിനിമകളിലെ നടന്മാരുടെ പ്രകടനം അനുകരിക്കും. അഭിനയമോഹവുമായാണ് ഞാൻ കമൽ സാറിന്റെ അടുത്തെത്തിയത്. എന്നാൽ, അസിസ്റ്റന്റ് ഡയറക്ടറാകുന്നതാണ് നിലനിൽക്കാൻ കുറച്ചുകൂടി നല്ലതെന്നുതോന്നി. സിനിമ അഭിനയത്തെക്കുറിച്ചൊന്നും എനിക്കന്ന് ഒരു ധാരണയുമില്ല. ഒരു പക്ഷേ, അഭിനയത്തിൽ നന്നായി പെർഫോം ചെയ്യാൻ കഴിഞ്ഞെന്നും വരില്ല. സിനിമ അഭിനയത്തിന്റെ ടെക്‌നിക് ഷൂട്ടിങ് കണ്ടുതുടങ്ങിയപ്പോഴാണ് എനിക്കു മനസിലായത്. ഇത്രയും കാലം സിനിമയിൽ വർക്ക് ചെയ്തത് അഭിനയത്തെ ഏറെ സഹായിച്ചു. നമ്മുടെ റൂമിൽ പെർഫോം ചെയ്യാൻ നമുക്ക് യാതൊരു മടിയും ഇല്ലല്ലോ. എന്നാൽ, ക്യാമറയ്ക്കു മുന്നിലുള്ള അഭിനയം അങ്ങനെയല്ല. കുറെ സിനിമകളിൽ വർക്ക് ചെയ്തതോടെയാണ് ഷൂട്ടിങ് ലൊക്കേഷൻ എനിക്ക് കംഫർട്ടബിൾ ആയത്. പെർഫോം ചെയ്യാൻ അത് കുറച്ചുകൂടി എളുപ്പമാക്കി.

  • ഗദ്ദാമയിലെ ബഷീർ

കമൽ സാർ ഗദ്ദാമ എന്ന പടം പ്ലാൻ ചെയ്യുന്നു. ഞാനന്ന് സ്പ്രിങ് പോലെ മുടിയൊക്കെ വളർത്തി മെലിഞ്ഞൊരു രൂപമാണ്. അതിൽ ബഷീർ എന്ന കഥാപാത്രത്തിനായി ആളെ തിരയുമ്പോഴാണ് പ്രൊഡക്ഷൻ കൺട്രോളർ ഷഫീർ സേട്ട് എന്റെ കാര്യം സാറിനോട് പറഞ്ഞത്. സാർ എന്നെ കൊടുങ്ങല്ലൂരിലേക്കു വിളിപ്പിച്ചു. എന്നെ കണ്ടപ്പോൾ സാർ ഹാപ്പിയായി. നന്നായി മെലിഞ്ഞിട്ടാണ് ഞാനന്ന്. മുടി ജട പിടിച്ചുകിടക്കുകയാണ്. ഇതുകൊള്ളാം, ഈ കഥാപാത്രം ഞാൻ തന്നെ ചെയ്താൽ മതിയെന്നു പറഞ്ഞു. എനിക്ക് അഭിനയിക്കാനുള്ള താത്പര്യം ഉണ്ടെന്ന് സാറിന് അറിയുകയും ചെയ്യാം. അസിസ്റ്റന്റ് ഡയറക്ടറായിരിക്കുമ്പോൾ ക്യാമറയ്ക്കു മുന്നിൽ പൊസിഷൻസ് മാർക്ക് ചെയ്യാനായി നിൽക്കുമായിരുന്നു. അതിന് എനിക്കു വലിയ ഇന്ററസ്റ്റ് ആണ്. എന്റെ താത്പര്യം കാണുമ്പോൾ നടനാവാൻ ആഗ്രഹമുണ്ടെന്ന് സ്വാഭാവികമായും ഒരു ഡയറക്ടർക്ക് മനസിലാവുമല്ലോ. ആദ്യം മുതൽ സിനിമയിൽ അഭിനയിക്കുകയായിരുന്നു ലക്ഷ്യം. എങ്ങനെ, എപ്പോൾ അതിലേക്കുകടക്കും. അതിനെക്കുറിച്ചു മാത്രമായിരുന്നു കൺഫ്യൂഷൻ.

  • വഴിത്തിരിവായി ഇതിഹാസ

ഇതിഹാസ ഇത്രയും വലിയ വിജയമാകും എന്നു കരുതിയിരുന്നില്ലെങ്കിലും ആൾക്കാർക്ക് ഇഷ്ടമാകും എന്ന പ്രതീക്ഷ ഉണ്ടായിരുന്നു. എന്നാൽ, ഇത്രയും ഗംഭീര വിജയമാകും എന്ന് ഞങ്ങളാരും വിചാരിച്ചില്ല. കേട്ടപ്പോൾ വളരെ ഇന്ററസ്റ്റിങ്ങായൊരു ത്രെഡ് ആയിരുന്നു അത്. ആ രീതിയിലുള്ള ഒരുപാട് ചിത്രങ്ങളുണ്ട്. അതിനെ നമ്മുടെ നാട്ടിൽ സംഭവിക്കുന്ന രീതിയിലേക്കു മാറ്റിയതാണ് ചിത്രത്തിന്റെ ബ്രില്ല്യൻസ്. ഈ കഥ നമ്മുടെ സമൂഹത്തിൽ, നമ്മുടെ വീട്ടിനടുത്ത് അല്ലെങ്കിൽ നമ്മുടെ ഫ്‌ളാറ്റിൽ സംഭവിച്ചാൽ എങ്ങനെയാവും എന്നതാണ് ഇതിഹാസയുടെ പുതുമ. ഓരോ കഥക്കും അതിന്റേതായൊരു ലോജിക് ഉണ്ടാവും. ആ ലോജിക് നിലനിർത്തിയാൽ തന്നെ ആളുകൾക്ക് ഇഷ്ടപ്പെടും. എല്ലാ പടത്തിലും റിയലിസ്റ്റിക്കാണോ, അതു നടന്നതാണോ, നടക്കുന്നതാണോ, നടക്കാൻ സാധ്യതയുള്ളതാണോ എന്നു നോക്കിയിട്ടുകാര്യമില്ല. ആ കഥയ്ക്കു നൽകേണ്ട ലോജിക്, അതാണ് പ്രധാനം. ടോം ആൻഡ് ജെറിക്ക് അതിന്റേതായ ഒരു ലോജിക് ഉണ്ട്. മറ്റൊരു രീതിയിൽ അതിനെ അവതരിപ്പിച്ചാൽ ആൾക്കാർക്ക് ഇഷ്ടപ്പെടില്ല. അതാണ് ഇതിഹാസയിലും സംഭവിച്ചത്.
ശരിക്കും ഇതിഹാസയിലേക്ക് ഞാൻ എത്തുന്നത്, അതിനു മുമ്പ് അതിന്റെ സംവിധായകൻ എന്നെ ശ്രദ്ധിച്ചതുകൊണ്ടാണ്. ഗദ്ദാമ, അന്നയും റസൂലും ചാപ്‌ടേഴ്‌സ് തുടങ്ങിയ ചിത്രങ്ങൾ വന്നപ്പോഴാണ് എന്നെ ശ്രദ്ധിക്കുന്നതും അതിലെ കഥാപാത്രത്തിലേക്ക് എന്നെ ആലോചിച്ചതും. അന്നയും റസൂലിലെ അബുവും ചാപ്‌റ്റേഴ്‌സിലെ ചൂണ്ട വിനോദിനെയും കണ്ടിട്ടാണ് അതിലെ രൂപമൊക്കെ വച്ചിട്ടാണ് അവർ എന്നെ തെരഞ്ഞെടുത്തത്. കുറച്ച് റഫ് ആയിട്ടുള്ള ഒരാൾ ചെയ്താൽ നന്നായിരിക്കില്ലേ എന്ന ചിന്ത. ഇതിഹാസയിലൂടെയാണ് ഞാൻ കൂടുതൽ ആളുകളിലേക്ക് എത്തുന്നത്.
ഞാൻ സാധാരണ സ്ത്രീപുരുഷന്മാരെ ശ്രദ്ധിക്കുന്നതിന്റെ കൂട്ടത്തിൽ ശ്രദ്ധിച്ചിട്ടുള്ള കാര്യങ്ങളൊക്കെയാണ് ഇതിഹാസക്കായി ഉപയോഗിച്ചത്. അല്ലാതെ അതിനുവേണ്ടി നോക്കിയിരിക്കാറില്ല. പിന്നെ ഇതുപോലൊരു കഥാപാത്രം വരുമ്പോൾ സ്വാഭാവികമായി നമ്മൾ ആലോചിക്കും, ഇവരുടെ പ്രത്യേകതകൾ, എന്തൊക്കെയാണ് ചെയ്യുന്നത് എന്നൊക്കെ. അതിനുശേഷം, ചിലപ്പോൾ നമ്മൾ ആലോചിക്കും. ഓർമയിലുള്ള അവരുടെ ചേഷ്ടകളും പെരുമാറ്റവുമൊക്കെയാണോ അവർക്കുള്ളതെന്ന് വെറുതെ നിരീക്ഷിച്ചിട്ടുണ്ടാവാം. അതൊക്കെ നമ്മൾ പ്രതീക്ഷിക്കുന്നത് പോലെ തന്നെയാണോ. ആൺ-പെൺ വ്യത്യാസവും ആ വ്യത്യാസങ്ങൾ എന്തൊക്കെയാണെന്നും പിന്നീട് നിരീക്ഷിച്ചിട്ടുണ്ടാവാം. ഓർത്തെടുക്കുന്ന കാര്യങ്ങൾ ശരിയാണോ, അല്ലെങ്കിൽ എന്തുവ്യത്യാസം വരുത്തിയാലാണ് അതിലേക്ക് കറക്ടായി എത്തുക. അങ്ങനെയുള്ള താരതമ്യമൊക്കെ നടത്തും. പിന്നെ അതു കൃത്യമായി ഒരു സ്ത്രീ ചെയ്യുന്നതുപോലെ അല്ല. കുറച്ചു കോമഡിയൊക്കെയുണ്ട്. ശരിക്കും ആ കോമിക് എലമെന്റാണ് ആളുകളെ കൂടുതൽ ആകർഷിച്ചത്, പ്രത്യേകിച്ച് കുട്ടികളെ.

