June 2019

You Are Here: Home / June 2019

Anusithara Love is my Religion
-അനുസിതാര / ബി. ഹൃദയനന്ദ

Categories:

രാമന്റെ ഏദൻ തോട്ടം, ഒരു കുപ്രസിദ്ധ പയ്യൻ, ഫുക്രി, ക്യാപ്റ്റൻ, അച്ചായൻസ് തുടങ്ങി നിരവധി ചിത്രങ്ങളിലൂടെ പ്രേക്ഷകരുടെ പ്രശംസയും ഇഷ്ടവും നേടിയ അഭിനേത്രിയാണ് അനുസിതാര. കുട്ടിക്കാലം മുതൽ തുടങ്ങിയ കലാസപര്യ. കലാമണ്ഡലത്തിലെ ശിക്ഷണത്തിലൂടെ മികച്ച നർത്തകിയെന്ന അംഗീകാരം.

  • നോമ്പുതുറയും കുട്ടിക്കാലവും

നോമ്പുകാല ഓർമകളിൽ പ്രിയപ്പെട്ടത് വൈകുന്നേരത്തെ നോമ്പുതുറയാണ്. നോമ്പുതുറയ്ക്ക് പലതരം പലഹാരങ്ങളും പത്തിരിയും കുഞ്ഞിപ്പത്തിരിയും ചിക്കനുമൊക്കെ ഉണ്ടാവും. കാരയ്ക്കയും വെള്ളവും കുടിച്ചാണ് നോമ്പുതുറ. റവ കൊണ്ടുണ്ടാക്കുന്ന തരിയാണ് നോമ്പുതുറയിലെ പ്രധാന വിഭവം. എല്ലാ നോമ്പും പറ്റില്ലെങ്കിലും ഞാൻ ഇടയ്‌ക്കൊക്കെ നോമ്പെടുക്കും. അച്ഛൻ അബ്ദുൾ സലാമും അമ്മ രേണുകയും പ്രണയിച്ചുവിവാഹം കഴിച്ചവരാണ്. അച്ഛന്റെ അമ്മ ഞങ്ങൾക്കൊപ്പമാണ്. ഉമ്മ എല്ലാ നോമ്പും എടുക്കും. അതിനാൽ, എല്ലാ ദിവസവും വൈകുന്നേരം വീട്ടിൽ നോമ്പുതുറയുണ്ടാവും. എനിക്ക് ഭക്ഷണം ഏറെ ഇഷ്ടമാണ്. നോമ്പുതുറയ്ക്ക് എനിക്കു പ്രിയപ്പെട്ട ഭക്ഷണമൊക്കെയുണ്ടാവും. വിവാഹശേഷവും സമയം കിട്ടുമ്പോഴെല്ലാം ഞാൻ വീട്ടിൽ ഓടിയെത്തും. രണ്ടുമൂന്നു ദിവസം നിന്നിട്ടെ തിരിച്ചുപോകൂ. ഈ നോമ്പുകാലത്തും ഞാൻ നാട്ടിലുണ്ടായിരുന്നു. ഇഷ്ടപ്പെട്ട പലഹാരങ്ങൾ കഴിക്കാനാണ് സമയം കിട്ടുമ്പോഴെല്ലാം നാട്ടിലേക്കുപോകുന്നത്. മലബാർ ഏരിയ അല്ലേ, നോമ്പുസമയത്തൊക്കെ ഭക്ഷണം കുറച്ചു ലാവിഷായിട്ടാവും ഉണ്ടാവുക. നോമ്പുകാലവും നോമ്പുതുറയും ചെറുപ്പം മുതലേ വലിയ ഇഷ്ടമാണ്.

  • ജാതിയും മതവുമില്ലാത്ത ആഘോഷങ്ങൾ

വീട്ടിലുണ്ടെങ്കിൽ ഇഫ്താർ വിരുന്നുകളിൽ പങ്കെടുക്കും. അയൽവാസികളും കുടുംബക്കാരും ക്ഷണിക്കും. അച്ഛന്റെ കുടുംബക്കാരൊക്കെ മലപ്പുറത്താണ്. ഇവിടെ വയനാട്ടിൽ അച്ഛന്റെ രണ്ട് അനിയന്മാരുണ്ട്. അവരുടെ വീടുകളിൽ പോകും. പിന്നെ സുഹൃത്തുക്കളുടെ വീടുകളിലും പോകും. പക്ഷേ, ഇപ്പോൾ വീട്ടിൽ അധികം ഉണ്ടാവാറില്ല. അതിനാൽ, പഴയ പോലെ നോമ്പുതുറയ്‌ക്കൊന്നും പോകാൻ കഴിയാറില്ല. വീട്ടിൽത്തന്നെ വീട്ടിലെത്തിയാൽ എപ്പോഴും ഫ്രീയായി ഇരിക്കാനാണ് ഇഷ്ടം. എവിടെയും പോകില്ല.
പെരുന്നാൾ ഗംഭീരമായി ആഘോഷിക്കും. ബന്ധുക്കളെ വീട്ടിലേക്കു ക്ഷണിക്കും. അച്ഛന്റെയും അമ്മയുടെയും സുഹൃത്തുക്കളും ഉണ്ടാവും. അച്ഛന്റെ കുടുംബക്കാർക്കൊപ്പം എന്റെ അമ്മമ്മയും ചെറിയമ്മയും വിഷ്ണുവേട്ടന്റെ അച്ഛനും അമ്മയും ഒക്കെയുണ്ടാവും. മലയാളികൾ ജാതിയും മതവും ഇല്ലാതെ ആഘോഷങ്ങൾ കൊണ്ടാടും എന്നാണല്ലോ പറയാറ്. പലപ്പോഴും അതു പറയുക മാത്രമേ ചെയ്യാറുള്ളൂ. ഞങ്ങളുടെ വീട്ടിൽ മിക്ക ആഘോഷങ്ങൾക്കും അത് അങ്ങനെ തന്നെയാണ്. ഓണം വന്നാലും പെരുന്നാൾ വന്നാലും ഞങ്ങളുടെ വീട്ടിൽ സദ്യയും ബിരിയാണിയും ഉണ്ടാക്കുന്നത് ഉമ്മയും അമ്മമ്മയും ചേർന്നാണ്. അങ്ങനെയൊരു ഒത്തൊരുമ ഞങ്ങളുടെ കുടുബത്തിൽ വന്നാൽ കാണാൻ പറ്റും. എനിക്ക് ഭയങ്കര അഭിമാനമുള്ള കാര്യമാണത്.