subscribe

മധു വസന്തം
-മധു

Categories:

മലയാള സിനിമകളൊന്നാകെ മദ്രാസിലെ സ്റ്റുഡിയോകളെ ആശ്രയിച്ചിരുന്ന കാലത്ത് നേരിടേണ്ടി വന്ന പ്രയാസങ്ങളാണ് കേരളത്തിൽ സ്വന്തമായി സ്റ്റുഡിയോ തുടങ്ങുകയെന്ന ആശയത്തിലേക്ക് എന്നെ എത്തിച്ചത്. തിരുവനന്തപുരത്തെ മെറിലാന്റ് സ്റ്റുഡിയോയും ആലപ്പുഴയിലെ ഉദയാ സ്റ്റുഡിയോയും മാത്രമായിരുന്നു അക്കാലത്ത് കേരളത്തിലുണ്ടായിരുന്നത്. ഈ രണ്ടു സ്റ്റുഡിയോ ഉടമകൾക്കും സ്വന്തം പ്രൊഡക്ഷനുകൾ ഉണ്ടായിരുന്നതിനാൽ മറ്റു പടങ്ങൾക്കായി ആ സ്റ്റുഡിയോകൾ വിട്ടുനൽകാനുള്ള സാധ്യത അവർക്കുണ്ടായിരുന്നില്ല. അതിനപ്പുറം മദ്രാസിൽ നിന്ന് കേരളത്തിലേക്ക് മലയാള സിനിമയെ പൂർണമായും പറിച്ചുനടണമെന്ന ചിന്തയും അക്കാലത്ത് വ്യാപകമായിരുന്നു. ഉമ സ്റ്റുഡിയോയിലൂടെ ഞാൻ അതിനു തുടക്കമിട്ടു. അച്ഛന്റെ മേൽനോട്ടത്തിൽ നടന്നിരുന്ന ഉമാ സ്റ്റുഡിയോ അപ്രതീക്ഷിതമായ ചില കാരണങ്ങളാലാണ് അടച്ചുപൂട്ടേണ്ടി വന്നത്.

ഉമ സ്റ്റുഡിയോയുടെ പ്രവർത്തനങ്ങൾ നന്നായി നടക്കുന്ന കാലത്താണ് എന്റെ വീട്ടിൽ ജോലിക്കു നിന്നിരുന്ന പയ്യനെ കാണാതാകുന്നത്. മദ്രാസിലെ ഏതോ ഒരു കമ്പനിയിൽ അവന്റെ അമ്മാവൻ ജോലി ശരിയാക്കിയിട്ടുണ്ടെന്നും പറഞ്ഞ്, അവിടേക്കുള്ള വണ്ടിക്കൂലിയും വാങ്ങിയാണ് അവൻ എന്റെ വീട്ടിൽ നിന്നിറങ്ങിയത്. പിന്നീട് അവൻ എവിടെപ്പോയെന്ന് ആർക്കും ഒരറിവുമില്ല. വീട്ടുകാരും നാട്ടുകാരും അന്വേഷണം തുടങ്ങി. അന്വേഷണത്തിനെത്തിയ ചില രാഷ്ട്രീയക്കാർ ഞാൻ അവനെ കൊന്നു കുഴിച്ചുമൂടി എന്ന കണ്ടെത്തലിലാണ് എത്തിച്ചേർന്നത്. ഇതിനൊപ്പം ഒരു പേര് കൂടി അവരെനിക്ക് ചാർത്തിത്തന്നു- ഘാതകൻ മധു. പതിമൂന്ന് വയസേ അവനുണ്ടായിരുന്നുള്ളൂ. വീട്ടിൽ ജോലി ചെയ്യുന്നതിന്റെ ശമ്പളം അവന്റെ അമ്മ വന്ന് വാങ്ങിക്കൊണ്ടു പോകാറാണ് പതിവ്. ചിലപ്പോൾ അഡ്വാൻസും വാങ്ങും. പക്ഷേ, ചെറുക്കന് ഒരു സിനിമ പോലും കാണെനെന്നല്ല ഒരു ചായ കുടിക്കാനുള്ള കാശുപോലും അവർ കൊടുത്തിരുന്നില്ല. ജോലി ചെയ്തിട്ടും പത്തുപൈസ കൈയിൽ കിട്ടാത്ത അവസ്ഥ വന്നപ്പോൾ അമ്മാവൻ മദ്രാസിൽ ജോലി ശരിയാക്കിയിട്ടുണ്ടെന്ന് പറഞ്ഞു ഒളിച്ചോടുകയായിരുന്നു. മോനെ കാണാതായപ്പോൾ അമ്മയുടെ അന്വേഷണത്തോടൊപ്പം പുളിയറക്കോണത്തെ ഗാന്ധിജിയുടെ പാർട്ടിയിലെ ചിലരും രംഗത്തെത്തി. പയ്യനെ കണ്ടെത്തുകയോ ഈ സംഭവത്തിന്റെ നിജസ്ഥിതി അറിയുകയോ ആയിരുന്നില്ല അവരുടെ ആവശ്യം. എന്നെ ഭീഷണിപ്പെടുത്തി കുറെ കാശ് അടിച്ചു മാറ്റണമെന്നായിരുന്നു ഉദ്ദേശം.

സ്റ്റുഡിയോയുടെ മതിലിനു മുകളിൽ വരെ ഘാതകൻ മധു എന്നുപറഞ്ഞു അവർ പോസ്റ്ററൊട്ടിച്ചു. ഇതിനുള്ള കാശെല്ലാം പയ്യന്റെ അമ്മയിൽ നിന്നാണ് അവർ വാങ്ങിയിരുന്നത്. വീട്ടിൽ ആടിനെ വിറ്റും വാഴക്കുല വിറ്റുമൊക്കെ കുറേ കാശ് ആ സ്ത്രീ അവർക്ക് കൊടുത്തു. കൊടുത്തു എന്നു പറയുന്നതിനെക്കാളും അവർ വാങ്ങിച്ചെടുത്തു എന്നു പറയുന്നതാവും ശരി. എനിക്കെതിരേ തിരുവനന്തപുരത്തെ മഞ്ഞപ്പത്രങ്ങൾക്കുവരെ അവർ വാർത്ത കൊടുത്തു. പക്ഷേ, ആ പത്രക്കാർ ഇപ്പറഞ്ഞ രാഷ്ട്രീയക്കാരെക്കാളും എത്രയോ മാന്യന്മാരായിരുന്നു. അവർ എന്നെ വിളിച്ചു പറഞ്ഞു. ‘സാർ വീട്ടിൽ വേലയ്ക്കു നിന്ന പയ്യനെ കൊന്നു എന്ന വാർത്തയുമായി ചില രാഷ്ട്രീയക്കാർ വന്നിട്ടുണ്ട്. ഞങ്ങൾ ആ വാർത്ത കൊടുക്കുന്നില്ല. പക്ഷേ, സാറു സൂക്ഷിക്കണം’. ഞാൻ തെറ്റു ചെയ്‌തെങ്കിലല്ലേ ഭയപ്പെടേണ്ടതുള്ളൂ.

ഞാൻ വെറുതേയിരുന്നില്ല. ഞാനും അന്വേഷണം തുടർന്നു. പയ്യന്റെ വീട്ടിലേക്ക് വരുന്ന കത്തുകൾ ശ്രദ്ധിക്കാൻ ഞാൻ ഏർപ്പാട് ചെയ്തിരുന്നു. അവനും അമ്മയും ഒരു കുന്നിൻപുറത്താണ് താമസിച്ചിരുന്നത്. കുന്നു കയറി ഓരോ വീട്ടിലും കത്ത് എത്തിക്കാൻ പോസ്റ്റുമാന് ആകുമായിരുന്നില്ല. ഒരു പലവ്യഞ്ജനകടയിലാണ് കത്തുകൾ അയാൾ ഏൽപ്പിക്കാറുള്ളത്. കടയിൽ സാധനങ്ങൾ വാങ്ങിക്കാൻ വരുമ്പോഴാണ് കടയുടമ കത്തു കൈമാറുന്നത്. പയ്യന്റെ അമ്മയുടെ പേരിൽ കത്തു വന്നു. ആ കത്തു എന്റെ കൈയിൽ ലഭിച്ചു. പൊട്ടിച്ചു നോക്കിയപ്പോൾ അവൻ കോഴിക്കോട് കല്ലായിയിലുള്ള ഒരു ഹോട്ടലിൽ ജോലിക്കു നിൽക്കുകയാണെന്ന് മനസിലായി. ഈ വിവരം ഞാൻ ഉടനെ പിവിജിയെ (പി.വി. ഗംഗാധരൻ) വിളിച്ചു പറഞ്ഞു. അദ്ദേഹം പോലിസുമായി ഹോട്ടലിൽ ചെന്ന് അന്വേഷിച്ചപ്പോൾ പയ്യൻ സിനിമക്കു പോയിരിക്കുകയാണ്. ഉടനെ തിയേറ്ററിലെത്തി. സിനിമ നിർത്തിച്ചു. പയ്യനെ കയ്യോടെ പിടികൂടി. തിരുവനന്തപുരത്ത് മധു അവനെ കൊന്ന കാര്യമൊന്നും അവനറിഞ്ഞിട്ടേയില്ല. ഏഴു ദിവസമായിരുന്നു ഈ കൊലപാതക കഥയുടെ ദൈർഘ്യം. കൊല്ലപ്പെട്ട ആളിനെ ഏഴാം ദിവസം ജീവനോടെ പിടികൂടി. അതിനുശേഷം പയ്യന്മാരെ ഞാൻ വീട്ടിൽ ജോലിക്ക് നിർത്തിയിട്ടില്ല. ഉമ ആർട്‌സ് സ്റ്റുഡിയോ എന്ന സ്ഥാപനം ആ നാടിന് ഏറെ നേട്ടങ്ങൾ നൽകി. കുറേ പേർക്ക് ജോലി ലഭിച്ചു. ഒടുവിൽ തിരിച്ച് കിട്ടിയതോ ഘാതകൻ മധു എന്ന പേരും. നന്ദിക്കേടിന്റെ, മനുഷ്യത്വമില്ലായ്മയുടെ കുറെ ഓർമകളാണ് പുളിയറക്കോണത്തുകാർ എനിക്കു നൽകിയത്. ഈ വിശേഷണത്തിനപ്പുറം ഇനി എന്ത് അവാർഡ് ലഭിക്കാൻ.

സ്റ്റുഡിയോ നിലനിന്നിരുന്ന സ്ഥലത്തിന്റെ വലിയൊരു ഭാഗം പെനിൻസുലാർ പോളിമേഴ്‌സിനും ബാക്കി വരുന്ന കുറേ സ്ഥലം പിന്നീട് ഏഷ്യാനെറ്റ് ചാനലിനും വിൽക്കുകയായിരുന്നു. സത്യത്തിൽ സ്റ്റുഡിയോ തുടങ്ങിയതു കൊണ്ടാണ് ദാരിദ്രമില്ലാതെ ഞാനിപ്പോഴും കഴിയുന്നത്. സിനിമയിലഭിനയിച്ചും സിനിമ നിർമിച്ചും കിട്ടിയ കാശിൽ വലിയൊരു ഭാഗവും ഞാൻ ചിലവഴിച്ചത് സിനിമയ്ക്ക് വേണ്ടിയായിരുന്നു. സിനിമ നിർമിച്ചിരുന്ന കാലത്ത് രണ്ട് പടങ്ങൾ പൊട്ടിപ്പോയാൽ മതി, പാപ്പരാകുമായിരുന്നു. അപ്പോഴും സാമ്പത്തികമായി എന്നെ നിലനിർത്തിയത് സ്റ്റുഡിയോയിൽ നിന്നുള്ള വരുമാനമാണ്. സ്റ്റുഡിയോക്കു വേണ്ടി പുളിയറക്കോണത്ത് വാങ്ങിയ സ്ഥലത്തിന്റെ ക്രയവിക്രയത്തിൽ നിന്നുള്ള സാമ്പത്തിക നേട്ടങ്ങളാണ് എന്നെ ഇന്നും ദാരിദ്ര്യമില്ലാതെ മുന്നോട്ടു കൊണ്ടുപോകുന്നത്.

subscribe

ഗിരീഷ് കർണാഡ് – നാടകം, സിനിമ, ജീവിതം
-സന്ദീപ്. എസ്

Categories:

ആധുനിക ഇന്ത്യൻ നാടകസിനിമാ രംഗത്തെ അതികായൻ ഗിരീഷ് കർണാഡ് വിട പറഞ്ഞു. ഒരു കാലഘട്ടത്തിന്റെ സാമൂഹികവും രാഷ്ട്രീയവുമായ പ്രബുദ്ധതയുടെ പ്രതീകവുമായിരുന്നു അദ്ദേഹം. നാടകത്തെയും സിനിമയെയും ഇന്ത്യയുടെ സമകാലിക ജീവിതത്തിലേക്ക് പറിച്ചു നട്ടതാണ് അദ്ദേഹത്തിന്റെ ഏറ്റവും വലിയ സംഭാവന. കർണാഡിന്റെ മരണം സൃഷ്ടിക്കുന്ന ശൂന്യത ഇന്ത്യയുടെ സാമൂഹ്യ രാഷ്ട്രീയ സാഹിത്യ മണ്ഡലങ്ങളിൽ ഏൽപ്പിക്കുന്ന ആഘാതം വലുതാണ്. മനുഷ്യപക്ഷത്തുനിന്നു നിരന്തരം ശബ്ദിച്ചിരുന്നതായിരുന്നു അദ്ദേഹത്തിന്റെ സൃഷ്ടികളുടെ പ്രധാന സവിശേഷത. ഇറ്റാലിയൻ ചലച്ചിത്രകാരന്മാരുടെ നിയോറിയലിസ്റ്റിക് സിനിമകളുടെയും ഫ്രഞ്ച് നവതരംഗ സിനിമകളുടെയും ഏറ്റക്കുറച്ചിലുകൾ കർണാഡിന്റെ സിനിമകളിലും നാടകങ്ങളിലും നിറഞ്ഞുനിൽക്കുന്നു. സമാന്തര സിനിമാ രംഗത്ത് അദ്ദേഹം നടത്തിയ പരീക്ഷണങ്ങൾ ഇന്ത്യയിൽ പുതിയ ചലച്ചിത്ര സംസ്‌കാരത്തിനു തന്നെ വിത്തുപാകി. ഇക്കാരണം കൊണ്ടുതന്നെ കർണാഡ് ചലച്ചിത്രമേഖലയിൽ നവഭാവുകത്വത്തിന്റെ വക്താവായെന്നു പറഞ്ഞാലും അത് അതിശയോക്തിയാവില്ല.

കലയിലൂടെ ഫാസിസ്റ്റ് ഭരണകൂടത്തെ ചോദ്യം ചെയ്യാനാകുമെന്നും ഗിരീഷ് കർണാഡ് സമൂഹത്തോടു വിളിച്ചു പറഞ്ഞു. 1938 മേയ് 19 ന് മഹാരാഷ്ട്രയിലെ മാഥേരാനിലാണ് ഗിരീഷ് കർണാഡ് ജനിച്ചത്. 1958-ൽ ബിരുദം നേടിയ അദ്ദേഹം 6063 കാലത്ത് ഓക്‌സ്ഫഡ് യൂണിവേഴ്‌സിറ്റിയിൽ റോഡ്‌സ് സ്‌കോളറായിരുന്നു. തത്വശാസ്ത്രം, രാഷ്ട്രതന്ത്രം, സാമ്പത്തികശാസ്ത്രം എന്നിവയിൽ ബിരുദാനന്തര ബിരുദം കരസ്ഥമാക്കിയാണ് അദ്ദേഹം ഓക്‌സ്ഫഡിൽ നിന്നു പോരുന്നത്. പത്മശ്രീയും പത്മവിഭൂഷണും ജ്ഞാനപീഠ പുരസ്‌കാരവും അടക്കമുള്ള ഇന്ത്യയിലെ പ്രമുഖ പുരസ്‌കാരങ്ങൾ അദ്ദേഹത്തെ തേടിയെത്തി.

നാടകവേദിയിലെ അതുല്യപ്രതിഭ
…………………………………

നാടോടി കലാസങ്കേതങ്ങളെ സമകാലിക ഇന്ത്യൻ ജീവിതങ്ങളുമായി ഇണക്കിച്ചേർത്ത് അവതരിപ്പിക്കുന്നതിൽ അദ്ദേഹത്തിനുണ്ടായിരുന്ന അസാധാരണമായ കഴിവാണ് മുഖ്യധാരയിൽ നിന്ന് പുറത്തേക്കു പൊയ്‌ക്കൊണ്ടിരുന്ന നാടകത്തെ ജനകീയമാക്കിയത്. ചാർലി ചാപ്ലിനെയും ബ്രെതോൾഡ് ബ്രെഹ്ത്തിനെയും പോലുള്ളവർ മുന്നോട്ടുവച്ച ജീവിത ദർശനമാണ് കർണാഡിനെയും മുന്നോട്ടു നയിച്ചിരുന്നത്. ഇന്ത്യയിലെ പ്രമുഖരായ എല്ലാ സംവിധായകരും കർണാഡിന്റെ നാടകങ്ങളെ അരങ്ങിലെത്തിച്ചിട്ടുണ്ട്. ഇന്ത്യൻ നാടകത്തിന്റെ പിതാവ് എന്നു വിശേഷിപ്പിക്കപ്പെടുന്ന ഇബ്രാഹിം അൽക്കാസിയാണ് അതിൽ പ്രധാനി.