  • ഇഷ്ടം ബിരിയാണി

എനിക്ക് ബിരിയാണിയാണ് ഏറെ ഇഷ്ടം. എന്റെ വീട്ടിൽ ഉണ്ടാക്കുന്ന ബിരിയാണിയെ എനിക്ക് ഇഷ്ടമുള്ളൂ. ഹോട്ടലുകളിൽ നിന്ന് ബിരിയാണി കഴിക്കാറേയില്ല. വീട്ടിൽ ഉണ്ടാക്കുന്ന ബിരിയാണിയുടെ ടേസ്റ്റ് വേറെ എവിടെയും കിട്ടില്ല. വിഷ്ണുവേട്ടന്റെ വീട്ടിലും എന്റെ അമ്മയും ചെറിയമ്മയും ഒക്കെ ഉണ്ടാക്കുന്ന ബിരിയാണി. അത് വേറെ എവിടെയും കിട്ടില്ല. ഏറെ സ്‌പൈസിയായ ബിരിയാണി ഇഷ്ടമല്ല. വീട്ടിൽ എസൻസൊന്നും ചേർക്കാതെ നാടൻ ബിരിയാണി ഉണ്ടാക്കും. അതാണ് എനിക്കിഷ്ടം. പക്ഷേ, എനിക്ക് ബിരിയാണി ഉണ്ടാക്കാനറിയില്ല.

subscribe

സത്യൻ മാഷ് എന്ന ഇതിഹാസം
-മോഹൻലാൽ

Categories:

ചെറുകാറ്റിന്റെ വേഗതയിൽ കടന്നുപോയ ഒരു ദൃശ്യമാണ് സത്യൻ മാഷിനെക്കുറിച്ചുള്ള ആദ്യ ഓർമ. 11-ാം വയസിൽ, പ്രൈമറി സ്‌കൂൾ പഠനകാലത്തായിരുന്നു അത്. വെള്ള അംബാസിഡർ കാറിന്റെ പിൻസീറ്റിൽ കറുത്ത കണ്ണട ധരിച്ചിരിക്കുന്ന സത്യൻ മാഷ്. ആ കാർ കൺമുന്നിൽ മിന്നിമറയുന്ന ദൃശ്യം ഇന്നും മനസിൽ ആനന്ദം നിറയ്ക്കുന്നു.

‘ഓടയിൽ നിന്ന്’ എന്ന അനശ്വരകൃതിയുടെ സൃഷ്ടാവ് പി. കേശവദേവ് താമസിച്ചിരുന്നത് എന്റെ വീടിനടുത്താണ്. അദ്ദേഹത്തെ കാണാനായിരിക്കണം സത്യൻ മാഷ് ആ വഴി പോയത്. ആദ്യവും അവസാനവും മാഷിനെ നേരിൽ കാണുന്നത് അന്നാണ്. എന്റെ മനസിലെ സത്യൻമാഷിന് ‘ചെമ്മീനി’ലെ പളനിയുടെ രൂപമാണ്. അഞ്ചാം വയസിൽ അച്ഛനും അമ്മയ്ക്കും ജ്യേഷ്ഠനുമൊപ്പമാണ് ചെമ്മീൻ സിനിമ കണ്ടത്. തിരുവനന്തപുരം ശ്രീകുമാർ തിയറ്ററിൽ. പളനിയുടെ ഇൻട്രൊഡക് ഷൻ ഷോട്ട് മറക്കാനാകില്ല. വള്ളത്തിന്റെ അമരത്തുനിന്ന് വലിയ വീറോടെ തുഴഞ്ഞുവരുന്ന പളനി കടൽത്തിരകളെ ഓലക്കൊട്ടകയിലെ ആരവങ്ങളിലേക്ക് പടർത്തി. ചെമ്മീൻ അന്നും ഇന്നും എന്നും ക്ലാസിക് ചിത്രം തന്നെ.

കുട്ടിക്കാലത്ത് സത്യൻ മാഷിന്റെ പടങ്ങൾ അധികം കണ്ടതായി ഓർക്കുന്നില്ല. സിനിമകൾ പതിവായി കാണുന്ന കാലം വന്നപ്പോഴേക്കും മാഷ് ഓർമയായി. എന്റെ അഭ്രക്കാഴ്ചകളിലെ ആദ്യനായകന്മാർ നസീർ സാറും മധു സാറുമായിരുന്നു. പിൽക്കാലത്താണ് സത്യൻ മാഷിന്റെ ചിത്രങ്ങൾ നിരീക്ഷണകൗതുകത്തോടെ, ഒരു പഠിതാവിനെപ്പോലെ കണ്ടത്. സ്‌കൂൾ കാലത്ത് ഒറ്റയ്ക്ക് പോയി സിനിമ കണ്ടിട്ടില്ല. വീട്ടുകാരുമൊത്താണ് പോകാറുള്ളത്. ‘ചെമ്മീനും’ ‘അനുഭവങ്ങൾ പാളിച്ചകളു’മാണ് തിയറ്ററിൽ കണ്ട സത്യൻ മാഷിന്റെ ചിത്രങ്ങൾ. അനുഭവങ്ങൾ പാളിച്ചകൾ കണ്ടത് ശക്തി തിയറ്ററിൽ നിന്നാണ്. അതിൽ ചെല്ലപ്പൻ എന്ന കഥാപാത്രത്തെയാണ് മാഷ് അനശ്വരമാക്കിയത്. ഷാപ്പിലിരുന്ന് കള്ളു കുടിക്കുന്ന രംഗം, മകളുടെ കുഴിമാടത്തിനരികിൽ നിന്ന് തേങ്ങുന്ന രംഗം, ‘അഗ്നി പർവതം പുകഞ്ഞു…’ എന്ന ഗാനരംഗം, ചെല്ലപ്പനെ തൂക്കിക്കൊല്ലുന്ന രംഗം. മാഷിന്റെ മറക്കാനാകാത്ത അഭിനയമുഹൂർത്തങ്ങൾ ആ സിനിമ എന്നിൽ മുദ്രിതമാക്കി.

ചിലപ്പോൾ അറിഞ്ഞും അറിയാതെയും സത്യൻ മാഷ് എന്നിൽ കടന്നുകൂടാറുണ്ട്. ചെല്ലപ്പനും ഗോപാലനും (പ്രേംനസീർ) ഷാപ്പിലേക്ക് കയറുമ്പോൾ വഴിമുടക്കിയ പട്ടിയെ ചെല്ലപ്പൻ കാലുമടക്കി തൊഴിക്കുന്ന രംഗം ഈയിടെ എന്റെ ജീവിതത്തിലും പുനർജ്ജനിച്ചു. ഒരു സെറ്റിൽ ഞാൻ സ്‌കൂട്ടറിൽ വരുന്ന രംഗം ഷൂട്ട് ചെയ്തിരുന്നു. വഴിയിൽ ഒരു പട്ടി മുന്നിൽ പെട്ടു. ഒരു നിമിഷം, ഞാൻ സത്യൻ മാഷെ ഓർത്തു.. പട്ടിയെ കാലുമടക്കി അടിക്കട്ടെ എന്നു ചോദിച്ചു. പലർക്കും കാര്യം മനസിലായില്ല. പക്ഷേ, നടൻ സിദ്ദിഖ് അതു കേട്ട് പൊട്ടിച്ചിരിച്ചു. ആ നിമിഷം തന്നെ സിദ്ദിഖിന് അത് ക്ലിക് ചെയ്തു.

subscribe

SHAFI Humor in Everyday Life
-ഷാഫി / പി.കെ.ബി

Categories:

തിയേറ്ററുകളെ ഇളക്കിമറിച്ച നിരവധി കോമഡി ചിത്രങ്ങൾ ഒരുക്കിയിട്ടുള്ള സംവിധായകനാണ്. പക്ഷേ, താങ്കൾ ഗൗരവക്കാരനോ? ചോദ്യം സംവിധായകൻ ഷാഫിയോടാണ്. ചിരിയോടെയാണ് അദ്ദേഹം ചോദ്യത്തെ നേരിട്ടത്. ‘എന്നെ കണ്ടാൽ ഭയങ്കര ഗൗരവക്കാരനായി തോന്നും. എല്ലാവരും അങ്ങനെ പറയാറുണ്ട്. കാരണം എന്റെ രൂപം അങ്ങനെയായിപ്പോയി. പക്ഷേ, എന്നോട് അടുപ്പമുള്ളവരാരും ഞാൻ ഗൗരവക്കാരനാണെന്നു പറയില്ല. മിമിക്രിക്കാരും ആർട്ടിസ്റ്റുകളുമായി ഫാമിലി മുഴുവൻ തമാശക്കാരാണ്. എല്ലാം തമാശയിലൂടെ കാണുന്നവരാണ്. പരസ്പരം കളിയാക്കലും. സെറ്റിലും അങ്ങനൊക്കെ തന്നെയാണ്.’ കല്യാണരാമൻ, മായാവി, ടു കൺട്രീസ് പൊട്ടിച്ചിരിയോടെയാണ് ഈ ചിത്രങ്ങളെ ജനങ്ങൾ ഇപ്പോഴും ഓർക്കുന്നത്. ഷാഫി സിനിമ വിശേഷങ്ങൾ പങ്കുവയ്ക്കുന്നു.

  • ഞാൻ കോമഡിക്കൊപ്പം

ആദ്യ ചിത്രം വൺ മാൻ ഷോ. രണ്ടാമത്തെ ചിത്രം കല്യാണരാമൻ വൻ വിജയമായി. എന്റെ ചിത്രങ്ങളിൽ ഏറ്റവും കൂടുതൽ ആളുകൾ കണ്ടതും കല്യാണരാമനായിരിക്കും. ഞാൻ ചെയ്ത എല്ലാ പടങ്ങളും എനിക്ക് ഇഷ്ടപ്പെട്ടതു തന്നെ. മേരിക്കുണ്ടൊരു കുഞ്ഞാട്, മായാവി, ചോക്ലേറ്റ് ഈ മൂന്നു ചിത്രങ്ങൾ കൂടുതൽ സംതൃപ്തി നൽകിയവയാണ്. മറ്റു സിനിമകൾ സംതൃപ്തി നൽകിയില്ലെന്നല്ല പറയുന്നത്. തൊമ്മനും മക്കളും, ടൂ കൺട്രീസ് ഇവയെല്ലാം ഞാൻ വളരെ എൻജോയ് ചെയ്ത പടങ്ങളാണ്. ഏറ്റവും കൂടുതൽ കളക്ട് ചെയ്ത ചിത്രങ്ങളിൽ ഓരോയൊരു കോമഡി പടം ടു കൺട്രീസ് ആണ്. റിയലിസ്റ്റ് ചിത്രങ്ങൾ ട്രെൻഡായി നിൽക്കുമ്പോഴാണ് ടു കൺട്രീസ് ഇറങ്ങുന്നത്. വിജയത്തെപ്പറ്റി ആശങ്കയുണ്ടായിരുന്നു. പക്ഷേ, അത് എന്റെ ചിത്രങ്ങളിൽ ഏറ്റവും അധികം കളക്ട് ചെയ്ത ചിത്രമായി.

ബോക്‌സോഫീസിൽ വലിയ തരംഗമുണ്ടാക്കാത്ത ലോലിപോപ്പ്, ഷെർലക് ടോംസ് പോലുള്ള ചിത്രങ്ങൾ പോലും ചാനലുകളിൽ സജീവമാണ്. ഹ്യൂമർ ഉള്ളതുകൊണ്ടാണ് ചാനലുകൾ ഈ ചിത്രങ്ങൾ ആവർത്തിച്ചു കാണിക്കുന്നത്. കിലുക്കവും ഗോഡ്ഫാദറും പഞ്ചാബി ഹൗസും പോലുള്ള ചിത്രങ്ങൾ എത്ര കണ്ടാലും മതിയാവില്ല. കോമഡി ചിത്രങ്ങൾ, കണ്ടതാണെങ്കിലും ആളുകൾ വീണ്ടും വീണ്ടും കാണും. തമാശപ്പടങ്ങളുടെ മെച്ചം അതാണ്. തമാശയ്ക്ക് മറ്റു കഥകളേക്കാളും സ്വീകാര്യത കൂടുതലാണ്. എന്നെ സംബന്ധിച്ചിടത്തോളം എളുപ്പം ചെയ്യാവുന്നതും വഴങ്ങുന്നതും കോമഡിയാണ്. അതുകൊണ്ടാണ് കോമഡി ചിത്രങ്ങളിൽ ഉറച്ചുനിൽക്കുന്നത്. മറ്റു ചിത്രങ്ങൾ ചെയ്യാൻ ഞാൻ ശ്രമിക്കും, പക്ഷേ, പ്രൊഡ്യൂസർമാർ ചെയ്യാൻ സമ്മതിക്കില്ലെന്നതാണ് വാസ്തവം (ചിരിക്കുന്നു).

  • പ്രേക്ഷകർ ചിരിക്കട്ടെ

കോമഡി ചിത്രങ്ങൾ എളുപ്പത്തിൽ വഴങ്ങുന്നവർക്ക് വലിയ ബുദ്ധിമുട്ടൊന്നുമില്ല. ഓരോർത്തർക്കും ഓരോ കഴിവുകൾ ദൈവം തരുമല്ലോ. എന്നെ സംബന്ധിച്ചിടത്തോളം, എന്റെ കഴിവാണോ എന്നറിയില്ല, ഞാൻ ചെയ്യുന്ന ചിത്രങ്ങൾ കണ്ട് ആളുകൾ ചിരിക്കുന്നുണ്ട്. മറ്റു ജോണറുകൾ പോലയല്ല, കോമഡി ഏറ്റില്ലെങ്കിൽ വലിയ നെഗറ്റീവ് വരും. അതിനാൽ, എഡിറ്റിങ്ങിനായി ഞാൻ കൂടുതൽ സമയം ചെലവഴിക്കും. പടം കമ്മിറ്റ് ചെയ്യുമ്പോൾ എല്ലാ പ്രൊഡ്യൂസർമാരോടും ഞാൻ പറയും, ഡബ്ബിങ് കഴിഞ്ഞാൽ എനിക്കു കുറച്ചുസമയം തരണം.

subscribe

ചിരിപ്പിച്ചും ചിന്തിപ്പിച്ചും അപ്‌സര
-അപ്‌സര / ബി. ഹൃദയനന്ദ

Categories:

ഒരു പൊട്ടിപെണ്ണാണ് സ്‌നേഹലത. ഒട്ടും പക്വതയില്ല. പിടിവാശിയുള്ള, പെട്ടെന്നു സന്തോഷവും സങ്കടവും ദേഷ്യവുമൊക്കെ വരുന്നൊരു കഥാപാത്രം. കൈരളിയിലെ ഉള്ളതുപറഞ്ഞാൽ എന്ന സീരിയലിലെ സ്‌നേഹലതയായി എത്തുന്നത് അപ്‌സരയാണ്. ‘ ഞാനും സ്‌നേഹലതയെപ്പോലെയാണെന്നാ എല്ലാരും പറയുന്നത്. ഒട്ടും പക്വതയില്ല. ഇനിയെങ്കിലും കുറച്ചുപക്വതയൊക്കെ വേണമെന്നു വിചാരിച്ച് കുറച്ചുദിവസം മസിലുപിടിച്ചിരിക്കും. പിന്നീട് വീണ്ടും പഴയ പോലാവും. വാങ്ങാൻ പറ്റുമായിരുന്നെങ്കിൽ കുറച്ചു പക്വത വാങ്ങാമായിരുന്നു ചേട്ടാ…’ കണ്ണുകളിലും കവിളുകളിലും കുസൃതി ഒളിപ്പിച്ച് അപ്‌സര പൊട്ടിച്ചിരിച്ചു. നാൽപ്പത്തിയൊൻപത് തവണ പി.എസ്.സി പരീക്ഷ എഴുതി പരാജയപ്പെട്ട സ്‌നേഹലതയെ തേടി ഒടുവിൽ ഒരു അവാർഡ് എത്തി. മികച്ച ഹാസ്യനടിക്കുള്ള സംസ്ഥാന ടെലിവിഷൻ അവാർഡ്. സ്‌നേഹലതയെപ്പോലെ അപ്‌സര ബോധം കെട്ടുവീണില്ലെന്നേയുള്ളൂ. അപ്പോൾ ബഡായി പറച്ചിലാണ് അപ്‌സരയുടെ ജോലി. അതെ, ഏഷ്യാനെറ്റിലെ ബഡായി ബംഗ്ലാവിൽ പുതിയ വാടകക്കാരിയാണ് അപ്‌സര.

  • ഞാൻ ഒട്ടും പ്രതീക്ഷിച്ചില്ല കേട്ടോ

പ്ലസ് ടു കഴിഞ്ഞ് വെറുതെ നിൽക്കുന്ന സമയത്താണ് ഫോട്ടോഗ്രാഫർ ഗിരീഷ് അമ്പാടി സാർ എന്നെ കാണുന്നതും കുറച്ചുഫോട്ടോകളെടുക്കുന്നതും. ഒരു പ്രസിദ്ധീകരണത്തിൽ അത് കവറായി. അതായിരുന്നു തുടക്കം. പിന്നീടാണ് സീരിയലിൽ അവസരം കിട്ടിയത്. ആദ്യ സീരിയൽ അമ്മ. ആദിത്യൻ സാർ ആയിരുന്നു ഡയറക്ടർ. അതിൽ ശ്രുതി എന്നൊരു കഥാപാത്രമാണ് ചെയ്തത്. ക്യാമറയ്ക്കു മുന്നിൽ എങ്ങനെയാണ് നിൽക്കേണ്ടത്. ഡയലോഗ് പ്രസന്റ് ചെയ്യേണ്ടത് എങ്ങനെയാണ് എന്നൊന്നും അറിയില്ല. കുമരകം രഘുനാഥ് അങ്കിൾ, ബീന ആന്റണി ചേച്ചി അങ്ങനെ മറ്റുള്ളവരെല്ലാം സീനിയർ ആർട്ടിസ്റ്റുകളാണ്. എനിക്കു ഭയങ്കര ടെൻഷനായിരുന്നു. ഫസ്റ്റ് ഷോട്ട് കുമരകം രഘുനാഥ് അങ്കിളിനൊപ്പമായിരുന്നു. ഞാൻ റോഡ് ക്രോസ് ചെയ്യുമ്പോൾ പുള്ളിയുടെ കാർ എന്നെ ഇടിക്കുന്നതാണ് സീൻ. ഞാൻ റോഡിൽ വീഴുമ്പോൾ അങ്കിൾ വന്നെന്നെ പിടിച്ചെഴുന്നേൽപ്പിക്കും. കാർ ശരിക്കും ഇടിക്കുമോ, വീഴുന്നത് ശരിയാവുമോ. അങ്ങനെ പല ടെൻഷനായിരുന്നു. ചെയ്തുകഴിഞ്ഞപ്പോൾ, മോൾ നന്നായിട്ട് ചെയ്തു, ഐശ്യര്യമുള്ള തുടക്കമാവും, ഉയരങ്ങൾ എത്തും എന്നൊക്കെ രഘു അങ്കിൾ പറഞ്ഞു.

subscribe

അനുരാജിന്റെ ഇഷ്‌ക്
-അനുരാജ് മനോഹർ / ബി. ഹൃദയനന്ദ

Categories:

ഇഷ്‌ക് വെറുമൊരു പ്രണയകഥയല്ല. കാലികപ്രാധാന്യമുള്ളൊരു വിഷയം പ്രണയത്തിന്റെ മേമ്പൊടിയിൽ പറയുന്ന ചിത്രം. ആദ്യ ചിത്രം പ്രേക്ഷകർ സ്വീകരിച്ചതിന്റെ ആഹ്ലാദത്തിലാണ് സംവിധായകൻ അനുരാജ് മനോഹർ. ഇരുപത്തിയൊന്നു വയസുള്ളപ്പോൾ സിനിമയിൽ എത്തിയതാണ് കൈതപ്രം സ്വദേശിയായ അനുരാജ്. സംവിധായകൻ ബി. ഉണ്ണികൃഷ്ണനൊപ്പമായിരുന്നു തുടക്കം. പിന്നീട് ലിജോ ജോസ് പെല്ലിശ്ശേരി, ശ്യംധർ, ശ്രീകാന്ത് മുരളി, കുക്കു സുരേന്ദ്രൻ എന്നിവർക്കൊപ്പവും പ്രവർത്തിച്ചു. ഇഷ്‌കിന്റെ വിശേഷങ്ങളും ജീവിതവും അനുരാജ് മനോഹർ പറയുന്നു.

  • സ്വീകരിക്കപ്പെട്ടതിൽ സന്തോഷം

സിനിമയെക്കുറിച്ച് നല്ല ആത്മവിശ്വാസം ഉണ്ടായിരുന്നു. പുതിയൊരു ആശയം പറയുന്ന ചിത്രമായതിനാൽ അതെങ്ങനെ പ്രേക്ഷകർ സ്വീകരിക്കും എന്ന ആശങ്ക മാത്രമാണ് ഉണ്ടായിരുന്നത്. എന്നാൽ, സിനിമയെ ജനങ്ങൾ സ്വീകരിച്ചതിൽ സന്തോഷമുണ്ട്. നോമ്പിന്റെയും തെരഞ്ഞെടുപ്പിന്റെയും സമയമായിട്ടുപോലും പ്രദർശനത്തിനെത്തിയ എല്ലാ തിയേറ്ററുകളിലും ചിത്രം നന്നായി പോകുന്നു. അത്രയും പോസിറ്റീവായാണ് പ്രേക്ഷകർ സിനിമയെ ഏറ്റെടുത്തത്. സിനിമ മുന്നോട്ടുവയ്ക്കുന്ന ആശയം സത്യസന്ധമായി പറഞ്ഞതുകൊണ്ടാണ് ജനങ്ങളിലേക്കതു കൃത്യമായി എത്തിയത്.