യയാതി, തുഗ്ലക്ക്, ഹയവദന, നാഗമണ്ഡല എന്നിവയാണു കർണാഡിന്റെ പ്രധാന നാടകങ്ങൾ. പ്രാദേശികമായ വിഷയങ്ങളും ആഖ്യാനശൈലികളുമാണ് കന്നഡ സാഹിത്യത്തിന്റെ പ്രത്യേകതയായി എല്ലാക്കാലത്തും വിലയിരുത്തപ്പെട്ടിട്ടുള്ളത്. എന്നാൽ, കർണാഡിന്റെ നാടകങ്ങളിൽ കർണാടകത്തെ മാത്രം സ്പർശിക്കുന്ന വിഷയങ്ങളില്ല. ഒന്നാമത്തെ നാടകമായ യയാതി ഒരു പുരാണ കഥയുടെ പുനരാഖ്യാനമാണ്. മഹാഭാരതത്തിലെ ‘യയാതി’യെക്കുറിച്ചുള്ള നാടകം 1961 ലാണ് പുറത്തിറങ്ങുന്നത്. തന്റെ യൗവനകാലത്ത് ശുക്രാചാര്യന്റെ ശാപത്താൽ അകാല വാർധക്യം വരിക്കേണ്ടിവന്നയാളാണ് യയാതി. അരങ്ങിൽ വിജയം നേടിയ ആ നാടകം നിരവധി ഇന്ത്യൻ ഭാഷകളിൽ വേദിയിലെത്തി.

പിന്നീടു പുറത്തുവന്ന തുഗ്ലക്ക് എന്ന നാടകത്തിൽ മുഹമ്മദ് ബിൻ തുഗ്ലക്കായിരുന്നു കേന്ദ്രകഥാപാത്രം. പതിന്നാലാം നൂറ്റാണ്ടിൽ ഡൽഹി ഭരിച്ച മുഹമ്മദ് ബിൻ തുഗ്ലക് എന്ന ചരിത്രനായകനെ അദ്ദേഹം വെറുതെ വേദിയിലെത്തിക്കുകയായിരുന്നില്ല. ഇന്ത്യയുടെ ആദ്യത്തെ പ്രധാനമന്ത്രയായിരുന്ന ജവഹർലാൽ നെഹ്‌റുവിന്റെ കാലത്തെ രാഷ്ട്രീയത്തെ വിമർശനാത്മകമായി സമീപിക്കുക കൂടിയായിരുന്നു അദ്ദേഹം ചെയ്തത്. രണ്ടാമത്തെ നാടകമായ തുഗ്ലക്കിലേക്കെത്തുമ്പോൾ അത് ചരിത്രാധിഷ്ഠിതമായ രചനയായി മാറുന്നു. രസകരമായ കാര്യം ഇവ രണ്ടും ആധുനിക നാടകങ്ങളുമാണെന്നതാണ്. അതായത്, വീക്ഷണത്തിലും ഭാവത്തിലും ആധുനികം. തുഗ്ലക് ഒരു മോഡേൺ ക്ലാസിക് ആയിട്ടാണ് നിരൂപകർ വാഴ്ത്തുന്നത്.

ഹയവദനയിലേക്കും നാഗമണ്ഡലത്തിലേക്കും വരുമ്പോൾ അദ്ദേഹം കന്നഡക്കാരനായെന്നു പറയുന്നതിൽ തെറ്റില്ല. കർണാടകയിലെ ഗ്രാമീണതയിൽ നിന്നും നാടോടി കഥകളിൽ നിന്നും സ്വാംശീകരിച്ചെടുത്ത അതിമനോഹരമായ നാടകീയ മുഹൂർത്തങ്ങളുടെ ധാരാളിത്തം ഈ നാടകങ്ങളിൽ കാണാനാവും. സംസ്‌കൃത ഭാഷയിലെ ഒരു പഴയ കഥാസമാഹാരമായ കഥാസരിത് സാഗരത്തിൽ നിന്നാണ് ഹയവദന രൂപപ്പെടുന്നതെന്നു പറയാമെങ്കിലും വിഖ്യാത ജർമൻ നോവലിസ്റ്റായ തോമസ് മന്നിന്റെ ‘മാറ്റിവച്ച തലകളു’ടെ വലിയ സ്വാധീനം ഹയവദനയിലുണ്ട്. യക്ഷഗാനമെന്ന കർണാടകയിലെ നാടോടികലാരൂപത്തെ നാടകത്തിലേക്കു സന്നിവേശിപ്പിച്ചിടത്താണ് ഹയവദന ശ്രദ്ധേയമാകുന്നത്. പാരമ്പര്യ ദൃശ്യകലാരൂപമായ യക്ഷഗാനം ഗിരീഷ് കർണാഡെന്ന കലാകാരനെ എത്രമാത്രം സ്വാധീനിച്ചിരുന്നു എന്ന് മനസിലാക്കാൻ ഹയവദന കണ്ടാൽ മതി.

പ്രാദേശിക നാടോടികലാരൂപങ്ങളോട് കർണാഡിനുണ്ടായിരുന്ന അഭിനിവേശത്തിന്റെ വ്യക്തമായ തെളിവാണ് ‘നാഗമണ്ഡല’ എന്ന നാടകം. ഷിക്കാഗോയിലെ മിന്നാപൊളീസ് ഗുത്രീ തിയറ്ററിലാണ് നാഗമണ്ഡല അവതരിപ്പിക്കപ്പെട്ടത്. ഗിരീഷ് കർണാഡ് നാടകരചനയിലേക്കെത്തുന്ന കാലത്ത് പുറത്തിറങ്ങിയ നാടകങ്ങളിലെല്ലാം നഗരജീവിതത്തിന്റെ പശ്ചാത്തലത്തിൽ എഴുതപ്പെട്ടവയായിരുന്നു. കർണാഡിന്റെ സമകാലികരായിരുന്ന വിജയ് തെണ്ടുൽക്കറും മോഹൻ രാകേഷും ബാദൽ സർക്കാറുമൊക്കെ നാഗരികതയുടെ വളർച്ചയും നന്മതിൻമകളും പ്രമേയമാക്കിയപ്പോൾ കർണാഡ് ഗ്രാമങ്ങളിലേക്കാണ് പോയത്. ഗ്രാമീണമായ ജീവിതങ്ങളെ നാടകങ്ങളിലൂടെ അവതരിപ്പിക്കാൻ അദ്ദേഹം സവിശേഷമായ ശ്രദ്ധ പുലർത്തിയിരുന്നു.

പുത്തൻ ചലച്ചിത്ര സംസ്‌കാരം
………………………………..

വിഖ്യാത നോവലിസ്റ്റ് യു.ആർ. അനന്തമൂർത്തിയുടെ പ്രശസ്ത നോവൽ ‘സംസ്‌കാര’ യുടെ തിരക്കഥ തയാറാക്കുകയും പ്രധാനവേഷത്തിൽ അഭിനയിക്കുകയും ചെയ്തു കൊണ്ടാണ് ഗിരീഷ് കർണാഡ് വെള്ളിത്തിരയിൽ അരങ്ങേറിയത്. രാഷ്ട്രപതിയുടെ പുരസ്‌കാരവും ആ സിനിമയ്ക്കായിരുന്നു. നടനായും തിരക്കഥാകൃത്തായും അരങ്ങേറിയ ഗിരീഷ് കർണാഡ് സംവിധായകന്റെ മേലങ്കിയും തനിക്കു നന്നായി ചേരുമെന്ന് തെളിയിച്ചു. സംവിധാനം ചെയ്യാനായി അദ്ദേഹം തെരഞ്ഞെടുത്തത് എസ്.എൽ. ബൈരപ്പയുടെ വംശവൃക്ഷ എന്ന നോവലായിരുന്നു. ആദ്യ ചിത്രമായ സംസ്‌കാര മികച്ച സിനിമയ്ക്കുള്ള ദേശീയ പുരസ്‌കാരമാണ് കർണാഡിന് സമ്മാനിച്ചതെങ്കിൽ വംശവൃക്ഷ മികച്ച സംവിധായകനുള്ള ദേശീയപുരസ്‌കാരം നേടിക്കൊടുത്തു. മികച്ച സംവിധായകനുള്ള ദേശീയ പുരസ്‌കാരം ബി.വി. കാരന്തിനൊപ്പമാണ് അദ്ദേഹം നേടിയത്. വിഖ്യതമായ നോവലുകൾ ദൃശ്യവത്കരിക്കുന്നതിൽ കഴിവുള്ളയാളായിരുന്നു കർണാഡ്. ശ്രീകൃഷ്ണ ആലനഹള്ളിയുടെ പ്രശസ്ത നോവൽ ‘കാടും’ കർണാഡിന്റെ സംവിധാനത്തിൽ പുറത്തുവന്നു.

ശൂദ്രകന്റെ മൃച്ഛഘടികം എന്ന നാടകത്തെ അടിസ്ഥാനമാക്കി അദ്ദേഹം സംവിധാനം ചെയ്ത ഉത്സവ്, നിഷാന്ത് (1975), കലിയുഗ് (1980) എന്നിവയും അദ്ദേഹത്തിലെ ചലച്ചിത്രകാരന്റെ കൈയൊപ്പുപതിഞ്ഞവയാണ്. ആർ.കെ. നാരായണന്റെ മാൽഗുഡി ഡെയ്‌സ് പരമ്പരയിൽ കേന്ദ്രകഥാപാത്രമായ സ്വാമിയുടെ പിതാവിനെ അവതരിപ്പിച്ചതും കർണാടാണ്. ശങ്കർ നാഗും കവിത ലങ്കേഷുമായിരുന്നു മാൽ ഗുഡി ഡെയ്‌സിന്റെ സംവിധായകർ.

പൂന ഫിലിം ആൻഡ് ടെലിവിഷൻ ഇൻസ്റ്റിറ്റ്യൂട്ടിന്റെ ആദ്യ ഡയറക്ടറായിരുന്നു കർണാഡ്. സംഗീത നാടക അക്കാദമി ചെയർമാനായും അദ്ദേഹം പ്രവർത്തിച്ചിട്ടുണ്ട്. ജോൺപോളിന്റെ രചനയിൽ ഭരതൻ സംവിധാനം ചെയ്ത നീലക്കുറിഞ്ഞി പൂത്തപ്പോൾ എന്ന ചിത്രത്തിലൂടെ അദ്ദേഹം മലയാള സിനിമയിലും തന്റെ സാന്നിധ്യമറിയിച്ചു. സുരേഷ് കൃഷ്ണ സംവിധാനം ചെയ്ത ദ പ്രിൻസ് എന്ന ചിത്രത്തിലും അദ്ദേഹം മലയാളത്തിൽ അഭിനയിച്ചിട്ടുണ്ട്.

പഴയ വീടും അമ്മയെക്കുറിച്ചുള്ള ഓർമകളും
-എ. എസ്. ദിനേശ്‌

Categories:

കർമം ചെയ്യുക. അത് നൂറു ശതമാനം ആത്മാർത്ഥതയോടെ ആസ്വദിച്ച് ചെയ്യുക. എന്തു കിട്ടുമെന്ന വേവലാതി വേണ്ട. ആവശ്യമുള്ളതു കിട്ടും. കിട്ടുന്നതു കൊണ്ടു സംതൃപ്തിപ്പെടുക. ഇനി കിട്ടാത്തത് അർഹതയില്ലാത്തതു കൊണ്ടാണ്. പരാതിപ്പേടേണ്ട. ഈ ഋഷി വചനം എന്റെ ജീവിതത്തിൽ പ്രാവർത്തികമാക്കി സന്തോഷത്തോടെ കഴിയുകയാണ് ഞാൻ. പി.ആർ.ഒ ആയി കർമരംഗത്തെത്തിയ നാളുകൾ മുതൽ കുറേ വർഷങ്ങളോളം ഒരു പ്രമുഖ പ്രസിദ്ധീകരണം എന്റെ വാർത്തകൾ ഉപയോഗിച്ചിരുന്നില്ല. അതിനു പ്രത്യേക കാരണമൊന്നുമില്ല. എന്നാലും ഒരു മടിയും കൂടാതെ വാർത്തകൾ അയച്ച് ഞാൻ എന്റെ ജോലിയിൽ മാത്രം ശ്രദ്ധിച്ചു. അതിൽ വാർത്തകൾ വാരാത്തത് എന്റെ കഴിവുകേടായി ആരും വിശേഷിപ്പിച്ചില്ല. മനസും ശരീരവും കൂടുതൽ ഊർജസ്വലമായി. ക്ഷമ എനിക്കൊരു അലങ്കാരമായിരുന്നു. ഒടുവിൽ കാലം മുന്നിൻ തെളിഞ്ഞ് എന്നെ വെളിപ്പെടുത്തി. ഇപ്പോൾ എന്റെ കുടുതൽ
വാർത്തകൾ വരുന്നത് ആ പ്രസിദ്ധീകരണത്തിലാണ്. ഒരു പി.ആർ.ഒ എന്ന നിലയിൽ ഇന്ന് ഞാൻ അംഗീകരിക്കപ്പെടുപ്പോൾ ആ പ്രസിദ്ധീകരണത്തിനും സ്ഥാനമുണ്ട്. കർമനിരതരാവു… ഫലം ഇച്ഛിക്കേണ്ട. കാലത്തിന്റെ കുലുക്കിക്കുത്തിൽ കാലിടറില്ല… ഉറപ്പ്!

മാന്യനും ശാന്തനും സൗമ്യനുമായ ഒരു ഹിറ്റ് ചിത്രത്തിന്റെ നിർമാതാവ് ഒരിക്കൽ തന്റെ പുതിയ ചിത്രത്തിന്റെ ചിത്രീകരണ വേളയിൽ എന്നെ ഫോണിൽ വിളിച്ചു ചോദിച്ചു.
‘ഒരു പടത്തിന് എത്രയാ പ്രതിഫലം വാങ്ങുന്നത്? ‘
‘അങ്ങനെ ഒരു തുക ഇതു വരെ ചോദിച്ചു വാങ്ങിയിട്ടില്ല. തരുന്നത് വാങ്ങും. ഒരു പരാതിയും ഇതു വരെ ആരോടും പറഞ്ഞിട്ടില്ല. ആവശ്യത്തിൽ കൂടതലാണെങ്കിൽ വേണ്ടയെന്ന് പറയാൻ തയാറാണെങ്കിലും അതിനു ഭാഗ്യവുമുണ്ടായിട്ടില്ല’ -ഞാൻ പറഞ്ഞു.
എന്നെ വെറുതെ അങ്ങനെ വിടാൻ ഭാവമില്ലെന്ന് മനസ്സസിലായി. ഉടൻ അടുത്ത ചോദ്യം വന്നു.
‘ഏറ്റവും കൂടതലായി എത്ര രൂപയാണ് മേടിച്ചത്?
‘അത് പറയില്ല. സാറിന് ഇഷ്ടമുള്ളതു തരുക. തരുന്നത് സന്തോഷത്തോടെ തരുക. അതിന്റെ പേരിൽ ഒരു വിരോധവുണ്ടാവില്ലെ’ – ഞാൻ പറഞ്ഞു.
അദ്ദേഹം തിരിച്ചും മറിച്ചും ചോദിച്ചുവെങ്കിലും ഞാൻ വിട്ടു പറഞ്ഞില്ല. ഗതികെട്ട് ഞാൻ കാര്യം തിരക്കി. സ്‌നേഹപൂർവം അദ്ദേഹം പറഞ്ഞതിങ്ങനെയാണ്.
‘ആത്മാർത്ഥതയോടെ ദിനേശ് ചെയ്യുന്ന ജോലി എനിക്കിഷ്ടമായി. അതു കൊണ്ട് ഏറ്റവും കൂടുതൽ കിട്ടിയ തുകയുടെ 25 ശതമാനം കൂടതൽ താരാൻ വേണ്ടിയാണ് ചോദിച്ചത്’.
അപ്പോഴും ഞാൻ പറഞ്ഞു, അതൊന്നും നോക്കണ്ട. ഇഷ്ടമുള്ളത് തന്നാൽ മതിയെന്ന്. സന്തോഷത്തോടെ ശരിയെന്ന് പറഞ്ഞാണ് സംസാരം നിർത്തിയത്. അദ്ദേഹത്തിന്റെ ആ സിനിമ വമ്പൻ പരാജയമായിരുന്നു. അദ്ദേഹത്തിന്റെ ആ വലിയ ആഗ്രഹം നടക്കാതെ പോയതിൽ ഇപ്പോഴും എനിക്ക് ഒത്തിരി വിഷമമുണ്ട്.

പള്ളുരുത്തിയിലെ ഞാൻ ജനിച്ച് പഠിച്ച് വളർന്ന വീട് ഓർമകളുടെ ചുവരുകൾക്കുള്ളിൽ അകപ്പെട്ട് ക്രമേണ മങ്ങിയ വെളിച്ചത്തിലേക്കു മറയുകയാണ്.
പ്രാചീനതയുടെ മഹത്ത്വമുണ്ടായിരുന്ന തറവാടിന്റെ മുൻഭാഗം 35 വർഷങ്ങൾക്കു മുമ്പ് പുതുക്കി പണിതു. കാലപ്പഴക്കം കൊണ്ട് അവശയായ ഈ വീടിന് മോക്ഷം. പകരം പുതിയ ചെറിയ വീട് വരും. അകക്കണ്ണിൽ തറവാടിന്റെ അകത്തളത്തിലേക്ക് ഉളിഞ്ഞു നോക്കി. മഹാഭാരത കഥ പോലെ വിശാലമാണത്.
ഒരു നിമിഷം! ആരോ പിന്നോട്ട് വലിക്കുന്നു. ഓർമകള്ളുടെ ആഴങ്ങളിൽ ആണിയടിച്ച് മുറിവേറ്റ് തിളങ്ങി നിൽക്കുന്നു ‘ അമ്മ’. ഓർക്കാൻ പോലും അർഹനല്ല ഞാൻ. കണ്ണീർ നിറഞ്ഞ് ഒഴുകുയാണ്, ഞാനറിയാതെ. കുറേ പേരുണ്ടായിട്ടും ഒടുവിൽ ഒറ്റപ്പെട്ട് മറ്റുള്ളവരാൽ അവഗണിക്കപ്പെട്ട് തളർന്ന് കിടപ്പിലായി യാത്ര പറയുമ്പോൾ മുഖം ശാന്തമായിരുന്നു. മൂത്ത മകന്റെ ഭാര്യയായി നിറ ദീപത്താൽ തറവാട്ടിലെത്തി, ശേഷം ബന്ധുക്കൾക്കായി കാലിത്തൊഴുത്തിലും വിശാലമായ അടുക്കളയിലും പണിയെടുത്ത് അടിഞ്ഞുകൂടി, പരാതിയും പരിഭവവുമില്ലാതെ. അപ്പോൾ ഞാൻ എവിടെയായിരുന്നുവെന്ന ചോദ്യം വരുന്നു അല്ലേ? അത് മറ്റൊരു പർവമാണ്. ഓർമകൾ എല്ലാം മായും. പക്ഷേ, കണ്ണീരിലെ വിശുദ്ധിയും സഹനത്തിന്റെ മാധുര്യവും സഹജീവികളോടുള്ള പ്രേമവും വിശ്വാസത്തിന്റെ സംതൃപ്തിയും കാലത്തോടൊപ്പം നിലനിൽക്കും. മാപ്പ് പറയുന്നില്ല. അമ്മയെ ഓർക്കുമ്പോൾ മഹാനായ ശ്രീയേശുവിന്റെ തിരുമുഖമാണ് മുന്നിൽ. വ്യാഖ്യാനിക്കാൻ കഴിയില്ല, അതാണ് അമ്മ!!! എന്റേതു മാത്രമല്ല, നിങ്ങളുടേതും…