  • ഇഷ്‌കിൽ എത്തിയത്

മൂന്നു വർഷം മുമ്പ് ഫഹദ് ഫാസിലിനെ നായകനാക്കി ഒരു ചിത്രം പ്ലാൻ ചെയ്തിരുന്നു. എന്നാൽ, പല കാരണങ്ങളാൽ അതു നടന്നില്ല. പിന്നീട് പുള്ളിക്കാരൻ സ്റ്റാറാ എന്ന മമ്മൂട്ടി ചിത്രത്തിൽ ചീഫ് അസോസിയേറ്റ് ഡയറക്ടറായി പ്രവർത്തിക്കുമ്പോഴാണ് തിരക്കഥാകൃത്ത് രതീഷേട്ടനെ പരിചയപ്പെട്ടത്. പുള്ളിക്കാരൻ സ്റ്റാറാ എന്ന ചിത്രത്തിന്റെ തിരക്കഥ രതീഷേട്ടനായിരുന്നു. അങ്ങനെയാണ് ഇഷ്‌കിലേക്ക് എത്തുന്നത്. ചിത്രത്തിന്റെ നിർമാതാക്കളിൽ ഒരാളായ സാരഥി ചേട്ടനോട് കഥ പറഞ്ഞു. അദ്ദേഹത്തിന് കഥ ഇഷ്ടമായി.

  • എന്തുകൊണ്ട് പ്രണയകഥയല്ല

നോട്ട് എ ലൗ സ്‌റ്റോറി എന്ന ചിത്രത്തിന്റെ ടാഗ് ലൈൻ ശ്രദ്ധിക്കപ്പെട്ടിരുന്നു. വിട്ടുവീഴ്ചയില്ലാത്ത പ്രണയകഥയാണിത്. പ്രണയം മാത്രമല്ല ജീവിതം. ദേഷ്യം, സ്വാർത്ഥത എന്നിവയെല്ലാം പ്രണയവുമായി ബന്ധപ്പെട്ടുണ്ടാവും. പ്രണയത്തിന്റെ ഭാഗമായി വരുന്ന അത്തരം ചില വികാരങ്ങളും സിനിമയിൽ പറയുന്നു. പ്രണയത്തിൽ വിട്ടുവീഴ്ചകൾ വേണ്ടിവരും. എന്നാൽ, വിട്ടുവീഴ്ചകൾ ഇല്ലെങ്കിൽ പ്രണയത്തിന് പൂർണതയുണ്ടാവും. പ്രണയത്തിൽ വിട്ടുവീഴ്ച വേണ്ടെന്നാണ് ഇഷ്‌ക് പറയുന്നത്.

subscribe

MAHINDRA XUV 300
-അമൽ കെ. ജോബി

Categories:

പ്രമുഖ ഇന്ത്യൻ വാഹന നിർമാതാക്കൾ, മഹീന്ദ്ര ആൻഡ് മഹീന്ദ്ര ലിമിറ്റഡ് യൂട്ടിലിറ്റി വെഹിക്കിൾ സെഗ്‌മെന്റിൽ പുതിയ കോംപാക്റ്റ് സ്‌പോർട്‌സ് യൂട്ടിലിറ്റി (കോംപാക്റ്റ് എക്‌സ്‌യുവി) വാഹനമായ എക്‌സ്‌യുവി 300 വിപണിയിലിറക്കി. ഇന്ത്യൻ നിരത്തുകൾക്കു പ്രിയപ്പെട്ട വാഹനമായി മാറുന്നു ഈ ചെറു എക്‌സ്‌യുവി. അഞ്ചു പേർക്കു സുഖമായി യാത്ര ചെയ്യാം.

മഹീന്ദ്രയുടെ കൊറിയൻ പങ്കാളികളായ സാങ്‌യോങിന്റെ ചെറു എസ്‌യുവി ടിവോളിയെ അടിസ്ഥാനമാക്കിയാണ് എക്‌സ്‌യുവി നിർമിച്ചിരിക്കുന്നത്. സാങ് യോങ് അമ്പതിലധികം രാജ്യങ്ങളിലായി 2.6 ലക്ഷം യൂണിറ്റുകൾ വിറ്റഴിച്ച ടിവോളിയുടെ പ്ലാറ്റ്‌ഫോം പങ്കുവച്ചുകൊണ്ടാണ് ഈ വാഹനം പുറത്തിറക്കിയിരിക്കുന്നത്. ഇന്ത്യയിലെ എല്ലാ വിഭാഗത്തിലുമുള്ള വാഹനപ്രേമികൾക്ക് ആവേശം പകരുന്നതാണ് എക്‌സ്‌യുവി 300.

കൂടുതൽ ഉയർന്ന ഗ്രൗണ്ട് ക്ലിയറൻസ്, നവീകരിച്ച സസ്‌പെൻഷൻ, സ്റ്റിയറിങ് സംവിധാനങ്ങൾ എന്നിവയുള്ള ഈ വാഹനം ഏഴ് എയർ ബാഗുകളുള്ള ഇന്ത്യയിലെ ഒരേയൊരു കോംപാക്റ്റ് എക്‌സ്‌യുവിയാണ്. ഉന്നത ഗുണനിലവാരവും നവീനമായ ഒരു വാഹനാനുഭവവുമാണ് എക്‌സ്‌യുവി 300-ലൂടെ മഹീന്ദ്ര നൽകുന്നത്. ബോഡി ഘടകങ്ങളും രൂപകൽപ്പനയുമെല്ലാം ടിവോളിയിൽ അടിസ്ഥാനമാക്കിയാണെങ്കിലും ഇന്ത്യൻ സാഹചര്യങ്ങൾക്കായി വാഹനത്തിന്റെ സസ്‌പെൻഷനിൽ ആവശ്യമായ മാറ്റങ്ങൾ വരുത്തിയിട്ടുണ്ട്. എംപിവിയായ മറാസോയിൽ അരങ്ങേറിയ 1.5 ലീറ്റർ, നാലു സിലിണ്ടർ, ഡീസൽ എൻജിനാവും എക്‌സ്‌യുവി 300-നും കരുത്തുപകരുന്നത്. കോംപാക്ട് എസ്‌യുവിയിലെത്തുമ്പോൾ ഈ ഡീസൽ എൻജിൻ 300 എൻഎം ടോർക്ക് സൃഷ്ടിക്കും.

subscribe

ബ്രിട്ടനിൽ ഒരു മലയാളിപ്പെൺപ്പെരുമ
-പി.കെ.ബി

Categories:

വിശാലമായ ലണ്ടൻ നഗരത്തിന്റെ ഓരം ചേർന്ന് ഒരു ഉദ്യാനം പോലെ മനോഹരമായ ആഷ് ടെഡ് എന്ന സമ്പന്നരുടെ ചെറുഗ്രാമം. അവിടെ അൽപ്പം ഉള്ളിലേക്കൊതുങ്ങി വസന്തം നിറഞ്ഞുനിൽക്കുന്ന പാതയോരത്ത് വിശ്രമം കൊള്ളുന്ന ഒരു ചുവന്ന വിക്ടോറിയൻ സൗധം. വിശാലമായ പച്ചപ്പുൽ തകിടികൾക്കും പൂന്തോട്ടത്തിനു നടുവിൽ തലയുയർത്തി നിൽക്കുന്ന മുപ്പതോളം മുറികളുള്ള ‘റെഡ് ഹൗസ്’. രോഗ പീഡിതരും ശയ്യാവലംബികളുമായ പ്രായാധിക്യരുടെ സ്വർഗതുല്യഭവനം. അതിലെ ഓഫിസ് മുറികളിലെ തിരക്കുകൾക്കിടയിലിരുന്ന് ജനറൽ മാനേജർ വൽ മാത്യു എന്ന അനു മാത്യുവിനു പറയാനുള്ളത് അനിതര സാധാരണമായ അതിജീവനത്തിന്റെയും ശ്ലാഖനീയമായ തൊഴിൽ വിജയത്തിന്റെയും ചരിത്രം. ചങ്ങനാശേരി തൃക്കൊടിത്താനം ഗ്രാമത്തിലെ പട്ടിണിയും കഷ്ടപ്പാടുകളും നിറഞ്ഞ ഭൂതകാല ജീവിതത്തിൽ നിന്നു തുടങ്ങി ബ്രിട്ടനിലെ കെയർ മാനേജ്‌മെന്റ് രംഗത്തെ ഉന്നതനേട്ടങ്ങൾ കൈവരിച്ചതിലേക്കുള്ള പ്രചോദനാത്മകവും ഉജ്വലവുമായ ജീവിതകഥ.