പട്ടായയിൽ പറന്ന്… പറന്ന്
-അരുൺ ടോം

Categories:

ബാങ്കോങ്കിലെത്തി വിസ സ്റ്റാമ്പ് ചെയ്ത് വിമാനത്താവളത്തിൽ നിന്നിറങ്ങുമ്പോൾ സ്വീകരിക്കാനായി നിന്നയാളെ കണ്ടപ്പോൾ തോന്നി ഹാ കൊള്ളാല്ലോ… നല്ല സുന്ദരി തന്നെ.. പരിചയപ്പെടുന്നതിനിടയിലാണു മനസിലായത് കക്ഷി പെണ്ണല്ല ഹിജഡയാണ്. പലവട്ടം സൂക്ഷിച്ച് നിരീക്ഷിച്ചിട്ടും അങ്ങ് വിശ്വസിക്കാൻ പറ്റുന്നില്ല മുന്നിൽ നിൽക്കുന്നയാൾ ഹിജഡയാണെന്ന്.

പിന്നീടാണ് ലോകത്തിൽ വച്ച് ഏറ്റവും കൂടുതൽ ലിംഗമാറ്റ ശസ്ത്രക്രിയ നടക്കുന്ന ഇടമാണ് ബാങ്കോക്ക് എന്ന സത്യം അറിയുന്നത്. തായ്‌ലൻഡിലെ രാജഭരണകൂടം സ്വവർഗാനുരാഗികളോടും ഹിജഡകളോടുമെല്ലാം മൃദുസമീപനമാണ് കൈക്കൊള്ളുന്നത്. മറ്റിടങ്ങളെ അപേക്ഷിച്ച് ഹിജഡകൾക്ക് ഇവിടെ കൂടുതൽ അവസരങ്ങൾ ലഭിക്കുന്നുണ്ട്. സർക്കാർ ഓഫീസുകളിലും സ്‌കൂൾ, വാർത്താമാധ്യമങ്ങൾ എന്നീ മേഖലകളിലും ഇവർക്ക് അവസരങ്ങളുണ്ട്. മൂന്നാം ലിംഗക്കാരെ സ്ത്രീ/പുരുഷൻ എന്ന പോലെ തായ്‌സർക്കാർ അംഗീകരിച്ചിട്ടുണ്ട്. ലേഡിബോയ് എന്നാണ് ഇവരെ വിളിക്കുക. ബാങ്കോക്കിൽ നിന്ന് 150 കിലോമീറ്റർ തെക്ക് പടിഞ്ഞാറായി സ്ഥിതി ചെയ്യുന്ന പട്ടായയിലേക്കുള്ള യാത്രയിലെ കാഴ്ചകൾ മലയാളികളെ അത്ഭുതപ്പെടുത്തും. കാരണം കേരളത്തെ ഓർമപ്പെടുത്തും വിധമാണ് ഇവിടുത്തെ ഭൂപ്രകൃതി. ഒരു പക്ഷേ കേരളത്തോട് ഇത്ര അധികം സാമ്യമുള്ള മറ്റ് ഒരു നാട് കാണുവാൻ കഴിഞ്ഞെന്ന് വരില്ല. വാഹനങ്ങൾ ചീറിപ്പായുന്ന ആറുവരി പാതയ്ക്ക് ഇരുവശവും തെങ്ങിൻ തോട്ടവും കപ്പത്തോട്ടവും ഇടയ്ക്കിടയ്ക്ക് പെയ്യുന്ന മഴയുമാണ് സഞ്ചാരികളെ സ്വാഗതം ചെയ്യുന്നത്. സമയ കണക്കിൽ ഇന്ത്യയും തായ്‌ലൻഡും തമ്മിൽ ഒന്നരമണിക്കൂറിന്റെ വ്യത്യാസമുണ്ട്. നമ്മളേക്കാൾ ഒന്നരമണിക്കൂർ മുന്നേപായുന്നവരാണ് തായ്‌ലൻഡുകാർ. പൊതുവേ പട്ടായയെന്നു കേൾക്കുമ്പോൾ യുവാക്കളുടെ ഉള്ളിലുണ്ടാകുന്ന ചിരിയുണ്ടല്ലോ… അത് അറിവില്ലായ്മ കൊണ്ട് ഉണ്ടാകുന്ന ഒന്നുമാത്രമാണ്, അല്ലെങ്കിൽ കേട്ടുകേൾവികളിൽ വിശ്വസിക്കുന്നത് കൊണ്ട് മാത്രമാണ്. പട്ടായ മനുഷ്യമാംസത്തിന് വില പറയുന്ന നാട് മാത്രമല്ല, കുടുംബസമേതം സഞ്ചരിക്കാൻ കൊള്ളാവുന്ന ഒരു വിനോദസഞ്ചാര കേന്ദ്രം കൂടിയാണ്. എന്നാൽ, ഇക്കാര്യം പലർക്കും അറിയില്ലെന്നതാണ് സത്യം. തായ്‌ലൻഡിന്റെ കടലോരമേഖലയാണ് പട്ടായ എന്ന കൊച്ചുപട്ടണം. ബീച്ച് സൗന്ദര്യം ആസ്വദിക്കാൻ പട്ടായയും നഗരസൗന്ദര്യം ആസ്വദിക്കാൻ ബാങ്കോക്കുമാണ് വിനോദസഞ്ചാരികൾ തെരഞ്ഞെടുക്കുക.

രാത്രികൾ
………………………………….

മനോഹരമായ കടൽത്തീരങ്ങൾ, വൃത്തിയുള്ള റോഡുകൾ, സുഖകരമായ കാലാവസ്ഥ, രസകരമായ വിനോദങ്ങൾ, വ്യത്യസ്തമായ കാഴ്ചകൾ, പല രാജ്യങ്ങളിൽ നിന്നുള്ള സഞ്ചാരികൾ എല്ലാ അർത്ഥത്തിലും സുഖിക്കാൻ വന്നിറങ്ങുന്ന സ്ഥലം അതാണ് പട്ടായ. മസാജിന് പേരു കേട്ട സ്ഥലം കൂടിയാണ്. രാവിലെ തുറക്കുന്ന മസാജ് പാർലറുകൾ രാത്രി പുലരുവോളം തുറന്നിരിക്കും. വ്യത്യസ്ഥ ഡ്രസ് കോഡിലുള്ള അർദ്ധനഗ്‌നരായ പെൺകുട്ടികൾ സഞ്ചാരികളെ കാത്ത് മസാജ് പാർലറുകൾക്ക് മുന്നിൽ നിരന്നിരിക്കുന്ന കാഴ്ച നഗരത്തിന്റെ എല്ലാം മുക്കിലും മൂലയിലും കാണുവാൻ കഴിയും. മണിക്കൂറിന് 200 മുതൽ 400 ബാത്ത് (ബാത്ത് തായ്‌ലൻഡ് കറൻസിയാണ്. ഒരു ബാത്ത് 1.87 ഇന്ത്യൻ രൂപയാണ്) വരെയാണ് ചാർജ്. പകൽ ഉറക്കവും രാത്രി ഉണരുകയും ചെയ്യുന്ന നഗരമാണ് പട്ടായ. പകൽ സമയം റോഡുകളിൽ വാഹനങ്ങൾ തീരെക്കുറവാണ്. പകൽ സഞ്ചാരികൾ കൂടുതലും ബീച്ചുകളിൽ വാട്ടർ സ്‌പോർട്‌സ് ആക്റ്റിവിറ്റികളിലും വെയിൽ കായലിലുമായി സമയം ചെലവഴിക്കുക.