ബ്രിട്ടീഷ് സർക്കാരിന്റെ കെയർ ക്വാളിറ്റി കമ്മിഷൻ (CQC) വിപുലവും കർക്കശവുമായ നിരീക്ഷണങ്ങൾക്കും പരിശോധനകൾക്കും ശേഷം ഈ വർഷം നൽകിയ ഏറ്റവും കഴിവുള്ള മാനേജ്‌മെന്റ് എന്ന ഖ്യാതി റെഡ് ഹൗസിനു നേടിക്കൊടുത്തതിന്റെ സന്തോഷത്തിലാണ് അനു. മാത്രമല്ല, CQC യുടെ ഏറ്റവും ഉയർന്ന ഔട്ട്‌സ്റ്റാൻഡിങ് റേറ്റിങ് റെഡ് ഹൗസിന്റെ പ്രവർത്തനത്തിന് നേടിക്കൊടുക്കാനായതിന്റെ മൊത്തം ക്രെഡിറ്റും അനുവിനു തന്നെ. യുകെയിൽ പ്രവർത്തിക്കുന്ന പന്ത്രണ്ടായിരത്തോളം വരുന്ന കെയർ ഹോമുകളിൽ വിരലിലെണ്ണാവുന്നവയ്ക്കു മാത്രം ലഭിക്കുന്ന അത്യപൂർവ റേറ്റിങ് ആണിത്. കഴിഞ്ഞ ഏഴു വർഷമായി റെഡ് ഹൗസിന്റെ ജനറൽ മാനേജരും ഗ്രൂപ്പ് കോംപ്ലയൻസ് ഹെഡുമായ അനുവിനെ സംബന്ധിച്ചിടത്തോളം ഇതു തന്റെ കരിയറിലെയും ജീവിതത്തിലെയും അവിസ്മരണീയ ഘട്ടം. റെഡ് ഹൗസ് എന്ന കെയർ ഹോമിനെയും അതുൾപ്പെടുന്ന ഗോൾഡൻ ഇയേഴ്‌സ് എന്ന കെയർ ഗ്രൂപ്പിനെയും സംബന്ധിച്ചിടത്തോളം ഇതു സുദൃഢവും ശോഭനകരവുമായ ഭാവിയിലേക്കുള്ള ജാലകം.

അനു മാത്യുവിന് കരിയറിലെ ശ്രദ്ധേയമായ ആദ്യ നേട്ടമല്ല. ബ്രിട്ടനിലെ തന്നെ മാഞ്ചസ്റ്ററിലെ ഒരു നഴ്‌സിങ് ഹോമിൽ പത്തു വർഷങ്ങൾക്കു മുമ്പ് മാനേജരായിരിക്കുമ്പോൾ യുകെയിലെ ഏറ്റവും പ്രായം കുറഞ്ഞ (28 വയസ്) കെയർ ഹോം മാനേജരായിരുന്നു അനു. മാഞ്ചസ്റ്റർ ഏരിയായിലെ ആദ്യത്തെ ഗോൾഡ് സ്റ്റാന്റേർഡ്‌സ് ഫ്രെയിം വർക്ക് (GSF) അവാർഡ് തന്റെ സ്ഥാപനത്തിന് നേടിക്കൊടുത്തതും അനുവിന്റെ കഴിവുകൾക്കുള്ള അംഗീകാരമായിരുന്നു. ഒരു രജിസ്‌റ്റേർഡ് മാനേജർ എന്നതിലുപരി ഒരു അംഗീകൃത കെയർ മാനേജ്‌മെന്റ് പരിശീലക എന്ന നിലയിലും കുറഞ്ഞ കാലം കൊണ്ടുതന്നെ പേരെടുത്തു.

subscribe

ചക്രാസനം
-സുധീഷ് ആചാര്യർ

Categories:

ബ്രഹ്മസൂത്രയോഗം

ഓ ജാഗ്രതായുക്തം കർമം യോഗ:
യോഗം ബ്രഹ്മ: അഹം ബ്രഹ്മാസ്മി

ജാഗ്രതയോടെയുള്ള കർമം ആണ് യോഗം.
യോഗം ബ്രഹ്മം ആകുന്നു. ഞാൻ ബ്രഹ്മം ആകന്നു.

മനസിനെയും ഇന്ദ്രിയങ്ങളെയും ജയിച്ച് ബോധത്തിലെ അജ്ഞാനത്തെക്കൂടി ദുരീകരിക്കുമ്പോൾ സ്വ സ്വരൂപത്തെ ആത്മാവിനെ ബ്രഹ്മത്തെ അറിയുവാൻ കഴിയുന്നു. ബ്രഹ്മത്തെ അറിയുന്നവൻ ആണ് യോഗി. യോഗിയാണ് ഈ ലോകത്തിലെ ഏറ്റവും വലിയ ശ്രേഷ്ഠൻ.

ചക്രാസനം
…………………….

നട്ടെല്ലിന്റെ വളവ് പരിഹരിക്കുന്നതിനുള്ള ഉത്തമമായ ഒരു ആസനമാണ് ചക്രാസനം.

പരിശീലനരീതി
…………………………..

മലർന്ന് കിടന്ന് രണ്ട് കാലുകളും മടക്കി ഉപ്പൂറ്റി പൃഷ്ഠഭാഗത്തിനോട് ചേർത്തുവയ്ക്കുക. രണ്ട് കൈകളുടെയും മുട്ടുകൾ മടക്കി കൈപ്പത്തികൾ ശിരസിന്റെ ഇരു വശങ്ങളിലും തറയിൽ പതിപ്പിച്ചുവയ്ക്കുക. ശേഷം ശ്വാസം എടുത്തുകൊണ്ട് ശിരസും ശരീരവും കൈപ്പത്തിയുടെയും കാൽപാദത്തിന്റെയും ബലത്തിൽ സാവകാശം മുകളിലേക്ക് ഉയർത്തി കൈയും കാലും ശരീരവും കൂടി ഒരു അർധ ചക്രാകൃതിയിലാക്കുക. ഈ നിലയിൽ നിന്നുകൊണ്ട് അഞ്ച് ശ്വാസം എടുക്കുകയും വിടുകയും ചെയ്യുക. അതിനു ശേഷം ശ്വാസം വിട്ടുകൊണ്ട് സാവകാശം ശരീരം താഴ്ത്തി പൂർവസ്ഥിതിയിലേക്ക് വരിക.

പ്രയോജനങ്ങൾ
………………………

ശ്വാസകോശത്തിനും ഹൃദയത്തിനും വികസം കിട്ടുന്നു. നട്ടെല്ലിനെ അയവുള്ളതാക്കി യൗവനത്തെ നിലനിർത്തുന്നു. സർവനാഡികൾക്കും ഉത്തേജനം കിട്ടുന്നു. ദുർമേദസിനെ കുറയ്ക്കുന്നു. ഇടുപ്പു വേദന, ഇടുപ്പെല്ലിന്റ സ്ഥാനഭ്രംശം, നെഞ്ചെരിച്ചിൽ, പുളിച്ചു തികട്ടൽ, ഗ്യാസ് ട്രബിൾ, ദഹനക്കേട്, വാതം, വൃക്ക സംബന്ധമായ അസുഖങ്ങൾ, നടുവേദന, മുതലായവയ്ക്ക് ഈ ആസനം വളരെയധികം പ്രയോജനകരമാണ്.

subscribe

വഴിവെട്ടാൻ തയാറാണോ എങ്കിൽ മൂന്ന് വെള്ളച്ചാട്ടങ്ങൾ കാണാം
-അരുൺ

Categories:

പുതപ്പിനുള്ളിൽനിന്ന് തലയിട്ട് പുറത്തേക്കു നോക്കിയപ്പോൾ നേരംവെളുത്തിട്ടുണ്ട്. കൈ മൊബൈലിലേക്കു നീണ്ടു. സമയം 10 മണി. പതിയെ വാട്‌സ്ആപ് മെസേജ് നോക്കി. എല്ലാദിവസത്തേയും പോലെ കുറേ ഗുഡ്‌മോർണിങ് സന്ദേശങ്ങൾ. ഫോൺ തിരികെ വച്ച് വീണ്ടും ചുരുണ്ടുകൂടാൻ തുടങ്ങിയപ്പോഴാണ് ചങ്ക്‌ബ്രോ ബിൻസിന്റെ മെസേജ് വരുന്നത്. എടാ.. നാളെ അവളെയും മമ്മിയേയും കൂട്ടി പോകാൻ പറ്റിയ ഒരു സ്ഥലം പറഞ്ഞേ. മഴക്കാലമായതുകൊണ്ട് വെള്ളച്ചാട്ടങ്ങൾ എല്ലാം തന്നെ സജീവമാണ്. അതുകൊണ്ടുതന്നെ 30 കിലോമീറ്റർ ചുറ്റളവിലുള്ള എല്ലാ വെള്ളച്ചാട്ടങ്ങളുടെയും ലിസ്റ്റ് പറഞ്ഞുകൊടുത്തു. ലിസ്റ്റിൽ മാനത്തൂർ ഉള്ള പാമ്പനാൽ വെള്ളച്ചാട്ടം അവൻ പ്രത്യേകം നോട്ടുചെയ്തു. കാരണം, അങ്ങനെ ഒരു സ്ഥലത്തെക്കുറിച്ച് മുമ്പ് കേട്ടിട്ടില്ല. 2010-ൽ ഒരുവട്ടം പോയിട്ടുണ്ടെങ്കിലും വിശദമായ വിവരങ്ങൾ എന്റെ കൈയിലും ഇല്ലായിരുന്നു. ഓഫ് ഡേ ആയതുകൊണ്ട് ഇന്ന് അങ്ങോട്ടുതന്നെ യാത്രയെന്ന് ഉറപ്പിച്ച് പുതപ്പിനടിയിൽനിന്ന് എണീറ്റു. പാറുവിന് അവധിയില്ലാത്തതുകൊണ്ട് ബൈക്ക് എടുത്താണ് മാനത്തൂർക്ക് വച്ചുപിടിച്ചത്. കല്യാണം കഴിഞ്ഞ് പാറുവിനെ കൂട്ടാതെയുള്ള ആദ്യയാത്ര. പോകുംവഴി പാലായിൽനിന്ന് സുഹൃത്ത് വിഷ്ണുവും കൂടെക്കൂടി. ബൈക്ക് അവിടെ വച്ച് അവന്റെ കാറിലായി പിന്നീടങ്ങോട്ടു യാത്ര. ഇതിനിടെ പാറുവിന്റെ അനിയത്തി പ്രിയ വരുന്നുണ്ടെന്ന് പറഞ്ഞതോടെ പോകും വഴി അവളെയും കൂടെക്കൂട്ടി. പാലായിൽ നിന്ന് തൊടുപുഴ റോഡിൽ 12 കിലോമീറ്റർ സഞ്ചരിച്ച് മാനത്തൂർ കവലയിലെത്തി. മാനത്തൂർ സ്‌കൂളിന് എതിർവശമുള്ള മറ്റത്തിപ്പാറ-കരിങ്കുന്നം റോഡിലൂടെ കാർ കുന്നുകയറി. പണ്ട് മാനത്തൂർ കവലയിൽ പാമ്പനാൽ വെള്ളച്ചാട്ടമെന്ന് ബോർഡ് വച്ചിട്ടുണ്ടായിരുന്നു. പാലാ-തൊടുപുഴ റോഡ് വീതികൂട്ടിയപ്പോൾ അതു പിഴുതുമാറ്റപ്പെട്ടു.