രാത്രിയാകുന്നതോടെ നഗരത്തിന്റെ കെട്ടുംമട്ടും മാറും. രതി എന്ന ചിന്തയാണ് നഗരം സഞ്ചാരികൾക്ക് സമ്മാനിക്കുക. ഡാൻസ് ബാറുകളും നൈറ്റ് ക്ലബ്ബുകളും ഉണരുകയായി. ബാറുകളിലും തായി റെസ്റ്റോറന്റുകളിലും അർദ്ധനഗ്‌നരായ പെൺകുട്ടികൾ മേശയ്ക്ക് മുകളിൽ നിന്ന് നൃത്തം ചെയ്യുന്നത് ഒരു സാധാരണ കാഴ്ചയാണ്. ഇവിടുത്തെ മിക്ക ഡാൻസ് ബാറുകളും തായി റെസ്റ്റേറന്റുകളും നമ്മുടെ നാട്ടിലെ പോലെ നാലു ചുവരുകൾക്കുള്ളിൽ നിർമിക്കപ്പെട്ടിട്ടുള്ളതല്ല. ചുവരുകൾക്ക് പകരം തൂണുകളിൽ തീർത്ത ഓപ്പൺ കൊട്ടിടങ്ങളാണ് ഭൂരിഭാഗവും. ഇത്തരത്തിൽ നിർമിച്ചിരിക്കുന്നതിന്റെ ലക്ഷ്യവും സഞ്ചാരികളായ വഴിയാത്രകരുടെ ശ്രദ്ധ അങ്ങോട്ടെയ്ക്ക് ആകർഷിക്കുക എന്നതു തന്നെ. രണ്ടരകിലോമീറ്റർ ദൂരം നീണ്ട് കിടക്കുന്ന വാക്കിങ് സ്ട്രീറ്റ് എന്ന പേരിൽ അറിയപ്പെടുന്ന ചുവന്നതെരുവാണ് പട്ടായ നഗരത്തിന്റെ പ്രധാന ആകർഷണം. ഇന്ത്യയിലെ ചുവന്ന തെരുവുപോലെ പാൻ മുറുക്കുന്ന യുവതികളും വൃത്തിഹീനവും ഇടുങ്ങിയതും ഭീതിപ്പെടുത്തുന്നതുമായ വഴികളോ ആളുകളോ ഇവിടെയില്ല. ആരും നിർബന്ധിച്ച് വലിച്ചുകൊണ്ടുപോകുകയോ ശല്യപ്പെടുത്തുകയോ കൊള്ളയടിക്കുകയോ ചെയ്യില്ല. നേരെ മറിച്ച് വൃത്തിയുള്ളതും കസ്റ്റമറെ ബഹുമാനിക്കുകയും ചെയ്യുന്ന പോലീസ് കാവലിൽ നടക്കുന്നതുമായ മാംസവ്യാപര കേന്ദ്രമാണ് ഇവിടെയുള്ളത്.

ഈ മാംസവ്യാപര കേന്ദ്രത്തിൽ വാഹനങ്ങൾക്ക് പ്രവേശനമില്ല. പേരുപോലെ തന്നെ നടന്നു നീങ്ങാനുള്ള തെരുവാണിത്. തിങ്ങിനിറഞ്ഞ നിരത്തിലൂടെ നടന്ന് നീങ്ങുന്നതും കുറച്ച് പാടുള്ള കാര്യം തന്നെയാണ്. രതി നുകരാൻ വരുന്നവർ മാത്രമല്ല ചുവന്നതെരുവ് കാണുവാൻ വരുന്നവരുമുണ്ട് ഇവിടെ. അർദ്ധനഗ്‌നരായി ഒരോ കടകൾക്കുമുന്നിലും പ്രത്യേക ഡ്രസ് കോഡ് ധരിച്ച പെൺകുട്ടികൾ സ്വയം വിൽപ്പനച്ചരക്കുകളായി നിൽക്കുന്ന കാഴ്ചകളാണ് വീഥിക്കിരുവശവും. 100 ബാത്ത് മുതൽ 500 ബാത്ത് വരെ റെയ്റ്റുകൾ പ്രദർശിപ്പിച്ചിരിക്കുന്ന കാർഡുകളുമേന്തിയാണ് ഇവരുടെ നിൽപ്പ്. നടന്ന് നീങ്ങുന്നവരെ ആകർഷിക്കാൻ പ്രത്യേക ഡിസ്‌ക്കൗണ്ടുകളും ഓഫറുകളും പാക്കേജുകളുമായി ബ്രോക്കർമാരും നടപ്പുണ്ട്.

ഇന്ത്യക്കാർക്ക് വേണ്ടി ഇന്ത്യൻ യുവതികളെ കിട്ടുന്ന സ്ഥങ്ങളുമുണ്ട് തെരുവിൽ. ഇവിടെ സാരി അണിഞ്ഞ ഇന്ത്യൻ യുവതി കടയ്ക്കുമുന്നിൽ സ്ഥാപിച്ചിരിക്കുന്ന ചില്ലുകൂട്ടിൽ നിന്ന് നൃത്തം വയ്ക്കുന്നുണ്ട്. ഡാൻസ് ബാറുകളിൽ ബീയറിന് വിലക്കുറവ് എന്ന ബോർഡ് വയ്ച്ച് ആളുകളെ ആകർഷിക്കാൻ ഉടമകൾ ശ്രമം വിജയിക്കുന്നുണ്ടെന്ന് ബാറിനുള്ള് കണ്ടാൽ അറിയാം. ഇവിടെ നിന്ന് ബീയർ വാങ്ങിക്കുന്ന ആളുകൾക്ക് മറ്റൊരു ഓഫറുകൂടിയുണ്ട് ബീയർ ഗ്ലാസിൽ പകർത്തുന്ന യുവതിയെ ഇഷ്ടപ്പെട്ടാൽ രതിനുഗരാൻ അകത്ത് മുറികൾ റെഡി. പക്ഷേ, എക്‌സ്ട്രാ ചാർജ് ഈടാക്കുമെന്ന് മാത്രം. ചുവന്നതെരുവിൽ ശരീരം വിൽക്കുന്നവർ മാത്രമല്ല ഉള്ളത്. ഭക്ഷണശാലകളും നൃത്തശാലകളും വഴിയരികിൽ നിന്ന് മാജിക്ക് കാണിക്കുന്നവരും പൊയ്കാലിൽ നടക്കുന്നവരും ഭീകരരൂപികളുടെ വേഷം കെട്ടിയവരുമായി അനേകം പേർ നിത്യജീവിതത്തിനുള്ള പണം ഇവിടെ നിന്ന് കണ്ടെത്തുന്നുണ്ട്. ചുവന്നതെരുവിൽ നിന്ന് രതി നുകരാൻ മടിക്കുന്നവർക്ക് മാന്യതയും സുരക്ഷിതത്വവും നൽകുന്ന പട്ടായയിലെ ഹോട്ടലുകളിൽ പെൺകുട്ടികളെ കിട്ടും.

ഹോട്ടൽ റിസപ്ഷനിൽ 300 മുതൽ 500 വരെ ബാത്ത് മുൻകൂട്ടി നൽകണമെന്നു മാത്രം. പറ്റിക്കപ്പെടുമോ എന്ന പേടി വേണ്ട കാരണം പെൺകുട്ടിക്ക് തിരിച്ചുപോകണമെങ്കിൽ കസ്റ്റമറുടെ അനുമതി റിസപ്ഷനിലെ ജീവനക്കാർക്ക് ലഭിക്കണം. അതുവരെ പെൺകുട്ടിയുടെ തിരിച്ചറിയൽ കാർഡ് റിസപ്ഷനിൽ പണയവസ്തുവായി ഇരിക്കും.

ബോയ്‌സ് സ്ട്രീറ്റ്
……………………………….

പെൺകുട്ടികളെ താത്പര്യമില്ലാത്തവർക്കായി ഒരു സ്ട്രീറ്റ് തന്നെ ഇവിടെയുണ്ട്. സ്വവർഗാനുരാഗികൾക്ക് മാത്രമായുള്ള തെരുവാണ് ബോയ്‌സ് സ്ട്രീറ്റ്. പട്ടായയുടെ മറ്റൊരു മുഖ്യ ആകർഷണം അൽകസർ ഷോയാണ്. തായ്‌ലാന്റിന്റെ എല്ലാവിധ സംസ്‌കാര, ടൂറിസമനോഭാവം പ്രകടമാക്കുന്ന ഒരുമണിക്കൂർ നേരത്തെ സ്റ്റേജ് ഷോയാണ് അൽകസർ ഷോ. നമ്മുടെ നാട്ടിൽ സ്‌റ്റേജ് ഷോകൾ അവതരിപ്പിക്കുമ്പോൾ രംഗം മറ്റുന്നതിന് ലൈറ്റ് അണക്കുകയാണ് പതിവ്. അല്ലെങ്കിൽ ആർട്ടിസ്റ്റുകൾ വന്ന് രംഗം ഒരുക്കും. എന്നാൽ ഒറ്റ സ്‌റ്റേജിൽ ഒരു മണിക്കൂർ തുടർച്ചയായി നിരവധി രംഗങ്ങൾ സിനിമ കാണുന്നപോലെയിരുന്ന് കാണുവാൻ സാധിക്കുമെന്നതാണ് അൽകസർ ഷോയുടെ പ്രത്യേകത. നഗ്‌നത പ്രദർശനം എന്നു വേണമെങ്കിൽ വിളിക്കാവുന്ന ഈ സ്റ്റേജ് പെർഫോമൻസിൽ പങ്കെടുക്കുന്ന സുന്ദരികൾ എല്ലാവരും ലിംഗമാറ്റം നടത്തിയവരാണ്. ഷോ കണ്ടാൽ ഇവർ പെൺകുട്ടികൾ അല്ല എന്ന സത്യം വിശ്വസിക്കാൻ പ്രയാസമാണ്.

subscribe

ഗർഭധാരണവും ആയുർവേദവും
-ഡോ. രമ്യ ജെ. BAMS

Categories:

മാതൃത്വം ദൈവീകമായ അനുഗ്രഹമാണ്. തൈത്തിരീയ ഉപനിഷത് അനുസരിച്ച് ‘പ്രത്യുൽപ്പാദനം’ ജീവജാലങ്ങളുടെ പ്രഥമ സ്വഭാവമാണ്. ഗർഭധാരണത്തിന് തയാറെടുക്കുന്ന സ്ത്രീക്കും പങ്കാളിക്കും നൽകുന്ന മാനസികവും ശാരീരികവുമായ കരുതലും നിർദ്ദേശങ്ങളും ആണ് പ്രീ കൺസപ്ഷണൽ കെയർ. ഗർഭധാരണ പ്രക്രിയാ സമയത്ത് ഇത്തരം കരുതലുകൾ വളരെ ആവശ്യമാണ്.