മറ്റത്തിപ്പാറ-കരിങ്കുന്നം റോഡിൽ നിന്ന് വെള്ളച്ചാട്ടത്തിലേക്ക് തിരിയുന്ന റോഡ് ഒരു കാറിന് കഷ്ടി കടന്നു പോകാൻ മാത്രം വീതിയുള്ളാണ്. ടാറും കോൺക്രീറ്റും ഇട്ട റോഡിനെ മുറിച്ച് പലയിടത്തും ചെറു അരുവികൾ കടന്നുപോയി. ടാറിട്ട റോഡ് അവസാനിക്കുന്നിടത്ത് മണ്ണിട്ട പാത തുടങ്ങുകയാണ്. ഇവിടെവരെ മാത്രമേ വാഹനങ്ങൾ പോകുകയുള്ളൂ. ഞങ്ങൾ കാർ പാർക്ക് ചെയ്തു നടപ്പാരംഭിച്ചു. അര കിലോമീറ്റർ നടന്നുവേണം വെള്ളച്ചാട്ടത്തിലെത്താൻ (ഇരുചക്രവാഹനങ്ങൾ വെള്ളച്ചാട്ടംവരെ പോകും). മൂന്ന് വെള്ളച്ചാട്ടങ്ങളാണ് ഇവിടെയുള്ളത്. അതിൽ ഒരണ്ണത്തിന്റെ അടുത്തുവരെ റോഡുണ്ട്. റബർ തോട്ടങ്ങളും പൈനാപ്പിൾ തോട്ടങ്ങളും കടന്നുവേണം വെള്ളച്ചാട്ടത്തിന് അരികിൽ എത്താൻ. മൺപാതകൾ പലയിടത്തും വഴിപിരിഞ്ഞ് പോകുന്നത് പലപ്പോഴും കൺഫ്യൂഷൻ ഉണ്ടാക്കി. 20 മിനിറ്റ് നടപ്പിന് അവസാനം ഒന്നാമത്തെ വെള്ളച്ചാട്ടത്തിന് അടി ഭാഗത്തെത്തി. ഇവയെക്കുറിച്ച് പുറംലോകത്തിന് അറിയാത്തതുകൊണ്ട് ഈ പ്രദേശത്തുതന്നെയുള്ള കുറച്ച് കുട്ടികൾ അല്ലാതെ സഞ്ചാരികളായി ആരും തന്നെയില്ല. ചെരിഞ്ഞു കിടക്കുന്ന വലിയൊരു പാറക്കല്ലിലൂടെ ജലകണങ്ങൾ ഒഴുകി താഴേക്ക് പോകുന്ന നയനമനോഹര ദൃശ്യമാണിവിടെ. ശാന്തമായി പതിക്കുന്ന വെള്ളച്ചാട്ടത്തിന് കുറുകേ കല്ലുപാളികൾ കൊണ്ട് പാലം നിർമിച്ചിട്ടുണ്ട്. ഇതിന് അടിയിലൂടെ ജലം രണ്ടാമത്തെ വെള്ളച്ചാട്ടത്തിലെത്തി അർത്തിരമ്പുന്ന ജലകണങ്ങളായി താഴേക്കു പതിക്കുന്നു. ഇവിടെ നിന്ന് രണ്ടാമത്തെ വെള്ളച്ചാട്ടത്തിലേക്കുള്ള വഴി തപ്പിയെങ്കിലും കണ്ടെത്താനായില്ല. അവസാനം കാടുകയറി നശിച്ച വാഴത്തോട്ടത്തിലൂടെ താഴേക്കിറങ്ങാൻ തീരുമാനിച്ചു. കൈയിൽ ഇരുന്ന കാലൻകുടകൊണ്ട് വിഷ്ണു പുതിയവഴികൾ വെട്ടി. തട്ടുതട്ടായി കിടന്ന കൃഷിയിടങ്ങളിലൂടെ താഴേക്കിറങ്ങി. ഒരാൾപൊക്കത്തിൽ ഭീകരരൂപത്തിൽ കുറ്റിക്കാടുകൾ പലപ്പോഴും വഴിയെ തടസപ്പെടുത്തിനിന്നു. പാമ്പ് ഉണ്ടാകുമോ എന്ന പേടിമാത്രമായിരുന്നു ഞങ്ങളുടെ മനസിൽ അപ്പോഴും.

subscribe

ജീവിത ശൈലീ രോഗങ്ങളും ഹോമിയോപ്പതിയും
-ഡോ. മിനി സി. BHMS. MSc (Clinical Nutri.)

Categories:

ഒരു വ്യക്തിയുടെ ജീവിതം, അതു സ്ത്രീയായാലും പുരുഷനായാലും അവരുടെ ദിനചര്യകളെ ആശ്രയിച്ചിരിക്കും. ശാരീരിക, മാനസിക പിന്നെ സാമൂഹികവുമായ സന്തുലിതാവസ്ഥ, അതാണല്ലോ ആരോഗ്യം. ഇതിനെല്ലാം ഭംഗം വരുമ്പോഴാണ് ജീവിത ശൈലി രോഗങ്ങൾ ഉണ്ടാകുന്നത്. നിസാരവും വ്യാപകവുമായി കാണപ്പെടുന്ന അമിതവണ്ണത്തിൽ തുടങ്ങി പ്രമേഹം (DIABETES), രക്തസമ്മർദം (BP), ഹൃദ്രോഗങ്ങൾ, മാനസിക പിരിമുറുക്കങ്ങൾ എന്നിവയിലൂടെ അർബുദം വരെ എത്തിക്കാൻ കഴിവുള്ള ഒരു കൂട്ടം രോഗങ്ങളാണിത്. ഈ രോഗാവസ്ഥകളെ നമുക്ക് ‘ജീവിതശൈലി രോഗങ്ങൾ’ എന്നു വിളിക്കാം.

ഒരു സമൂഹത്തിന്റെ എല്ലാ നേട്ടങ്ങൾക്കും കോട്ടങ്ങൾക്കും സ്ത്രീ വളരെയേറെ പങ്കു വഹിക്കുന്നുണ്ട്. അതുകൊണ്ട്, ഇന്നത്തെ ആരോഗ്യ സംവിധാനത്തെത്തന്നെ വെല്ലുവിളിക്കുന്ന ഈ വിഭാഗം രോഗങ്ങളെക്കുറിച്ചു തികഞ്ഞ അവബോധവും അറിവും ഉണ്ടാകേണ്ടത് സ്ത്രീകൾക്കു പ്രത്യേകിച്ച് അനിവാര്യമാണ്. വളരെ ലളിതമായി പറഞ്ഞാൽ ജീവിതശൈലിയിൽ വന്ന മാറ്റങ്ങൾ തന്നെയാണ് ഇവയ്ക്കു കാരണം. അടുക്കളത്തോട്ടം മുതൽ അടുപ്പിൽ വരെ വന്ന പരിഷ്‌കാരങ്ങൾ തീൻമേശയിൽ എത്തിയപ്പോൾ അറിഞ്ഞോ അറിയാതെയോ വരുമാനത്തിന്റെ നല്ല ഒരു പങ്ക് ഇൻഷുറൻസ് പോളിസികൾക്കും പതിവ് ലാബ് പരിശോധനകൾക്കുമായി മാറ്റപ്പെട്ടത് എന്തോ നാം മനഃപൂർവം ശ്രദ്ധിക്കാതെ പോയി.

ഏതായാലും, തിരിഞ്ഞുനോട്ടം നടത്തി കാരണങ്ങൾ കണ്ടെത്തി ഒരു അവലോകനത്തിനു വിധേയമാക്കാം. ആദ്യം തന്നെ ‘YOU ARE WHAT YOU EAT’ എന്ന ചൊല്ല് മനസിലാക്കിയിട്ടു തുടങ്ങാം. നമ്മുടെ ഭക്ഷണരീതി, അതായത് അമിതവും അനാരോഗ്യകരവുമായിരിക്കുന്നു. ഫ്രിഡ്ജിൽ വച്ച ഭക്ഷണം അനാരോഗ്യകരമാണ്. ഹോട്ടലുകളിലെ ഭക്ഷണം പൂർണമായിട്ടല്ലെങ്കിലും കുറെയൊക്കെ ഒഴിവാക്കാറുണ്ടാകും. പക്ഷേ, പലപ്പോഴും ഹോട്ടൽ ഫുഡിന്റെ രുചിയെ വെല്ലാനായി അമിതമായ കൊഴുപ്പും ടേസ്റ്റ്‌മേക്കേഴ്‌സും ഉപയോഗിക്കുന്നില്ലേ? ഒഴിവുകഴിവ് സമർത്ഥമായി കണ്ടെത്താൻ കഴിവുള്ളവർ ആയതുകൊണ്ടു സ്ഥിരം പല്ലവി കേൾക്കാം, ‘കുട്ടികൾ അതേ കഴിക്കൂ…’ ഇത്തരം ശീലങ്ങൾ കുട്ടികളിൽ വരുത്തിതീർത്തത് അമ്മയല്ലാതെ മറ്റാരാണ്.

subscribe