മാനസിക-ശാരീരിക ആരോഗ്യം
…………………………..

ആവർത്തിച്ചു വരുന്ന ഗർഭ അലസലുകളും അതിനെക്കുറിച്ചുള്ള ചിന്തകൾ കൊണ്ടുള്ള മാനസിക സമ്മർദ്ദങ്ങളും ഈ കാലയളവിൽ പങ്കാളികളെ പ്രത്യേകിച്ചും സ്ത്രീകളെ കൂടുതൽ ആശങ്കപ്പെടുത്താറുണ്ട്. അതുകൊണ്ടു തന്നെ ഗർഭധാരണത്തിനു തയാറെടുക്കുന്നവർക്ക് മാനസികമായും ശാരീരികമായുമുള്ള തയാറെടുപ്പുകൾ അനിവാര്യമാണ്. ഡൌൺ സിൻഡ്രോം, ഓട്ടിസം, സെറിബ്രൽ പാൾസി തുടങ്ങിയ ജന്മ വൈകല്യങ്ങളും ഗർഭസ്ഥ ശിശുവിന്റെ മരണവും ഒക്കെ പ്രധാനമായും ഗർഭധാരണത്തിന് തയാറെടുക്കുന്നവർക്കുള്ള പൊതുവായ ആശങ്കകളാണ്.

ക്രമപ്പെടുത്തണം ആർത്തവചക്രം
……………………….

ഗർഭധാരണത്തിന് തയാറെടുക്കുന്ന സ്ത്രീ ആദ്യം ഉറപ്പുവരുത്തേണ്ടത് ആർത്തവക്രമത്തെയാണ്. ആർത്തവക്രമത്തിൽ തകരാറുകൾ ഉണ്ടെങ്കിൽ വൈദ്യ സഹായം തേടേണ്ടത് അനിവാര്യമാണ്. ശരീര ഹോർമോണുകളുടെ വ്യതിയാനങ്ങൾ, PCOS, തൈറോയ്ഡ് ഗ്രന്ഥിയെ സംബന്ധിച്ചുള്ള രോഗങ്ങൾ, എന്റോമെട്രിയോസിസ്, ഗർഭാശയത്തെ സംബന്ധിക്കുന്ന മറ്റു രോഗങ്ങൾ എന്നിവയെല്ലാം തന്നെ ഗർഭധാരണത്തെ തടസപ്പെടുത്തുകയോ വൈകിക്കുകയോ ചെയ്യുന്നു.

സ്ത്രീകൾക്ക് ഓവുലേഷൻ അധവാ അണ്ഡവിസർജനം നടക്കുന്ന ദിവസം ബന്ധത്തിൽ ഏർപ്പെടുകയാണെങ്കിൽ ഗർഭധാരണത്തിനുള്ള സാധ്യത കൂടുതലാണ്. അണ്ഡവിസർജനം നടന്നാൽ 12 മുതൽ 24 മണിക്കൂറിനുള്ളിൽ അണ്ഡം നിർജീവമാകും, എന്നാൽ, പുരുഷബീജത്തിന് അഞ്ചു ദിവസം വരെ ആയുസുണ്ടായിരിക്കും. 28 ദിവസമായി വരുന്ന ആർത്തവചക്രത്തിൽ 14-ാത്തെ ദിവസമാണ് അണ്ഡവിസർജനം നടക്കുന്നത്. ചിലരിൽ ആർത്തവ ചക്രം 35 ദിവസം വരെയും ഉണ്ടാകാറുണ്ട്. എന്നിരുന്നാലും 14-ാത് ദിവസം ശ്രമിക്കുന്ന തരത്തിൽ വേണം ഗർഭധാരണത്തിന് ആഗ്രഹിക്കുന്നവർ തയാറെടുക്കാൻ.

പുരുഷന്മാരും ഭക്ഷണവും
………………………………

ആയുർവേദത്തിൽ ഗർഭധാരണത്തിന് തയാറെടുക്കുന്ന സ്ത്രീയും പങ്കാളിയും ശീലിക്കേണ്ട പ്രത്യേകതരം ഭക്ഷണക്രമങ്ങളെക്കുറിച്ചു പ്രതിപാദിക്കുന്നുണ്ട്. പുരുഷൻ പ്രത്യേക അനുപാതത്തിൽ നെയ്യ് കഴിച്ച് പഞ്ചകർമ വിധിപ്രകാരമുള്ള ശോധന ക്രിയകൾ ചെയ്യണം എന്ന് നിർദ്ദേശിക്കുന്നു.
പുരുഷന് മധുരരസ ഔഷധങ്ങൾ ഇട്ട് കാച്ചിയ പാലും നെയ്യും കൊടുക്കേണ്ടതാണ്. പാലിൽ അടങ്ങിയിരിക്കുന്ന proteins, Amino acids എന്നിവ ആരോഗ്യമുള്ള ബീജത്തിന്റെ ഉത്പാദനത്തിനും ബീജത്തിന്റെ വളർച്ചയ്ക്കും സഹായകരമാണ്. ഇത്തരം ആരോഗ്യമുല്ല ബീജം സംയോജിച്ചുണ്ടാകുന്ന ഭ്രൂണം ആരോഗ്യമുള്ളതായിരിക്കും. ഇതിൽ അടങ്ങിയിരിക്കുന്ന ശീറശില ഭ്രൂണാവസ്ഥയിൽ നിന്ന് തന്നെ വികാസം പ്രാപിക്കുന്ന നാഡീ ഞരമ്പ് വ്യവസ്ഥിതിക്കും ഭ്രൂണം വളർന്നു കുഞ്ഞാകുമ്പോൾ ഉണ്ടാകുന്ന IQ വിനും അത്യന്താപേക്ഷിതമാണ്. നെയ്യിൽ അടങ്ങിയിരിക്കുന്ന ജീവകം A, E, Btuyric acid എന്നിവ രോഗപ്രതിരോധ ശേഷി വർദ്ധിപ്പിക്കുന്നു. സ്ത്രീയും പുരുഷനും ഈ സമയങ്ങളിൽ ഞവര അരിയാണ് ഭക്ഷണത്തിനായി ഉപയോഗിക്കേണ്ടത്. അതിൽ അടങ്ങിയിട്ടുള്ള Ntiric Oxide ഗർഭപാത്രത്തിലേക്കുള്ള രക്തചംക്രമണത്തെ വർദ്ധിപ്പിക്കുന്നു.

സ്ത്രീകളും ഭക്ഷണവും
………………………………

സ്ത്രീകൾക്ക് ഒരുമാസത്തേക്ക് നല്ലെണ്ണയും ഉഴുന്നും നൽകുവാൻ പറയുന്നുണ്ട്. ഉഴുന്നിൽ അടങ്ങിരിക്കുന്ന Folic Acid നാഡീ വ്യൂഹങ്ങളുടെ ബലത്തിന് സഹായിക്കും. വ്യൂഹങ്ങൾക്ക് വൈകല്യങ്ങളുണ്ടാകാതെ സംരക്ഷിക്കും. അധികം പുളിരസമുള്ള ഭക്ഷണങ്ങൾ, പുളിപ്പിച്ചെടുത്ത ഭക്ഷണ പദാർത്ഥങ്ങൾ എന്നിവ ഗർഭധാരണ സമയങ്ങളിൽ വർജിക്കേണ്ടതാണ്. ആർത്തവമുള്ള സ്ത്രീ ബ്രഹ്മചര്യം അനുഷ്ഠിക്കാനും പുൽമെത്തയിൽ കിടക്കുവാനും അധികമായുള്ള സംസാരം, പകൽ ഉറക്കം എന്നിവ ഒഴിവാക്കുവാനും ആചാര്യന്മാർ നിർദ്ദേശിക്കുന്നു. ഈ സമയങ്ങളിൽ സ്ത്രീകൾക്ക് വിശ്രമം അത്യാവശ്യമാണ്. ഈ സമയം യഥാർത്ഥത്തിൽ അണ്ഡാശയത്തിലുള്ള ഫോളിക്കിളുകൾ പക്വതപെടുന്നതാണ്. ഈ സമയത്തെ വിശ്രമം അണ്ഡാശയത്തിനു കരുത്ത് നൽകുന്നതാണ്, ഇന്ന് പരസ്യങ്ങളിലും മറ്റും പ്രചരിക്കുന്ന സാനിറ്ററി പേഡ് ധരിച്ച് എന്ത് ആയാസമുള്ള ജോലിയും ചെയ്യാം എന്നുള്ളത് തികച്ചും തെറ്റായ ധാരണയാണ്. ഇത് സ്ത്രീയുടെ ആരോഗ്യത്തെയും ഉത്കൃഷ്ടതയെയും സാരമായി ബാധിക്കുന്നതും ഭാവിയിൽ അണ്ഡാശയ രോഗങ്ങൾക്ക് വഴിവയ്ക്കുന്നതും ഗർഭധാരണത്തെ സാരമായി ബാധിക്കുന്നതുമാണ്.

subscribe